Gutpela Lotu i Skulim Man Long Rispek Long Tok Bilong Baibel
JISAS i bin skulim ol man long rispektim Tok Bilong God, em Baibel. Dispela i kamap ples klia long tok em i bekim long Satan taim Satan i traim em. (Matyu 4:4-11) Olsem: Taim Satan i tokim Jisas long tanim ol ston i kamap bret, Jisas i mekim wanem? Em i sakim dispela traim, na bilong mekim olsem em i kamapim tok bilong Moses, em yu inap ritim long Lo 8:3. Na taim Satan i tok long givim olgeta kingdom bilong dispela graun long Jisas sapos em i brukim skru na lotuim em wanpela taim tasol, Jisas i bekim wanem tok long em? Jisas i sakim dispela samting na em i kamapim wanpela stiatok bilong Baibel em yu inap ritim long Lo 6:13.
Tingim: Maski Jisas em i Pikinini Bilong God, em i kamapim ol tok bilong Baibel taim em i skulim ol man. Na em i no bin givim baksait liklik long Tok Bilong God na kamapim tok bilong ol man, nogat. (Jon 7:16-18) Tasol planti hetman bilong lotu long taim bilong Jisas, ol i no rispek long Tok Bilong God olsem Jisas i bin mekim. Bilong wanem? Ol i putim tok bilong ol man i go pas long tok bilong Buk Holi Bilong God. Jisas i tokaut stret long ol dispela man bilong lotu: “Yupela i save daunim tok bilong God na litimapim pasin yupela i bin kisim long ol tumbuna. ‘Yupela i man bilong giaman. Profet Aisaia i bin makim tru pasin bilong yupela taim em i tok olsem, “Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol na tok, ‘Dispela em i tok bilong God.’ Olsem na ol i lotu nating long mi.” ’ ”—Matyu 15:6-9.
Planti lotu bilong graun, ol lotu Kristen na ol lotu i no Kristen, ol i tok ol i rispek long Baibel. Tasol taim ol lo bilong man i pait wantaim tok bilong Baibel, yu ting hamas lotu bai bihainim tok bilong Baibel? Tingim tupela samting olsem.
TOK BILONG SKELIM: Ol biknem insait long lotu.
TOK BILONG BAIBEL : Jisas i krosim ol hetman bilong lotu long taim bilong em, long wanem, ol i laikim tumas ol biknem na ol i laik i stap olsem ol bikman. Em i tok ol i laikim tumas long “kisim ol namba wan sia long ol bikpela kaikai, na ol namba wan ples bilong sindaun long ol haus lotu. Ol i laikim tumas long ol manmeri i mas givim gude long ol long ol ples bung, na ol i laik bai ol man i mas kolim ol ‘Tisa.’ ” Orait nau Jisas i tokim ol disaipel: “Ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven.”—Matyu 23:1-10.
ASKIM: Ol hetman bilong dispela lotu i laik bai ol man i kolim ol biknem long ol na ol i laik i stap olsem bikman, o ol i bihainim tok bilong Jisas long abrusim dispela pasin?
TOK BILONG SKELIM: Mekim wok long ol imis long lotu.
TOK BILONG BAIBEL : “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em.”—Kisim Bek 20:4, 5.
Aposel Jon i tokim ol Kristen: “Yupela i mas i stap longwe long olgeta giaman god.”—1 Jon 5:21.
ASKIM: Dispela lotu i bihainim tok bilong Baibel long yumi no ken yusim ol imis na piksa samting bilong lotuim God?
Yu Inap Painim Rot i Stret
Maski i gat kain kain rot bilong lotu i stap long nau, yu inap painim rot i bringim man i go bilong kisim laip. I gat planti samting bilong helpim yu long luksave long lotu “i stap stret olgeta na i no gat asua long ai bilong God.” (Jems 1:27) Ol ves bilong Baibel yumi bin skelim long ol dispela stori, ol i olsem ol sain pos bilong soim rot i go long dispela lotu.
Yu ken askim ol Witnes Bilong Jehova long kamapim klia ol bekim bilong ol askim i stap long ol dispela stori. Taim yu skelim tok bilong ol, bihainim gutpela pasin bilong ol man i stap long taun Beria long taim bilong ol aposel. Taim ol i harim ol tok em aposel Pol i autim, “ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) Sapos yu olsem ol Beria na yu rispek long tok bilong Baibel, na yu stadi gut long en, bai yu painim rot i go long laip. Orait bai yu wokabaut long dispela rot o nogat, em samting bilong yu yet long makim.
[Rait long pes 9]
Wanem lotu i save kirapim ol man long stadi long Baibel bambai ol i ken save, ol tok ol i lainim em i tru o nogat?