Stap Olsem Disaipel Tru Bilong Krais

“Olgeta gutpela diwai i save karim gutpela kaikai. Na diwai nogut i save karim kaikai nogut.”​—MT. 7:17.

1, 2. Olsem wanem ol disaipel tru bilong Krais i stap narapela kain long ol Kristen giaman, na moa yet long dispela taim bilong pinis?

JISAS i tok ol Kristen giaman i stap narapela kain long ol Kristen tru. Dispela i kamap ples klia long pasin ol i mekim na long ol tok ol i lainim ol man long en. (Mt. 7:​15-17, 20) Tru tumas, ol samting ol man i putim long bel na tingting bilong ol, dispela i stiaim ol. (Mt. 15:​18, 19) Ol man i bihainim ol tok giaman, ol i karim “kaikai nogut,” na ol man i lainim ol tok i tru bilong Baibel, ol i karim “gutpela kaikai.”

² Dispela tupela kain kaikai i bin kamap ples klia long dispela taim bilong las de. (Ritim Daniel 12:​3, 10.) Ol Kristen giaman i no gat stretpela tingting long God na planti ol i giaman olsem ol i givim bel bilong ol long God. Tasol ol man i gat gutpela save long ol samting bilong spirit, ol i lotuim God “long strong bilong Holi Spirit na long pasin i tru.” (Jo. 4:24; 2 Ti. 3:​1-5) Ol i wok strong long kamapim ol pasin Kristen. Tasol olsem wanem long yumi wan wan? Taim yu skelim 5-pela mak bilong ol Kristen tru, askim yu yet: ‘Pasin bilong mi na ol tok mi skulim ol man long en i stret wantaim Tok Bilong God? Pasin na tok bilong mi i save mekim na tok i tru i kamap olsem gutpela samting long ai bilong ol man i wok long painim tok i tru?’

Bihainim Tok Bilong God Long Olgeta Samting

3. Jehova i amamas long wanem samting? Dispela i makim wanem samting long ol Kristen tru?

³ Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.” (Mt. 7:21) Bilong amamasim Jehova, i no inap long man i tok tasol olsem em i Kristen, nogat, em i mas mekim ol samting Kristen i mas mekim. Dispela pasin i stiaim olgeta samting long laip bilong ol disaipel tru bilong Krais, olsem tingting bilong ol long mani, wok mani, ol amamas, ol kastam na bikpela de, na marit na pasin bilong pas gut wantaim ol narapela man. Tasol ol Kristen giaman i bihainim pasin na tingting bilong ol man bilong dispela graun, em pasin bilong ol i wok long i go nogut moa.​—Sng. 92:7.

4, 5. Olsem wanem yumi inap bihainim tok bilong Jehova i stap long Malakai 3:18?

⁴ Profet Malakai i tok: “Bai yupela lukim gen olsem stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.” (Mal. 3:​18, NW) Taim yu skelim ol dispela tok, askim yu yet: ‘Pasin bilong mi i olsem pasin bilong ol man bilong dispela graun, o mi stap narapela kain? Mi save bihainim pasin ol wanwok o wanskul bilong mi i laikim, o mi strong long bihainim ol stiatok bilong Baibel, na tokaut long bilip bilong mi long taim i stret long mekim olsem?’ (Ritim 1 Pita 3:16.) Tru, yumi no laik mekim pasin olsem yumi yet i stretpela man tru, nogat, tasol yumi mas i stap narapela kain long ol man husat i no laikim Jehova na i no mekim wok bilong em.

⁵ Sapos yu lukim olsem yu mas stretim sampela pasin bilong yu yet, i gutpela yu beten long dispela samting na kisim strong long rot bilong stadi oltaim long Baibel, beten, na go long ol miting. Taim yu bihainim moa yet Tok Bilong God, bai yu kamapim planti “gutpela kaikai,” na “litimapim nem bilong [God].”​—Hi. 13:15.

Autim Tok Long Kingdom Bilong God

6, 7. Long wok bilong autim tok bilong Kingdom, olsem wanem ol Kristen tru i stap narapela kain long ol Kristen giaman?

⁶ Jisas i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Lu. 4:43) Bilong wanem Kingdom Bilong God i bikpela tok Jisas i autim? Em i save olsem bihain em bai kamap King bilong dispela Kingdom, na em wantaim ol brata bilong em, em God i bin makim ol na ol i kirap bek pinis, ol bai pinisim as bilong ol hevi bilong ol manmeri​—em sin na Satan. (Ro. 5:12; KTH 20:10) Olsem na em i tokim ol disaipel bilong em long autim tok bilong Kingdom i go inap long pinis bilong pasin nogut bilong dispela graun. (Mt. 24:14) Ol man i tok tasol olsem ol i disaipel bilong Krais, ol i no save mekim dispela wok​—ol i no inap long mekim. Bilong wanem i olsem? I gat tripela as bilong dispela: Namba wan, ol i no inap autim tok long samting ol i no kliagut long en. Namba tu, planti bilong ol i no gat pasin daun na strongpela bel em man i mas i gat bambai em inap karim hevi bilong tok bilas na pasin birua inap kamap long taim em i autim tok bilong Kingdom long ol man. (Mt. 24:9; 1 Pi. 2:23) Na namba tri, ol Kristen giaman i no gat holi spirit bilong God.​—Jo. 14:​16, 17.

⁷ Tasol ol disaipel tru bilong Krais, ol i save Kingdom Bilong God em wanem samting na em bai kamapim wanem ol samting. Na tu, ol i putim wok bilong dispela Kingdom i stap namba wan long laip bilong ol, na spirit bilong Jehova i helpim ol long autim tok bilong en long olgeta hap bilong graun. (Sek. 4:6) Olsem wanem? Yu save mekim dispela wok oltaim? Yu wok strong long kamap gutpela moa long wok bilong autim tok bilong Kingdom, olsem lusim sampela hap taim moa bilong mekim dispela wok o mekim wok autim tok bilong yu i kamap gutpela moa? Sampela i traim long mekim wok autim tok i kamap gutpela moa long rot bilong yusim gut Baibel. Aposel Pol i gat pasin bilong toktok gut wantaim ol man long Baibel, na em i tok: “Tok bilong God em i gat laip, na em i wok strong i stap.”​—Hi. 4:12; Ap. 17:​2, 3.

8, 9. (a) Wanem ol ekspiriens i kamapim klia olsem i gutpela long yusim Baibel taim yumi autim tok? (b) Olsem wanem yumi inap lain long mekim gutpela wok long Baibel?

⁸ Taim wanpela brata i autim tok long ol haus, em i ritim Daniel 2:44 long wanpela man Katolik na em i stori long olsem wanem Kingdom Bilong God bai kamapim bel isi na gutpela sindaun. Man hia i tok: “Mi amamas tru long yu opim Baibel na soim mi ol tok Baibel i mekim na yu no stori tasol long mi.” Taim wanpela brata i ritim skripsa long wanpela meri bilong lotu Grik Otodoks, meri i kamapim sampela gutpela askim. Dispela brata wantaim meri bilong em, ol i yusim Baibel bilong bekim ol askim. Bihain dispela meri i tok: “Yupela i save long as na mi laik toktok wantaim yupela? Yupela i kam long haus bilong mi wantaim Baibel, na yupela i ritim stret ol tok bilong en.”

⁹ Tru, ol buk na nius bilong yumi i bikpela samting na yumi mas tilim long ol man. Tasol Baibel em i nambawan tul bilong yumi long mekim wok. Olsem na sapos yu no save yusim Baibel planti taim tumas long wok autim tok, i gutpela sapos yu putim mak long mekim olsem. Ating yu ken makim sampela skripsa i kamapim klia Kingdom Bilong God em wanem samting, na olsem wanem Kingdom bai stretim ol hevi ol man long hap bilong yu i save tingting planti long en. Na redi long ritim ol dispela skripsa taim yu autim tok long ol haus.

Amamas Long Holim Nem Bilong God

10, 11. Long pasin bilong yusim nem bilong God, olsem wanem Jisas i stap narapela kain long planti man i tok ol i save bihainim em?

¹⁰ Baibel i tok: “Yupela i witnes bilong mi. Mi wanpela tasol mi God, Bikpela [“Jehova,” NW].” (Ais. 43:12) Nambawan gutpela Witnes Bilong Jehova, em Jisas Krais, em i ting dispela em i wanpela gutpela wok tru, long holim nem bilong God na autim dispela nem long ol narapela man. (Ritim Kisim Bek 3:15 na futnot; Jon 17:6; Hibru 2:12.) Jisas i autim nem bilong Papa bilong em, olsem na ol i kolim em “Man bilong autim stret olgeta tok bilong God.”​—KTH 1:5; Mt. 6:9.

¹¹ Tasol planti husat i tok ol i lain bilong God na Pikinini bilong em, ol i no gat rispek long nem bilong God na ol i rausim dispela nem long ol Baibel bilong ol. Na tu, ol bisop bilong Misin Katolik i kisim tok olsem ol i “no ken yusim o kolim nem bilong God em ol i raitim long 4-pela leta Hibru olsem YHWH,” long taim bilong mekim lotu.a Dispela kain tingting i nogut tru!

12. Long 1931, wanem samting i kamap na i klia moa olsem ol wokboi bilong God ol i lain bilong Jehova?

¹² Ol Kristen tru i amamas long yusim nem bilong God wankain olsem Krais na planti “manmeri bilong bipo” husat i bin stap paslain long em, em ol i bin yusim. (Hi. 12:1) Long yia 1931, taim ol wokboi bilong God i kisim nem ol Witnes Bilong Jehova, em i kamap ples klia moa olsem ol i lain bilong Jehova. (Ritim Aisaia 43:​10-12.) Olsem na ol disaipel tru bilong Krais i kamap “wanpela lain em nem bilong [God] i stap long ol.”​—Ap. 15:​14, 17, NW.

13. Yumi ken mekim wanem na bai yumi mekim ol samting ol man i holim nem bilong God ol i mas mekim?

¹³ Yumi wan wan i ken mekim wanem na bai yumi mekim ol samting ol man i holim nem bilong God ol i mas mekim? Wanpela samting em olsem: Yumi mas stap gut long wok bilong autim tok bilong God. Pol i tok: “ ‘Olgeta manmeri i askim Bikpela long helpim ol [“singaut long nem bilong Jehova,” NW], em bai i kisim bek ol.’ Tasol sapos ol i no bilip long em, olsem wanem bai ol i askim em long helpim ol. Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim? Na sapos ol i no salim ol man i go bilong autim tok, olsem wanem bai ol i autim?” (Ro. 10:​13-15) Na tu, long gutpela pasin yumi mas kamapim klia ol bilip giaman i save bagarapim nem bilong Man Bilong Wokim yumi, olsem bilip bilong helpaia em dispela bilip i mekim na i olsem God bilong pasin laikim i gat ol pasin nogut olsem bilong Satan.​—Jer. 7:31; 1 Jo. 4:8; skelim Mak 9:​17-27.

14. Taim ol man i kisim save long nem bilong God, sampela i bin mekim wanem?

¹⁴ Olsem wanem? Yu amamas long holim nem bilong Papa bilong yu long heven? Yu save helpim ol narapela man long kisim save long dispela nem holi? Wanpela meri long Paris, Frans, em i harim olsem ol Witnes Bilong Jehova i save long nem bilong God, olsem na em i askim wanpela Witnes long soim dispela nem long Baibel bilong dispela meri yet. Taim meri i ritim Song 83:​18, em i kirap nogut tru. Em i kirap stadi long Baibel na nau em i wanpela gutpela sista i mekim wok bilong God long narapela kantri. Taim wanpela meri Katolik husat i stap long Australia, em i lukim nem bilong God long Baibel long namba wan taim, em i amamas tru na i krai. Inap planti yia nau em i bin mekim wok painia oltaim. I no longtaim i go pinis, taim wanpela Witnes long Jameka i soim nem bilong God long wanpela meri long Baibel bilong dispela meri yet, em tu i amamas na i krai. Olsem na yumi mas amamas long holim nem bilong God, na olsem Jisas i bin mekim, autim dispela gutpela nem long olgeta man.

“Yupela i No Ken Laikim Ol Pasin Bilong Graun”

15, 16. Ol Kristen tru i gat wanem tingting long dispela graun? Yumi mas mekim wanem ol askim long yumi yet?

¹⁵ Baibel i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa.” (1 Jo. 2:15) Dispela graun na ol pasin nogut bilong en i birua long Jehova na holi spirit bilong em. Olsem na ol disaipel tru bilong Krais ol i no bilong dispela graun, tasol i no dispela samting tasol. Ol i no laikim tru pasin bilong dispela graun, na ol i save olsem tok bilong disaipel Jems i tru, em i tok, “man i laik pren wantaim ol pasin bilong graun, em bai i kamap birua bilong God.”​—Jem. 4:4.

¹⁶ I hatwok long bihainim tok bilong Jems taim yumi stap long dispela graun i gat planti samting bilong pulim yumi. (2 Ti. 4:10) Olsem na Jisas i beten askim God long helpim ol disaipel bilong em, olsem: “Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun.” (Jo. 17:​15, 16) Askim yu yet: ‘Mi wok strong na bai mi no ken stap man bilong dispela graun? Ol narapela i save bilong wanem mi abrusim ol bung na kastam em Baibel i no as bilong en, na ol bung i kamapim pasin nogut bilong dispela graun maski lotu haiden i no as bilong en?​—2 Ko. 6:17; 1 Pi. 4:​3, 4.

17. Wanem samting inap kirapim ol man i gat gutpela bel long kam insait long lain bilong Jehova?

¹⁷ Tru, ol man bilong graun bai i no laikim pasin bilong yumi long bihainim tok bilong Baibel, tasol dispela pasin inap kirapim tingting bilong ol man i gat gutpela bel. Tru tumas, taim ol dispela kain man i lukim olsem tok bilong Baibel i as bilong ol bilip bilong yumi na i stiaim olgeta wokabaut bilong yumi, i olsem ol i tokim ol Kristen God i bin makim, olsem: ‘Mipela i harim olsem God i stap wantaim yupela. Olsem na mipela i laik kamap wanlain wantaim yupela.’​—Sek. 8:23.

Soim Pasin Laikim Bilong Ol Kristen Tru

18. Wanem ol samting i insait long pasin bilong laikim tru Jehova na ol narapela man?

¹⁸ Jisas i tok: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Na namba 2 lo em i wankain olsem dispela. Em i olsem, ‘Yu mas laikim ol wantok [“ol arapela man,” NW] olsem yu laikim yu yet.’ ” (Mt. 22:​37, 39) Dispela pasin laikim (long tok Grik a·gaʹpe) em pasin we stretpela pasin i as bilong en, na i kirapim man long mekim wok em i mas mekim, na mekim ol pasin i stret wantaim ol gutpela stiatok. Tasol man i mas pilim dispela pasin long bel. (1 Pi. 1:22) Dispela pasin i narapela kain olgeta long pasin bilong tingim yu yet tasol, man i gat pasin a·gaʹpe, em i save mekim ol tok na pasin i helpim ol narapela na em i no tingim em yet.​—Ritim 1 Korin 13:​4-7.

19, 20. Stori long sampela ekspiriens i soim strong bilong pasin laikim Kristen.

¹⁹ Pasin laikim em wanpela pasin holi spirit bilong God i save kamapim, olsem na ol Kristen tru inap mekim ol samting ol narapela i no inap mekim, olsem ol i no insait long pasin bilong birua long ol man bilong narapela skin, ples, o wok politik. (Ritim Jon 13:​34, 35; Ga. 5:22) Ol man i olsem sipsip ol bai pilim tru taim ol i lukim dispela kain pasin laikim. Olsem, taim wanpela yangpela man Juda i go namba wan taim long miting Kristen, em i kirap nogut long lukim ol brata bilong lain Juda na lain Arap ol i lotu wantaim long Jehova. Dispela i mekim na em i kirap long i go oltaim long ol miting na em i kirap stadi long Baibel. Olsem wanem? Yu save soim kain pasin laikim olsem long ol brata bilong yu? Na yu save wok strong long tok welkam long ol nupela man i kam long Haus Kingdom, maski ol i bilong wanem kantri, skin, o sindaun?

²⁰ Yumi Kristen tru, olsem na yumi wok strong long soim pasin laikim long olgeta man. Long El Salvado, wanpela yangpela pablisa i stadi long Baibel wantaim wanpela meri Katolik i gat 87 krismas na i strong long lotu bilong em. Wanpela de, dispela meri i sik nogut tru na em i edmit long haus sik. Taim em i kam bek long haus, ol Witnes i kam lukim em na bringim kaikai i kam long em. Ol i mekim olsem inap wanpela mun. Tasol i no gat wanpela wanlotu bilong meri i kam lukim em. Wanem samting i kamap? Em i rausim olgeta imis bilong em, lusim lotu bilong em, na kirap stadi gen long Baibel. Em nau, pasin laikim Kristen i gat strong! Ol man bai pilim moa yet pasin laikim Kristen, winim ol tok yumi mekim.

21. Yumi ken mekim wanem na bai yumi kisim gutpela sindaun long bihain?

²¹ Ol man i giaman olsem ol i mekim wok bilong Jisas, klostu nau Jisas bai tokim ol olsem: “Mi no save liklik long yupela. Yupela ol man bilong mekim pasin nogut, yupela klia long mi.” (Mt. 7:23) Olsem na i gutpela sapos yumi kamapim ol pasin i givim biknem long Papa na Pikinini. Jisas i tok: “Man i harim dispela tok bilong mi na i bihainim, em i olsem wanpela man i gat gutpela tingting, na em i wokim haus bilong en antap long ples ston.” (Mt. 7:24) Yes, sapos yumi stap olsem ol disaipel tru bilong Krais, God bai amamas long yumi, na bai yumi kisim gutpela sindaun long bihain.

[Futnot]

Yu Tingim Yet?

• Olsem wanem ol Kristen tru i stap narapela kain long ol Kristen giaman?

• Kolim sampela pasin bilong ol Kristen tru.

• Yu inap putim mak long kamapim wanem ol pasin Kristen?

[Piksa long pes 13]

Oltaim yu save yusim Baibel long wok autim tok?

[Piksa long pes 15]

Ol narapela i save bilong wanem yu abrusim ol bung em Baibel i no as bilong en?