Yu Save Long Dispela?
Bilong wanem Baibel i tok olsem pasin pamuk i insait long pasin bilong lotuim giaman god Bal?
Ol lain Kenan i save lotuim god Bal, ol i bilip olsem em i save mekim ol gaden i kamapim planti kaikai na ol animal i kamapim planti pikinini. Wanpela buk (Manners and Customs in the Bible) i tok, “ol i save mekim pasin pamuk long ol ples lotu, ol i ting dispela bai kirapim god Bal na god meri Ashera long mekim maritpasin, na dispela bai mekim ol gaden i kamapim planti kaikai na ol animal i kamap planti.”
Ol lain Kenan i bilip olsem taim bikpela san i kamap na i no gat ren, dispela i makim olsem Mot, em god bilong pasim ren na kamapim dai, em i daunim Bal na Bal i go daun insait tru long graun. Tasol taim ren i pundaun, ol i bilip dispela i makim olsem Bal i kisim bek strong bilong em, na ol samting bilong gaden bai karim planti kaikai na ol animal bai kamap planti. Bilong amamas long taim bilong ren, ol Kenan i save mekim bung bilong amamas na ol i save mekim kain kain pasin pamuk nogut tru long dispela taim. Dispela stori i helpim yumi long save long as na ol Israel i lotuim giaman god Bal long Peor, ol i stat long “pamuk nabaut wantaim ol meri Moap.”—Namba 25:1-3.
Wanem mining bilong tok bilong Jisas taim em i tok ol saveman bilong lo na ol Farisi ol i olsem “matmat ol i bin penim long waitpela pen”?
Jisas i tokim ol saveman bilong lo na ol Farisi olsem ol i man bilong tupela maus na em i tok: “Yupela i olsem matmat ol i bin penim long waitpela pen. Ausait bilong matmat em i naispela bilong lukim, tasol long insait ol bun bilong man i dai pinis na olgeta samting i doti i pulap i stap.” (Matyu 23:27) Long taim bilong ren i pinis, long namba 15 de bilong mun Adar, em wanpela mun paslain long Pasova, ol Juda i save penim matmat long waitpela pen na bai ol man i ken lukim. Ren i save mekim na kala i lus.
Wanpela buk (The Jewish Encyclopedia) i stori olsem, ol i save penim ol matmat na bai “ol man i wokabaut long ol rot long taim bilong bung bilong Pasova” ol i ken lukim na abrusim matmat. Lo i stap long Namba 19:16 i tok sapos wanpela man i pas long bodi bilong man i dai, o pas long bun bilong man i dai pinis, o em i krungutim matmat, dispela man bai i stap doti inap 7-pela de. Sapos i gat sampela samting i mekim wanpela Israel i kamap doti, orait lo i tambuim em long mekim lotu. Sapos em i no bihainim dispela lo, em i mas i dai. (Wok Pris 15:31) Jisas i mekim dispela tok piksa sampela de paslain long Pasova, olsem na ol man i harim tok bilong em ol inap tingim yet dispela pasin bilong penim matmat i save kamap long olgeta yia. Tok bilong Jisas i kamapim klia olsem long ai bilong ol man ol saveman bilong lo na ol Farisi i mekim olsem ol i stretpela man, tasol ol i giaman, na sapos ol man i pas wantaim ol, ol bai kamap doti long ai bilong God.
[Piksa long pes 15]
Plet ston bilong god bal bilong laitning bilong 13 handet yia samting paslain long Krais
[Kredit Lain]
Musée du Louvre, Paris