Gutpela Lotu i Skulim Man Long Laikim Tru Ol Arapela
“GOD yet em i as bilong dispela pasin bilong laikim ol arapela. Olsem na man i no save laikim ol arapela, em i no save long God.” (1 Jon 4:8) Olsem na gutpela lotu i mas skulim man long laikim tru ol arapela.
Planti lotu i mekim ol gutpela wok bilong lukautim ol sikman na ol lapun na ol rabisman. Ol i kirapim lain bilong ol long bihainim tok bilong aposel Jon: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man. Ol liklik pikinini bilong mi, yumi no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.”—1 Jon 3:17, 18.
Tasol wanem samting i save kamap taim pait i kamap namel long ol kantri? God i tok yumi mas “laikim ol wantok olsem [yumi] laikim [yumi] yet,” na yu ting yumi mas bihainim dispela tok long gutpela taim tasol na no ken bihainim long taim gavman o king i laik pait long narapela kantri?—Matyu 22:39.
Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Taim yu bekim ol askim daunbilo, askim yu yet, ‘Lain bilong dispela lotu i save laikim tru olgeta man, na ol i soim dispela long toktok na long pasin bilong ol?’
TOK BILONG SKELIM: Pait.
TOK BILONG BAIBEL: Jisas i tokim ol disaipel: “Yupela i mas laikim ol birua bilong yupela, na . . . marimari long ol man i save mekim pasin nogut long yupela.”—Matyu 5:44.
Taim ol soldia i kam bilong arestim Jisas, aposel Pita i kamautim bainat bilong sambai long Jisas. Tasol Jisas i tok: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.”—Matyu 26:52.
Aposel Jon i tok: “Sapos yumi laik save husat em i pikinini bilong God, na husat em i pikinini bilong Satan, orait yumi ken save olsem, man i no mekim stretpela pasin, em i no bilong God. Na man i no save laikim tru ol arapela pikinini bilong God, em tu i no bilong God. Bipo tru yupela i bin harim tok olsem, yumi wan wan i mas laikim tru ol arapela. Yumi no ken i stap olsem Kein. Em i man bilong Satan, na em i kilim i dai brata bilong en.”—1 Jon 3:10-12.
ASKIM: Dispela lotu i save tokim lain bilong en long insait long pait?
TOK BILONG SKELIM: Wok politik.
TOK BILONG BAIBEL : Taim sampela man i lukim Jisas i wokim ol mirakel, ol i laik bai em i insait long wok politik. Jisas i mekim wanem? “Jisas i harim dispela tok na em i save, ol i laik i kam holimpas em na mekim em i kamap king bilong ol. Olsem na em i lusim dispela ples na em wanpela tasol i go bek gen long maunten.”—Jon 6:15.
Taim ol i arestim Jisas na sutim tok giaman olsem em i laik kirapim ol man long birua long gavman, em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.”—Jon 18:36.
Taim Jisas i beten askim God long helpim ol disaipel, em i tok: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol manmeri bilong mi ol i no bilong dispela graun, olsem mi tu mi no bilong dispela graun.”—Jon 17:14.
ASKIM: Dispela lotu i bihainim pasin bilong Jisas na i no insait long wok politik, maski sampela lain politik bai birua long lain bilong en?
TOK BILONG SKELIM: Bel nogut long sampela lain.
TOK BILONG BAIBEL : Taim sampela bilong ol narapela lain i kamap Kristen, aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Jems i tokim ol Kristen bilong pastaim: “Ol brata bilong mi, yupela i bilip long Bikpela bilong yumi Jisas Krais, . . . na nogut yupela i wok long mekim gut long ol man i gat nem, na yupela i givim baksait long ol man nating. Sapos wanpela man em i bilas gut tru na em i gat ring gol long pinga bilong en, em i go insait long haus lotu bilong yupela. Na sapos wanpela rabisman, bilas bilong en i bruk bruk nabaut na i nogut tasol, em tu i go insait long haus lotu. Orait ating yupela bai i mekim gut long man i bilas gut tru na yupela bai i tokim em, ‘Plis, yu kam sindaun long dispela sia.’ Na ating yupela bai i tokim rabisman olsem, ‘Yu sanap long hap,’ o, ‘Yu sindaun long plua klostu long lek bilong mi.’ Sapos yupela i mekim kain pasin olsem, i olsem yupela i skelim pasin bilong ol arapela long tingting bilong yupela. Na yupela i no tingting stret na skelim olgeta man long wankain pasin. Nogat. Yupela i kamap olsem jas i skelim ol man long tingting nogut tasol.”—Jems 2:1-4.
ASKIM: Dispela lotu i skulim lain bilong en olsem olgeta man i wankain long ai bilong God, na ol lain bilong dispela lotu i no ken tingim kantri o mani bilong em na skelim em long dispela?
[Rait long pes 7]
Wanem lotu i skulim lain bilong en long daunim pasin bilong brukim lain, olsem no ken bel nogut long wanpela lain politik, o lain bilong narapela skin, o lain i stap rabis?