Go Klostu Long God

Jehova i Laik Bai Yumi Mekim Wanem?

Lo 10:​12, 13

BAI yu bihainim tok o yu no bihainim tok​—sampela taim i hatwok long mekim dispela disisen. Taim wanpela man i gat namba i mekim hatpela pasin o em i strong tumas long ol man i mas bihainim tok bilong em, ating ol bai bihainim tok, tasol ol i no amamas na mekim. Tasol God Jehova i laik bai ol lain i lotuim em ol i mas amamas long bihainim tok bilong em. Bilong wanem? Bilong bekim dispela askim, yumi ken skelim tok bilong Moses i stap long Lo 10:​12, 13.a

Taim Moses i stori long ol samting God i laik ol man i mas mekim, Moses i tok: “Harim gut wanem ol samting God, Bikpela bilong yumi, i tok yupela i mas mekim.” (Lo sapta 10 Ves 12) God i gat rait long tokim yumi long ol samting em i laik yumi mas mekim, long wanem, em i Bikpela King na As bilong laip na Man bilong helpim olgeta samting long i stap laip. (Song 36:9; Aisaia 33:22) Jehova i gat rait long tokim yumi long bihainim tok bilong em. Tasol em i no laik bai yumi bihainim tok bilong em, long wanem, yumi pilim olsem em i subim yumi, nogat. Em i laik bai yumi mekim wanem? Em i laik bai yumi “bihainim tru” tok long bel bilong yumi.​—Rom 6:17.

Wanem samting inap kirapim yumi long bihainim tok bilong God? Wanpela samting Moses i kolim, i olsem: “Yupela i mas aninit [“pret,” NW] long God.”b (Lo sapta 10 Ves 12) Dispela pasin bilong pret i no olsem yumi pret long samting nogut bai painim yumi, nogat. Em pasin bilong daun long God na rispek long em na long ol lo bilong em. Sapos yumi laikim tru God, bai yumi no mekim wanpela samting God i no laikim.

Wanem nambawan samting i mas kirapim yumi long bihainim tok bilong God? Moses i tok: “Yupela i mas laikim em [God] tru, na amamas tru wantaim bel na tingting bilong yupela long mekim wok bilong em.” (Lo sapta 10 Ves 12) I gat planti samting i insait long pasin bilong laikim God, na i no makim tasol ol samting yumi pilim long bel, nogat. Wanpela buk i tok: “Long tok Hibru ol tok bilong makim samting man i pilim long bel, sampela taim em inap makim tu ol pasin man i kamapim long ol samting em i pilim.” Sapos yumi laikim tru God, yumi bai mekim ol pasin em i laikim.​—Sindaun 27:11.

Yumi mas bihainim tok bilong God i go inap long wanem mak? Moses i tok: “Yupela i mas . . . bihainim olgeta tok bilong em [God].” (Lo sapta 10 Ves 12) Jehova i laik bai yumi mekim olgeta samting em i tokim yumi long mekim. Olsem wanem? Sapos yumi bihainim olgeta tok bilong God, dispela bai pasim yumi long mekim ol samting yumi laik mekim? Nogat tru.

Pasin bilong yumi long amamas long bihainim tok bai kamapim ol gutpela samting. Moses i tok: “Yupela i mas bihainim olgeta lo . . . nau mi givim long yupela. Sapos yupela i bihainim, bai yupela i ken stap gut.” (Lo sapta 10 Ves 13) Tru tumas, olgeta lo bilong Jehova​—olgeta samting em i laik yumi mekim​—ol i bilong helpim yumi long i stap gut. Ol dispela lo inap helpim yumi, long wanem, Baibel i tok: ‘God yet em i as bilong pasin laikim.’ (1 Jon 4:8) God i givim ol lo em ol i bilong helpim yumi long stap gut inap oltaim oltaim. (Aisaia 48:17) Taim yumi mekim olgeta samting Jehova i tokim yumi long mekim, bai yumi no bungim planti hevi long nau, na dispela bai opim rot long yumi kisim planti blesing tru aninit long Kingdom bilong em.c

Taim Jehova i tokim yumi long ol samting yumi mas mekim, bai yu bihainim tok o yu no bihainim tok? I gat wanpela samting tasol yumi mas mekim. Pasin bilong amamas long bihainim tru tok bilong em, dispela em i nambawan gutpela pasin long mekim. Dispela pasin bai helpim yumi long i go klostu moa long Jehova, em God i save laikim yumi na oltaim em i laik helpim gut yumi.

[Ol Futnot]