Skul Yumi Kisim Long Jisas

Long Sindaun Bilong Famili

Bilong famili i ken stap amamas, ol i mas i gat wanem tingting long marit?

Marit em samting i holi. Taim ol Farisi i askim Jisas sapos em i orait long katim marit o nogat, Jisas i tok: “Ating yupela i no bin ritim tok i stap long buk bilong God? Dispela tok i tok olsem, ‘Bipo tru taim God i wokim olgeta samting, em i wokim ol manmeri, na em i mekim ol i kamap man na meri. Na God i tok, “Olsem na man i save lusim papamama na i pas wantaim meri bilong en, na tupela i kamap wanpela bodi tasol.” ’ God i tok olsem na tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim. . . . Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” (Matyu 19:​4-6, 9) Taim tupela marit i bihainim ol skultok bilong Jisas na narapela i stap gut long narapela, olgeta long famili bai stap bel isi na amamas.

Olsem wanem pasin bilong laikim God i helpim famili long i stap amamas?

Jisas i tok: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru.” Orait, wanem namba 2 bikpela lo? Jisas i tok: “Yu mas laikim ol wantok [na ol man i stap klostu tru long yu​—famili bilong yu] olsem yu laikim yu yet.” (Matyu 22:​37-39) Olsem na rot bilong famili i ken stap amamas, em ol i mas pas gut wantaim God, long wanem, pasin bilong laikim God i save kirapim yumi long laikim narapela narapela.

Olsem wanem maritman na maritmeri inap helpim narapela narapela long i stap amamas?

Maritman i helpim meri bilong em long i stap amamas taim em i bihainim gutpela pasin bilong Jisas. Em i givim laip bilong em yet bilong helpim sios, olsem meri bilong em. (Efesus 5:25) Jisas i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol.” (Matyu 20:28) Jisas i no mekim hatpela pasin long ol man i stap aninit long lukaut bilong em, nogat, em i save mekim gutpela pasin i givim nupela strong long ol. (Matyu 11:28) Olsem na maritman i mas mekim wok bos long gutpela pasin we inap helpim olgeta long famili.

Gutpela pasin bilong Jisas inap helpim tu ol maritmeri. Baibel i tok: “Het bilong Krais em God.” Na em i tok tu olsem “het bilong meri em man bilong en.” (1 Korin 11:3) Jisas i no ting em yet i no gat wok long i stap aninit long God, nogat. Em i gat bikpela rispek long Papa bilong em. Em i tok: “Oltaim mi save mekim ol samting em i laikim.” (Jon 8:29) Taim pasin bilong laikim tru God na rispek long Em i as na meri i daun long wok bos bilong man bilong em, dispela i save mekim famili bilong em i stap amamas.

Ol papamama inap kisim wanem skul long tingting bilong Jisas long ol pikinini?

Jisas i givim sampela hap taim bilong stap wantaim ol pikinini na em i laik save long tingting bilong ol na ol samting ol i pilim long bel. Baibel i tok: “Jisas i singautim ol pikinini i kam klostu long em, na em i tokim ol disaipel olsem, ‘Yupela larim ol pikinini i kam long mi.’ ” (Luk 18:​15, 16) Wanpela taim ol man i tok bilas long sampela liklik mangi, long wanem, ol i tokaut long bilip bilong ol long Jisas. Tasol Jisas i tok amamas long ol dispela mangi, na em i tokim ol man i tok bilas long ol: “Ating yupela i no bin ritim dispela tok, ‘Ol liklik pikinini i save litimapim nem bilong [God].’ ”​—Matyu 21:​15, 16.

Ol pikinini inap kisim wanem skul long pasin bilong Jisas?

Jisas i soim gutpela pasin em ol pikinini i ken bihainim long laikim ol samting bilong lotu. Taim em i gat 12-pela krismas, papamama i lukim em i sindaun “insait long banis bilong tempel. Em i sindaun i stap namel long ol tisa. Em i wok long harim tok bilong ol, na long askim ol tu.” Dispela i bin mekim wanem long ol manmeri i harim tok? “Ol i kirap nogut long save bilong en na long tok em i bekim long ol.” (Luk 2:​42, 46, 47) Tasol bikpela save bilong Jisas i no mekim na em i hambak, nogat. Save bilong em i mekim na em i rispektim papamama bilong em. Baibel i tok: “Oltaim em i save bihainim tok bilong tupela.”​—Luk 2:51.

Bilong kisim sampela save moa, lukim sapta 14 bilong buk Tru Tru Baibel i Tok Wanem?a

[Futnot]