Bihainim Tok na Strongim Bel Olsem Krais

“Bel bilong yupela i ken i stap strong. Mi winim pinis strong bilong dispela graun.”​​—JO. 16:33.

1. Jisas i bihainim tok bilong God i go inap long wanem mak?

JISAS KRAIS i bihainim laik bilong God long olgeta taim. I no gat wanpela taim em i bin tingting long sakim tok bilong Papa bilong em long heven. (Jo. 4:​34; Hi. 7:​26) Tasol ol samting i painim em long graun i putim hevi long em long pasin bilong bihainim tok. Taim Jisas i kirap long autim tok, ol birua, na Satan tu, ol i traim long grisim, fosim, o trikim em bambai em i no ken i stap gut long God. (Mt. 4:​1-​11; Lu. 20:​20-​25) Ol dispela birua i givim bikpela pen long Jisas long sait bilong tingting, bel, na skin. Bihain ol i kilim em i dai long diwai pos. (Mt. 26:​37, 38; Lu. 22:44; Jo. 19:​1, 17, 18) Maski ol dispela hevi i painim Jisas na em i kisim bikpela pen tru, em i “bihainim tok bilong God, i go inap long em i dai.”​​—Ritim Filipai 2:8.

2, 3. Yumi inap kisim wanem skul long pasin bilong Jisas long bihainim tok maski em i bin kisim pen na hevi?

² Ol samting i painim Jisas long taim em i stap long graun, dispela i skulim em long ol nupela samting long pasin bilong bihainim tok. (Hi. 5:8) Yumi inap tok olsem Jisas i save pinis long pasin bilong mekim wok bilong Jehova, long wanem, em i bin stap longpela taim tru wantaim Jehova, na em i “saveman i bosim wok” long taim God i wokim ol samting. (Snd. 8:​30) Tasol maski i olsem, taim em i kamap man long graun, em i bin holimpas bilip na karim hevi, na long dispela rot em i kamapim klia olsem em i givim bel olgeta long stap gut long God. Jisas, Pikinini Bilong God, em i kamap strong moa long ol samting bilong spirit. Dispela i skulim yumi long wanem samting?

³ Maski Jisas i gutpela olgeta, em i no ting olsem long strong bilong em yet em inap bihainim tok, nogat. Em i beten askim God long helpim em. (Ritim Hibru 5:7.) Sapos yumi laik bihainim tok long olgeta taim, yumi tu i mas daunim yumi yet na oltaim beten askim God long helpim yumi. Aposel Pol i tokim ol Kristen: “Yupela i mas holim wankain tingting olsem Krais Jisas i bin holim.” Em i bin “daunim em yet na i bihainim tok bilong God, i go inap long em i dai.” (Fl. 2:​5-8) Pasin bilong Jisas i kamapim klia olsem ol man inap bihainim tok maski ol i stap namel long ol man nogut. Jisas em i gutpela olgeta, tasol olsem wanem long yumi ol sinman?

Yumi Inap Bihainim Tok Maski Yumi Gat Sin

4. God i wokim yumi i stap fri, na dispela i makim wanem samting?

⁴ Taim God i wokim Adam na Iv, em i wokim ol i stap fri long makim rot ol i laik bihainim. Yumi ol tumbuna bilong tupela, yumi tu i stap fri long makim rot yumi laik bihainim. Yumi inap makim olsem yumi bai mekim stretpela pasin o pasin nogut; yumi bai bihainim tok bilong God o yumi bai sakim tok. Yumi stap fri, tasol Jehova bai skelim pasin bilong yumi. Disisen bilong yumi bai makim olsem yumi bai kisim laip o yumi bai dai. Na tu, ol disisen bilong yumi bai mekim sampela samting long ol man i stap klostu long yumi.

5. Yumi olgeta i gat wanem hatwok? Yumi mas mekim wanem bambai yumi inap holimpas pasin bilong bihainim tok?

⁵ Yumi kisim sin long Adam, olsem na i hatwok long bihainim tok. Sampela taim i hatwok long bihainim ol lo bilong God. Dispela samting i bin kamap long Pol. Em i tok: “Mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.” (Ro. 7:​23) Em isi moa long yumi bihainim tok taim yumi no karim pen na hevi o i no gat wok long yumi daunim ol laik bilong yumi yet. Tasol yumi save mekim wanem taim pasin bilong bihainim tok i pait wantaim “pasin bilong bel kirap na aigris”? Ol dispela laik nogut i kamap na ol i gat bikpela strong long pulim yumi, long wanem, yumi gat sin, na yumi stap namel long ol man i bihainim “spirit bilong dispela graun.” (1 Jo. 2:​16; 1 Ko. 2:​12) Bilong sakim ol dispela laik nogut, yumi mas redim bel bilong yumi paslain long hevi o traim i painim yumi, na yumi mas tingting strong olsem maski wanem wanem samting i kamap, yumi bai strong yet long bihainim tok bilong Jehova. (Sng. 78:8) Baibel i gat stori bilong planti man em ol i bihainim tok bilong God, long wanem, ol i bin redim bel bilong ol.​​—Esr. 7:​10; Dan. 1:8.

6, 7. Stori long olsem wanem stadi bilong yumi yet inap helpim yumi long mekim ol gutpela disisen.

⁶ Wanpela rot bilong redim bel em long stadi gut long Baibel na ol buk na nius bilong Baibel. Long tingting, piksaim olsem: Em nait yu bin makim bilong mekim stadi bilong yu yet. Yu beten long spirit bilong Jehova i ken helpim yu long bihainim ol skul yu kisim long Baibel. Long tumora nait bai i gat wanpela muvi i kamap long TV, na yu laik lukim dispela muvi. Yu harim ol man i tok olsem em gutpela muvi, tasol yu save olsem sampela hap bilong en i stori long pasin pamuk na pait.

⁷ Yu tingim tok bilong Pol long Efesus 5:3: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin.” Na yu tingim tok bilong Pol long Filipai 4:​8. (Ritim.) Yu skelim dispela tok na yu askim yu yet, ‘Sapos mi larim ol dispela kain program long TV i pas long bel na tingting bilong mi, orait mi bihainim pasin bilong Jisas long bihainim stret tok bilong God, o nogat?’ Bai yu mekim wanem? Bai yu lukim dispela muvi o nogat?

8. Bilong wanem yumi mas holimpas ol lo long stretpela pasin na long ol samting bilong spirit?

⁸ Yumi bai popaia stret sapos yumi slek long bihainim ol lo long stretpela pasin na long ol samting bilong spirit, na yumi ting olsem yumi yet i gat strong long sakim ol samting em ol poroman nogut i laik pulim yumi long mekim. Na tu, dispela inap makim ol samting yumi mekim bilong kisim amamas long en, olsem ol piksa na muvi bilong pasin pamuk na pait. Mobeta yumi lukautim gut yumi yet wantaim ol pikinini bilong yumi bambai ol samting nogut we i kamapim klia tingting bilong Satan i no ken pulim yumi na bagarapim ol gutpela pasin bilong yumi. Ol lain i wok long kompiuta, ol i save wok strong long lukautim gut kompiuta bambai ol program nogut, olsem vairas, i no ken bagarapim o paulim ol program long kompiuta, o i yusim kompiuta bilong ol long bagarapim ol arapela kompiuta. Olsem tasol, em i bikpela samting moa yet long yumi mas wok strong long lukautim yumi yet bambai ol “trik na giaman” bilong Satan i no ken bagarapim yumi.​​—Ef. 6:​11.

9. Bilong wanem yumi mas tingting strong long bihainim tok bilong Jehova long olgeta de?

⁹ Long olgeta de, yumi mas makim olsem yumi bai bihainim pasin bilong Jehova long ol samting yumi mekim, o nogat. Sapos yumi laik abrusim bagarap, yumi mas bihainim tok bilong God na ol samting yumi mekim i mas i stret wantaim ol stretpela stiatok bilong em. Sapos yumi bihainim pasin bilong Krais long bihainim tok i go inap long mak bilong dai, yumi bai kamapim klia olsem bilip bilong yumi em i samting tru, na i no giaman. Jehova bai praisim yumi taim yumi stap gut long em. Jisas i tok promis olsem: “Ol manmeri i stap strong inap long las de, God bai i kisim bek ol.” (Mt. 24:13) Dispela i makim olsem yumi mas kisim pasin bilong strongim bel, olsem Jisas i bin mekim.​​—Sng. 31:24.

Jisas​​—Nambawan Gutpela Piksa Long Pasin Bilong Strongim Bel

10. Ol man inap putim wanem ol hevi long yumi? Yumi mas mekim wanem?

¹⁰ Yumi mas i gat strongpela bel bambai yumi ken sakim ol tingting na pasin bilong graun na ol i no ken mekim yumi i kamap doti. Yumi ol Kristen i save bungim ol hevi we inap pulim yumi long lusim ol stretpela lo bilong Jehova​—em ol hevi i kamap long pasin na sindaun bilong yumi, na long ol samting bilong mani na lotu. Planti Kristen i save kisim hevi long ol famili i birua long ol. Long sampela kantri, ol skul i strongim moa yet tok bilong evolusen, na planti man moa i orait long ol man i holim tingting olsem i no gat God i stap. Yumi no ken lukluk tasol long ol dispela hevi, nogat, yumi mas mekim sampela samting bilong sakim ol dispela hevi bambai yumi ken lukautim yumi yet. Pasin bilong Jisas i soim yumi long rot bilong mekim olsem.

11. Taim yumi tingim gut pasin bilong Jisas, olsem wanem dispela inap strongim bel bilong yumi?

¹¹ Jisas i tokim ol disaipel: “Long taim yupela i stap long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.” (Jo. 16:33) Oltaim em i sanap strong na em i no larim ol samting bilong graun i pulim em. Em i no larim ol man bilong graun i pasim em long mekim wok bilong em long autim tok o mekim em i slek long bihainim lotu i tru na stretpela pasin; yumi tu i mas bihainim pasin bilong em. Long beten, Jisas i tok long ol disaipel olsem: “Ol i no bilong dispela graun, olsem mi yet mi no bilong dispela graun.” (Jo. 17:16) Sapos yumi stadi na tingim gut pasin bilong Krais long strongim bel, dispela bai strongim bel bilong yumi tu long no ken insait long ol samting bilong graun.

Kisim Skul Long Pasin Bilong Jisas Long Strongim Bel

12-14. Kamapim sampela stori long Jisas i bin strongim bel na em i no pret.

¹² Wok autim tok bilong Jisas i kamapim klia olsem em i gat pasin bilong strongim bel. Em i gat namba olsem Pikinini Bilong God, olsem na em i no pret long “i go insait long banis bilong tempel na em i rausim olgeta man i mekim wok bisnis i stap long dispela hap. Em i kapsaitim ol tebol bilong ol man i wok long senisim mani, wantaim ol sia bilong ol man i wok long salim ol pisin.” (Mt. 21:12) Taim ol soldia i kam bilong arestim Jisas long laspela nait bilong em long graun, em i strongim bel na i go klostu long ol. Em i mekim olsem, long wanem, em i laik lukautim ol disaipel, na em i tok: “Sapos yupela i painim mi, orait larim ol dispela man i go.” (Jo. 18:8) Sampela minit bihain, em i tokim Pita long putim bainat i go bek long paus bilong en, na dispela i kamapim klia olsem Jisas i bilip long strong bilong Jehova, na i no long bainat samting.​​—Jo. 18:11.

¹³ Jisas i no pret long kamapim stret pasin bilong ol tisa giaman em ol i no gat pasin laikim na ol i skulim ol man long ol bilip kranki. Jisas i tokim ol: “Yupela saveman bilong lo na yupela Farisi, yupela lukaut. Yupela i man bilong tupela maus. Yupela i save pasim dua bilong kingdom bilong heven long pes bilong ol manmeri. . . . Yupela i lusim pinis olgeta bikpela hap tok bilong lo, olsem tok bilong stretpela pasin bilong skelim man na pasin bilong marimari na pasin bilong bilip. . . . Yupela i save klinim gut ausait bilong ol kap na plet, tasol ol kaikai samting yupela i save pulapim insait bilong ol, em yupela i save kisim long pasin bilong stil na pasin bilong tingting tasol long yupela yet.” (Mt. 23:​13, 14, 23, 25) Ol disaipel bilong Jisas i mas kisim wankain pasin bilong strongim bel, long wanem, ol tisa giaman bilong lotu bai mekim nogut long ol tu na kilim i dai sampela bilong ol.​​—Mt. 23:34; 24:9.

¹⁴ Jisas i no pret long ol spirit nogut. Wanpela taim em i bungim wanpela man i gat planti spirit nogut i stap long em, na ol i bosim em strong tumas na i no gat wanpela man inap long pasim em long sen. Tasol Jisas i rausim ol dispela spirit nogut. (Mk. 5:​1-​13) Long nau, God i no givim strong long ol Kristen long wokim ol kain mirakel olsem. Tasol long wok bilong yumi long autim tok na skulim ol man, yumi tu i mas mekim pait long Satan, em man i “pasim tingting” bilong ol man i no bilip. (2 Ko. 4:4) Olsem Jisas, ol samting yumi holim bilong mekim pait “ol i no samting bilong dispela graun. Nogat. Ol i gat strong bilong God, na ol inap brukim ol strongpela banis bilong ol birua”​​—em ol tingting kranki bilong lotu we i pas strong long tingting bilong man. (2 Ko. 10:4) Pasin bilong Jisas i skulim yumi long mekim wok long ol dispela samting bilong mekim pait.

15. Wanem samting i mekim na Jisas i gat pasin bilong strongim bel?

¹⁵ Jisas i gat pasin bilong strongim bel, long wanem, em i gat strongpela bilip, na i no olsem em i wanpela hapman stret, nogat. Yumi tu i mas i gat strongpela bilip. (Mk. 4:​40) Yumi mas mekim wanem bilong kisim strongpela bilip? Orait, yumi ken skelim gen pasin bilong Jisas. Em i save gut tru long ol Rait Holi na em i bilip tru long en. Em i holim bainat bilong spirit, em Tok Bilong God. Oltaim em i kolim tok bilong ol Rait Holi bilong strongim ol tok em i skulim ol man long en. Planti taim em i kirapim tok olsem: “Buk bilong God i gat tok olsem.”a

16. Yumi ken mekim wanem bilong strongim bilip bilong yumi?

¹⁶ Bilong yumi ken strongim bilip bambai yumi no pundaun taim yumi bungim ol hevi bilong i stap olsem disaipel, oltaim yumi mas ritim na stadi long Baibel na go long ol miting Kristen, na tingim gut ol tok i stap olsem as bilong bilip. (Ro. 10:17) Yumi mas skelim long bel ol save yumi kisim, na larim ol dispela save i stiaim bel bilong yumi. Strongpela bilip tasol bai kirapim yumi long strongim bel na mekim wok. (Jem. 2:​17) Na yumi mas beten long kisim holi spirit, long wanem, bilip em wanpela bilong ol pasin em holi spirit i save kirapim man long mekim.​​—Ga. 5:​22, NW.

17, 18. Olsem wanem wanpela yangpela sista long skul i bin strongim bel?

¹⁷ Wanpela yangpela sista, Kitty, em i pilim tru olsem bilip inap strongim bel bilong man. Kirap long taim em i liklik yet, em i save olsem em i no ken “sem long autim gutnius” long skul, na em i laik tru long autim tok long ol wanskul. (Ro. 1:​16) Long olgeta yia, em i save tingting strong long autim tok, tasol pret i mekim na em i save surik long mekim olsem. Em i senisim skul taim em i kamap tineja. Na em i tok, “Nau mi bai wok strong moa, long wanem, pastaim ol rot i bin op long mi ken autim tok, tasol mi no bin mekim olsem.” Kitty i beten long em i ken kisim pasin bilong Krais long strongim bel, na skelim gut ol samting, na rot i ken op long em i autim tok.

¹⁸ Long namba wan de bilong em long skul, tisa i askim olgeta wan wan sumatin long stori liklik long ol i husat na ol i kam long wanem hap. Sampela sumatin i kolim lotu bilong ol, na ol i tok tu olsem ol i no save go tumas long lotu. Kitty i luksave olsem rot i op nau long em i ken autim tok, olsem em i bin beten long en. Orait nau em taim bilong em long toktok, na em i strongim bel na i tok, “Mi wanpela Witnes Bilong Jehova, na mi save larim ol tok bilong Baibel i stiaim mi long ol samting bilong lotu na ol pasin i stret long bihainim.” Taim em i toktok, sampela sumatin i tanim ai bilong ol, tasol ol arapela i putim gut yau na bihain ol i givim sampela askim long em. Na tisa i tok olsem Kitty i stap gutpela piksa long pasin bilong sambai long bilip, na ol arapela i ken bihainim pasin bilong em. Kitty i amamas tru olsem em i bin kisim skul long pasin bilong Jisas long strongim bel.

Kamapim Bilip na Strongim Bel Olsem Krais

19. (a) Wanem samting i insait long pasin bilong bilip? (b) Yumi mas mekim wanem bilong amamasim Jehova?

¹⁹ Ol aposel tu i luksave olsem ol i mas i gat bilip bambai ol inap strongim bel. Ol i tokim Jisas: “Yu mas mekim bilip bilong mipela i kamap bikpela moa.” (Ritim Luk 17:​5, 6.) Pasin bilong bilip em i olsem: Man i mas save olsem God i stap. Na tu, em i mas kisim pasin bilong pas gut tru wantaim Jehova, wankain olsem liklik pikinini i pas gut wantaim gutpela papa bilong em. Holi spirit i kirapim Solomon long tok: “Pikinini, sapos yu kisim gutpela tingting na save, bel bilong mi bai i gutpela tru. Na mi bai amamas moa yet long harim stretpela tok bilong yu.” (Snd. 23:​15, 16) Olsem tasol, sapos yumi strongim bel na bihainim ol stretpela stiatok, dispela bai amamasim Jehova, na i kirapim yumi long strongim bel moa yet. Olsem na oltaim yumi mas bihainim pasin bilong Jisas na strongim bel long bihainim stretpela pasin!

[Futnot]

Yu Inap Stori Long Dispela?

• Maski yumi gat sin, wanem samting bai helpim yumi long bihainim tok?

• Wanem samting i kamapim klia olsem bilip bilong yumi em i samting tru, na i no giaman? Olsem wanem dispela inap helpim yumi long strongim bel?

• Wanem ol gutpela samting bai kamap sapos yumi bihainim tok na strongim bel olsem Krais i bin mekim?

[Piksa long pes 13]

Yu redim bel long sakim ol traim?

[Piksa long pes 15]

Olsem Jisas, bilip inap kirapim yumi long strongim bel