“Man Em Inap Long Kisim Dispela Tok, Em i Ken Kisim”
1 Long wanpela taim, Jisas i toktok wantaim ol disaipel bilong em long ol samting bilong marit, na em i tok pasin bilong i stap singel i olsem wanpela presen. Bihain em i tok: “Man em inap long kisim dispela tok, em i ken kisim.” (Mt. 19:10-12) Sampela yia bihain, aposel Pol i raitim pas i stori long ol gutpela samting i save kamap long pasin bilong i stap singel, na em i kirapim ol narapela long bihainim pasin bilong em long i stap singel. (1 Ko. 7:7, 38) Planti long nau ‘ol inap’ long stap singel na ol i kisim ol gutpela samting dispela pasin i save kamapim. Wanem sampela bilong ol dispela gutpela samting?
2 Ol Samting i No “Pulim Nabaut Tingting”: Pol i save olsem pasin bilong i stap singel i helpim em long mekim wok bilong Jehova na ol samting i no “pulim nabaut tingting.” Long nau tu, wanpela brata singel em inap putim aplikesen bilong i go long Ministerial Trening Skul, na planti singel i no gat ol samting i pasim ol long mekim wok painia, lainim narapela tok ples, go mekim wok long hap i sot long ol man bilong autim tok, mekim wok long Betel, o insait long ol narapela gutpela wok bilong spirit. Ol i gat bikpela hap taim moa na planti rot moa bilong mekim gut stadi bilong ol yet na tingim tingim ol tok long bel na toktok wantaim Jehova long rot bilong beten. Man o meri singel inap lusim bikpela taim moa bilong helpim ol narapela. Olgeta dispela wok bai helpim ol yet long “i stap gut.”—1 Ko. 7:32-35; Ap. 20:35.
3 Planti gutpela samting i save kamap long dispela kain pasin bilong mekim wok bilong God na ol samting i no pulim nabaut tingting. Wanpela sista singel i bin i stap inap 27 yia long Kenya, em i tok: “Mi gat planti pren na bikpela wok bilong mekim! Mipela i mekim ol samting wantaim [na] i go i kam lukim narapela narapela. . . . Mi stap singel, olsem na mi fri moa long mekim bikpela wok bilong autim tok, na dispela i bin givim bikpela amamas long mi.” Em i tok moa: “Insait long ol dispela yia, pasin bilong mi long pas gut wantaim Jehova i kamap strong moa.”
4 Mekim Gutpela Wok Long En: Jisas i tok i gutpela sapos as tingting i kirapim man long i stap singel em “long mekim wok bilong kingdom bilong heven.” (Mt. 19:12) Olsem long ol narapela presen, man i mas mekim gutpela wok long pasin bilong i stap singel na bai dispela i ken kamapim amamas na i ken helpim em tru. Planti singel ol i mekim gutpela wok long pasin bilong i stap singel na ol i bilip long Jehova bai givim gutpela tingting na strongim ol, na long dispela rot ol i save olsem pasin bilong i stap singel inap helpim tru man.