Man i Save Long Lotu i Tru Em i Gat Wok
“Ol man i harim tok bilong God na i bihainim, em ol i ken amamas.”—LUK 11:28.
YUMI mas save long lotu i tru. Tasol sapos yumi laikim tru ol samting i stret na i tru, orait taim yumi painim pinis lotu i tru, bai yumi mekim dispela i kamap namba wan samting long laip bilong yumi. Yumi no ken kisim save tasol long lotu i tru; em i mas bosim olgeta samting yumi mekim.—Song 119:105; Aisaia 2:3; lukim tu Aposel 9:2.
2 God i kamapim pinis laik bilong em na Jisas i makim olsem em i bikpela samting long yumi mas bihainim. Long pinis bilong tok em i mekim long maunten, em i tok yumi no ken ting olgeta man i kolim em Bikpela (em ol man i tok ol i Kristen) bai i go insait long Kingdom; ol man i bihainim laik bilong Papa bilong em, ol tasol bai go insait. Bai em i sakim ol narapela, long wanem, ol i “mekim pasin nogut.” Olsem wanem ol i mekim pasin nogut? Long wanem, Baibel i tok, ol i mekim sin sapos ol i no bihainim laik bilong God, na sin em i pasin nogut, em i pasin bilong sakim lo bilong God. (Matyu 7:21-23; 1 Jon 3:4; lukim tu Rom 10:2, 3.) Sapos man i save long lotu i tru, ating em i tok, ol man i lainim ol narapela long en ol i mekim gutpela wok, na em i litimapim nem bilong ol man i bihainim. Tasol em yet i gat wok—em yet i mas bihainim. (Jems 4:17) Sapos em i mekim, bai em i stap gutpela na kisim amamas em i no inap kisim long narapela rot.
3 Long tok i kamap paslain long dispela, yumi bin stori long 6-pela mak bilong lotu i tru. Olgeta wan wan i helpim yumi long save long lotu i tru na i makim ol wok yumi mas mekim. Olsem wanem ol i mekim olsem?
Yu Harim Tok Bilong God na Mekim Wanem?
4 Taim ol Witnes Bilong Jehova i lainim ol nupela man long Baibel, kwiktaim planti ol i save, tru tumas ol tok ol i lainim em tok bilong Baibel. Taim ol i gat askim, ol Witnes i no kamapim bilip bilong ol misin, o stori nating bilong ol tumbuna, o tingting bilong sampela bikman, na bekim askim bilong ol. Nogat. Ol i kamapim tok bilong Baibel, em Tok Bilong God. Taim ol nupela man i go long Haus Kingdom, ol i lukim olsem Baibel em i namba wan buk ol Witnes i skul long en. Ol man i laik save long tok i tru, kwiktaim ol i save, ol Witnes i stap amamas, long wanem, ol i kisim planti kaikai bilong spirit long Baibel.—Aisaia 65:13, 14.
5 Sapos yu save long dispela samting, yu mekim wanem? Sapos yu pilim as bilong dispela, yu no ken i stap nating, na yu no ken laik long i stap nating. Baibel i tok, ol man i “harim nating tasol” na ol i no “bihainim,” ol i ‘giamanim ol yet.’ (Jems 1:22) Ol i giamanim ol yet, long wanem, ol i no pilim. Tasol maski ol i tok ol i givim bel long God, sapos ol i no bihainim tok bilong em, ol i no givim bel tru long em. Maski ol i tok ol i bilip, sapos ol i no mekim wok tu, bilip bilong ol i olsem i dai pinis. (Jems 2:18-26; 1 Jon 5:3) Tasol man i givim bel tru long God na dispela i kirapim em long “bihainim tru” tok bilong God, em bai i amamas. Tru tumas, olsem Jisas i tok: “Ol man i harim tok bilong God na i bihainim, em ol i ken amamas.”—Jems 1:25; Luk 11:28; Jon 13:17.
6 Dispela amamas bai kamap strong moa taim yu kisim sampela save moa long laik bilong God na yu bihainim ol tok yu lainim. Bai yu wok strong long lainim ol tok bilong Baibel? Sampela tausen manmeri, bipo ol i no skul, ol i bin wok strong long lain long rit rait. Ol i mekim olsem, long wanem, ol i laik tru bai ol inap kaunim Baibel na lainim ol narapela long en. Sampela i kirap kwik long moningtaim bambai ol i gat hap taim long olgeta de bilong kaunim Baibel na ol buk na nius bilong Baibel, olsem Wastaua. Taim yu yet yu kaunim Baibel o lukim ol tok bilong Baibel em buk o nius yu stadi long en i kolim, yu mas wok long save gut long ol lo bilong Jehova, na ol tok bilong em bilong stiaim tingting bilong yumi na soim rot long yumi. Tingim gut ol samting ol wan wan hap tok i lainim yu long en, olsem long God, na long laik bilong em, na ol samting em i mekim long ol man. No ken hariap; larim dispela tok i go daun long bel. Tingim rot bilong yu ken bihainim moa yet ol dispela tok bilong God.—Song 1:1, 2; 19:7-11; 1 Tesalonaika 4:1.
Yu Givim Bel Olgeta Long Jehova?
7 Sampela milion manmeri ol i amamas taim ol i save, God tru em i no God Triwan. Ol man i bin tokim ol, tok bilong God Triwan em i wanpela “tok hait,” tasol olsem wanem ol i ken lotu long wanpela God ol i no inap save long em? Tok bilong God Triwan i mekim na bipo ol i no tingim tumas Papa (ol i no harim nem bilong em taim ol i go long lotu); ol i ting Jisas em i God na ol i lotuim em, o ol i lotuim Maria (long wanem, misin i lainim ol olsem Maria em i “Mama bilong God”). Tasol bel bilong ol i amamas tru long taim wanpela Witnes Bilong Jehova i bin opim Baibel na ol i lukim nem tru bilong God, em Jehova. (Song 83:18, NW) Wanpela yangpela meri Witnes i soim nem bilong God long wanpela meri bilong Veneswela. Meri i amamas nogut tru na holim strong Witnes, na em i orait long stadi long Baibel. Taim kain man o meri olsem i kisim save olsem Jisas i bin kolim Papa olsem “God bilong mi na God bilong yupela,” na em i tok, Papa wanpela tasol em i “God tru,” nau ol i save ol tok bilong Baibel long God i no wanpela tok hait; ol inap save long God. (Jon 17:3; 20:17) Ol i kisim save long ol pasin bilong Jehova na i go klostu long em, na ol i kirap long beten long em, na ol i laik mekim pasin em i laikim. Olsem na ol i mekim wanem?
8 Insait long 10-pela yia i go pinis, 2,528,524 manmeri long olgeta kantri na ol planti ailan i bin dediket long Jehova na kisim baptais. Yu wanpela bilong ol? O nau yu redi bilong kisim baptais? Baptais em i bikpela samting long olgeta Kristen tru. Jisas i givim wok long ol disaipel bilong em bilong i go long olgeta lain na kamapim ol disaipel na baptaisim ol. (Matyu 28:19, 20) Na yumi ken tingim tu, taim Jisas i baptais pinis, Jehova yet long heven em i tok olsem: “Yu Pikinini bilong mi. Mi laikim yu tumas. Bel bilong mi em i amamas long yu.”—Luk 3:21, 22.
9 Sapos Jehova i amamas long yu, long wanem, yu dediket na baptais pinis, dispela em i gutpela samting tru, na yu mas was gut oltaim bambai yu inap i stap gutpela long ai bilong em. Yu no ken tingting planti long mani samting na bai yu no tingting tumas long i stap gutpela long ai bilong Jehova—dispela i kamap namba tu samting tasol long yu. (1 Timoti 6:8-12) Yu mas bihainim tru tok bilong Sindaun 3:6: “Long olgeta samting yu mekim, yu mas tingting strong long Bikpela [Jehova] na yu mekim, na em bai i soim yu stretpela rot long bihainim.”
Sori Bilong Krais i Kirapim Tru Bel Bilong Yu?
10 Sapos yu bilip tru olsem Jehova wanpela tasol em i God tru, i no olsem yu givim baksait long Krais Jisas. Nogat. Kamapim Tok Hait 19:10 (liklik tok daunbilo) i tok: “Yumi save, Holi Spirit i kirapim ol profet long autim tok bilong God, em i save helpim ol man long autim nem bilong Jisas.” Long rot bilong spirit holi, God i kamapim olgeta tok profet long Baibel na tokaut long ol wok em i laik bai Jisas i mekim. Taim man i kisim save long ol dispela samting, nau em inap save gut long God na Jisas, na ol tok kranki bilong ol misin i no paulim moa tingting bilong em.
11 Taim man o meri i kisim stretpela save long Pikinini bilong God, dispela inap kirapim em long senisim tru pasin bilong em. Danuta, wanpela meri long Polan, i mekim olsem. Inap 8-pela yia em i save toktok wantaim ol Witnes Bilong Jehova na em i laikim ol tok ol i lainim em long en, tasol em i no bihainim lotu i tru. Bihain em i kisim buk Nambawan Man Tru i Winim Olgeta Narapela Man. Dispela buk i stori long olgeta samting Krais i bin mekim long graun na i no hatwok long kisim save long ol tok bilong en.a Long apinun tru Danuta i opim buk na em i tingting long kaunim wanpela sapta tasol. Tasol em i kaunim i go inap long tulait na kaunim olgeta. Em i lusim buk na em i krai. Em i beten na em i tok: “Jehova, lusim rong bilong mi.” Ol tok em i kaunim i helpim em long pilim tru bikpela sori bilong Jehova na Pikinini bilong em. Em i save, inap 8-pela yia pinis em i no pilim gutpela pasin bilong Jehova, em Jehova i isi long em na wok long helpim em. Em i bilip long Jisas na dediket long Jehova na kisim baptais long yia 1993.
12 Man i kisim stretpela save “long Jisas Krais, Bikpela bilong yumi,” dispela i kirapim em long mekim ol wok Kristen na wok bilong em i karim kaikai. (2 Pita 1:8) Yu laik insait long dispela wok na autim tok bilong Kingdom inap long wanem mak? I gat kain kain as na sampela inap mekim bikpela wok na sampela, nogat. (Matyu 13:18-23) Sampela samting yumi inap senisim; sampela nogat. Wanem samting inap helpim yumi long luksave long samting yumi inap senisim na kirapim yumi long senisim? Aposel Pol i tok: “Krais i bin givim bel bilong en long mipela, na dispela i save kirapim mipela long wok.” Krais i givim bel tru long yumi—em i dai bilong helpim yumi. Taim yumi pilim tru dispela samting, dispela i kirapim tru bel bilong yumi na yumi save, i no stret yumi wok yet long tingim laik bilong yumi yet tasol na wokabaut. Olsem na yumi kirap stretim ol samting bilong yumi bambai wok Krais i lainim ol disaipel long mekim i stap nambawan wok bilong yumi.—2 Korin 5:14, 15.
Klia Long Pasin Bilong Graun—Olsem Wanem?
13 Yumi save pinis long ol samting ol misin na ol narapela lotu i bin mekim, long wanem, ol i laik insait long ol samting bilong graun. Ol i bin putim mani bilong misin bilong helpim sampela lain i mekim pait bilong daunim gavman. Ol pris i kamap paitman. Planti taim ol nius i stori long ol man bilong narapela narapela lotu ol i pait long planti hap. Blut bilong ol man i pas long han bilong ol. (Aisaia 1:15) Long olgeta hap, ol pris pasto i wok yet long stiaim ol wok politik. Ol man i bihainim lotu i tru ol i no save insait liklik long ol dispela wok.—Jems 4:1-4.
14 Tasol i gat sampela samting moa yumi mas mekim bilong klia long pasin bilong graun. Ol manmeri bilong dispela graun i save laikim tumas mani na ol samting ol inap baim long mani, na ol i laik kisim biknem, na bel bilong ol i skrap oltaim long painim amamas; ol i sot long pasin sori, na ol i save giaman na mekim ol tok nogut, bikhet long ol man i gat wok long bosim ol, na ol i no bosim skin. (2 Timoti 3:2-5; 1 Jon 2:15, 16) Yumi gat sin na ating sampela taim yumi mekim kain pasin olsem. Wanem samting inap helpim yumi long klia long ol dispela pasin bilong graun? Yumi no ken lusim tingting olsem “dispela graun olgeta em i stap aninit long strong bilong Satan.” (1 Jon 5:19) Taim wanpela pasin i laik pulim yumi, maski planti man i bihainim, sapos yumi tingim as bilong en, em Satan, nambawan birua bilong Jehova, bai yumi save em i pasin nogut na yumi klia long en.—Song 97:10.
Yu Inap Givim Bel Moa Yet?
15 Taim yu kirap long bung wantaim ol Witnes Bilong Jehova, ating yu pilim tru pasin bilong ol long laikim tru ol narapela, long wanem, em i narapela kain tru long pasin bilong graun. Ol i daunim laik bilong ol na tingim ol narapela na dispela pasin i makim lotu i tru bilong Jehova i narapela kain long ol narapela lotu. Ating dispela pasin bilong ol Witnes i mekim na yu bilip olsem ol i bihainim lotu i tru. Krais i tok: “Sapos yupela wan wan i laikim tru ol [brata], orait dispela bai i soim olgeta man olsem, yupela i disaipel bilong mi.”—Jon 13:35.
16 Dispela pasin i makim yu olsem wanpela disaipel bilong Krais? I gat rot bilong yu ken givim bel moa yet long ol narapela? I gat; yumi olgeta inap mekim. Yumi mas pren gut wantaim ol lain long Haus Kingdom, tasol sapos yumi laikim tasol ol man i laikim yumi, bai pasin bilong yumi i no narapela kain long pasin bilong ol man bilong graun, a? Baibel i tok: “Yupela i mas holim strong pasin bilong laikim tru ol arapela manmeri bilong God.” (1 Pita 4:8) Orait, yumi ken givim bel moa yet long husat? Em wanpela brata o sista Kristen em i bilong narapela kain sindaun, na pasin bilong em i save skrapim bel bilong yumi? O em i wanpela brata o sista i no save kam oltaim long ol miting, long wanem, em i gat sik o em i lapun? O em i poroman marit bilong yu? O ating em i lapun papamama? Sampela brata sista i strong long bihainim ol pasin bilong spirit holi, olsem laikim tru ol narapela, tasol taim bikpela sik i painim wanpela long famili bilong ol na ol i mas mekim olgeta samting bilong lukautim em, ol i pilim olsem ol i mas lain gen long mekim ol dispela gutpela pasin sori. Maski yumi gat kain hevi olsem, yumi mas wok yet long givim bel long ol narapela tu.
Autim Tok Bilong Kingdom—Em Bikpela Samting Long Yu?
17 Wanpela bikpela rot bilong soim ol man yumi laikim ol tru, em olsem: Yumi ken autim tok bilong Kingdom bilong God long ol. Wanpela lain tasol long nau i mekim dispela wok Jisas i tok long en. (Mak 13:10) Em ol Witnes Bilong Jehova. Dispela wok i bin helpim yumi, na nau yumi ken insait long en na helpim ol narapela. Sapos yumi gat tingting olsem bilong God, bai yumi tingim dispela wok i nambawan wok bilong yumi.
18 Stori bilong wok bilong autim tok bilong Kingdom long ol longwe ples nau long las taim em i stap long nupela buk tok Inglis (Jehovah’s Witnesses—Proclaimers of God’s Kingdom). Sapos yu save long tok Inglis, yu mas kaunim dispela buk. Na taim yu kaunim, tingim gut kain kain rot ol man i bin bihainim bilong autim tok bilong Kingdom. Ating yu tu i ken autim tok long kain rot olsem? Planti rot bilong autim tok i op long yumi olgeta. Sapos yumi givim bel tru long Jehova, dispela bai kirapim yumi long bihainim ol dispela rot.
19 Taim yumi wok strong long bihainim laik bilong Jehova, yumi save long bekim bilong askim olsem: Yumi stap bilong mekim wanem? (KTH 4:11) Yumi no longlong nabaut na i stap nating. I gat gutpela wok tru yu inap givim bel long mekim, em wok bilong God Jehova. I no gat narapela wok inap helpim yu long i stap amamas tru. Na bai yu kisim gutpela samting long bihain tu! Yu inap i stap amamas oltaim long nupela taim God bai kamapim. Bai yumi inap givim skin na bel olgeta long mekim gutpela wok God i wokim yumi ol man bilong mekim.
[Ol Futnot]
a Sosaiti Wastaua bilong Nu Yok i wokim dispela buk.
Bai Yu Bekim Olsem Wanem?
◻ Olsem wanem na i bikpela samting wanpela lotu i mas bilip olsem Baibel em i Tok Bilong God na Jehova wanpela tasol em i God tru?
◻ Lotu i tru i lainim ol man olsem wanem long wok bilong Jisas long baim bek ol man?
◻ Bilong wanem ol Kristen i mas klia long pasin bilong graun na laikim tru ol narapela man?
◻ Wok bilong autim tok bilong Kingdom i bikpela samting long ol man i bihainim lotu i tru o nogat?
[Askim Bilong Stadi]
1. Wanem kain man, taim em i painim pinis lotu i tru em i mekim dispela i kamap namba wan samting long laip bilong em?
2, 3. (a) Jisas i tok wanem na yumi save, i bikpela samting long yumi mas bihainim laik bilong God? (b) Olgeta man i save long lotu i tru, ol i gat wanem wok?
4. (a) Taim ol nupela man i kirap long bung wantaim ol Witnes, kwiktaim ol i lukim ol Witnes i mekim wanem wok long Baibel? (b) Ol wokboi bilong Jehova i gat planti kaikai bilong spirit na dispela i mekim wanem long ol?
5. (a) Ol man i wok long lukim ol Witnes, ol i mas mekim wanem? (b) Olsem wanem ol i ken i stap amamas olsem ol Witnes?
6. Sapos yumi laikim tru Tok Bilong God, bai yumi kirap mekim wanem?
7. (a) Tok bilong God Triwan i bin mekim wanem long ol samting ol man i mekim bilong lotuim God? (b) Taim man i kisim save long God tru Jehova, wanem samting inap kamap?
8. (a) Planti milion manmeri i laikim tumas Jehova na ol i laik mekim pasin em i laikim, na dispela i kirapim ol long mekim wanem? (b) Olsem wanem na baptais Kristen i bikpela samting tru?
9. Bilong i stap gutpela oltaim long ai bilong Jehova, yumi mas mekim wanem?
10. Yumi lotuim Jehova, tasol olsem wanem dispela i no kirapim yumi long givim baksait long Jisas?
11. Wanpela meri long Polan i kisim stretpela save bilong Baibel long Pikinini bilong God na em i mekim wanem?
12. Stretpela save yumi kisim long Krais Jisas i kirapim yumi long mekim wanem?
13. Bilong wanem yumi mas klia long ol lotu i insait long ol wok bilong dispela graun?
14. (a) Yumi yet i mas mekim wanem na bai yumi klia long pasin bilong dispela graun? (b) Wanem samting inap helpim yumi na bai yumi klia long tingting na pasin bilong ol man bilong dispela graun?
15. Yu lukim wanem pasin bilong laikim tru ol narapela na dispela i helpim yu long save long lotu i tru?
16. I gat wanem ol rot bilong yumi olgeta wan wan i ken givim bel moa yet long ol narapela?
17. Sapos wok bilong ol Witnes Bilong Jehova i bin helpim yumi, nau dispela i mas kirapim yumi long mekim wanem?
18. Sapos yumi inap kaunim nupela buk tok Inglis (Jehovah’s Witnesses—Proclaimers of God’s Kingdom), olsem wanem dispela inap kirapim yumi long mekim bikpela wok moa long wok bilong autim tok bilong Kingdom?
19. Taim yumi save long lotu i tru na yumi mekim wok bilong en, dispela i helpim yumi olsem wanem?
[Ol Piksa long pes 16]
Man i laik bihainim lotu i tru em i mas kisim baptais. Long olgeta mun, long olgeta hap bilong graun, inap 25,000 i kisim baptais
Rasia
Senegal
Papua Niugini
Amerika
[Ol Piksa long pes 17]
Hap wok bilong man i bihainim lotu i tru em bilong autim tok i tru bilong Baibel long ol man
Amerika
Brasil
Amerika
Hong Kong