‘Sanap Strong na No Ken Pret!’
“Bel bilong yupela i ken i stap strong. Mi winim pinis strong bilong dispela graun.”—JON 16:33.
1. Ol Israel bai bungim ol birua long Kenan, olsem na ol i kisim wanem tok bilong strongim ol?
TAIM ol Israel i laik brukim wara Jordan na go insait long Graun Bilong Promis, Moses i tokim ol: “Yupela i mas sanap strong na i no ken guria na pret long ol. God, Bikpela bilong yumi, bai i stap wantaim yupela.” Bihain Moses i singautim Josua, em i gat wok long bringim ol Israel i go long Kenan, na long Josua yet Moses i kamapim gen dispela tok long sanap strong na no ken pret. (Lo 31:6, 7) Bihain Jehova yet i strongim Josua na i tok: “Sanap strong na yu no ken pret . . . Sanap strong na yu no ken pret na surik.” (Josua 1:6, 7, 9) Tok hia i kam long taim stret. Ol Israel i mas i gat strongpela bel, long wanem, hapsait long wara Jordan ol bai bungim ol birua i gat bikpela strong.
2. I stap bilong yumi long nau i wanem kain? Yumi mas i gat wanem samting?
2 Long nau, i no longtaim na ol Kristen tru bai go insait long nupela taim God i tok promis long en, na olsem Josua, ol tu i mas i gat strongpela bel. (2 Pita 3:13; KTH 7:14) Tasol i stap bilong yumi i narapela kain long i stap bilong Josua. Josua i bin pait wantaim ol spia na bainat. Pait bilong yumi em long samting bilong spirit, na no gat wanpela taim yumi yusim ol samting bilong pait tru tru. (Aisaia 2:2-4; Efesus 6:11-17) Na tu, Josua i bin i gat wok long insait long planti bikpela pait bihain long em i go insait long Graun Bilong Promis. Tasol ol bikpela pait bilong yumi em long nau—paslain long yumi go insait long nupela taim. Bai yumi skelim sampela samting i olsem as na yumi mas i gat strongpela bel.
Bilong Wanem Yumi Mas Pait Strong?
3. Baibel i tok wanem long nambawan birua bilong yumi?
3 Aposel Jon i tok: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” (1 Jon 5:19) Dispela tok i kamapim wanpela as na ol Kristen i mas pait strong long holimpas bilip bilong ol. Taim wanpela Kristen i holimpas bilip bilong em, i olsem Satan i no win. Olsem na Satan i raun olsem “wanpela laion i singaut strong” na i laik pretim na bagarapim ol gutpela Kristen. (1 Pita 5:8) Em i mekim pait long ol Kristen God i makim na ol lain i poromanim ol. (KTH 12:17) Bilong mekim dispela pait em i save yusim ol man em ol i save olsem ol i mekim wok bilong em, na ol man i no save long dispela samting. Man i mas i gat strongpela bel na bai em inap long sanap strong na sakim Satan na ol helpim bilong em.
4. Jisas i bin mekim wanem toksave? Ol Kristen tru i bin kamapim wanem kain pasin?
4 Jisas i save pinis olsem Satan na ol helpim bilong em bai strong tru long sakim gutnius, olsem na Em i toksave long ol lain bilong em: “Bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.” (Matyu 24:9) Truim bilong dispela tok i bin kamap long taim bilong ol aposel, na i kamap long nau tu. Tru tumas, pasin birua ol Witnes Bilong Jehova i bin karim ol hevi long en long taim bilong yumi i nogut tru wankain olsem ol man i bin mekim long ol lain bilong Jehova kirap long bipo yet. Tasol ol Kristen tru i gat strongpela bel maski ol i bungim ol hevi olsem. Ol i save olsem “man i pret long ol arapela man, pret bilong en i olsem wanpela umben em i taitim pinis na i pasim em yet.”—Sindaun 29:25.
5, 6. (a) Wanem sampela samting i olsem as na yumi mas i gat strongpela bel? (b) Ol gutpela Kristen i mekim wanem taim ol i gat traim long pasin bilong ol long sanap strong na no ken pret?
5 Pasin birua i stap na i gat ol narapela samting tu i mekim na yumi mas i gat strongpela bel. Sampela ol i hatwok long autim gutnius long ol man ol i no save long ol. Ol pikinini i skul i gat traim long ol i gat strongpela bel o nogat, em long taim tisa i tokim ol long mekim singsing bilong litimapim kantri o long mekim tok bilong givim bel long kantri o long plak. Kain tok olsem em i samting bilong lotu, olsem na ol pikinini Kristen i bin pasim tok long bel olsem ol bai bihainim pasin God i laikim, na gutpela piksa bilong ol i bin givim amamas long ol narapela.
6 Na tu, yumi mas i gat strongpela bel long taim ol birua i stiaim ol nius lain long mekim ol tok i nogutim ol wokboi bilong God o long taim ol i traim pasim lotu i tru long rot bilong ‘putim lo i tok orait long ol man i mekim nogut’ long ol. (Song 94:20) Orait yumi mas i gat wanem tingting taim niuspepa, redio, o TV i stori long ol Witnes Bilong Jehova, tasol tok bilong ol i kranki o i giaman tasol? Bai yumi kirap nogut long dispela samting? Nogat. Yumi save pinis ol samting olsem bai kamap. (Song 109:2) Na yumi no kirap nogut taim sampela i bilipim ol tok giaman na tok kranki ol i ritim, long wanem, “ol man i gat liklik save tasol, ol i save bilipim olgeta kain tok.” (Sindaun 14:15) Tasol ol Kristen i stap gut long ol narapela ol i no laik bilip nating long tok ol i harim long samting bilong ol brata bilong ol, na ol i no inap tru long larim tok bilong nogutim ol i kamap long nius i kirapim ol long lusim ol miting Kristen, o slek long wok autim tok, o daunim bilip bilong ol. Ol i kamapim klia ol i ‘stap wokman bilong God, [maski] sampela man i save litimapim nem bilong ol, na sampela i save daunim nem bilong ol. Sampela i save tok baksait long ol, na sampela i save tokim ol arapela man long ol i mekim gutpela pasin. Sampela man i ting ol i man bilong giaman, tasol nogat, ol i save mekim tok tru tasol.’—2 Korin 6:4, 8.
7. Wanem ol askim yumi ken givim long yumi yet bilong skelim gut bel na tingting bilong yumi?
7 Pol i rait long Timoti na i tok: “Dispela Spirit God i bin givim long yumi, em i no spirit bilong mekim yumi i pret. Nogat. Em i Spirit bilong givim strong long yumi . . . Olsem na yu no ken sem long autim tok bilong Bikpela bilong yumi.” (2 Timoti 1:7, 8; Mak 8:38) Yumi ritim pinis dispela tok, orait nau yumi ken askim yumi yet: ‘Mi save sem long ol bilip bilong mi, o mi gat strongpela bel? Long ples wok (o long skul), mi save tokaut long ol narapela olsem mi wanpela Witnes Bilong Jehova, o mi wok long haitim dispela samting? Mi sem long stap narapela kain, o mi amamas long ol narapela i luksave olsem mi narapela kain, long wanem, mi pas gut long Jehova?’ Sapos wanpela i pret long autim gutnius o long stap narapela kain, em i ken tingim tok Jehova i givim long Josua: “Sanap strong na yu no ken pret.” No ken lusim tingting long dispela samting, tingting bilong ol wanwok o ol wanskul bilong yumi i no bikpela samting, tingting bilong Jehova na Jisas Krais dispela tasol em i bikpela samting.—Galesia 1:10.
Rot Bilong Kisim Strongpela Bel
8, 9. (a) Olsem wanem ol Kristen bilong pastaim i gat traim long pasin bilong ol long sanap strong na no ken pret? (b) Pita na Jon i bin mekim wanem taim ol man i mekim ol tok bilong pretim ol? Wanem samting i bin kamap long ol yet na long ol brata bilong ol?
8 Olsem wanem yumi inap kisim strongpela bel i inapim yumi long holimpas bilip bilong yumi nau long dispela taim bilong planti hevi? Orait ol Kristen bilong pastaim i bin mekim wanem bilong kisim strongpela bel? Tingim ol samting i bin kamap taim ol bikpris na ol hetman long Jerusalem i tokim Pita na Jon long lusim wok bilong autim tok long nem bilong Jisas. Ol disaipel i tok nogat long dispela samting, na ol man i mekim tok bilong pretim ol na larim ol i go. Wantu ol i bung wantaim ol brata, na olgeta i beten wantaim na i tok: “Bikpela, yu mas tingting nau long olgeta tok ol i mekim bilong pretim mipela, na yu mas helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.” (Aposel 4:13-29) Jehova i harim beten bilong ol na strongim ol long rot bilong spirit holi, na olsem ol hetman Juda i bin tokaut long bihain, ol disaipel i bin autim tok bilong ol long “olgeta hap bilong Jerusalem.”—Aposel 5:28.
9 Nau yumi ken skelim gut samting i bin kamap long dispela taim. Taim ol hetman bilong Juda i mekim tok bilong pretim ol disaipel, dispela hevi i no mekim na ol disaipel i gat tingting long lusim wok, nogat. Ol disaipel i beten long ol bai i gat strong long mekim yet wok autim tok. Bihain ol i mekim wok i stret long beten bilong ol, na Jehova i strongim ol long spirit bilong em. Ekspiriens bilong ol i soim olsem tok bilong narapela samting Pol i bin raitim planti yia bihain i stret tu long olgeta Kristen em ol man i mekim nogut long ol. Pol i tok: “Krais i save strongim mi, na long strong bilong em mi inap mekim olgeta samting.”—Filipai 4:13.
10. Olsem wanem ekspiriens bilong Jeremaia i ken helpim ol lain husat i gat pasin bilong sem?
10 Tasol sapos wanpela man o meri i gat pasin bilong sem. Bai em inap strong long mekim wok bilong Jehova long taim ol man i birua long em? Yes, em inap tru long mekim olsem! Tingim tok bilong Jeremaia taim Jehova i makim em long mekim wok profet. Dispela yangpela man i bin tok: “Mi yangpela tumas.” Jeremaia i pilim olsem em i no fit long mekim wok. Tasol Jehova i strongim em olsem: “No ken tok olsem, yu yangpela tumas. Nogat. Taim mi salim yu i go long sampela lain man, orait yu mas i go long ol. Na olgeta tok mi givim yu, em yu mas autim. Yu no ken pret long ol, long wanem, mi stap wantaim yu na bai mi lukautim yu.” (Jeremaia 1:6-10) Jeremaia i bilip long Jehova, olsem na long rot bilong strong em i kisim long Jehova em i daunim pret, na long Israel em i kamap man bilong autim tok i gat strongpela bel.
11. Wanem samting i helpim ol Kristen long nau long bihainim pasin bilong Jeremaia?
11 Ol Kristen long nau em God i bin makim ol i holim wanpela wok i kain olsem wok Jeremaia i bin mekim na bikpela lain bilong ol “arapela sipsip” i helpim ol, na dispela lain Kristen ol i wok yet long autim tok long ol samting Jehova bai mekim, maski ol man i les, tok bilas long ol, na mekim nogut long ol. (KTH 7:9; Jon 10:16) Ol i kisim strong long tok Jehova i mekim long Jeremaia: “No ken pret.” Ol i no lusim tingting olsem God i bin givim wok long ol na ol i autim tok bilong em.—2 Korin 2:17.
Ol Gutpela Piksa Yumi Ken Bihainim
12. Jisas i mekim wanem na em i stap gutpela piksa tru long pasin bilong sanap strong na no ken pret? Em i tok wanem bilong strongim ol disaipel bilong em?
12 Sapos yumi tingim tingim long bel stori bilong ol narapela i gat strongpela bel olsem Jeremaia, dispela bai helpim wok bilong yumi long kisim pasin bilong sanap strong na no ken pret. (Song 77:12) Olsem: Taim yumi skelim wok autim tok bilong Jisas, yumi pilim tru pasin bilong em long no ken pret long taim Satan i bin traim em, na long taim ol hetman bilong Juda i birua long em. (Luk 4:1-13; 20:19-47) Strong bilong Jehova i mekim na Jisas i strong olgeta, na sotpela taim paslain long em i dai, em i tokim ol disaipel: “Long taim yupela i stap long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.” (Jon 16:33; 17:16) Sapos ol disaipel bilong Jisas i bihainim pasin bilong em, ol tu inap win. (1 Jon 2:6; KTH 2:7, 11, 17, 26) Tasol ‘bel bilong ol i mas stap strong.’
13. Pol i givim wanem tok long ol Filipai bilong strongim ol?
13 Sampela yia bihain long Jisas i dai, Pol na Sailas i kalabus long Filipai. Bihain, Pol i tokim kongrigesen long Filipai olsem: “Sanap strong na i stap wanbel, na long wanpela tingting tasol yupela i wok wantaim bilong kirapim ol manmeri long bilip long gutnius. Na mi bai save olsem ol birua bilong yupela ol i no inap mekim yupela i pret.” Bilong strongim ol long mekim olsem, Pol i tok: “Ol [man i mekim nogut tru long ol Kristen] bai i lus, tasol God yet bai i mekim yupela i stap gut tru. Harim. God i mekim gut pinis long yupela na em i larim yupela i mekim wok bilong Krais. Em i no larim yupela i bilip tasol long Krais. Nogat. Em i larim yupela i karim pen tu long nem bilong em.”—Filipai 1:27-29.
14. Pasin bilong Pol long no ken pret i bin kamapim wanem samting long Rom?
14 Taim Pol i rait long kongrigesen long Filipai, em i stap gen long kalabus, na dispela taim em long Rom. Tasol em i wok yet long autim tok long ol narapela na em i no pret. Dispela i kamapim wanem samting? Em i tok: “Olgeta lain soldia bilong lukautim haus bilong Sisar, na olgeta arapela man tu, ol i save pinis olsem ol i bin putim mi long kalabus, long wanem, mi mekim wok bilong Krais. Na bikpela lain bilong ol brata, ol i ting long mi stap long kalabus, na dispela i strongim bel bilong ol na ol i bilip strong long Bikpela. Na ol i lusim pret na ol i strong moa long autim tok bilong God.”—Filipai 1:13, 14.
15. Yumi inap painim we stori bilong ol narapela bilong strongim yumi long bihainim pasin bilong sanap strong na no ken pret?
15 Pasin bilong Pol i strongim yumi. Wankain olsem pasin bilong ol Kristen long nau i stap long hap we lotu o wanpela dikteta i bosim kantri, ol i sanap strong maski ol man i mekim nogut long ol. Stori bilong planti bilong ol dispela brata i bin kamap long ol Wastaua na Kirap! na long ol Yearbook of Jehovah’s Witnesses. Taim yu ritim stori long ol samting i bin kamap, tingim ol man em ol i kamapim stori bilong ol, ol i wankain olsem yumi yet; tasol taim ol bikpela hevi i painim ol, Jehova i givim strong long ol i winim strong bilong yumi man na ol i sanap strong. Yumi ken bilip tru long em bai mekim wankain samting bilong helpim yumi sapos samting i kamap na yumi mas i gat helpim olsem.
Pasin Bilong Yumi Long Sanap Strong na No Ken Pret i Amamasim Jehova na Givim Biknem Long Em
16, 17. Wanem samting inap helpim yumi long nau long kisim strongpela bel?
16 Sapos wanpela Kristen i sanap strong, long wanem, em i tingim tok i tru na stretpela pasin, em i gat strongpela bel. Sapos wanpela Kristen i mekim olsem, maski pret i stap long bel bilong em, orait em i gat strongpela bel moa yet. Yes, wanpela Kristen inap i gat strongpela bel sapos tru tru em i laik bihainim laik bilong Jehova, na em i strong long stap gut long God, na oltaim em i bilip long God i helpim em, na em i no lusim tingting olsem bipo Jehova i bin strongim planti ol narapela man i wankain olsem em yet. Na tu, taim yumi save olsem pasin bilong yumi long sanap strong na no ken surik i amamasim na givim biknem long Jehova, dispela i mekim yumi strong moa long yumi no ken lusim bilip. Yumi redi long karim hevi bilong ol man i tok bilas long yumi o mekim sampela pasin long yumi i nogut moa, long wanem, yumi laikim em tru.—1 Jon 2:5; 4:18.
17 No ken lusim tingting long dispela samting: Taim bilip bilong yumi i as na yumi karim pen na hevi, dispela i no makim olsem yumi bin mekim sampela rong. (1 Pita 3:17) Yumi karim pen na hevi, long wanem, yumi helpim wok king bilong Jehova, na mekim ol gutpela pasin, na yumi no insait long ol pasin bilong dispela graun. Pita i stori long dispela samting olsem: “Sapos yupela i mekim gutpela pasin na ol i paitim yupela, na yupela i karim dispela pen, orait God i laikim dispela pasin.” Na tu Pita i tok: “Sapos long laik bilong God sampela man i mas karim pen, orait dispela ol man i mas putim laip bilong ol long han bilong God na mekim ol gutpela pasin tasol.” (1 Pita 2:20; 4:19) Yes, bilip bilong yumi i amamasim God bilong yumi, Jehova, na i givim biknem long em. Em i gutpela as tru long bihainim pasin bilong sanap strong na no ken pret!
Taim Yumi Mas Toktok Wantaim Ol Bikman
18, 19. Taim yumi gat strongpela bel na sanap long ai bilong wanpela jas, i olsem yumi givim wanem tok long em?
18 Taim Jisas i tokim ol lain bilong em olsem ol man bai mekim nogut long ol, em i tok tu olsem: “Ol [man] bai i kotim yupela long ol kaunsil bilong ol, na ol bai i wipim yupela insait long ol haus lotu bilong ol. Ol bai i ting long daunim mi, na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu.” (Matyu 10:17, 18) Sapos man i gat wok long sanap long ai bilong wanpela jas o long wanpela hetman, long wanem, ol narapela i sutim tok giaman long em, orait em i mas i gat strongpela bel. Tasol taim yumi strongim bel na autim tok long ol dispela man, i olsem yumi mekim samting i hatwok i kamap olsem rot bilong inapim wanpela bikpela wok. I olsem yumi givim sampela tok long ol man i skelim yumi, em tok bilong Jehova i stap long Buk Song: “Yupela ol king, yupela putim gut yau na stretim pasin bilong yupela. Yupela ol hetman bilong graun, yupela harim dispela tok na yupela lukaut. Yupela i mas pret long God na aninit long em. Yupela i mas guria long em na amamas wantaim.” (Song 2:10, 11) Taim ol man i bin sutim tok giaman long ol Witnes Bilong Jehova long kot, planti taim ol jas i bin sapotim pasin bilong stap fri long mekim lotu, na yumi amamas long dispela samting. Tasol sampela jas i bin larim ol birua bilong yumi long bosim tingting bilong ol. Long ol jas olsem Baibel i tok: “Stretim pasin bilong yupela.”
19 Ol jas i mas save olsem lo bilong God Jehova i winim olgeta narapela lo. Ol i no ken lusim tingting olsem God Jehova na Jisas Krais bai skelim olgeta man, na ol jas tu. (Rom 14:10) Na maski wanpela jas bilong graun i mekim stretpela kot long yumi o nogat, i gat as tru na yumi sanap strong na no ken pret, long wanem, Jehova i helpim yumi. Baibel i tok: “Man i save bilip long God na pas tru long em, em i ken amamas.”—Song 2:12.
20. Bilong wanem yumi ken amamas sapos yumi karim hevi long ol man i mekim nogut long yumi na sutim tok giaman long yumi?
20 Long tok bilong em antap long maunten, Jisas i tok: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven. Ol man i bin mekim ol wankain pasin nogut long ol profet i bin i go paslain long yupela.” (Matyu 5:11, 12) Tru, yumi no laik bai ol man i mekim nogut long yumi, tasol samting i mekim yumi i amamas em pasin bilong yumi long sanap strong maski i gat pasin birua na ol tok giaman i kamap long nius. Em i makim olsem yumi mekim Jehova i amamas na bai yumi kisim gutpela pe. Yumi sanap strong na yumi no pret, dispela i soim olsem bilip bilong yumi i samting tru na i helpim yumi long save olsem God i orait long yumi. Tru tumas, dispela samting i kamapim klia yumi bilip tru long Jehova. Wanpela Kristen i mas bilip olsem long Jehova, olsem stori i kam bihain long dispela bai kamapim.
Yu Lainim Wanem Samting?
• Wanem ol samting long nau i olsem as na man i mas i gat strongpela bel?
• Yumi ken mekim wanem bilong kisim pasin bilong sanap strong na no ken pret?
• Husat i stap olsem gutpela piksa long pasin bilong sanap strong na no ken pret?
• Bilong wanem yumi laik bihainim pasin bilong sanap strong na no ken pret?
[Ol Piksa long pes 9]
Simone Arnold (nau em Simone Liebster) long Jemani, Widdas Madona long Malawi, na Lydia na Oleksii Kurdas long Yukren, ol i bin kamapim olsem ol i gat strongpela bel na ol i bin sakim Satan
[Ol Piksa long pes 10]
Yumi no save sem long gutnius
[Piksa long pes 11]
Pasin bilong Pol long sanap strong na i no pret taim em i stap long kalabus i bin helpim tru wok bilong autim gutnius
[Piksa long pes 12]
Sapos yumi strongim bel na mekim wok long Baibel bilong stori long wanpela jas long bilip bilong yumi, yumi autim tok man i mas harim