“Stap Insait Yet Long Pasin Laikim Bilong God”
“Stap insait yet long pasin laikim bilong God. Yupela i mas bilip na wet long marimari bilong Bikpela Jisas Krais long opim rot long yupela long kisim laip oltaim.”—JUT 21, NW.
LONG planti rot God Jehova i bin soim pasin bilong em long laikim tru yumi. Tasol nambawan samting i soim olsem Jehova i laikim tru yumi, em ofa bilong baim bek ol man. Em i laikim tumas yumi ol man, olsem na em i salim Pikinini bilong em—dispela wanpela Pikinini em i laikim tumas—i kam long graun bilong i dai bilong helpim yumi. (Jo. 3:16) Jehova i mekim dispela samting, long wanem, em i laik bai yumi kisim laip oltaim, na em i laik tu bai pasin laikim bilong em i ken helpim yumi inap oltaim oltaim!
2 Tasol olsem wanem? Yu ting Jehova bai larim yumi i stap insait yet long pasin laikim bilong em maski yumi mekim wanem wanem samting? Nogat. Long Jut ves 21 bilong Baibel New World Translation, yumi ritim dispela tok: “Taim yupela i mekim olsem, yupela bai stap insait yet long pasin laikim bilong God. Yupela i mas bilip na wet long marimari bilong Bikpela Jisas Krais long opim rot long yupela long kisim laip oltaim.” Dispela hap tok “stap insait yet long pasin laikim bilong God” i makim olsem yumi yet i mas mekim sampela samting. Orait yumi mas mekim wanem bambai yumi ken i stap insait yet long pasin laikim bilong God?
Olsem Wanem Yumi Inap i Stap Insait Yet Long Pasin Laikim Bilong God?
3 Yumi lukim bekim bilong dispela askim long tok Jisas yet i bin mekim long laspela nait bilong em long i stap long graun. Em i tok: “Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.” (Jo. 15:10) Olsem dispela ves i soim, Jisas i save olsem em i mas bihainim ol lo bilong Jehova bambai em i ken i stap gut long ai bilong Papa bilong em. Sapos Pikinini Bilong God—em man i gutpela olgeta—i mas bihainim ol lo bilong Jehova, orait yumi tu i mas mekim olsem, laka?
4 Namba wan rot bilong soim olsem yumi laikim tru Jehova em long rot bilong bihainim tok bilong em. Aposel Jon i stori gut long dispela samting, olsem: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jo. 5:3) Tru, long nau planti man i no laikim dispela tok olsem, yumi mas bihainim tok bilong God. Tasol lukim dispela hap tok: “Ol lo bilong en i no givim hevi long yumi.” Jehova i no askim yumi long mekim samting i hatwok tumas long yumi mekim, nogat.
5 Yumi ken mekim tok piksa long dispela samting: Yu ting yu bai askim wanpela gutpela pren long karim wanpela samting em yu save pinis olsem em i hevi tumas long karim? Nogat, a? Jehova i gat gutpela pasin moa, winim yumi, na em i save gut moa long ol samting yumi no inap mekim. Baibel i tok Jehova i “tingim yumi i olsem das tasol.” (Sng. 103:14) Em i no inap askim yumi long mekim samting yumi no inap long mekim. Olsem na i no gat as long yumi sakim dispela tingting olsem yumi mas bihainim tok bilong Jehova. Nogat. Yumi luksave olsem pasin bilong bihainim tok em i gutpela rot bilong soim Papa bilong yumi long heven olsem yumi laikim em tru na yumi laik i stap insait yet long pasin laikim bilong em.
Gutpela Presen i Kam Long Jehova
6 Long dispela taim nau yumi stap long en, pasin bilong bihainim tok bilong God i insait long planti disisen yumi mekim. Olsem wanem yumi inap save tru olsem ol dispela disisen i stret wantaim laik bilong God? Jehova i bin givim yumi wanpela presen em inap helpim yumi tru long bihainim tok. Dispela presen em maus bilong bel. Maus bilong bel em wanem samting? Em i wanpela samting i helpim yumi long save long bel na tingting bilong yumi yet. Em i mekim wok olsem wanpela jas i stap insait long yumi, na helpim yumi long skelim ol rot yumi mas makim long laip bilong yumi o tingim ol samting yumi mekim pinis na skelim ol dispela samting, olsem ol i gutpela o nogut, i stret o i no stret.—Ritim Rom 2:14-16.
7 Olsem wanem yumi ken mekim gutpela wok long maus bilong bel? Tingim dispela tok piksa: Wanpela man i wokabaut long wanpela ples nating. I no gat ol liklik han rot, o bikpela rot, na i no gat ol sain. Tasol man hia i wokabaut i go long hap em i laik i go long en. Olsem wanem em inap mekim olsem? Em i gat kompas. Kompas em raunpela samting i gat mak bilong not, is, saut, na wes, na wanpela nil magnet i save poin i go long hap not. Sapos dispela man i no gat kompas, em bai paul olgeta long rot. Na olsem tasol, sapos man i no gat maus bilong bel, em bai paul olgeta taim em i laik makim ol pasin na ol rot i stret long bihainim.
8 Tasol olsem kompas, maus bilong bel i no gutpela olgeta. Sapos dispela man bilong wokabaut i putim magnet klostu long kompas, nil bilong kompas bai i no poin moa i go long hap not. Na olsem tasol, sapos yumi larim ol laik bilong bel i stiaim yumi tumas, wanem samting bai kamap? Ol laik nogut bilong bel inap paulim maus bilong bel. Baibel i tok lukaut long yumi olsem “bel bilong olgeta man i save tingting oltaim long mekim pasin giaman.” (Jer. 17:9; Snd. 4:23) Na tu, sapos dispela man bilong wokabaut em i no gat gutpela mep, orait kompas bilong em bai i no inap helpim em tumas. Na olsem tasol, sapos yumi no bilip long ol gutpela tok bilong Baibel, em ol tok i stiaim gut yumi na i no save senis, orait maus bilong bel bai i no inap helpim yumi. (Sng. 119:105) Sori tru olsem planti man i save tingim tumas ol laik bilong bel, na ol i no tingim tumas o ol i no tingim liklik ol lo i stap long Baibel. (Ritim Efesus 4:17-19.) Long dispela as planti manmeri i save mekim pasin nogut, maski ol i gat maus bilong bel.—1 Ti. 4:2.
9 Yumi mas i gat strongpela tingting long yumi no laik tru long stap kain man olsem! Yumi mas wok yet long larim Tok Bilong God i skulim maus bilong bel bambai em inap helpim tru yumi. Yumi mas bihainim maus bilong bel, em Baibel i skulim pinis, na yumi no ken larim ol laik nogut bilong yumi i daunim maus bilong bel. Na yumi mas tingim tu maus bilong bel bilong ol brata na sista insait long kongrigesen. Yumi wok strong long yumi no ken pundaunim ol, na yumi mas tingim olsem maus bilong bel bilong brata inap pasim em long mekim sampela samting o kotim em hariap, winim maus bilong bel bilong yumi yet.—1 Ko. 8:12; 2 Ko. 4:2; 1 Pi. 3:16.
10 Orait nau yumi ken skelim tripela samting we yumi ken kamapim klia pasin bilong yumi long laikim tru Jehova long rot bilong bihainim tok bilong em. Long olgeta tripela samting, maus bilong bel i gat wok bilong en, tasol ol lo bilong Baibel long stretpela pasin i mas stiaim maus bilong bel. Ol dispela tripela rot bilong bihainim tok bilong Jehova em olsem: (1) Yumi laikim ol man em Jehova i laikim, (2) yumi soim rispek long wok bos, na (3) yumi wok strong long i stap klin long ai bilong God.
Laikim Ol Man Em Jehova i Laikim
11 Orait namba wan samting, yumi mas laikim ol man em Jehova i laikim. Long sait bilong ol poroman, yumi ol man i olsem spans i pulim wara. Yumi save pulim, olsem kisim na bihainim tingting na pasin bilong ol man yumi stap wantaim ol. Man Bilong Wokim yumi i save olsem ol poroman inap nogutim o helpim tru yumi. Olsem na em i givim dispela gutpela tok long yumi: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Snd. 13:20; 1 Ko. 15:33) I no gat wanpela bilong yumi i laik bai ‘trabel i painim’ yumi, nogat. Yumi olgeta i laik “kisim gutpela tingting.” I no gat wanpela man inap mekim na bai savetingting bilong Jehova i kamap bikpela moa, na tu, i no gat wanpela man inap bagarapim gutpela pasin bilong em, nogat. Em i stap gutpela piksa tru long pasin bilong makim ol poroman. Tingim—Jehova i save makim husat long i stap olsem pren bilong em?
12 Jehova i bin kolim Abraham olsem “pren bilong mi.” (Ais. 41:8) Dispela man i stap gutpela piksa tru long pasin bilong i stap gut long God, mekim stretpela pasin, na bihainim tok—yes, em man i gat bilip. (Jem. 2:21-23) Jehova i save makim ol dispela kain man long i stap pren bilong em. Long nau tu em i kamap pren bilong ol kain man olsem. Sapos Jehova i makim ol kain pren olsem, orait em i bikpela samting long yumi tu i mas makim ol gutpela pren. Long dispela rot yumi bai wokabaut wantaim ol man i gat gutpela tingting na yumi tu i ken kisim gutpela tingting.
13 Wanem samting inap helpim yu long makim ol gutpela pren? Taim yu skelim stori bilong sampela man long Baibel, dispela inap kirapim yu long mekim olsem. Tingim pasin pren i stap namel long Rut na tambu mama bilong em Naomi, na namel long Devit na Jonatan, na namel long Timoti na Pol. (Rut 1:16, 17; 1 Sml. 23:16-18; Fl. 2:19-22) Wanpela bikpela samting tru i mekim na ol i pas gut wantaim, em olsem: Olgeta wan wan i laikim tru Jehova. Olsem wanem? Yu inap painim ol pren husat i laikim tru Jehova wankain olsem yu save laikim em? Yu ken save tru olsem kongrigesen Kristen i pulap long ol bratasista em ol i gat dispela pasin bilong laikim tru Jehova. Ol kain pren olsem bai i no kirapim yu long mekim samting i bagarapim pasin bilong yu long pas gut wantaim God. Nogat. Ol bai helpim yu long bihainim tok bilong Jehova, pas gut moa wantaim em, na bihainim ol pasin bilong holi spirit. (Ritim Galesia 6:7, 8.) Ol bai helpim yu long i stap insait yet long pasin laikim bilong God.
Soim Rispek Long Wok Bos
14 Namba tu rot bilong soim pasin bilong yumi long laikim tru Jehova em olsem: Yumi mas soim rispek long wok bos. Bilong wanem sampela taim dispela i hatwok tru long yumi? Wanpela samting em olsem, ol man husat i mekim wok bos em ol man i gat sin. Na tu, yumi yet i gat sin. Laik bilong mekim pasin bikhet i stap pinis long yumi, na yumi hatwok long daunim.
15 Ating yu tingting olsem, ‘Sapos i hatwok long yumi soim rispek long wok bos, orait i gat wanem as na pasin bilong soim rispek em samting yumi mas mekim?’ Bilong bekim dispela askim, yumi mas skelim sampela askim long wok bos. Yu laik bai husat i stap king o hetman bilong yu? Sapos yumi makim Jehova olsem King bilong yumi, orait yumi mas soim rispek long wok bos bilong em. Sapos yumi no mekim olsem, yu ting yumi inap kolim em olsem King bilong yumi? Na tu, Jehova i save mekim wok bos bilong em long rot bilong ol man i gat sin, em ol man Jehova i givim wok long ol bilong lukautim lain bilong em. Sapos yumi bikhet long ol dispela man, Jehova bai ting olsem wanem long dispela?—Ritim 1 Tesalonaika 5:12, 13.
16 Olsem: Taim lain Israel i toktok planti na bikhet long Moses, Jehova i pilim olsem ol i bikhet long em. (Nam. 14:26, 27) God i no save senis. Sapos yumi bikhet long ol man em God i bin givim wok long ol long bosim yumi, i olsem yumi bikhet long God yet!
17 Aposel Pol i kamapim klia stretpela tingting yumi mas i gat long ol brata i holim wok insait long kongrigesen Kristen. Em i tok: “Ol lida bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.” (Hi. 13:17) Tru, yumi mas wok strong tru long kisim pasin bilong bihainim tok na daunim yumi yet. Tasol tingim, yumi wok long mekim ol samting bilong stap insait yet long pasin laikim bilong God. Yumi mas wok strong tru bilong winim dispela mak, laka?
Stap Klin Yet Long Ai Bilong Jehova
18 Namba tri rot bilong soim olsem yumi laikim Jehova em yumi wok strong long i stap klin yet long ai bilong em. Ol papamama i save wok strong long helpim ol pikinini long i stap klin. Bilong wanem? Wanpela samting em olsem, pasin bilong i stap klin bai lukautim helt bilong pikinini na em i no ken sik tumas. Na tu, taim pikinini i stap klin, dispela i givim biknem long famili na i soim olsem papamama i laikim tru na tingim gut ol pikinini. Na long wankain as Jehova i laik bai yumi stap klin. Em i save olsem pasin bilong i stap klin bai helpim yumi long i stap gut. Jehova i save tu olsem pasin bilong yumi long i stap klin bai givim biknem long em, em Papa bilong yumi long heven. Dispela em i bikpela samting tru, long wanem, taim ol man i lukim olsem yumi stap narapela kain long ol man bilong dispela graun i gat pasin doti, dispela inap kirapim laik bilong ol long mekim wok bilong God.
19 Yumi mas i stap klin long wanem ol samting? Long olgeta samting. Long Israel bilong bipo, Jehova i kamapim klia long lain bilong em olsem ol i mas i stap klin long skin. (Wkp. 15:31) Lo Bilong Moses i gat lo long pasin bilong rausim pipia, klinim ol kap samting, na wasim han, lek, na klos. (Kis. 30:17-21; Wkp. 11:32; Nam. 19:17-20; Lo 23:13, 14) Dispela i kirapim lain Israel long tingim olsem God bilong ol, Jehova, em i holi—olsem em i klin tru na i no gat wanpela samting i doti long em. Ol wokman bilong God holi, ol tu i mas i stap holi.—Ritim Wok Pris 11:44, 45.
20 Olsem na yumi mas i stap klin long olgeta samting. Yumi mas wok strong long tingting tasol long ol samting i klin. Yumi bihainim gut ol lo bilong Jehova long stretpela pasin, maski planti manmeri bilong graun i save mekim ol pasin sem i nogut tru. Na bikpela samting tru, yumi strong long lotu bilong yumi i mas i stap klin; yumi sakim ol samting nogut bilong lotu giaman. Oltaim yumi tingim tok lukaut i stap long Aisaia 52:11: “Yupela olgeta i mas lusim Babilon na i kam. Na lukaut gut, nogut yupela i pas long ol samting i no klin long ai bilong God.” Long nau, yumi stap klin long ol samting bilong lotu taim yumi stap longwe long lotu giaman. Olsem na yumi no insait liklik long ol bikpela de bilong lotu giaman em planti man long nau i save amamas long en. Tru, em hatwok long i stap klin. Tasol ol manmeri bilong Jehova ol i wok strong long i stap klin, long wanem, dispela bai helpim ol long i stap insait yet long pasin laikim bilong God.
21 Jehova i laik bai yumi stap insait yet long pasin laikim bilong em inap oltaim oltaim. Tasol yumi olgeta wan wan i mas wok strong tru long i stap insait yet long pasin laikim bilong God. Bilong mekim olsem, yumi mas bihainim pasin bilong Jisas na soim olsem yumi laikim tru Jehova long rot bilong bihainim tok bilong em. Taim yumi mekim olsem, yumi ken bilip olsem i no gat wanpela samting “inap tekewe yumi long pasin laikim bilong God, em dispela pasin i stap long Krais Jisas, Bikpela bilong yumi.”—Ro. 8:38, 39, NW.
Yu Tingim Yet?
• Olsem wanem maus bilong bel inap helpim yumi long i stap insait yet long pasin laikim bilong God?
• Bilong wanem yumi mas laikim ol man em Jehova i save laikim?
• Bilong wanem yumi mas soim rispek long wok bos?
• Olsem wanem pasin bilong i stap klin i bikpela samting long lain bilong God?
[Askim Bilong Stadi]
1, 2. Olsem wanem Jehova i soim olsem em i laikim tru yumi? Olsem wanem yumi save olsem yumi no inap i stap nating insait long pasin laikim bilong Jehova?
3. Jisas i tok em i mas mekim wanem bambai em i ken i stap insait yet long pasin laikim bilong Papa?
4, 5. (a) Wanem namba wan rot bilong soim olsem yumi laikim tru Jehova? (b) Bilong wanem i no gat as long yumi sakim dispela tingting olsem yumi mas bihainim tok bilong Jehova?
6, 7. (a) Maus bilong bel em wanem samting? (b) Kamapim tok piksa long olsem wanem maus bilong bel inap helpim yumi long stap insait yet long pasin laikim bilong God.
8, 9. (a) Yumi mas tingim gut wanem ol samting we inap mekim na maus bilong bel bai i no helpim yumi? (b) Yumi mas mekim wanem bambai maus bilong bel inap helpim tru yumi?
10. Bai yumi stori long wanem tripela samting?
11. Bilong wanem yumi mas laikim ol man em Jehova i laikim?
12. Jehova i save makim wanem kain ol man long i stap pren bilong em?
13. Wanem samting inap helpim yumi long makim ol gutpela pren?
14. Wanem ol samting i mekim na i hatwok long yumi soim rispek long wok bos?
15, 16. (a) Bilong wanem em i bikpela samting long yumi mas rispektim ol man em Jehova i bin givim wok long ol bilong lukautim lain bilong em? (b) Yumi kisim wanem gutpela skul long tingting bilong Jehova long lain Israel taim ol i bikhet long Moses?
17. Yumi mas wok strong long kisim wanem stretpela tingting long ol brata husat i mekim wok bos insait long kongrigesen?
18. Bilong wanem Jehova i laik bai yumi stap klin?
19. Olsem wanem yumi save olsem em i bikpela samting long i stap klin long skin?
20. Yumi mas i stap klin long wanem ol samting?
21. Olsem wanem yumi ken save tru olsem yumi bai stap insait yet long pasin laikim bilong God?
[Blok/Piksa long pes 20]
BUK I STRONGIM GUTPELA PASIN
Long kibung distrik bilong 2008, ol i bin tokaut long wanpela nupela buk i gat 256 pes, nem bilong en “Stap Insait Yet Long Pasin Laikim Bilong God.” Wanem wok bilong dispela buk? Em bilong helpim ol Kristen long save long ol lo bilong Jehova na laikim ol dispela lo, na em i stori long pasin Kristen. Taim yumi stadi gut long buk “Stap Insait Yet Long Pasin Laikim Bilong God,” em bai helpim yumi long save tru olsem pasin bilong bihainim ol lo bilong Jehova em nambawan gutpela rot bilong bihainim long nau, na em bai bringim yumi long laip oltaim long bihain.
Na moa yet, em i bilong helpim yumi long luksave olsem pasin bilong bihainim tok bilong Jehova i no putim hevi long yumi, nogat. Em rot bilong soim Jehova olsem yumi laikim em tru. Olsem na dispela buk bai kirapim yumi long askim yumi yet, ‘Bilong wanem mi bihainim tok bilong Jehova?’
Taim sampela i lusim pasin laikim bilong Jehova, planti taim as bilong en em pasin ol yet i mekim, i no olsem ol i pundaun long sampela bilip. Olsem na em i bikpela samting long strongim pasin bilong pilim na laikim tru ol lo na ol stiatok bilong Jehova em ol i save stiaim yumi long olgeta wan wan de! Mipela i bilip tru olsem dispela buk bai helpim ol sipsip bilong Jehova long olgeta hap long sanap strong long mekim pasin i stret, na kamapim klia olsem Satan em i giaman, na bikpela samting tru, ol i ken stap insait yet long pasin laikim bilong God!—Jut 21, NW.
[Piksa long pes 18]
“Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em”