Ol Man i Askim
Long Wanem Rot Jisas na Papa Bilong Em i Wanpela?
Jisas i tok: “Mi wantaim Papa mitupela i wanpela tasol.” (Jon 10:30) Sampela i tok dispela ves i soim olsem Jisas na Papa bilong em, tupela i hap bilong wanpela god triwan. Jisas i gat wanem tingting taim em i tok olsem?
Orait yumi ken skelim ol narapela tok i stap klostu long dispela ves. Long Jon sapta 10 ves 25, Jisas i tok olsem em i mekim olgeta wok long nem bilong Papa bilong em. Long Jon sapta 10 ves 27 i go long Jon sapta 10 ves 29, em i stori long ol man i kain olsem sipsip, em Papa bilong em i bin givim long em. Sapos Jisas na Papa, tupela i wanpela man tasol, orait ol man i harim tok bilong em, ol bai i no kisimgut dispela tupela tok. Tasol Jisas i laik tok, ‘Mi wantaim Papa bilong mi, mitupela i pas gut tru, olsem na i no gat wanpela man inap tekewe ol sipsip long mi, wankain olsem i no gat wanpela man inap tekewe ol sipsip long Papa bilong mi.’ I kain olsem wanpela pikinini i tokim birua bilong papa bilong em, ‘Sapos yu paitim papa bilong mi, i olsem yu paitim mi.’ Ol man bai no ting dispela pikinini wantaim papa bilong em, tupela i wanpela man tasol, nogat. Tasol ol bai save olsem dispela pikinini na papa i pas gut tru.
Olsem tasol Jisas na Papa bilong em, God Jehova, tupela i stap “wanpela” long pasin bilong stap wanbel tru long ol laik na ol samting ol i laik mekim. Tasol Satan na namba wan man na meri, Adam na Iv, ol i no olsem. Ol i no laik bai God bosim ol. Tasol Jisas i no gat dispela tingting. Em i tok: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim. Olgeta samting Papa i save mekim, em Pikinini tu i save mekim.”—Jon 5:19; 14:10; 17:8.
Tupela i pas gut tru, tasol dispela i no mekim na God na Pikinini bilong em, Jisas, tupela i stap wankain tru long olgeta liklik liklik samting, nogat. Tupela wantaim i narapela narapela. Tupela i gat ol pasin bilong ol yet. Jisas yet i gat filings, tingting, na ol samting i bin painim em long laip bilong em, na em i stap fri long makim wanem samting em i laik mekim. Tasol maski i olsem, em yet i daunim laik bilong em bambai em i ken bihainim laik bilong Papa bilong em. Long Luk 22:42, Jisas i tok: “Yu no ken bihainim laik bilong mi. Nogat. Yu mas bihainim laik bilong yu tasol.” Ol dispela tok bai i no gat mining sapos laik bilong Jisas i wankain stret long laik bilong Papa. Sapos i tru olsem Jisas na Papa, tupela i wanpela man tasol, orait bilong wanem na Jisas i beten long God na long pasin daun em i tok em i no save long sampela samting em Papa tasol i save long en?—Matyu 24:36.
Ol god em ol man bilong planti lotu ol i lotuim, ol man i wokim ol piksa bilong ol dispela god olsem ol i kros na pait wantaim ol famili bilong ol yet. Olsem: Long ol stori nating bilong ol Grik, god Kronus i rausim papa bilong em Yuranus na kaikaim ol pikinini bilong em yet. Man! Dispela em narapela kain stret long pasin wanbel i stap namel long God Jehova na Pikinini bilong em, Jisas, em pasin laikim i as bilong en! Na dispela pasin wanbel i kirapim yumi long laikim tru ol! Tru tumas, em wanpela bikpela ona tru yumi gat, long pas gut wantaim tupela bikpela Man bilong heven na graun. Jisas i tingim ol disaipel bilong em na i beten olsem: “Mi beten . . . bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela.”—Jon 17:20, 21.
Olsem na taim Jisas i tok: “Mi wantaim Papa mitupela i wanpela tasol,” em i no stori long wanpela tok hait bilong God Triwan, nogat, em i stori long pasin wanbel tru i stap namel long tupela.