Yumi Bilong Jehova​—Dispela i Bikpela Pasin Marimari

“Yumi bilong Bikpela tasol.”​—RO. 14:8.

1, 2. (a) Yumi gat wanem gutpela samting? (b) Bai yumi skelim wanem ol askim?

WANPELA gutpela samting tru i painim lain Israel taim Jehova i tokim ol: “Olgeta manmeri i bilong mi, tasol mi bai makim yupela i stap lain manmeri bilong mi stret.” (Kis. 19:5) Long nau, ol bratasista bilong kongrigesen Kristen, ol tu i bilong Jehova. (1 Pi. 2:9; KTH 7:​9, 14, 15) Dispela em i wanpela gutpela samting tru na em inap helpim yumi inap oltaim oltaim.

² Yumi stap lain manmeri bilong Jehova na dispela em i gutpela samting tru, na tu, em i wanpela wok yumi mas mekim. Sampela inap tingting: ‘Bai mi inap mekim ol samting Jehova i laik bai mi mas mekim? Sapos mi mekim rong, em bai sakim mi? Sapos mi bilong Jehova, dispela bai mekim na mi no stap fri?’ I gutpela long skelim ol kain tingting olsem. Tasol pastaim yumi mas skelim gut wanpela narapela askim, olsem: Wanem ol gutpela samting i painim yumi taim yumi stap olsem lain manmeri bilong Jehova?

Yumi Bilong Jehova, Dispela i Kamapim Amamas

3. Rahap i wokim disisen long lotuim Jehova, na olsem wanem dispela i helpim em?

³ Ol manmeri husat i stap lain manmeri bilong Jehova, yu ting dispela i helpim ol? Tingim Rahap, em wanpela pamukmeri i stap long Jeriko bilong bipo. Em i bin kamap bikpela insait long lotu we ol i save lotuim ol god giaman bilong Kenan. Tasol taim em i harim ol stori long Jehova i helpim lain Israel long winim ol birua bilong ol, em i luksave olsem Jehova em i God tru. Olsem na em i redi long lukautim lain bilong God maski em inap i dai long dispela rot, na taim em i mekim olsem em i putim laip bilong em long han bilong ol. Baibel i tok: “Pamukmeri Rahap i lukautim ol man Josua i bin salim i kam na Rahap i salim ol i go bek long narapela rot. Olsem na God i kolim em stretpela meri.” (Jem. 2:25) Tingim ol gutpela samting i painim em taim em i kamap wanpela bilong lain bilong God em ol i stap klin, na Lo Bilong God i skulim ol long bihainim pasin laikim na stretpela pasin. Em i amamas tru long em i lusim pasin bilong em long bipo! Em i maritim wanpela man Israel na mekim bikpela long pikinini man bilong em, Boas, husat i kamap man bilong mekim laik bilong God.​—Jos. 6:25; Rut 2:​4-12; Mt. 1:​5, 6.

4. Rut i wokim disisen long lotuim Jehova, na olsem wanem dispela i helpim em?

⁴ Rut bilong Moap tu i wokim disisen long lotuim Jehova. Taim em i liklik yet, ating em i lotuim Kemos na ol narapela god bilong Moap, tasol em i kisim save long God tru, Jehova, na em i maritim wanpela man Israel husat i bin kam i stap long kantri bilong Rut. (Ritim Rut 1:​1-6.) Bihain, taim Rut na tambu susa bilong em, Orpa, i kirap wokabaut i go long Jerusalem wantaim tambu mama bilong ol, Naomi, em i tokim dispela tupela yangpela meri long i go bek long ples bilong ol. Em bai hatwok long ol i lain long sindaun long Israel. Orpa “i go bek long lain bilong en na long god bilong ol tumbuna bilong en,” tasol Rut, nogat. Em i bilip na em i save long em i laik stap insait long lain bilong husat. Em i tokim Naomi: “Yu no ken tokim mi long lusim yu na yu no ken pasim mi long i go wantaim yu. Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:​15, 16) Rut i wokim disisen long lotuim Jehova, olsem na Lo Bilong God i helpim em, em dispela lo i lukautim ol wido, ol rabisman, na ol man i no gat graun bilong ol yet. Aninit long lukaut bilong Jehova, em i stap amamas, na ol samting nogut i no painim em.

5. Ol manmeri i stap gut long wok bilong Jehova ol i stap olsem wanem?

⁵ Ating yu save long sampela husat i bin dediketim ol yet long Jehova na ol i mekim wok bilong Jehova inap planti yia tru. Askim ol long olsem wanem pasin bilong mekim wok bilong Jehova i bin helpim ol. Ol hevi i save painim yumi olgeta, tasol ol samting i kamapim klia olsem tok bilong man bilong raitim song i tru, em i tok: ‘Ol manmeri i putim Bikpela i stap God bilong ol, ol i ken amamas.’​—Sng. 144:15.

Ol Samting Jehova i Laik Yumi Mas Mekim

6. Bilong wanem yumi no ken pret olsem yumi no inap mekim ol samting Jehova i laik bai yumi mas mekim?

⁶ Ating yu bin tingting olsem yu inap mekim ol samting Jehova i laik bai yu mas mekim o nogat. Yumi inap ting olsem taim yumi stap wokboi bilong God, bihainim lo bilong em, na autim nem bilong em, dispela em i bikpela wok tumas. Olsem, taim God i salim Moses i go toktok long lain Israel na long king bilong Isip, Moses i pilim olsem em i no inap mekim dispela samting. Tasol God i gat stretpela tingting long ol samting em i laik bai Moses i mekim. Jehova i ‘toksave long [“lainim,” NW] em long ol samting em i mas mekim.’ (Ritim Kisim Bek 3:​11; 4:​1, 10, 13-​15.) Moses i kisim helpim em God i givim, olsem na em i kisim amamas long mekim laik bilong God. Jehova i gat wankain stretpela tingting long ol samting em i laik yumi mas mekim. Em i save yumi gat sin, na em i laik helpim yumi. (Sng. 103:14) Pasin bilong mekim wok bilong God olsem disaipel bilong Jisas, dispela i givim nupela strong long yumi na i no daunim yumi, long wanem, kain wok olsem i helpim ol narapela na i mekim bel bilong Jehova i amamas. Jisas i tok: “Yupela olgeta kam long mi na bai mi givim malolo long yupela. . . . Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. . . . Mi save mekim pasin isi long ol man na mi save daunim mi yet.”​—Mt. 11:​28, 29.

7. Bilong wanem yu ken bilip olsem Jehova bai helpim yu long mekim ol samting em i laik bai yu mas mekim?

⁷ Oltaim Jehova bai strongim bel bilong yumi sapos yumi askim em long givim strong long yumi. Olsem, Jeremaia i no man bilong tokaut strong long ol samting. Olsem na taim Jehova i makim em long kamap profet bilong Em, Jeremaia i tok: “Sori, God, Bikpela, mi yangpela tumas na mi no save long pasin bilong autim tok.” Bihain, em i tok: “Mi no ken autim tok moa long nem bilong yu.” (Jer. 1:6; 20:9) Jehova i strongim Jeremaia, na inap 40 yia em inap autim wanpela tok em ol man i no gat laik long harim. Planti taim Jehova i strongim bel bilong em olsem: “Mi yet mi stap wantaim yu. Na bai mi helpim yu na kisim bek yu.”​—Jer. 1:​8, 19; 15:20.

8. Olsem wanem yumi soim olsem yumi bilip long Jehova?

⁸ Jehova i bin strongim Moses na Jeremaia, na olsem tasol em bai helpim yumi long mekim ol samting em i laik bai ol Kristen i mas mekim long nau. Bikpela samting em yumi mas bilip olsem God bai helpim yumi. Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Snd. 3:​5, 6) Yumi soim olsem yumi bilip long Jehova taim yumi kisim helpim em i givim long rot bilong Tok bilong em na kongrigesen. Sapos yumi larim Jehova i stiaim olgeta wokabaut bilong yumi, i no gat wanpela samting inap mekim na yumi lusim em.

Jehova i Tingim Tru Olgeta Wan Wan Insait Long Lain Bilong Em

9, 10. Song 91 i tok promis long Jehova bai lukautim lain bilong em olsem wanem?

⁹ Taim sampela i tingting long ol bai dediket long Jehova o nogat, ating ol i tingting planti, nogut ol bai mekim bikpela rong, kisim nem nogut, na Jehova bai i no orait long ol. Tasol gutpela tru na Jehova i givim yumi olgeta samting yumi nidim bilong lukautim pasin bilong yumi long pas gut wantaim em. Yumi ken lukim tok em Song 91 i mekim long dispela samting.

¹⁰ Dispela song i kirap olsem: “Man i go long God Antap Tru [“ples hait bilong God Antap Tru,” NW], bilong God i ken lukautim em, em i stap klostu long God I Gat Olgeta Strong, na God i karamapim em. Bai dispela man i tok long Bikpela olsem, ‘Yu save banisim mi na yu was gut long mi. Yu God bilong mi. Mi save bilip long yu.’ Tru tumas, bai God i lukautim yu gut na samting i stap hait [“umben bilong man bilong kisim pisin,” NW] i no inap bagarapim yu.” (Sng. 91:​1-3) Long dispela hap, God i tok promis long em bai lukautim ol man husat i laikim em na i bilip long em. (Ritim Song 91:​9, 14.) Em bai lukautim ol olsem wanem? Jehova i bin lukautim sampela wokboi bilong em long bipo na bai bagarap i no ken painim ol​—sampela taim em i mekim olsem bambai lain em Mesaia bai kamap long en i no ken bagarap. Tasol planti narapela wokboi bilong em i bin kalabus, ol man i givim bikpela pen long ol, na kilim ol i dai taim ol i traim long bagarapim pasin bilong ol long stap gut long God. (Hi. 11:​34-39) Ol i gat strongpela bel na ol inap karim dispela hevi, long wanem, Jehova i lukautim ol bambai ol i ken stap gut long em. Olsem na yumi ken ting Song 91 em i wanpela tok promis olsem Jehova bai lukautim yumi long ol samting bilong spirit.

11. Dispela “ples hait bilong God Antap Tru” em wanem samting? God i save lukautim husat long dispela ples?

¹¹ Man bilong raitim song i tok long “ples hait bilong God Antap Tru,” na dispela i wanpela tok piksa na i makim olsem God bai lukautim ol man long ol samting bilong spirit. Insait long dispela ples, ol man i stap wantaim God ol i stap gut, na i no gat wanpela samting o wanpela man inap bagarapim bilip bilong ol na pasin bilong ol long laikim tru God. (Sng. 15:​1, 2; 121:5) Em i wanpela ples hait long wanem ol man i no bilip ol i no inap luksave long en. Long dispela ples, Jehova i save lukautim ol manmeri husat i tok: ‘Yu God bilong mi na mi save bilip long yu.’ Sapos yumi stap long dispela ples hait, i no gat wok long yumi wari olsem Satan, em “man bilong kisim pisin,” bai bagarapim yumi na nau God i no ken orait moa long yumi.

12. Wanem ol samting i laik bagarapim pasin bilong yumi long pas gut wantaim God?

¹² Wanem ol samting i laik bagarapim pasin bilong yumi long pas gut wantaim God? Man bilong raitim song i kolim sampela, olsem ‘bikpela sik i kamap long nait, na samting nogut i kamap long biksan na i laik bagarapim yumi.’ (Sng. 91:​5, 6) “Man bilong kisim pisin” i bin pundaunim planti long rot bilong kirapim laik bilong ol long bosim wokabaut bilong ol yet. (2 Ko. 11:3) Em i kirapim sampela long kisim pasin mangal, pasin antap, na pasin bilong laikim tumas mani kago, na long dispela rot em i pundaunim ol. Em i giamanim sampela long rot bilong pasin bilong litimapim kantri, tok bilong evolusen, na lotu giaman. (Kl. 2:8) Na planti i bin pundaun long pasin pamuk. Ol dispela samting i olsem wanpela bikpela sik na i bin mekim na planti milion i lusim pasin bilong laikim tru God.​—Ritim Song 91:​7-10; Mt. 24:12.

Lukautim Pasin Bilong Yu Long Laikim God

13. Olsem wanem Jehova i save lukautim yumi na bai ol samting i no ken bagarapim yumi long ol samting bilong spirit?

¹³ Jehova i save mekim wanem bilong lukautim lain bilong em na bai ol dispela samting i no ken bagarapim ol long ol samting bilong spirit? Man bilong raitim song i tok: “Bikpela bai i givim wok long ol ensel bilong was long yu long olgeta wokabaut bilong yu.” (Sng. 91:11) Ol ensel i save stiaim na sambai long yumi na bai yumi ken autim gutnius. (KTH 14:6) Na tu, ol elda Kristen i save holim strong ol tok bilong Baibel taim ol i skulim ol man, na long dispela rot ol i lukautim yumi na bai ol tok giaman i no ken paulim yumi. Ol inap helpim ol wan wan bratasista husat i hatwok long lusim sampela pasin bilong dispela graun. (Ta. 1:9; 1 Pi. 5:2) Na tu, “wokboi i gat gutpela tingting” i givim kaikai bilong spirit bilong lukautim yumi na bai yumi no ken pundaun long tok bilong evolusen, ol laik nogut bilong skin, pasin bilong bungim planti mani kago, kisim biknem, na planti narapela laik na tingting nogut. (Mt. 24:45) Wanem samting i bin helpim yu long sakim sampela bilong ol dispela samting nogut?

14. Olsem wanem yumi ken larim God i lukautim yumi?

¹⁴ Yumi mas mekim wanem bambai yumi ken stap yet long “ples hait” bilong God we em i save lukautim yumi? Oltaim yumi mas lukautim yumi yet na bai ol samting i no ken bagarapim skin bilong yumi, olsem eksiden, ol raskol, o bikpela sik. Na olsem tasol, oltaim yumi mas lukautim yumi yet na bai ol samting i no ken bagarapim yumi long ol samting bilong spirit. Olsem na oltaim yumi mas larim Jehova i stiaim yumi long rot bilong ol buk na nius bilong yumi na long ol miting Kristen na kibung. Yumi askim ol elda long givim skultok long yumi. Na ol narapela narapela pasin ol brata na sista i save kamapim i helpim tru yumi. Tru tumas, pasin bilong yumi long bung wantaim kongrigesen i helpim yumi long kisim savetingting.​—Snd. 13:20; ritim 1 Pita 4:10.

15. Bilong wanem yu ken bilip tru olsem Jehova inap lukautim yu na bai i no gat wanpela samting i mekim na yu no stap gut long ai bilong em?

¹⁵ Yumi ken bilip tru olsem Jehova inap lukautim yumi na bai yumi no mekim wanpela samting we inap mekim na yumi no stap gut long ai bilong em. (Ro. 8:​38, 39) Ol strongpela lain lotu na lain politik i laik mekim na bai yumi no pas gut wantaim God holi bilong yumi, i no olsem ol i laik kilim yumi i dai. Tasol Jehova i bin lukautim kongrigesen na dispela samting i no bin kamap. Tok promis bilong Jehova em i tru: “I no gat wanpela bilong ol dispela samting bilong pait inap bagarapim yu.”​—Ais. 54:17.

Husat i Mekim Yumi Stap Fri?

16. Bilong wanem dispela graun i no inap mekim yumi stap fri?

¹⁶ Sapos yumi bilong Jehova, yu ting dispela bai mekim na yumi no stap fri? Nogat, i no olsem. Tasol sapos yumi bilong dispela graun, bai yumi no stap fri. Dispela graun i stap longwe long Jehova na wanpela god nogut i bosim dispela graun na i save kalabusim ol man. (Jo. 14:30) Olsem, dispela graun bilong Satan i mekim wok long hevi bilong mani na bai ol man i no ken i stap fri. (Skelim KTH 13:​16, 17.) Sin tu i gat strong long kalabusim ol man. (Jo. 8:34; Hi. 3:13) Ol man i no bilip, ol i tok pasin bilong wokabaut long pasin i no stret wantaim tok bilong Jehova, dispela bai mekim na man i stap fri. Tasol ol man husat i bihainim tok bilong ol, ol bai lukim olsem ol i kalabus long sin na pasin nogut.​—Ro. 1:​24-32.

17. Jehova inap mekim yumi stap fri long wanem samting?

¹⁷ Tasol sapos yumi putim yumi yet long han bilong Jehova, em bai mekim yumi stap fri long olgeta samting inap bagarapim yumi. Long sampela rot, yumi olsem man husat i putim laip bilong em yet long han bilong dokta husat i save mekim gut ol operesen na inap oraitim man long wanpela bikpela sik i laik kilim em i dai​—i olsem man i kamap fri. Yumi olgeta i gat samting i laik kilim yumi i dai​—em sin yumi kisim long Adam. Sapos yumi putim yumi yet long han bilong Jehova, orait long rot bilong ofa bilong Krais, yumi inap abrusim ol samting nogut em sin i save kamapim na kisim laip i stap gut oltaim. (Jo. 3:36) Bilip bilong yumi long dokta bilong katim man bai i go bikpela taim yumi harim ol gutpela tok long wok bilong em. Na olsem tasol, pasin bilong yumi long bilip long Jehova bai i go bikpela taim yumi wok yet long kisim save long em. Olsem na yumi wok yet long stadi gut long Baibel, long wanem, dispela bai helpim yumi long laikim tru God na bai yumi no pret long stap olsem lain manmeri bilong em.​—1 Jo. 4:18.

18. Wanem samting bai painim ol man husat i bilong Jehova?

¹⁸ Jehova i larim olgeta man i stap fri long makim rot ol i laik bihainim. Baibel i tok: “Yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi.” (Lo 30:​19, 20) Em i laik bai yumi soim pasin bilong yumi long laikim em, na bilong mekim olsem yumi yet i mas makim rot bilong lotuim em. Taim yumi stap manmeri bilong God, dispela i mekim yumi stap fri na stap amamas.

19. Yumi bilong Jehova, bilong wanem dispela em i bikpela pasin marimari?

¹⁹ Yumi ol sinman, olsem na yumi no gutpela inap long yumi ken stap olsem lain manmeri bilong God husat i gutpela olgeta. Bikpela pasin marimari bilong God i mekim na yumi inap i stap olsem lain manmeri bilong em. (2 Ti. 1:9) Olsem na Pol i tok: “Sapos yumi stap laip, em i samting bilong Bikpela. Na sapos yumi dai, em tu i samting bilong Bikpela. Olsem na sapos yumi stap laip, o sapos yumi dai, yumi bilong Bikpela tasol.” (Ro. 14:8) Bai yumi no bel hevi long yumi bin wokim disisen bilong stap olsem lain manmeri bilong Jehova.

Bai Yu Bekim Olsem Wanem?

• Taim yumi bilong Jehova, dispela i helpim yumi olsem wanem?

• Bilong wanem yumi inap mekim ol samting Jehova i laik bai yumi mas mekim?

• Olsem wanem Jehova i save lukautim ol wokboi bilong em?

[Ol Piksa long pes 8]

Askim ol narapela long olsem wanem pasin bilong i stap manmeri bilong Jehova i bin helpim ol

[Piksa long pes 10]

Wanem sampela rot bilong Jehova long lukautim yumi?