Bilong Wanem God i Pait Long Ol Kenan?

“Yupela i mas kilim i dai ol Hit na ol Amor na ol Kenan na ol Peres na ol Hivi na ol Jebus, olsem Bikpela i bin tokim yupela.”​​—LO 20:17.

“Yupela i mas painim rot bilong i stap wanbel wantaim olgeta man.”​​—ROM 12:18.

YU TING dispela tupela ves bilong Baibel i pait wantaim? Planti man i hatwok long wanbel long dispela tok God i mekim long bagarapim ol Kenan, na tok Baibel i mekim long ol man i mas i stap wanbel wantaim.a (Aisaia 2:4; 2 Korin 13:11) Ol i ting dispela tupela tok i no stret wantaim.

Sapos yu inap toktok wantaim God long dispela samting, bai yu mekim wanem kain askim long em? Tingim 5-pela askim planti man i save mekim na ol bekim bilong Baibel.

1. Bilong wanem ol i rausim ol Kenan? Ol Kenan i sindaun long graun i no bilong ol. Bilong wanem i olsem? Inap 400 yia paslain long dispela, God i bin tok promis long bilipman Abraham olsem ol lain tumbuna bilong em bai kisim graun Kenan. (Stat 15:18) God i inapim dispela tok promis taim em i givim dispela hap graun long lain Israel, em ol i lain tumbuna bilong Abraham. Tru, sampela inap tok olsem ol Kenan i bin sindaun pinis long dispela hap graun, olsem na ol i gat rait long i stap long en. Tasol God em i King bilong heven na graun, olsem na em i gat rait long tok husat bai sindaun long wanem wanem hap.​—Aposel 17:26; 1 Korin 10:26.

2. Bilong wanem God i no larim ol Kenan i sindaun wantaim lain Israel? God i tokim ol Israel long ol i mas was gut long ol Kenan, na i tok: “Yupela i no ken larim ol i stap long kantri bilong yupela. Nogut ol i pulim yupela na yupela i mekim sin long mi. Sapos yupela i lotuim ol giaman god bilong ol, bai yupela i pundaun na bagarap olgeta.” (Kisim Bek 23:33) Bihain profet Moses i tokim lain Israel: “[Bikpela] bai i rausim ol, long wanem, ol i man nogut.” (Lo 9:5) Pasin nogut bilong ol dispela lain i nogut olsem wanem?

Pasin pamuk, lotu haiden, na pasin bilong kilim i dai ol pikinini olsem sakrifais i bikpela tru long Kenan. Saveman Henry H. Halley i tok, ol saveman bilong painim ol samting bilong bipo, ol i bin digim graun long dispela hap na kamautim “planti sospen graun i gat ol bun bilong ol pikinini em ol i bin kilim i dai olsem sakrifais long Bal [bikpela god bilong ol Kenan].” Em i tok moa: “Dispela hap olgeta em ples matmat bilong ol nupela bebi. . . . Hap lotu bilong ol Kenan em bilong mekim pasin pamuk long ai bilong ol god bilong ol; na tu, ol i save kilim i dai ol fesbon pikinini olsem sakrifais long ol dispela god. I luk olsem graun Kenan olgeta i kamap olsem Sodom na Gomora. . . . Ol saveman husat i save digim ol ples we ol taun bilong Kenan i bin stap bipo long en, ol i kirap nogut long God i no bin kirap hariap long bagarapim ol.”

3. Long dispela taim bipo i bin i gat ol narapela lain nogut tu i stap. Bilong wanem God i laik bagarapim ol Kenan tasol? Planti taim God i bin makim ol man nogut em i laik bagarapim. Long taim bilong Noa, taim ol man long “olgeta hap bilong graun ol i wok long pait na bikhet tasol,” God i kamapim bikpela tait i bagarapim olgeta manmeri. Wanpela famili tasol i abrusim bagarap​—em famili bilong Noa. (Stat 6:11; 2 Pita 2:5) God i bagarapim taun Sodom na Gomora taim pasin bilong ol manmeri i kamap “nogut tru.” (Stat 18:20; 2 Pita 2:6) Na em i bin tok strafe bai painim biktaun bilong Asiria, em Ninive, em taun bilong “kilim ol man i dai.” Tasol taim ol manmeri bilong dispela taun i tanim bel na lusim pasin nogut bilong ol, God i no bin bagarapim dispela taun. (Nahum 3:1; Jona 1:​1, 2; 3:​2, 5-10) God i bagarapim ol Kenan bambai em i ken lukautim ol Israel, em lain we Mesaia bai kamap long en long bihain.​—Song 132:​11, 12.

4. Taim God i bagarapim ol Kenan, yu ting dispela i pait wantaim pasin laikim bilong em? Tru, taim yumi ritim tasol dispela stori, yumi inap ting pasin bilong God long bagarapim ol Kenan, dispela i pait wantaim pasin laikim bilong em. (1 Jon 4:8) Tasol taim yumi skelim gut moa dispela samting, pasin laikim bilong em i kamap ples klia.

Long bipo yet God i save olsem ol Kenan i bihainim rot nogut. Tasol em i no bagarapim ol wantu tasol, nogat, em i isi long ol na larim ol i stap inap 400 yia, i go inap long taim ol i “mekim pinis” planti pasin nogut.​—Stat 15:16.

Taim pasin nogut bilong ol Kenan i kamap nogut olgeta na ol i no inap senisim pasin bilong ol, orait Jehova i bagarapim ol. Tasol maski i olsem, em i no bagarapim nating olgeta Kenan. Bilong wanem? Long wanem, sampela i redi long tanim bel. Ol dispela man i amamas long senisim pasin bilong ol, olsem Rahap na ol Gibeon, God i marimari long ol.​—Josua 9:​3-11, 16-27; Hibru 11:31.

5. Olsem wanem na God bilong pasin laikim inap kilim i dai man? Yumi ken pilim tru dispela askim, long wanem, yumi no amamas long tingim olsem man bai i dai. Tasol pasin laikim bilong God i kirapim em long bagarapim ol man nogut. Tingim dispela tok piksa: Sapos lek bilong man i gat sua nogut na sua inap bagarapim em, na ol dokta i no gat narapela rot bilong stretim, orait ol i mas katim na rausim dispela lek. Ol dokta i no amamas long mekim olsem, tasol gutpela dokta i save olsem sapos ol i no katim na rausim dispela lek, samting nogut moa bai kamap​—sua nogut bai kamap bikpela. Em i tingim tru sikman, olsem na em i mekim dispela samting em i no amamas long mekim.

Na olsem tasol, Jehova i no amamas long bagarapim ol Kenan. Em yet i tok: “Mi no save amamas long taim ol man bilong mekim sin, ol i dai.” (Esekiel 33:11) Na tu, em i laik bai Mesaia i kamap long lain Israel, em man husat bai opim rot bilong God i ken kisim bek ol man i bilip. (Jon 3:16) Olsem na God i no inap larim ol pasin nogut bilong ol Kenan i bagarapim lain Israel. Em i tokim ol Israel long rausim ol Kenan long dispela kantri. Taim God i mekim olsem, em i kamapim bikpela pasin laikim​—dispela pasin laikim i kirapim em long mekim samting em i no amamas long mekim, tasol em i mekim olsem bilong helpim ol man i lotu long em.

Dispela Stori i Helpim Yumi

Olsem wanem? Stori bilong God i bagarapim ol Kenan inap helpim yumi long nau? Yes, em i helpim yumi, olsem Rom 15:4 i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” Olsem wanem ol samting i bin kamap long Kenan inap skulim yumi na helpim yumi long bilip na wet long gutpela samting bai kamap?

Ol dispela stori i skulim yumi long planti samting. Olsem, taim Rahap na ol Gibeon i bilip long God, em i marimari long ol na em i no bagarapim ol. Dispela i helpim yumi long tingim olsem ol man husat i laik mekim ol samting God i laikim, ol inap mekim olsem, maski ol i bilong wanem lain na sindaun, o wanem kain pasin nogut ol i bin mekim long bipo.​—Aposel 17:30.

Ol stori bilong ol bagarap i bin kamap long Kenan i helpim yumi long bilip na wetim gutpela samting, na i soim ol samting God bai mekim klostu nau. Ol i strongim bilip bilong yumi olsem God bai i no larim pasin nogut i pinisim tru gutpela pasin. Nogat. Baibel i tok, klostu nau God bai bagarapim olgeta man nogut, tasol em bai kisim bek ol man i laikim em na bringim ol i go long nupela taim i gat stretpela pasin long en. (2 Pita 2:9; KTH 21:​3, 4) Long dispela taim, dispela gutpela tok bai kamap tru, olsem: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.”​—Song 37:34.

[Futnot]

[Blok long pes 14]

Baibel i Orait Long Woa Bilong Ol Man o Nogat?

God i tok ol Israel i mas bagarapim ol Kenan. Olsem wanem? Dispela i makim olsem ol woa bilong ol man long nau i no gat rong long en? Nogat, i no olsem. I gat 3-pela as bilong dispela samting:

▪ I no gat wanpela lain man long nau i olsem spesel lain bilong God. Taim lain Israel i sakim Jisas olsem Mesaia, ol i no stap moa olsem wokman bilong God, na tu, ol i no stap moa olsem man bilong karimaut strafe bilong God. (Matyu 21:​42, 43) Olsem na long ai bilong Jehova lain Israel i wankain tasol olsem ol narapela lain. (Wok Pris 18:​24-28) Kirap long dispela taim na i kam, i no gat wanpela lain inap tok olsem God i sapotim pait bilong ol.

▪ Jehova i no makim moa wanpela kantri o hap graun bilong lain i lotuim em ol i ken stap long en. Nogat. Ol wokboi bilong em ol i bilong “olgeta kantri na bilong olgeta kain skin” bilong dispela graun.​—KTH 7:9; Aposel 10:​34, 35.

▪ Jisas i kamapim klia olsem ol disaipel bilong em i no ken pait. Taim Jisas i mekim tok lukaut olsem ol Rom bai kam na pait long Jerusalem, em i tokim ol disaipel olsem ol i no ken stap na pait, nogat, ol i mas ranawe. Na ol i bin mekim olsem. (Matyu 24:​15, 16) Ol Kristen tru i no save holim ol samting bilong pait, nogat, ol i bilip long Kingdom Bilong God, em klostu nau bai pinisim olgeta pasin nogut long dispela graun.​—Daniel 2:44; Jon 18:36.

[Piksa long pes 15]

Stori bilong Rahap i soim olsem olgeta man husat i laik mekim samting God i laikim, ol inap mekim olsem