Kisim Kain Pasin Laikim i No Inap Pinis

‘Pasin laikim i save sanap strong long olgeta hevi i kamap long en. Pasin laikim i no inap pinis.’​​—1 KO. 13:​7, 8, NW.

1. (a) Ol man i save stori olsem wanem long pasin laikim? (b) Planti man i save laikim husat na laikim wanem samting?

I GAT planti buk na nius i stori long pasin laikim. Ol man i bin litimapim tru dispela pasin, na i stori long en long ol singsing bilong ol. Pasin laikim em wanpela samting ol man i laik bai ol narapela i mas mekim long ol. Tasol ol buk na ol muvi i kamapim ol stori nating long pasin laikim i stap namel long man na meri, na ol dispela kain buk samting i pulap long ol stua. Tasol sori tru, ol man i no gat pasin bilong laikim tru God na laikim ol arapela man. Yumi wok long lukim truim bilong ol tok profet bilong Baibel long ol samting bai kamap long dispela taim bilong las de. Ol man i ‘laikim ol yet tasol, laikim tumas mani, na laikim tumas kain kain pasin bilong amamas, na ol i no laikim God.’​​—2 Ti. 3:​1-5.

2. Baibel i givim wanem tok lukaut long pasin bilong laikim ol samting i no stret long laikim?

² Ol man inap soim pasin laikim long narapela, tasol Tok Bilong God i givim tok lukaut long yumi no ken laikim ol samting i no stret long laikim. Na Baibel i stori long ol samting nogut i save kamap taim kain pasin laikim olsem i kamap insait long bel bilong yumi. (1 Ti. 6:​9, 10) Yu inap tingim tok em aposel Pol i bin mekim taim em i stori long Demas? Maski Demas i bin poroman wantaim Pol, em i kirap long laikim ol samting bilong dispela graun. (2 Ti. 4:​10) Aposel Jon i bin givim tok lukaut long ol Kristen long dispela samting. (Ritim 1 Jon 2:​15, 16.) Sapos man i laikim dispela graun wantaim ol samting bilong en em ol i save stap sotpela taim tasol, dispela pasin i no poroman wantaim pasin bilong laikim God na ol samting em i kamapim.

3. Yumi gat wok long mekim wanem? Dispela i kamapim wanem ol askim?

³ Yumi stap long dispela graun, tasol yumi no insait long ol pasin bilong en. Olsem na yumi gat wok long abrusim tingting kranki ol man i holim long pasin laikim. Em i bikpela samting long yumi no ken larim pasin bilong laikim ol samting i no stret long laikim i trikim yumi. Sapos olsem, orait yumi mas kamapim na soim pasin bilong laikim husat? Wanem ol samting inap helpim yumi long kisim kain pasin laikim we inap karim olgeta hevi na i no inap pinis? Olsem wanem dispela pasin i helpim yumi long nau na i helpim i stap bilong yumi long bihain? Yumi mas kisim tingting bilong God long ol dispela samting na bai em i ken stiaim yumi.

Kisim Pasin Bilong Laikim Tru Jehova

4. Olsem wanem pasin bilong laikim tru God inap gro na kamap bikpela?

⁴ Bilong kisim pasin bilong laikim tru Jehova, em i kain olsem wok fama i mekim bilong redim graun na planim ol sid na helpim ol sid long gro. (Hi. 6:7) Na olsem tasol, pasin bilong yumi long laikim God i mas gro na kamap bikpela. Bilong dispela samting i ken kamap, yumi mas mekim wanem? Yumi mas redim gut bel bilong yumi, we yumi bin planim sid bilong tok i tru bilong Kingdom long en. Yumi ken mekim olsem long rot bilong givim bel long stadi long Tok Bilong God bambai yumi ken save gut moa long Em. (Kl. 1:​10) Pasin bilong go oltaim na bekim tok long ol miting bilong kongrigesen, dispela tu bai helpim yumi long kisim sampela save moa. Olsem wanem? Yumi wan wan i save wok strong oltaim bilong kisim sampela save moa?​​—Snd. 2:​1-7.

5. (a) Olsem wanem yumi ken kisim save long ol bikpela pasin bilong Jehova? (b) Yumi ken tok wanem long savetingting, strong, na stretpela pasin bilong God?

⁵ Long rot bilong Tok bilong em, Jehova i kamapim klia ol pasin bilong em. Taim yumi wok long stadi long Baibel na kisim save long Jehova, bai yumi amamas moa long ol pasin bilong em​—em stretpela pasin, bikpela strong, savetingting, na pasin laikim bilong em, em pasin i nambawan tru. Jehova i kamapim stretpela pasin long olgeta samting em i mekim na long lo bilong em, em lo i stret olgeta. (Lo 32:4; Sng. 19:7) Yumi ken tingim ol samting Jehova i bin wokim na pilim tru gutpela savetingting bilong em. (Sng. 104:24) Ples antap na graun tu i kamapim klia olsem Jehova em i As bilong bikpela strong na kain pawa i no inap pinis.​​—Ais. 40:26.

6. Olsem wanem God i bin kamapim pasin laikim long yumi? Dispela i bin mekim wanem long yu?

⁶ Yumi ken tok wanem long nambawan bikpela pasin bilong God, em pasin laikim? Dispela pasin i save go long olgeta hap na i mekim sampela samting long yumi olgeta. Em i bin kamapim dispela pasin laikim taim em i givim Pikinini bilong em olsem pe bilong baim bek ol man. (Ritim Rom 5:8.) Dispela ofa i bilong helpim olgeta lain man, tasol ol man husat i mekim ol samting bilong soim olsem ol i pilim dispela pasin laikim bilong God na ol i bilip long Pikinini bilong em, ol tasol bai kisim helpim long dispela ofa. (Jo. 3:​16, 36) God i givim Jisas olsem ofa bilong tekewe sin bilong yumi, na dispela pasin bilong em i mas kirapim yumi long laikim tru God.

7, 8. (a) Yumi mas mekim wanem bilong soim olsem yumi laikim tru God? (b) Wanem samting i save painim lain bilong God, tasol ol i save bihainim yet ol lo bilong em?

⁷ Olsem wanem yumi ken kamapim pasin bilong laikim God, bilong soim olsem yumi pilim tru ol samting em i bin mekim bilong helpim yumi? Baibel i bekim olsem: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jo. 5:3) Yes, pasin bilong laikim tru God Jehova i kirapim yumi long bihainim ol lo bilong em. Dispela em i wanpela as na yumi save autim tok long nem na Kingdom bilong em, em dispela wok i save helpim ol man. Taim bel bilong yumi i kirapim yumi long mekim olsem, dispela i kamapim klia olsem stretpela tingting i kirapim yumi long bihainim ol lo bilong God.​​—Mt. 12:34.

⁸ Ol brata bilong yumi long olgeta hap graun i strong long bihainim ol lo bilong God, maski ol man i les long harim o ol i sakim tok bilong Kingdom. Ol i no givap long mekim tru wok autim tok. (2 Ti. 4:5) Na tu, yumi laik autim tok na helpim ol narapela long kisim save long God, na yumi laik bihainim tu olgeta arapela lo bilong em.

As na Yumi Laikim Bikpela Jisas Krais

9. Jisas i bin karim wanem ol hevi? Wanem samting i kirapim em long karim ol dispela hevi?

⁹ Yumi save laikim tru God, tasol i gat planti narapela as na yumi kisim pasin bilong laikim tru Pikinini bilong em. Yumi no bin lukim Jisas, tasol taim yumi kisim sampela save moa long em, yumi laikim em moa yet. (1 Pi. 1:8) Jisas i bin karim wanem ol hevi? Taim em i wok long mekim laik bilong Papa bilong em, ol man i birua nating long em, mekim nogut long em, sutim tok giaman long em, tok nogut long em. Ol i mekim tu ol narapela pasin nogut long em. (Ritim Jon 15:25.) Pasin bilong Jisas long laikim tru Papa bilong em i kirapim em long sanap strong taim ol dispela hevi i painim em. Na pasin laikim i kirapim em long givim laip bilong em olsem pe bilong baim bek planti manmeri.​​—Mt. 20:28.

10, 11. Taim yumi tingim ol samting Krais i bin mekim bilong helpim yumi, yumi laik mekim wanem?

¹⁰ Pasin bilong Jisas i kirapim yumi long mekim sampela samting. Taim yumi tingim ol samting Krais i bin mekim bilong helpim yumi, yumi laikim em moa yet. Yumi ol disaipel bilong em, olsem na yumi mas kisim na soim wankain pasin laikim bilong Krais bambai yumi ken wok strong yet long bihainim tok bilong em na autim tok bilong Kingdom na kamapim ol disaipel.​​—Mt. 28:​19, 20.

¹¹ Krais i laikim tru olgeta lain manmeri, olsem na yumi gat laik tru long inapim wok bilong yumi paslain long pinis i kamap. (Ritim 2 Korin 5:​14, 15.) Pasin laikim em Krais i kamapim i bikpela samting bilong em i ken inapim ol samting God i tingting pinis long mekim bilong helpim ol man. Na taim yumi bihainim pasin bilong Krais, yumi olgeta wan wan inap insait long dispela samting God i tingting pinis long mekim. Bilong dispela samting i ken kamap, yumi mas laikim tru God long bel olgeta bilong yumi. (Mt. 22:37) Taim yumi bihainim ol tok na ol lo bilong Jisas, yumi soim olsem yumi laikim em tru na yumi tingting strong long stap gut long wok bos bilong God maski wanem samting i kamap, wankain olsem Jisas i bin mekim.​​—Jo. 14:​23, 24; 15:10.

Kisim Pasin Laikim i Nambawan Tru

12. Taim Pol i toktok long “pasin i nambawan tru,” em i toktok long wanem pasin?

¹² Aposel Pol em i man bilong bihainim pasin bilong Krais. Em i bin bihainim gut lek mak bilong Krais, olsem na em inap tokim ol brata long bihainim pasin bilong em. (1 Ko. 11:1) Pol i bin tokim ol Kristen long Korin long wok strong long kisim ol presen bilong holi spirit, em ol presen i bin stap long taim bilong ol aposel​—olsem oraitim ol sik na mekim kain kain tokples​—tasol em i tokim ol olsem i gat wanpela samting i gutpela moa em ol i mas kisim. Long 1 Korin 12:​31, em i tok: “Nau mi laik tokim yupela long wanpela pasin i nambawan tru.” Ol ves i kamap bihain long dispela i soim olsem dispela pasin em pasin laikim i nambawan tru. Olsem wanem em i nambawan tru? Pol i mekim tok piksa bilong kamapim klia mining bilong tok em i mekim. (Ritim 1 Korin 13:​1-3.) Sapos em i gat gutpela save na em i mekim ol bikpela wok, tasol em i no gat pasin laikim, orait olgeta dispela samting i no inap helpim em liklik! Spirit bilong God i stiaim em na em i kamapim klia dispela bikpela samting na bai yumi ken kliagut long en!

13. (a) Wanem yiateks bilong 2010? (b) Olsem wanem yumi ken tok pasin laikim i no inap pinis?

¹³ Orait nau Pol i kamapim klia ol samting em man i gat pasin laikim i mas mekim na ol samting em i no ken mekim. (Ritim 1 Korin 13:​4-8.) Nau lusim hap taim bilong skelim yu yet, olsem yu save mekim ol samting em man i gat pasin laikim i mas mekim o nogat. Lukim laspela hap bilong ves 7 na namba wan sentens bilong ves 8. Em i gat kain tok olsem: Pasin laikim inap karim olgeta hevi. Pasin laikim i no inap pinis​—dispela em i yiateks bilong 2010. Long ves 8, Pol i tok ol presen bilong holi spirit, olsem mekim tok profet na mekim kain kain tokples​​—em ol i bin mekim taim kongrigesen Kristen i nupela​​—ol dispela presen bai pinis. Tasol pasin laikim bai stap inap oltaim. Jehova em i as bilong pasin laikim, na em i stap inap oltaim. Olsem na pasin laikim i no inap pinis. Dispela pasin bai stap inap oltaim olsem wanpela pasin bilong God husat i save stap oltaim.​​—1 Jo. 4:8.

Pasin Laikim Inap Karim Olgeta Hevi

14, 15. (a) Olsem wanem pasin laikim inap helpim yumi long sanap strong na karim ol hevi? (b) Bilong wanem wanpela yangpela brata i no laik lusim bilip bilong em?

¹⁴ Taim sampela hevi i painim ol Kristen o sampela samting i givim hatwok long ol, wanem samting i save helpim ol long sanap strong na karim hevi? Em pasin laikim em ol stiatok i bosim. Kain pasin laikim i no makim tasol olsem yumi redi long lusim ol samting bilong skin, nogat. Yumi mas stap gut long God na redi long lusim laip bilong yumi long wanem yumi lain bilong Krais. (Lu. 9:​24, 25) Tingim ol Witnes i bin stap gut long God, em ol i karim bikpela pen na hevi long ol banis kalabus nogut long taim bilong Wol Woa 2 na bihain long en.

¹⁵ Wanpela yangpela Witnes long Jemani, nem bilong em Wilhelm, i kamapim klia dispela samting. Em i no laik lusim bilip bilong em, na em i stap gut long God taim ol Natsi i laik sutim em na kilim em i dai. Long pas em i raitim bilong tok gutbai long famili bilong em, em i tok: “Nambawan bikpela samting em yumi mas laikim tru God, olsem Lida bilong yumi Jisas Krais i bin tok. Sapos yumi stap gut long em, em bai praisim yumi.” Bihain, long wanpela stori bilong nius Wastaua, wanpela long famili bilong em i tok: “Long taim bilong ol bikpela hevi, mipela famili i bin wok strong long putim pasin bilong mipela long laikim God i stap namba wan.” Planti brata long nau i kalabus long Amenia, Eritrea, Saut Korea, na long sampela narapela kantri, ol i gat wankain tingting olsem dispela famili. Ol dispela brata i sanap strong long pasin bilong ol long laikim tru Jehova.

16. Ol brata bilong yumi long Malawi i bin karim wanem ol hevi?

¹⁶ Long planti hap, ol narapela kain hevi i traim bilip bilong ol brata bilong yumi na pasin bilong ol long sanap strong. Inap 26 yia, ol Witnes Bilong Jehova long Malawi i bin karim hevi bilong gavman i tambuim wok bilong ol, na ol man i birua long ol, na mekim planti pasin nogut tru long ol. Tasol ol i bin sanap strong na karim hevi na dispela i bin kamapim gutpela samting. Taim pasin birua i kirap, i gat 18,000 Witnes long dispela kantri. Tasol 30 yia bihain, namba bilong ol i bin go bikpela inap 38,393. Wankain samting i bin kamap long sampela narapela kantri.

17. Wanem samting i kamap insait long sampela famili we papamama i no wanlotu? Olsem wanem ol inap karim dispela hevi?

¹⁷ Taim ol birua i mekim nogut long lain bilong God, dispela i putim hevi long ol. Tasol taim famili i mekim nogut long ol Kristen, dispela i putim bikpela hevi moa long ol. Ol wanhaus o ol wanblut inap putim presa long ol. Jisas i bin tok profet olsem dispela samting bai kamap, na tru tumas, dispela samting i bin painim planti Kristen. (Mt. 10:​35, 36) Ol yangpela i bin kisim hevi long papamama em ol i no wanbilip. Sampela papamama i bin rausim ol long haus, tasol ol Witnes i bin kisim ol i kam i stap long haus bilong ol. Sampela papamama i givim baksait olgeta long pikinini bilong ol. Wanem samting i bin helpim ol kain lain olsem long karim dispela hevi? Pasin bilong ol long laikim tru lain brata, na moa yet em pasin bilong ol long laikim tru Jehova na Pikinini bilong em.​​—1 Pi. 1:​22; 1 Jo. 4:​21.

18. Olsem wanem dispela kain pasin laikim i karim olgeta hevi inap helpim ol marit Kristen?

¹⁸ I gat planti narapela samting long laip we yumi mas kamapim kain pasin laikim i save karim olgeta hevi. Insait long marit, pasin laikim i helpim tupela poroman long rispektim tok bilong Jisas, olsem: “Samting God i pasim pinis, em man i no ken katim.” (Mt. 19:6) Taim ol marit Kristen i “painim planti hevi long laip bilong ol,” ol i mas tingim olsem Jehova i stap nambawan long marit bilong ol. (1 Ko. 7:​28) Baibel i tok pasin laikim i karim olgeta hevi, na man na meri marit husat i gat dispela pasin, ol i strong long stap wantaim na stap gut long marit bilong ol.​​—Kl. 3:​14.

19. Taim guria o bikpela win na ren samting i bagarapim ples, lain bilong God i save mekim wanem?

¹⁹ Pasin laikim i helpim yumi long karim olgeta hevi taim guria o bikpela win na ren samting i bagarapim ples. Dispela samting i kamap taim graun i guria long sauten Peru na saiklon Katrina i bagarapim Galf Bilong Amerika. Haus na ol kago samting bilong planti brata bilong yumi i bagarap. Pasin laikim i kirapim ol bratasista long olgeta hap long givim ol samting bilong helpim ol brata i kisim hevi, na ol volantia i helpim wok bilong sanapim gen haus bilong ol na stretim ol Haus Kingdom. Ol kain pasin olsem i kamapim klia olsem ol brata i save laikim na tingim narapela narapela long olgeta taim na long taim bilong kain kain hevi.​​—Jo. 13:​34, 35; 1 Pi. 2:​17.

Pasin Laikim i No Inap Pinis

20, 21. (a) Bilong wanem pasin laikim i win tru? (b) Bilong wanem yu tingting strong long kamapim pasin laikim i nambawan tru?

²⁰ Insait long lain bilong Jehova long nau, yumi lukim olsem em i savepasin long kamapim pasin laikim i nambawan tru. Tru tumas, dispela pasin i win tru maski wanem samting i kamap. Tingim tok aposel Pol i mekim bilong kamapim klia dispela tok i tru. Pastaim em i tok, ol presen bilong holi spirit bai pinis na kongrigesen Kristen bai kamap strong. Bihain em i tok: “Tasol nau pasin bilong bilip, pasin bilong wetim God i helpim yumi, na pasin laikim, dispela tripela pasin i stap yet. Tasol pasin i nambawan tru, em pasin laikim.”​—1 Ko. 13:​13, NW.

²¹ Bihain, ol samting yumi bilip long en bai kamap tru, olsem na bai i no gat wok moa long bilip long ol dispela samting. Taim ol samting yumi bilip na wet long en i kamap tru, bai yumi no gat wok moa long wet long en taim olgeta samting i kamap nupela. Tasol olsem wanem long pasin laikim? Dispela bai i no inap pinis, em bai stap. Taim yumi kisim laip oltaim, bai yumi lukim na kliagut moa long pasin laikim bilong God. Taim yu mekim laik bilong God na kamapim pasin laikim i nambawan tru na i no inap pinis, yu inap kisim laip oltaim.​​—1 Jo. 2:​17.

Bai Yu Bekim Olsem Wanem?

• Bilong wanem yumi mas was gut, nogut yumi laikim ol samting i no stret long laikim?

• Pasin laikim inap helpim yumi long sanap strong na karim wanem ol hevi?

• Olsem wanem yumi ken tok pasin laikim i no inap pinis?

[Rait long pes 27]

Yiateks bilong 2010 em: Pasin Laikim Inap Karim Olgeta Hevi. Pasin Laikim i No Inap Pinis.​​—1 Ko. 13:​7, 8.

[Piksa long pes 25]

Pasin bilong laikim God i kirapim yumi long autim tok

[Piksa long pes 26]

Pasin laikim i mekim na ol brata na sista bilong yumi long Malawi inap karim ol hevi