Bipo Yu Bin Mekim Wanpela Wok Long Kongrigesen? Yu Inap Mekim Gen?
BIPO yu bin holim wanpela wok insait long kongrigesen Kristen? Ating yu bin holim wok kongrigesen sevan o elda. O yu bin insait long fultaim sevis. Ating yu bin kisim bikpela amamas long mekim ol dispela wok, tasol sampela samting i bin kamap na yu mas lusim.
Ating yu bin lusim dispela wok bambai yu ken lukautim gut famili. O ating yu lapun o yu gat sik, na long dispela as yu mas lusim wok. Tasol dispela i no makim olsem yu no bin mekim gut wok bilong yu, nogat. (1 Ti. 5:8) Long taim bilong ol aposel, Filip i bin mekim wok misineri, tasol bihain em i go sindaun long Sisaria we em i lukautim famili bilong em. (Ap. 21:8, 9) Taim King Devit bilong Israel bilong bipo i lapun pinis, em i stretim rot bambai pikinini bilong em Solomon i ken senisim em na kamap king. (1 Kin. 1:1, 32-35) Tasol Jehova i laikim yet Filip na Devit na i amamas long ol wok ol i bin mekim, na long nau tu ol man i gat rispek long tupela.
Olsem wanem? Ol i bin tekewe dispela wok yu bin holim, long wanem, yu bin mekim sampela pasin kranki? O yu gat sampela hevi long famili? (1 Ti. 3:2, 4, 10, 12) Ating yu no bin wanbel long ol i bin tekewe dispela wok bilong yu, na yu bel nogut yet i stap.
Yu Inap Long Winim Mak Gen
Taim ol i tekewe wanpela wok bilong kongrigesen long brata, yu ting em i no inap holim gen dispela wok? Nogat, i no olsem. Planti ol inap kisim bek dispela wok. Tasol bilong holim gen wanpela wok, yu mas i gat laik long winim mak gen. (1 Ti. 3:1) Tasol bilong wanem bai yu gat laik long mekim olsem? Bai yu laik mekim olsem long wankain as olsem yu bin dediket long God—yu laikim tru Jehova na ol manmeri i mekim wok bilong em. Sapos yu kamapim klia dispela pasin laikim na yu laik holim gen wanpela wok, dispela bai mekim na Jehova i ken yusim ol gutpela save yu bin kisim bipo na bihain long taim yu lusim wok yu bin holim.
Tingim gutpela tok Jehova i bin givim long lain Israel taim ol i mekim rong na em i tekewe gutpela wok ol i bin holim. Em i tok: “Mi tasol mi Bikpela na mi no save senisim tingting bilong mi. Olsem na yupela ol lain tumbuna pikinini bilong Jekop, yupela i no lus olgeta yet.” (Mal. 3:6) Jehova i laikim tumas ol Israel na em i laik bai ol i mekim sampela wok moa bilong em. Na Jehova i laik bai yu tu i ken mekim wok bilong em long bihain. Orait long nau yu ken mekim wanem? Bilong mekim ol wok tiokratik yu mas strong long ol samting bilong spirit, dispela em i bikpela samting, winim save yu gat bilong mekim ol wok. Olsem na nau taim yu no holim sampela wok bilong kongrigesen, givim bel long strongim yu yet long ol samting bilong spirit.
Bilong “stap strong” long bilip, yu mas “i go klostu long Bikpela na askim em long . . . strongim [yu].” (1 Ko. 16:13; Sng. 105:4) Wanpela rot bilong mekim olsem, em yu mas beten strong. Taim yu tokim Jehova long ol samting i kamap long sindaun bilong yu, kamapim gut bel bilong yu na askim em long givim spirit bilong em long yu. Sapos yu mekim olsem, bai yu go klostu moa long Jehova na dispela bai strongim yu. (Sng. 62:8; Fl. 4:6, 13) Narapela rot bilong strongim yu long ol samting bilong spirit, em yu mas stadi gut long Tok Bilong God. Long nau yu no gat planti wok bilong kongrigesen, olsem na ating yu inap lusim sampela hap taim moa bilong mekim stadi bilong yu yet na famili stadi, olsem bihainim gut sediul bilong mekim ol dispela stadi em bipo yu bin hatwok long painim taim long mekim.
Tru, yu stap yet olsem wanpela Witnes Bilong Jehova. (Ais. 43:10-12) Nambawan gutpela wok yumi inap holim, em bilong i stap “wanwok bilong God.” (1 Ko. 3:9) Sapos yu lusim sampela hap taim moa long wok autim tok, dispela em i gutpela rot tru bilong strongim yu yet wantaim ol poroman bilong yu long autim tok.
Rot Bilong Karim Bel Hevi
Taim ol i tekewe wanpela wok yu bin holim, ating bai yu pilim sem o bel hevi. Ating yu laik tok, samting yu bin mekim i no gat rong. Tasol olsem wanem sapos ol brata i harim ol tok bilong yu ol i pilim yet olsem yu no inap holim moa wok bilong yu? Ating yu bel nogut liklik long ol brata na dispela i pasim yu long wok strong long winim mak bilong holim gen wok, o i pasim yu long kisim skul long samting i bin painim yu. Yumi ken tingim ol samting i bin painim Jop, Manase, na Josep, na olsem wanem dispela inap helpim yumi long daunim pasin bilong bel nogut.
Jop i bin stap olsem hetman na mekim ol ofa long Jehova bilong helpim ol man na em i bin stap hetman na jas bilong ol. (Jop 1:5; 29:7-17, 21-25) Orait bihain, olgeta mani kago, ol pikinini, na strongpela skin bilong em, i lus olgeta. Na tu, em i no stap bikman moa long ai bilong ol man. Jop i tok: “Nau ol pikinini bilong ol rabisman i kam tok bilas na lap nogut long mi.”—Jop 30:1.
Jop i pilim olsem em i no gat asua liklik na em i laik kamapim stretpela pasin bilong em long God. (Jop 13:15) Tasol Jop i redi long wetim Jehova, na dispela i kamapim gutpela samting. Em i kisim save olsem em i mas kisim tok bilong stretim em, na wanpela as i olsem, em i bin kisim tingting kranki long ol traim i painim em. (Jop 40:6-8; 42:3, 6) Pasin daun bilong Jop i mekim na bihain God i mekim gut tru long Jop.—Jop 42:10-13.
Sapos yu bin mekim wanpela rong na long dispela as ol i tekewe wok yu bin holim, ating yu tingting olsem, tru tru Jehova na ol brata Kristen bilong yu bai lusim tingting long rong bilong yu o nogat? Tingim King Manase bilong Juda. Em “i mekim planti sin moa long ai bilong Bikpela, na . . . i mekim Bikpela i belhat moa yet.” (2 Kin. 21:6) Tasol taim em i dai, em i holim yet wok king na em i stap gut long God. Dispela samting i bin kamap olsem wanem?
Manase i larim Jehova i stretim em. Pastaim em i sakim ol tok lukaut em i bin kisim, olsem na Jehova i salim ol Asiria i kam pait na ol i pasim em long sen na kisim em i go kalabus long Babilon. Long dispela hap, Manase “i pilim hevi nogut tru na em i daunim em yet long ai bilong God, Bikpela bilong ol tumbuna bilong en. Na em i kam bek long God, na i askim God long helpim em.” Em i pilim rong bilong em na em i tanim bel tru, olsem na Jehova i lusim rong bilong em.—2 Sto. 33:12, 13.
Taim kongrigesen i tekewe wok bilong wanpela brata, em i no save kisim bek hariap dispela wok. Tasol ating bihain ol bai givim sampela wok long yu. Sapos yu orait long kisim dispela wok na yu givim bel long mekim, ating bihain bai yu kisim sampela wok moa. Tru, dispela i gat hatwok bilong en. Ating sampela taim bai yu bel hevi gen. Tasol sapos yu wok strong i go na yu no les, dispela bai kamapim gutpela samting.
Yumi ken tingim Josep, pikinini bilong Jekop. Taim em i gat 17 krismas, ol brata bilong em i bin salim em i go long ol narapela lain olsem wokboi nating. (Stt. 37:2, 26-28) Josep i no ting ol pikinini bilong papa bilong em bai mekim kain pasin olsem long em. Tasol em i orait long mekim ol wok em i mas mekim, na Jehova i mekim gut long em na “Josep i wok long haus bilong Potifar” olsem bosboi bilong haus. (Stt. 39:2) Bihain, ol i putim Josep long kalabus. Tasol em i stap gut long Jehova na Jehova i stap wantaim em, olsem na bihain ol i makim em long bosim olgeta wok bilong haus kalabus.—Stt. 39:21-23.
Josep i no save olsem ol dispela samting i bilong kamapim samting Jehova i tingting pinis long mekim. Josep i tingting tasol long mekim gut wok bilong em. Olsem na Jehova inap mekim wok long em bilong lukautim dispela lain em Pikinini bai kamap long en, olsem Jehova i bin promis long en. (Stt. 3:15; 45:5-8) Tru, yumi olgeta i no inap mekim bikpela wok olsem Josep long kamapim laik bilong Jehova, tasol Baibel i soim olsem han bilong Jehova yet i mekim na ol wokman bilong Em i kisim wok. Olsem na bihainim pasin bilong Josep na larim rot i op i stap.
Ol Hevi Inap Lainim Yu
Sampela bikpela hevi i bin painim Jop, Manase, na Josep. Tripela man wantaim ol i orait long karim ol hevi Jehova i larim i kamap long ol, na dispela i bin skulim olgeta wan wan long sampela bikpela samting. Yu inap kisim wanem skul long hevi i bin painim yu?
Wok strong long kisim save long samting Jehova i laik skulim yu long en. Bel bilong Jop i bagarap stret, olsem na em i tingting long em yet tasol na em i no tingim ol bikpela tok i bin kamap. Tasol Jehova i stretim em long gutpela pasin na em i kisim bek stretpela tingting, na i tokaut olsem: “Mi bin mekim planti kranki toktok long ol samting mi no klia olgeta long as bilong en.” (Jop 42:3) Sapos yu bel hevi long ol i bin tekewe wanpela wok long yu, ‘yu no ken ting save na pasin bilong yu i winim ol arapela. Nogat. Yu mas skelim gut ol pasin bilong yu yet na tingting stret.’ (Ro. 12:3) Ating Jehova i wok long stretim yu long wanpela rot em yu no kliagut yet long en.
Kisim ol tok bilong stretim yu. Ating pastaim Manase i ting ol tok Jehova i bin givim long em bilong stretim em i strong tumas. Tasol em i kisim ol dispela tok, tanim bel, na lusim ol pasin nogut em i bin bihainim. Maski yu gat wanem tingting long ol tok yu bin kisim bilong stretim yu, ‘yu mas daunim yu yet na stap aninit long strongpela han bilong God. Na em bai i litimapim yu.’—1 Pi. 5:6; Jem. 4:10.
Stap isi na larim Jehova i skulim yu. Ol samting i painim Josep inap mekim na em i bel nogut tru na i laik bekim rong ol i bin mekim long em. Tasol em i kisim gutpela tingting na pasin marimari. (Stt. 50:15-21) Sapos yu bel hevi long samting i bin painim yu, yu mas stap isi na wet tasol, na larim Jehova i skulim yu.
Olsem wanem? Bipo yu bin holim wanpela wok insait long kongrigesen Kristen? Givim rot long Jehova long givim sampela wok long yu long bihain. Strongim yu yet long ol samting bilong spirit. Kisim pasin daun na pasin bilong i stap isi na no ken les. Amamas long kisim wanem wanem wok ol i laik givim long yu. Bilip tru olsem Jehova “i no save pasim wanpela gutpela samting long ol manmeri i save wokabaut stret.”—Sng. 84:11.
[Rait long pes 30]
Kamap strong long bilip long rot bilong beten strong
[Piksa long pes 31]
Pasin bilong wok strong long autim tok em i gutpela rot bilong strongim yu yet long ol samting bilong spirit
[Piksa long pes 32]
Givim rot long Jehova long givim sampela wok long yu long bihain