Sindaun Bilong Ol Kristen Bilong Pastaim

Ol i Sindaun Long Wanem Kain Haus?

“Mi no surik long autim olkain gutpela tok . . . long ol bung bilong ol manmeri na long olgeta haus.”​—APOSEL 20:20.

TAIM yu go insait long bikpela geit, wantu yu stap insait long wanpela taun long taim bilong ol aposel. Olsem planti narapela taun, dispela taun i stap antap long liklik maunten. Long antap tru yu inap lukim ol traipela waitpela haus i lait long san, na planti haus i gat gaden em bikpela banis i raunim. Ol maniman tru i sindaun long dispela hap. Long sait bilong maunten, i gat sampela haus moa em sais na stail bilong ol i narapela narapela. Ol dispela bikpela haus ol i bin wokim long ston na ol i gat 2-pela plua, ol i bilong lain i gat gutpela sindaun olsem ol bisnisman na papa graun. Ol dispela haus i stap long arere bilong ol rot em ol i bin wokim long ston. I go daun liklik i gat ol haus bilong ol man nating. Ol dispela haus i liklik na i luk olsem boks, na ol i pas pas long arere bilong ol liklik rot o ol i raunim wanpela liklik ples bung.

Taim yu wokabaut long ol rot i pulap long ol man, ol nois yu harim na ol samting yu smelim i kirapim tingting bilong yu long ol samting i wok long kamap. Ol meri i kukim kaikai na dispela i kamapim gutpela smel tru. Yu harim nois bilong ol animal na ol pikinini i pilai. Ol man i bisi tru insait long ol woksop i gat bikpela pairap na i smel.

Ol famili Kristen i mekim planti samting insait long ol dispela haus, olsem ol wok bilong wan wan de, kisim skul long tok bilong God, na mekim lotu.

Ol Liklik Haus Olsem ol haus long nau, sais na stail bilong ol haus i narapela narapela, na hap em famili i stap long en na hamas mani ol i gat, dispela i makim wanem kain haus ol i sindaun long en. Ol liklik haus (1) i gat wanpela rum i no gat lait, na em bilong famili olgeta. Ol i wokim planti liklik haus long ol brik em ol i bin wokim long graun malumalum na draim long san. Sampela bilong ol dispela haus ol i wokim long ol ston ol i bin katim. Planti taim ol i wokim dispela tupela kain haus antap long ston.

Ol wol insait long haus ol i simenim na plua ol i wokim long ston, na ol i mas wok long stretim stretim long olgeta taim. Ol i wokim wanpela liklik windo samting long rup o long wol bambai smok bilong haus kuk i ken go ausait. I no gat planti sia na tebol samting, ol i holim tasol ol samting ol i nidim.

Bilong wokim rup, ol i yusim ol bikpela plang, ol han bilong diwai, ol stik pitpit samting, na putim graun antap long en, na ol pos i sapotim rup. Ol i karamapim rup long strongpela graun na bai wara i no ken i go insait long haus. Bilong go antap long rup, man i mas yusim lata i stap ausait.

Tru, ol dispela haus i liklik, tasol em gutpela ples we ol Kristen inap i stap amamas na stap gut long ol samting bilong lotu, maski ol i stap rabis.

Lain i Gat Gutpela Sindaun Ol bikpela haus ol i wokim long ston na i gat tupela plua (2) em haus bilong ol lain i gat gutpela sindaun, na ol dispela haus i gat rum bilong ol visita tu. (Mak 14:​13-16; Aposel 1:​13, 14) Ol inap wokim ol miting long dispela bikpela rum antap, na planti taim ol i yusim dispela rum long taim bilong ol bikpela bung. (Aposel 2:​1-4) Ol dispela haus na ol haus i bikpela moa (3) ol i bilong ol bisnisman na ol papa graun, na ol i wokim long ol ston ol i bin katim na simenim wantaim. Ol i simenim ol wol insait long haus na plua em ol i bin wokim long ston, na ausait bilong haus ol i peintim long waitpela peint.

I gat ol step i go long ol rum i stap antap na long rup. Ol rup i flet i gat banis i raunim na bai man i no ken pundaun o narapela eksiden i kamap. (Lo 22:8) Long rup i gat malur we ol man i ken hait long san, na long belo samting taim san i hat, em i gutpela ples bilong stadi, tingim tingim long bel ol tok, beten, o malolo.​—Aposel 10:9.

Planti taim ol wanblut i kam i stap wantaim famili, na long ol dispela strongpela haus i gat ol bikpela rum, na spes bilong famili i ken sindaun wantaim, ol rum slip, na bikpela haus kuk na rum bilong kaikai.

Haus Bilong Ol Maniman Tru Ol i wokim ol dispela haus long stail bilong ol Rom (4) na sais, na stail bilong ol i narapela narapela. Ol bikpela rum i raunim bikpela rum bilong kaikai (triclinium), em ples we famili i mekim planti samting. Sampela haus i gat tupela o tripela plua (5) o ol i gat gaden em bikpela banis i raunim.

Ol gutpela haus i gat ol naispela sia na tebol samting, em sampela ol i bilasim long gol na tit bilong elefan. Ol dispela haus i gat tep wara na ples waswas. Ol i wokim plua long timba o long ston mabol i gat kala kala, na putim plang bilong diwai sida antap long ol wol. Na ol i gat wanpela kain stov bilong hatim haus. Long ol windo ol i putim ol hap plang bilong pasim ol raskol, na ol i putim ol keten bilong pasim ol man long lukluk i go insait. Long ol windo bilong ol bikpela banis ston, ol i katim ples bilong sindaun.​—Aposel 20:​9, 10.

Maski sais o stail bilong haus i wanem kain, ol Kristen bilong bipo i save singautim ol man i kam long haus na givim kaikai samting long ol. Olsem na ol wasman raun i no hatwok long painim famili husat bai lukautim ol gut, na ol i ken stap wantaim ol i go inap long ol i pinisim wok autim tok bilong ol long dispela taun.​—Matyu 10:11; Aposel 16:​14, 15.

“Haus Bilong Saimon Tupela Andru” Ol i singautim Jisas long i stap long “haus bilong Saimon tupela Andru.” (Mak 1:​29-31) Ating haus bilong ol dispela man bilong kisim pis i stap namel long ol haus bilong ol man nating (6) i raunim liklik ples bung ol i wokim long ston.

Ol dua na windo bilong ol dispela kain haus i lukluk i go long ples bung, we ol man i kuk, wokim bret, wilwilim wit, na kaikai na stori wantaim.

Ol haus long Kaperneam i gat wanpela plua na ol i wokim ol dispela haus long ston basal (ston bilong volkeno). Ausait i gat ol step i go antap long rup i flet. Bilong wokim rup ol i putim strongpela timba na antap long en ol i putim ol plang na pitpit na karamapim long strongpela graun o long ol tail. (Mak 2:​1-5) Insait long haus ol i wokim ol plua long ston, na planti taim ol i karamapim long ol mat.

I gat ol lain haus klostu long nambis bilong raunwara Galili na namel long ol dispela lain haus i gat ol liklik rot. Kaperneam i gutpela hap bilong ol man bilong kisim pis i ken sindaun long en, em ol i kisim mani long dispela wok.

“Long Olgeta Haus” Long taim bilong ol aposel ol haus i gat kain kain stail​—sampela haus i gat wanpela rum na ol i wokim long ol brik em ol i wokim long graun malumalum, na sampela haus i bikpela na gutpela tru na ol i wokim long ston.

Ol dispela haus i bilong lukautim ol famili, na tu, ol i ples bilong kisim skul long ol tok bilong God na mekim lotu. Ol i bung long ol haus bilong ol man bilong stadi long buk bilong God na bilong stap wantaim ol wanbilip. Ol tok ol i lainim insait long ol dispela haus, ol i mekim gutpela wok long en taim ol i mekim nambawan bikpela wok bilong ol, em wok bilong autim tok na skulim ol man “long olgeta haus” long hap em gavman Rom i bosim.​—Aposel 20:20.