Mekim Gut Bel Bilong Ol Man Bihain Long Wanpela i Kilim i Dai Planti Long Skul

FRAN pes bilong niuspepa i blakpela. I gat wanpela tok tasol long en, em dispela tok “Wai?” Planti manmeri i wok long mekim dispela askim bihain long wanpela yangpela mangi i gat 17 krismas i holim gan na i sutim ol manmeri long Winnenden long hap saut bilong Jemani. Em i kilim i dai 15 manmeri na bihain em i sutim em yet na kilim em i dai. Long olgeta hap long Jemani ol i pulim fleg i go antap inap long namel tasol bilong pos. Wantu dispela nius i go long olgeta hap bilong graun.

Winnenden em i wanpela naispela taun i gat ol gaden wain na ol diwai prut. Long Albertville Sekonderi Skul, moning bilong Mas 11, 2009, i wankain olsem ol narapela moning. Tasol long 9:30 a.m., ol samting nogut tru i kamap.

Wanpela yangpela mangi i kisim gan long rum slip bilong papamama bilong em na bringim i kam long skul em bipo em i bin skul long en. Wantu em i sutim na kilim i dai 9-pela sumatin na 3-pela tisa long 3-pela klasrum na long rot i go long ol klasrum, na em i sutim sampela moa na ol i kisim bagarap. Insait long sampela minit tasol, ol polis i kam kamap. Dispela mangi i ranawe i go long hap bilong wanpela haus sik bilong ol man i gat sik bilong tingting. Long dispela hap em i kilim i dai wanpela wokman bilong haus sik husat i save stretim ol samting. Em i go hansapim wanpela draiva na kisim em wantaim ka bilong en. Ol i raun long ka inap 40 kilomita, na draiva i ranawe. Long wanpela ples bilong salim ka, dispela yangpela man i sutim wanpela wokman na kastama na kilim ol i dai, na em i sutim 2-pela polisman i bihainim em na tupela i kisim bagarap. Taim ol polis i kam bungim em stret, em i sutim em yet long het bilong em.

Ol man i save long dispela yangpela man, ol i tok em i wanpela yangpela man husat i laik bai ol arapela i mas laikim em na em i laik bai em i gat ol pren. Wanem samting i kirapim em long mekim dispela pasin nogut? Ating em i gat sik bilong bel hevi, na em i save pilai wantaim wanpela kain gan (air gan) na em i save pilaim ol kompiuta gem i kamapim pasin bilong pait na bagarapim man. Tasol sampela i tok, planti tausen yangpela i save pilaim ol kain kompiuta gem. Na olsem wanem long ol lain em i sutim ol long gan? Em i makim stret husat em bai sutim, o em i sutim nating ol man? Ol man i gat kain kain tingting long as na em i sutim 8-pela yangpela meri na wanpela mangi. Tasol i no gat wanpela inap kamapim stret as na dispela yangpela mangi i mekim dispela pasin.

Wantu Ol i Mekim Ol Samting

Heike i tok: “Taim pikinini man bilong mipela i ringim mipela na tokim mipela olsem wanpela mangi i sutim ol lain long skul long gan, mi no inap bilip long dispela. Tasol taim mi harim krai bilong planti polis ka na ambiulens i spit i go, mi pret tru.” Ol polis i kam hariap long skul, olsem na ating dispela i pasim mangi long sutim planti lain moa long skul. Taim ol i kisim olgeta pikinini i kam ausait pinis long skul, ol lain bilong ambiulens, na ol dokta bilong tingting, na ol pasto i kam na i wok long toktok wantaim ol pikinini na helpim ol.

Ol ripota i kam kwiktaim long skul, na ol i laik inteviuim ol sumatin, em tingting bilong planti i paul yet. Wanpela sumatin i kaunim ka bilong ol niuslain bilong TV na em inap olsem 28 ka bilong 26 narapela narapela TV stesin em ol i pak i stap long fran bilong skul. Ol niuslain i resis long kisim ripot, na dispela i mekim na ol i kamapim kain kain stori em ol i no sekim sapos stori i tru o nogat. Long dispela de stret em hevi i kamap, wanpela ripota i go lukim famili bilong wanpela yangpela meri i bin i dai, na em i askim ol long givim em sampela piksa bilong dispela yangpela meri. Na sampela ripota i baim ol sumatin bilong kisim poto bilong ol. Dispela bikpela hevi i mekim na sampela ripota i tingting tumas long kisim stori hariap winim ol arapela ripota, na ol i no soim rispek na tingim ol lain em hevi i painim ol.

Long taim kain hevi olsem i kamap, ol man i save go long lotu bilong kisim bel isi na bilong kisim save long as na ol kain hevi i save kamap. Long dispela de hevi i kamap, planti lotu i bung wantaim na lotu. Planti manmeri i amamas long helpim ol i kisim. Tasol ol manmeri em ol i laik kisim bel isi long rot bilong Tok Bilong God o ol i laik painim bekim bilong ol askim ol i gat, ol i bel hevi. Wanpela famili i go long fiuneral bilong wanklas bilong pikinini man bilong ol. Mama i tok: “Wanpela bisop i stori long ol hevi i painim Jop. Mi wet long em bai tokim mipela long ol samting mipela inap lainim long stori bilong Jop, o em bai kamapim sampela tok bilong mekim gut bel bilong mipela, tasol nogat, em i no mekim. Bisop i no stori long wanem as na ol hevi i painim Jop o wanem samting i painim Jop long bihain.”

Wanpela man i no amamas long ol tok nating em i harim. Inap 30 yia i go pinis, ol Witnes Bilong Jehova i bin stadi wantaim em long Baibel tasol em i bin stop long stadi. Nau em i kirap gen long go long ol miting bilong ol.

Valisa, em wanpela yangpela meri i gat 14 krismas na ol Witnes i save stadi wantaim em long Baibel. Em i stap long wanpela klasrum klostu long hap we dispela mangi i bin sutim ol lain. Taim em i harim pairap bilong gan, em i kirap beten long Jehova. Bihain, taim ol i askim em long olsem wanem em i karim dispela hevi, Valisa i tok ol samting i kamap i truim ol tok em i lainim long Baibel, olsem yumi stap long taim bilong las de i gat planti hevi nogut tru. (2 Timoti 3:​1-5) Tupela Witnes i wok long kamapim sampela gutpela tok bilong mekim gut bel bilong ol neiba bilong ol. Wanpela lapun meri i kam long tupela na i tok: “Planti man moa i mas mekim samting yutupela i mekim.” Dispela samting i kamap i nogut tru na yumi sori long ol man, tasol em i bin kirapim sampela manmeri long putim yau long ol tok Baibel i mekim long gutpela samting bai kamap bihain em ol man i ken bilip na wet long en.

Bel i Bagarap i Stap Longpela Taim

Tru, tok bilong mekim gut bel i no inap pinisim olgeta bel hevi bilong ol lain em dispela hevi i bin painim ol. I no gat wanpela tok inap pinisim tru pen bilong wanpela papa o mama em pikinini bilong em i dai, o daunim bel hevi bilong wanpela polisman taim em i go hariap long skul na em i kisim save olsem meri bilong em i wanpela bilong ol lain i bin dai.

Ol sumatin husat i no bin kisim bagarap, na ol famili bilong ol, bel na tingting bilong ol i bagarap stret. Vassilios i kalap i go ausait long windo taim dispela mangi i kirap long sut long gan. Em i tok: “Taim mi kalap i go ausait, mi beten long Jehova. Mi ting mi bai dai. Mi ting olsem dispela em laspela beten mi mekim.” Long ol wik bihain long dispela hevi, em i wok long kisim ol driman nogut na em i no laik toktok wantaim wanpela. Em i bel hevi long pasin bilong ol niuslain long resis long kamapim stori bilong dispela samting nogut i bin kamap, na pasin bilong ol lain i mekim planti askim bilong kisim save long ol samting na ol i no pilim hevi bilong ol lain. Bihain, em i pilim orait.

Jonas i stap long wankain klasrum olsem Vassilios na em i lukim 5-pela wanklas bilong en i dai. Em i tok: “Bihain stret long dispela taim, mi no pilim hatwok long stori long ol samting i bin kamap, em kain olsem wanpela piksa nogut. Tasol nau, i hatwok long mi stori long samting mi pilim. Filings bilong mi i save senis senis. Sampela taim mi no laik stori long dispela samting, tasol sampela narapela taim mi stori planti long en.” Em tu i save kisim ol driman nogut na em i no save slip gut.

Bihain long sampela de, ol i givim bek ol samting bilong ol sumatin i stap long klasrum. Ol saveman i tok lukaut olsem taim ol sumatin i lukim gen ol dispela samting, dispela inap kirapim ol long tingim gen dispela hevi. Pastaim Jonas i no laik tatsim saket, skul beg, na motobaik helmet bilong em. Em i save pret tru taim em i lukim wanpela man i luk wankain olsem dispela mangi i bin sutim ol lain long skul, o sapos em i lukim wanpela man i karim wankain beg olsem dispela mangi. Taim papamama bilong em i lukim wanpela piksa na pairap bilong gan i kamap, dispela i mekim em i pret nogut tru. Ol dokta bilong tingting i traim long helpim ol sumatin na bai ol dispela kain samting i no ken kirapim ol long tingim hevi i bin painim ol.

Jürgen, em papa bilong Jonas, em i save wok long dispela haus sik we dispela kilman i bin kilim i dai wanpela wokman. Em i tok olsem planti papamama na ol wanwok bilong em ol i wok long askim ol yet ol dispela askim: Bilong wanem dispela samting i kamap, na olsem wanem sapos em i bin sutim mi? Wanpela wokmeri long dispela haus sik em i bin stap long veranda bilong haus sik na lukim dispela kilman i wokabaut i go. Em i tingting olsem dispela man inap sutim em tu, na dispela i mekim na em i tingting planti tumas na em i mas kisim helpim long dokta bilong stretim tingting bilong em.

Wanem Samting i Helpim Sampela?

Wanem samting i bin helpim sampela long karim dispela hevi? Jürgen i tok: “Sampela taim i hatwok, tasol taim mi stap wantaim ol narapela mi amamas. Taim mi save olsem ol narapela i tingim mi, na i no mi wanpela tasol i karim dispela hevi, dispela i helpim mi.”

Jonas tu i amamas olsem ol arapela i tingim em: “Planti i salim kat na sampela tok bilong strongim mi. Sampela i kamapim ol skripsa bilong Baibel, na mi save ritim. Dispela i gutpela pasin.” Wanem narapela samting i helpim em? Em i tok: “Taim mi kirap long nait na mi pilim olsem mi no inap karim moa dispela hevi, mi save beten. Sampela taim mi save harim musik o sampela taim mi harim rekoding bilong nius Awake!” a Em i tok moa olsem Baibel i tokim yumi long as na dispela hevi i kamap. Satan i bosim dispela graun, na yumi stap long taim bilong pinis. Papa bilong em i tok dispela i save helpim ol long karim hevi.

Klostu Nau Bai i No Gat Moa Pen na Hevi

Insait long sampela de, ol manmeri i putim ol kandel, ol plaua, na ol pas long fran bilong skul. Kerstin i lukim olsem sampela manmeri i raitim long hap pepa dispela askim olsem wai na dispela hevi i kamap, na bilong wanem God i larim dispela hevi i kamap. Kerstin i pilim olsem wanpela i mas bekim ol dispela askim, olsem na em na 2-pela narapela Witnes i raitim wanpela pas na putim namel long ol dispela pas.

Long taim ol i wokim bung bilong tingim ol lain i bin dai, wanpela TV stesin i soim pas bilong Kerstin na ol i ritim kirap bilong pas i tok olsem: “Wai? Long taim bilong las de, ol man i wok long mekim dispela askim na moa yet dispela askim: God i stap we? Na bilong wanem em i larim dispela hevi i kamap?” Tasol sori tru, ol i no kamapim ol narapela tok bilong dispela pas.

Bilong wanem yumi tok sori tru? Long wanem, dispela pas i stori long husat i as bilong olgeta pen na hevi na i tok tu olsem God “bai mekim ol samting bilong rausim olgeta samting nogut ol man i bin mekim.” Na pas i tok moa: “Long laspela buk bilong Baibel, God i tok olsem em bai mekim drai wara i stap long ai bilong olgeta manmeri, na ol manmeri bai i no dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Na God Jehova bai kirapim bek ol man i dai pinis tu. Aninit long Kingdom bilong em, em klostu nau bai kam, bai i no gat pen na hevi moa na ol man bai i no kilim i dai narapela. God i tok promis olsem: “Harim. Mi mekim olgeta samting i kamap nupela.”​​—KTH 21:​4, 5.

[Futnot]

[Piksa long pes 12]

Jonas i kisim wanpela kat i gat dispela tok, “Mipela i tingim yu”

[Piksa Kredit Lain long pes 9]

Focus Agency/WPN

[Piksa Kredit Lain long pes 9]

© imagebroker/Alamy

[Piksa Kredit Lain long pes 10]

Foto: picture alliance

[Piksa Kredit Lain long pes 11]

Foto: picture alliance