Baibel i Tok Wanem?
Presen Bilong i Stap Singel
WANPELA meri Kristen, em man bilong em i dai sampela yia bipo, em i tok, ‘Mi stap wanpis, na mi laik tru bai mi gat poroman. Mi save mekim planti wok, na mi gat ol pren bilong mi, na dispela i helpim mi liklik. Tasol mi laik marit gen.’
Sapos yu laik tru long marit na yu no inap painim poroman, bai yu no pilim olsem pasin bilong i stap singel em i gutpela presen, a? Bai yu bel hevi na pilim olsem yu no gat rot, na bai yu les. O sapos yu gat ol pikinini na yu no gat poroman, ating yu wanpela tasol i mas lukautim ol pikinini long olgeta samting.
Olsem na ating yu no pilim olsem pasin bilong i stap singel i olsem presen. Tasol sampela ol i amamas long i stap singel, ol i ting em i olsem gutpela presen ol i kisim. Em i laik bilong ol yet na ol i stap singel. Orait yumi laik save, pasin bilong i stap singel em i gutpela presen o nogat? Sapos olsem, orait wanem taim na olsem wanem em i olsem gutpela presen? Baibel i tok wanem?
I Pasim Rot Bilong i Stap Amamas?
Marit inap givim bikpela amamas long man wantaim meri bilong em. (Sindaun 5:18, 19) Wanpela nius (Los Angeles Times) i tok, sampela “i bilip tru olsem marit tasol em i rot bilong kisim amamas na i stap belgut.” Tasol yu ting marit tasol em i rot bilong i stap amamas, no gat narapela rot?
Dispela nius i kamapim tok bilong wanpela savemeri (Ruth Luban) em i gat wok long helpim tingting bilong ol man long i stap gutpela, na em i tok olsem: “Ol meri [na ol man] sapos ol i no wet tasol long marit, bai ol i kirap nogut long ol planti gutpela samting ol inap mekim bilong i stap amamas.” Tru tumas, man o meri i stap singel, dispela i no pasim rot bilong em long i stap belgut na amamas. Planti man na meri i katim marit ol inap tokim yu, amamas i no save kamap nating insait long marit. Bilong i stap amamas tru, yumi mas pas gut wantaim God. Olsem na maski Kristen i singel o em i marit, em inap i stap amamas.—Song 84:12; 119:1, 2.
Tupela meri i raitim buk na ol i kolim sampela samting ol singel i mekim na i pasim rot bilong ol yet long i stap amamas, na tupela i kolim narapela samting i pasim rot bilong ol singel long i stap amamas—em tingting bilong ol narapela manmeri. Tupela i tok, “ol manmeri i ting sapos yu no marit, yu gat wanpela sik bilong tingting yu haitim insait tru long bel . . . Ol i ting yu kranki tru.”—Marie Edwards na Eleanor Hoover long buk The Challenge of Being Single.
Sampela pren bilong ol singel i laik helpim ol, tasol ol i no tingting gut na ol i putim bikpela hevi long ol, long wanem, oltaim ol i save tok, ‘Wanem taim bai yu marit?’ o ‘Yu man i gat gutpela skin, olsem wanem na yu no painim yet wanpela poroman?’ Ating ol i tok pilai, tasol kain tok olsem inap “bagarapim bel bilong narapela man olsem bainat i sutim em,” na bai em i pilim nogut na em i sem.—Sindaun 12:18.
Kain Kain Presen
Taim aposel Pol i raun na mekim wok misineri, em i no marit. Ating em i birua long marit, a? Nogat. Laik bilong em yet na em i no marit. Em i laik i stap singel bambai em i ken “mekim gutnius bilong Jisas i kamap strong.”—1 Korin 7:7; 9:23.
Pol i gat strong bilong i stap singel, tasol em i save i no olgeta manmeri inap i stap singel olsem em. Em i tok: “God i bin givim kain kain presen long olgeta man wan wan. Wanpela man i kisim wanpela kain presen, na narapela man i kisim narapela kain presen.”—1 Korin 7:7.
Maski yu no bin tingting long i stap singel, dispela inap kamap olsem wanpela rot bilong helpim yu long i stap amamas. Tru, marit em i wanpela bilong ol planti presen yumi kisim long Jehova. Tasol Baibel i makim olsem pasin bilong i stap singel, dispela tu inap kamap olsem “presen” yumi kisim—sapos yumi “inap long kisim.” (Matyu 19:11, 12; 1 Korin 7:36-39) Orait, wanem sampela gutpela samting bilong pasin bilong i stap singel?
Pol i tok, man na meri marit ol i ‘laik mekim pasin poroman i laikim,’ tasol ol man na meri i no marit ol i gat bikpela tingting “long pasin bilong Bikpela.” Dispela i kamapim klia wanpela gutpela samting tru bilong pasin bilong i stap singel—bai yu gat rot bilong mekim wok bilong Jehova na i no gat planti samting bilong “pulim nabaut tingting” bilong yu.—1 Korin 7:32-35.
Baibel i no tok ol singel i no gat wanpela wari. Nogat. Tasol man i stap wanpela tasol, em i no gat planti wari olsem man i marit na em i gat wok long lukautim famili. Taim singel i tingting long mekim wanpela samting, em i gat wok long tingim em yet tasol. Tingim Abraham long taim God i tokim em long lusim Haran na i go long Kenan. Baibel i tok: “Abram i kisim meri bilong en, Sarai, na Lot, pikinini bilong brata bilong en, na ol i go wantaim. Na ol i kisim ol wokman na wokmeri bilong ol tu, na olgeta samting ol i bin kisim long Haran, na ol i wokabaut i go long graun Kenan.” (Stat 12:5) Wok bilong Abraham insait long famili i no pasim em long bihainim tok bilong God, tasol ating em i mas lusim bikpela hap taim na stretim planti samting bambai em inap i go.
Nau tingim aposel Pol long taim em i mas i go long narapela hap. Taim Pol tupela Sailas i autim tok long taun Tesalonaika, bikpela lain i bung na i laik paitim tupela. Tudak i kamap pinis, orait ol brata i salim Pol na Sailas i go kwik long taun Beria. Narapela taim, Pol i stap long Troas na em i lukim samting olsem driman. Em i lukim wanpela man bilong provins Masedonia i sanap na i singautim Pol na i tok olsem, ‘Yu mas i kam helpim mipela.’ Kwiktaim Pol i painim rot na em i go long Masedonia. Em i no gat meri pikinini, olsem na em inap i go kwik; sapos em i gat meri pikinini em i no inap mekim olsem.—Aposel 16:8-10; 17:1-15.
Narapela gutpela samting bilong i stap singel em olsem: Yu stap fri bilong bihainim laik bilong yu. Yu ken i stap long hap yu yet yu laik i stap long en, na kaikai samting yu yet yu laikim long taim yu laikim, na yu ken i go slip long taim yu yet yu laikim. Na yu stap fri bilong mekim ol wok bilong spirit tu. Yu gat bikpela hap taim moa bilong stadi long Baibel, na bilong autim tok, na long mekim ol samting bilong helpim ol narapela man.
Olsem na maski em laik bilong yu o yu no inap painim poroman na yu stap singel, yu mas tingting strong long mekim gutpela wok long taim bilong yu. Taim yu stap singel, sapos yu wok long helpim ol narapela man, dispela em i bikpela samting bilong helpim yu long i stap amamas. (Aposel 20:35) Sapos yu gat laik long marit, no ken bel hevi na kalabusim yu yet; sapos yu no painim yet ‘poroman yu laikim tru,’ yu no ken pilim olsem yu no gat poroman, olsem na yu no inap mekim gut ol wok. Nogat. Wok strong long mekim ol wok bilong God, na olsem Pol i tok, bai yu pilim olsem pasin bilong i stap singel em i gutpela presen yu kisim.