Go Klostu Long God
Pasin Daun Em Bikpela Samting Long Jehova
PASIN antap, jeles, na tingting long kisim biknem o namba, em ol pasin planti man husat i kisim gutpela wok mani, ol i save mekim. Tasol yu ting ol dispela pasin i bringim yumi i go klostu long God Jehova? Nogat. Jehova i laik bai ol man i lotu long em, ol i gat pasin daun. Stori bilong Buk Namba sapta 12 i kamapim klia dispela samting. Long dispela taim ol Israel i stap long ples nating bilong Sainai bihain long God i bin kisim bek ol long Isip.
Brata na susa bilong Moses, em Aron na Miriam, “i tok nogut” long liklik brata bilong tupela. (Namba sapta 12Ves 1) Tasol tupela i no go stret long Moses na tokim em long samting ol i gat tok long en, nogat, i luk olsem ol i bin go long ol narapela long kem na komplein long em. Namba sapta 12Ves 1 i kolim nem bilong Miriam, ating em i bin go pas long komplein. Namba wan as long ol i komplein, em long wanem, Moses i bin maritim wanpela meri Sudan. Ating Miriam i jeles, nogut lain Israel i givim biknem moa long dispela meri husat i no wanpela Israel.
Tasol i gat narapela as tu. Miriam na Aron i tok: “Ating Bikpela i bin givim tok long ol manmeri long maus bilong Moses wanpela tasol, a? Nogat ya. Em i givim tok long ol long maus bilong mitupela tu.” (Namba sapta 12Ves 2) Ating as tru na tupela i komplein, em ol i laik kisim bikpela namba na biknem.
Long dispela stori, Moses i no bekim maus long tupela. Em i stap isi na karim dispela hevi. Pasin bilong em long stap isi i strongim dispela tok bilong Baibel: “I no gat wanpela man long dispela graun i save daunim em yet inap olsem Moses.”a (Namba sapta 12Ves 3) Moses i no bekim maus bilong strongim sait bilong em yet, nogat. Jehova i harim toktok bilong tupela, na em yet i bekim tok bilong helpim Moses.
Long tingting bilong Jehova, i olsem tupela i tok nogut long Jehova yet, long wanem, em yet i bin makim Moses. God i krosim Aron na Miriam na i kirapim tupela long tingim pasin bilong em long pas gut tru wantaim Moses, em i tok: “Mi save toktok wantaim em olsem man i toktok wantaim pren bilong en.” Nau Jehova i askim Miriam na Aron: “Watpo yutupela i no pret long tok nogut long Moses?” (Namba sapta 12Ves 8) Taim tupela i komplein long Moses, i olsem tupela i komplein long God yet. Tupela i no soim rispek, olsem na tupela bai pilim belhat bilong Jehova.
Miriam, em meri i go pas long komplein, i kisim sik lepra. Wantu Aron i askim Moses long helpim Miriam. Tingim! Bilong Miriam i ken kamap orait gen, em i mas kisim helpim long Moses, em man tupela i bin rongim. Long pasin daun, Moses i harim tok na helpim Miriam. Em i askim Jehova long helpim susa bilong em. Miriam i kamap orait gen, tasol em i kisim sem, long wanem, em i mas stap 7-pela de ausait long kem.
Dispela stori i lainim yumi long ol pasin Jehova i save laikim na ol pasin em i no save laikim. Sapos yumi laik i go klostu long God na yumi luksave olsem yumi gat pasin antap, jeles, na pasin bilong tingting long kisim biknem o namba, orait yumi mas wok strong long rausim ol dispela pasin. Jehova i save laikim ol man i gat pasin daun. Em i tok promis olsem: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:11; Jems 4:6.
[Futnot]
a Pasin daun em wanpela pasin i givim strong long man. Taim narapela i mekim nogut long em dispela pasin i save inapim em long stap isi na i no bekim rong.