Ol i No Marit, Tasol Ol i Stap Amamas
“Sapos em i laik maritim wanpela man, orait em i ken maritim em. Tasol em i mas maritim Kristen man. Tasol . . . Sapos em i stap nating, bai em i gat amamas moa.”−1 KORIN 7:39, 40.
1.Maski yumi marit o yumi no marit, tasol i stret yumi mas mekim wanem?
OLGETA manmeri i dediket long Jehova i stret ol i mas givim bel olgeta long lotuim em. Maski yumi marit o yumi no marit, tasol yumi mas givim bel olgeta na laip olgeta na tingting olgeta na strong olgeta long God. (Mak 12:30) Tru, Kristen i no marit, i no gat planti samting bilong pulim nabaut tingting bilong em olsem Kristen i marit. Tasol yu ting wokman bilong Jehova i no marit, em inap i stap amamas tru?
2 Aposel Pol i tok, ‘Em inap’ Em i stori long sampela bipo ol i marit, tasol bihain ol i stap nating gen, na em i tok: “Sapos man bilong wanpela meri em i stap laip yet, dispela meri i pas wantaim em. Tasol, sapos man bilong en i dai, meri i no pas moa. Sapos em i laik maritim wanpela man, orait em i ken maritim em. Tasol em i mas maritim Kristen man.Tasol mi yet mi ting olsem: Sapos em i stap nating, bai em i gat amamas moa. Na mi ting mi gat Spirit bilong God i stap long mi tu.”−1 Korin 7:39, 40.
3 Pol i makim olsem ol manmeri i no marit ol inap i stap amamas, olsem na ating i stret husat ol i ken tingting long stap singel, inap sampela yia o inap oltaim? Wanem samting inap helpim ol Kristen i no marit na bai ol i ken i stap amamas? Ol manmeri i no marit, olsem wanem ol inap i stap amamas?
Amamas Yu Inap Kisim long Taim Yu Stap Singel
4 Saveman King Solomon i tok: “Taim yu yangpela yet, yu mas tingim Bikpela man i bin wokim yu; long taim hevi [bilong lapun] i no kirap yet, na ol yia i no kamap yet bai tok: ‘Mi no amamas long ol.’” (Eklisiastis 12:1, NW) Taim man o meri i stap yangpela yet, skin bilong em i strong na i stap gutpela. Olsem na i stret em i mekim wok long dispela strong bilong lotuim Jehova na em i givim bel olgeta long mekim! Taim man o meri i stap yangpela yet, em taim bilong lain na kisim save na gutpela tingting. Tasol em i taim tu bilong bel i kirap nating na man i laikim meri na meri i laikim man. Ol i bin skelim 1,079 yangpela manmeri i gat 18-24 krismas, na ol dispela yangpela i tok, inap 7-pela taim samting ol i bin ‘laikim’ wanpela man o meri, na olgeta i tok, man o meri nau ol i laikim, ol i laikim em tru na i no olsem bel i kirap nating!
5 Tasol hevi i painim planti man na meri ol i marit taim ol i yangpela yet. Narapela i lusim narapela, o ol i katim marit, o famili i bruk. Olsem na yumi save i no gutpela sapos man o meri i marit taim em i yangpela yet. Gutpela sapos ol yangpela Kristen i no guria long marit na kirap kwik long wokabaut wantaim wanpela poroman na marit. Sapos ol i bihainim gutpela tingting bai ol i tingting long i stap singel inap sampela yia na mekim wok bilong Jehova, na bai i no gat planti samting bilong pulim nabaut tingting bilong ol. Sapos yu wanpela yangpela man o meri, orait givim askim long skin bilong yu yet, olsem: Bel na tingting bilong mi i olsem bilong man i bikpela pinis na i stret mi ken tingting long marit? Mi gat save pinis inap long mi mekim gut ol wok bilong mi insait long marit na pas gut wantaim poroman bilong mi? Sapos mi marit, mi inap karim ol hevi inap kamap insait long marit, na insait long famili sapos mi gat pikinini? Mi dediket long Jehova, olsem na ating i stret mi mas givim strong na yangpela bilong mi bilong mekim wok bilong Em, na mi mas i stap singel bambai i no gat planti samting bilong pulim nabaut tingting bilong mi?
Ol Gutpela Samting i Painim Ol Singel i Stap Klinpela
6 1 no gat planti samting bilong pulim nabaut tingting bilong ol Kristen i no marit, na ol inap “wok strong long wok bilong Bikpela.” (1 Korin 7:32-34; 15:58) Kristen i stap singel em i no tingim wanpela man o wanpela meri tasol; nogat; em inap tingim planti long kongrigesen, ol lapun tu, na mekim gutpela pasin sori na helpim ol. (Sam 41:1) Na ol singel i gat bikpela hap taim moa bilong stadi na tingim gut ol tok bilong God long Baibel. (Provep 15:28) Na ol inap wok long i stap klostu moa long Jehova; ol i lain long givim bel long em na wetim em i helpim ol na soim rot long ol. (Sam 37:5; Filipai 4:6, 7; Jems 4:8) Wanpela brata i no marit na inap planti yia em i bin mekim wok misineri long Afrika, em i tok:
7 “Long ol liklik ples long Afrika i no gat planti samting; i no gat planti masin samting bilong nau. Olsem na long ol dispela yia, i no gat planti samting bilong pulim nabaut tingting bilong mi na mi inap stadi na tingim gut ol tok bilong God. Dispela i helpim mi long i stap strong. Wok misineri i olsem wanpela gutpela blesing−dispela wok i lukautim mi na pasin bilong laikim tumas mani kago i no bin pundaunim mi. Afrika em i ples hat na long gutpela taim bilong apinun mi gat bikpela hap taim bilong lukim ol samting Jehova i bin wokim, na tingim Em, na i go klostu long Em. Nambawan bikpela amamas bilong mi em olsem: Long olgeta apinun, taim ol sta i lait na tingting bilong mi i klia yet, mi wanpela mi save wokabaut ausait na toktok wantaim Jehova. Dispela i pulim mi i go klostu tru long Jehova.”
8 Na tingim tok bilong wanpela sista singel em i bin wok long namba wan ofis bilong Sosaiti Was Taua inap planti yia, em i tok: “Long laik bilong mi yet mi stap singel na mi mekim wok bilong Jehova. Olsem wanem? Sampela taim mi bel hevi na pilim olsem mi stap wanpis? Nogat tru. Taim mi stap mi wanpela tasol, mi amamas, long wanem long dispela taim mi inap toktok wantaim Jehova long rot bilong beten. Mi inap stadi na tingim gut ol tok na i no gat samting bilong pulim nabaut tingting bilong mi. . . . Pasin bilong i stap singel em i bin helpim mi long i stap amamas.”
9 Man o meri i stap singel em inap kisim sampela wok ol marit i no inap kisim, long wanem ol marit i gat pikinini samting. Olsem: Ating ol singel inap i go mekim wok painia long wanpela hap i no gat planti man bilong autim tok bilong Kingdom long en. O yangpela man i stap singel, em inap kisim wok long Betel long namba wan ofis bilong Sosaiti Was Taua o long wanpela nambatu ofis, olsem brens-ofis. Yangpela meri i no marit, ating em inap wok wantaim wanpela sista singel i gat bikpela krismas liklik, winim em, na tupela i ken wok wantaim long kongrigesen bilong tupela yet o long narapela kongrigesen i gat planti teritori ol i no autim tok planti taim long en. Gutpela sapos yu toktok wantaim wasman sekit bambai yu ken save long ol rot i op long yu. Sapos yu wanpela Kristen i no marit, redi long mekim bikpela wok moa long wok bilong litimapim nem bilong Jehova, na bai em i givim planti blesing long yu.−Malakai 3:10.
Sampela long Bipo Ol i Stap Olsem Gutpela Piksa
10 Nambawan gutpela wokman bilong Jehova em i no marit, em Krais Jisas. Em i givim bel olgeta long bihainim laik bilong God. Em i tok “Kaikai bilong mi em i olsem: Mi bihainim laik bilong dispela em i bin salim mi na mi kam. Na mi mas pinisim wok bilong em.” (Jon 4:34) Em i mekim planti wok−em i autim tok, na oraitim ol sikman, na mekim planti narapela wok tu! (Matyu 14:14) Jisas i save laikim tru ol manmeri na em i amamas long i stap wantaim ol man o ol meri o ol pikinini. Taim em i raun autim tok, sampela manmeri ol i bihainim em i go. (Luk 8:1-3) Tasol sapos em i gat meri na ol liklik pikinini, bai i hatwok tru long em i mekim dispela wok, a? Tru tumas, i gutpela Jisas i stap singel. Na nau tu, sapos Kristen i stap singel, dispela inap helpim em; dispela inap helpim em tru sapos em i mas i go autim tok bilong kingdom long longwe ples o long ples nogut.
11 Sampela moa long bipo ol i stap singel na dispela i helpim ol na givim amamas long ol. Wanpela em pikinini meri bilong Jepta. Long laik bilong em yet em i truim tok tru antap papa bilong em i bin mekim na em i no marit. Tru, ol wanples bilong em i strong long marit na kamapim ol pikinini, tasol em i mekim wok bilong Jehova na kisim amamas long dispela. Na ol narapela i save go oltaim na strongim em. Baibel i tok, “Ol yangpela meri bilong Isrel i save lusim ples na i go litimapim nem bilong pikinini meri bilong Jepta, man bilong Giliat, inap 4-pela de long olgeta yia.” (Ol Hetman 11:34-40, NW) Olsem tasol ol Kristen i marit na ol narapela tu ol i mas strongim na litimapim nem bilong ol yangpela meri long nau, em ol i wok strong long mekim wok bilong Jehova.
12 Filip i gat 4-pela pikinini meri ol i no marit na ol i save “telimautim tok bilong God.” (Aposel 21:8, 9) Ol dispela meri i no marit ol i kisim bikpela amamas long wok ol i mekim bilong litimapim nem bilong Jehova. Olsem tasol long nau, planti yangpela meri singel i mekim wok painia, olsem ol i autim tok bilong Kingdom long olgeta de, na ol i kisim amamas long dispela. Yumi mas litimapim nem bilong ol dispela meri ol i insait long lain bilong ol “planti meri i go autim dispela tok.”−Sam 68:11.
13 Aposel Pol i stap singel na em i save, dispela i helpim em. Em i raun inap planti tausen kilomita bilong mekim wok bilong autim tok na ol bikpela hevi i painim em, na planti samting i laik bagarapim em, na planti taim em i no slip long nait, na em i stap hangre. (2 Korin 11:23-27) Sapos Pol i marit, bai em i no inap karim olgeta dispela hevi; bai i hatwok tumas long em i mekim dispela wok. Na sapos em i marit na em i gat wok long mekim bikpela long ol pikinini, ating God i no ken salim em bilong “mekim wok long [ol] arapela lain.” (Rom 11:13) Maski ol hevi i painim Pol, tasol Pol i save, man i stap singel em inap i stap amamas.
Sampela long Nau Ol i Stap Olsem Gutpela Piksa
14 Pol na sampela Kristen moa long bipo ol i no marit, na olsem tasol long nau, sampela long lain bilong God, em ol i bin mekim wok painia (kirap long yia 1881 na bihain long dispela taim), ol tu i no marit na ol i no gat famili ol i mas lukautim. Ol i amamas long i go long ol biktaun na ol stesin na ol liklik ples ol i no save long en, na wok long painim ol manmeri i gat gutpela bel na tilim ol buk na nius bilong Baibel long ol. Ol i raun long tren, na long wilwil, na long karis em hos i pulim, na long ka. Planti ol i wokabaut long lek i go long haus bilong ol man na ol i amamas long mekim olsem. (Aposel 20:20, 21) Wanpela witnes bilong Jehova i stori olsem: ‘Sampela taim ol i senisim ol buk bilong Baibel na kisim sampela samting bilong gaden, o kakaruk, o sop samting, na bai ol yet i mekim wok long dispela samting o baim i go long narapela man na kisim mani. Sampela taim ol i autim tok long hap i no gat planti man i stap long en, na ol i save slip long haus bilong ol fama, na sampela taim ol i slip long gras i drai em ol man i hipim i stap . . . Ol dispela gutpela wokman [em planti ol i no marit] ol i stap gut long wok inap planti planti yia, inap long ol i go lapun na ol i no inap mekim moa.’ Wanpela lapun sista em i wanpela bilong ol dispela painia bilong pastaim em i stori long wok ol i mekim na em i mekim tok ating olgeta bai wanbel long en, em i tok: “Long dispela taim mipela i yangpela na mipela i amamas long mekim wok, mipela i amamas long lusim strong bilong mipela long mekim wok bilong Ja.”
15 Planti brata sista, bihain ol i kamap painia, ol tu i no marit. Planti taim ol i autim tok long ol longwe ples i no gat kongrigesen, na ol i kirapim ol nupela kongrigesen, na ol i kisim ol narapela blesing long rot bilong mekim wok bilong Jehova. Sampela ol i amamas tru long wanem rot i op bambai ol i ken mekim bikpela wok moa−ol i go long Skul Giliat, em i kirap long yia 1943 long taim bilong Namba Tu Pait Bilong Olgeta Hap. (1 Korin 16:9) Yes, planti bilong ol dispela painia i no marit ol i go long skul Giliat na ol i lain long kamap misineri, na ol i go long ol nupela ples na autim tok bilong Kingdom. Ol i no marit, olsem na i no gat ol wok bilong marit ol i mas mekim, na ol i redi long i go mekim wok bilong Jehova. Sampela bilong ol dispela misineri bilong pastaim ol i stap singel yet na ol i mekim yet wok misineri o narapela wok painia.
16 Planti Kristen i no marit ol i bin mekim wok inap planti yia long namba wan ofis bilong Sosaiti Was Taua o long brens-ofis. Olsem wanem? Ol i stap amamas? Tru tumas. Wanpela brata em i singel na em i bin wok long Betel long Bruklin inap planti yia, em i tok: “Mi kisim bikpela amamas taim mi lukim planti milion nius na buk mipela wokim bilong kisim tok bilong God i go long olgeta hap bilong graun.” Na narapela brata i no marit na inap 45 yia em i bin wok long Betel, em i tok: “Long olgeta de mi save beten long gutpela Papa bilong yumi em i stap long heven; mi askim em long helpim mi, na givim gutpela tingting long mi, bambai mi inap i stap strong long spirit na long skin, na mi ken mekim yet laik bilong em. . . . Mi bin kisim planti blesing na mi stap amamas tru.”
Taim Yu Stap Singel, Wok long i Stap Klinpela
17 Yumi stori pinis long sampela manmeri long taim bilong Baibel na long nau, na samting i kamap ples klia em olsem: Man o meri i no marit em inap long i stap amamas. Tasol bikpela samting em olsem: Taim yu stap singel, yu mas i stap “strong long bel.” (1 Korin 7:37) Wanem samting inap helpim yu na taim yu stap singel, yu stap klinpela? Nambawan bikpela samting bilong helpim yu, em Jehova yet, em i Man bilong “harim beten.” (Sam 65:2) Olsem na long olgeta taim yu mas beten long em. Yu mas “beten long olgeta taim” na askim God long givim spirit bilong em long yu, na helpim yu long bihainim ol gutpela pasin em spirit holi i save kamapim, olsem pasin bilong i stap bel isi na bosim gut skin. (Rom 12:12; Luk 11:13; Galesia 5:22, 23) Na tu, long olgeta taim yu mas beten na tingim gut ol tok bilong God long Baibel na bihainim ol dispela tok.
18 Narapela samting bilong helpim yu long i stap klinpela long taim yu stap singel, em olsem: Yu mas klia long olgeta samting em inap kirapim bel bilong yu. Yu no ken lukim ol buk o piksa wokabaut i gat sem, na yu mas sakim ol amamas nogut. Pol i tok: “Long pasin nogut yupela i mas i stap olsem liklik pikinini. Tasol long tingting bilong yupela, yupela i mas kamap olsem bikpela man” (1 Korin 14:20) Yu no ken wok long kisim save long pasin nogut; God i mas helpim yu na yu mas bihainim gutpela tingting na i stap olsem liklik pikinini long ol dispela samting nogut. Yu no ken lusim tingting olsem pasin pamuk na ol narapela pasin nogut, ol dispela pasin i no stret long ai bilong Jehova.
19 Na yu mas was gut long ol manmeri yu poroman wantaim ol, na bai yu inap i stap klinpela long taim yu stap singel. (1 Korin 15:33) Yu no ken poroman wantaim ol manmeri em oltaim ol i save toktok long marit na long maritpasin. Sakim olgeta tok pilai nogut! Pol i givim gutpela tok long yumi, em i tok: “Pasin pamuk na olgeta pasin doti na mangal nogut, tok bilong ol dispela pasin em i no ken kamap liklik namel long yupela. I no inap yumi manmeri bilong God yumi toktok long dispela kain pasin. Yupela i no ken mekim tok doti na tok kranki na tok pilai nogut. Dispela pasin em i no inap. Nogat. Mobeta yupela tok tenkyu long God.”−Efesas 5:3, 4.
Amamas Bilong Bihain
20 Taim yu stap singel yet, sapos yu mekim wok bilong Jehova, dispela bai helpim yu long i stap amamas long nau na i stap bel isi. Na dispela bai helpim yu long kamap strong long spirit. Sapos yu tingim Kingdom na yu stap singel i go inap long taim dispela pasin nogut bilong nau i pinis, Jehova i no ken lusim tingting long gutpela wok yu mekim, olsem yu daunim laik bilong yu yet na yu mekim wok bilong em.
21 Taim yu no marit, sapos yu wok strong long mekim ol wok bilong Kingdom, bai yu kisim planti blesing. (Provep 10:22) Na sapos bihain yu marit, bai yu gat gutpela save pinis na yu stap strong long spirit na dispela bai helpim yu long marit bilong yu. Na sapos yu bihainim ol tok bilong Baibel, bai yu maritim wanpela poroman em i dediket pinis, na em i save holimpas lo bilong God, na em inap helpim yu long i stap gut long wok bilong God. Tasol sapos nau yu stap singel na yu mekim wok bilong gutpela God bilong yumi, Jehova, orait, bai yu stap amamas.
Bai Yu Bekim Wanem Tok?
◻ Ol wokman bilong Jehova i stap singel na ol i stap klinpela, ol i kisim wanem ol amamas?
◻ Baibel i stori long husat long bipo na yumi inap save, man o meri i stap singel em inap i stap amamas?
◻ Long nau, husat ol i stap singel na ol i stap amamas?
◻ Wanem samting inap helpim Kristen na taim em i stap singel bai em i stap klinpela?
2, 3. (a) Pol i tok wanem long 1 Korin 7:39, 40? (b) Olsem na yumi mas tingim wanem ol askim?
4. Olsem wanem long taim man o meri i stap yangpela yet?
5. I gat wanem ol askim long marit na i gutpela sapos ol yangpela i tingim?
6, 7. (a) Wanem sampela gutpela samting i painim ol Kristen i no marit? (b) Wanpela misineri long Afrika em i no marit, em i tok wanem long dispela samting?
8. Wanpela sista singel i wok longtaim long namba wan ofis bilong Sosaiti, em i tok wanem long i stap singel?
9. Wanem sampela wok em Kristen i stap singel em inap mekim?
10. Husat i nambawan gutpela wokman bilong Jehova em i no marit? Bilong wanem i gutpela em i no marit?
11, 12. Husat ol i olsem gutpela piksa na ol yangpela meri i mekim wok bilong Jehova long nau ol i ken bihainim pasin bilong ol?
13. Olsem wanem long Pol na yumi save, man i no marit em inap i stap amamas?
14. Wanem ol gutpela samting i bin painim ol painia bilong pastaim, em planti ol i no marit?
15. Inap olsem 45 yia bipo, wanem rot i op long planti painia i no marit na ol inap mekim bikpela wok moa?
16. Olsem wanem yumi save ol brata sista i mekim wok long Betel na ol i no marit, ol i stap amamas?
17. I gat wanem tupela samting bilong helpim man o meri i stap singel na bai em i stap klinpela?
18. Olsem wanem tok bilong 1 Korin 14:20 inap helpim ol singel long i stap klinpela?
19. Wanem ol tok bilong Baibel i kolim sampela rot moa bilong helpim ol singel long i stap klinpela?
20. Taim yu stap singel yet, sapos yu mekim gutpela wok bilong Jehova, dispela bai helpim yu olsem wanem?
21. Sapos bihain yu marit, ating bai yu gat wanem samting na dispela inap helpim yu long marit bilong yu?
[Blok long pes 23]
Rot Bilong i Stap Klinpela long Taim Yu Stap Singel
◆ Beten oltaim askim God long givim spirit bilong em long yu, na helpim yu long bihainim ol gutpela pasin bilong spirit holi
◆ Tingim gut na oltaim bihainim tok bilong God long Baibel
◆ Sakim ol buk na piksa wokabaut i gat sem na ol amamas nogut
◆ Was gut long ol manmeri yu poroman wantaim ol
◆ Sakim ol tok doti na tok pilai nogut
[Piksa long pes 22]
Pikinini meri bilong Jepta, na aposel Pol, na sampela wokman moa bilong Jehova, ol i no marit, tasol ol i stap amamas. Yu inap mekim olsem?