Ol i Gutpela Piksa Bilong Mipela
STORI BILONG CRAIG ZANKER
Inap 8-pela yia mi wantaim meri bilong mi (Gayle) i bin mekim wok bilong God long olgeta de, olsem mekim wok painia. Mitupela i Witnes Bilong Jehova. Inap 6-pela yia pinis, mipela bin autim tok long ol Aborijini long bus bilong Ostrelia. Mipela bihainim gutpela pasin bilong papamama na tumbuna papamama bilong mi.
ORAIT, pastaim mi ken stori long tumbuna papamama bilong mi. Mipela save laikim tru tupela na kolim tupela olsem Opa na Oma, long tok Holan dispela i olsem bubu man na bubu meri. Tumbuna papa, em Charles Harris, em i givim bel yet long mekim wok painia long Melbon. Em i bin i stap inap 50 yia long Melbon.
Kisim Save Long Tok i Tru Bilong Baibel
Opa i bilong wanpela liklik taun long Tasmenia, em wanpela ailan bilong Ostrelia. Long yia 1924, taim em i gat 14 krismas, papa bilong em i go long oksen na baim bokis bilong wanpela boskru. Gutpela samting tru i stap insait long dispela bokis—em sampela buk namba wan presiden bilong Sosaiti Was Taua, em Charles Taze Russell, i bin raitim.
Papa bilong Opa i no laikim ol dispela buk, tasol Opa i kirap long kaunim, na kwiktaim em i save, ol tok i tru bilong Baibel i stap long en. Olsem na em i wok long painim lain i bin wokim ol dispela buk (International Bible Students), nau ol i holim nem ol Witnes Bilong Jehova. Em i laik toktok wantaim ol na kisim sampela save moa long ol dispela tok i tru bilong Baibel.
Em i askim askim na bihain em i bungim tripela lapun meri i wok strong long lainim ol narapela long ol dispela tok. Yangpela Charles i pilim tru tok bilong ol, na long yia 1930 em i dediket long Jehova na kisim baptais. Em i lusim wok bilong em long katim mit, na em i go long hap not, long Sidni, na kamap painia.
Em i Wok Painia Long Ostrelia
Inap sampela yia, Charles i autim tok long hap bilong nambis long Sidni, ol i kolim Bondai, na long bus long distrik Nu Saut Wels. Bihain ol i makim em bilong i go autim tok longwe tru inap sampela tausen kilomita, long biktaun Pet, long Westen Ostrelia. Inap 6-pela mun em i autim tok long ol stua na ofis long Pet, na bihain em i go wantaim tupela painia moa long hap not-wes bilong Ostrelia na autim tok long hap i no gat planti man.
Tripela hia—em Arthur Willis na George Rollsten na Charles—ol i autim tok long bikpela hap tru, i winim graun bilong Itali inap 4-pela taim! No gat planti man, na i no gat planti diwai, na san i strong tru. Sampela taim ol i lusim wanpela ples bilong lukautim ol bulmakau na ol i mas raun inap 500 kilomita bambai ol i kamap long narapela ples olsem. I no gat planti gutpela ka long yia 1930 samting, na ka bilong ol i nogut, tasol ol i gat strongpela bilip na ol i wok strong.
Ol i raun long ol liklik rot i gat planti hul na ol baret em lek bilong planti kamel i wokim. Long sampela hap, das i karamapim as bilong diwai ol man i bin katim; ol i no inap lukim na ol inap bamim. Ol spring waia bilong ka i bruk planti taim, na hap ain i holim tupela wil baksait long ka i bruk tupela taim, na planti taim ol taia i bagarap. Sampela taim ol painia i putim olpela gumi insait long taia na pasim long bikpela skru na raun i go.
Taim mi manki yet mi askim Opa, wanem samting i strongim ol long wok i go yet, maski ol i gat hevi. Em i tok, ol i stap longwe long ol man, tasol ol i stap klostu long Jehova. Sampela hevi bilong skin ol i karim i kamap olsem blesing bilong spirit.
Opa i no man bilong hambak na ting em yet i stretpela man. Nogat. Tasol em i save kirap nogut long sampela man i tingting tumas long kisim planti samting bilong skin. Em i tokim mi: “Gutpela sapos yumi gat liklik kago tasol. Taim Jisas i no gat ples slip, em i slip ausait. Yumi tu i ken amamas long mekim olsem bilong inapim wok bilong yumi.” (Matyu 8:19, 20) Em wantaim ol poroman bilong em i bin mekim olsem.
Singautim Em i Go Long Narapela Kantri
Long yia 1935, Opa i kisim nupela wok—bilong autim tok long ol ailan long solwara Pasifik. Em wantaim 6-pela narapela boskru i raun long bot bilong Sosaiti Was Taua, em bot i gat sel na i longpela inap 16 mita na nem bilong en Lightbearer.
Wanpela taim ol i stap long solwara Koral long hap not bilong Ostrelia na namba tu ensin bilong bot i bagarap. No gat win liklik na ol i trip nating longwe tru long nambis. Ol inap bagarap long bikpela rip, tasol Opa i tingim solwara long dispela taim i slip gut, no gat si liklik. Em i tok: “Long olgeta apinun, mi lukim solwara i slip gut na san i go daun na i gutpela tru, na bel bilong mi i sori gen. Mi no inap lusim tingting long dispela.”
Gutpela tru, taim bot i no pas yet long rip, win i kirap na ol i sel i go long Pot Mosbi, long Papua Niugini, na ol i stretim ensin. Ol i lusim Mosbi na sel i go long ailan Tesde na bihain ol i go long Java, em bikpela ailan bilong Indonisia. Opa i kirap laikim tru dispela kantri, em sampela man i tok ol ailan bilong en i olsem ‘gutpela bis long solwara.’ Long dispela taim, lain Holan i bosim ples, olsem na bubu i lain long tupela tok ples, em tok Holan na tok Indonisia. Taim em i autim tok, em i tilim ol buk na nius long 5-pela tok ples, em tok Holan, na tok Indonisia, na tok Saina, na tok Inglis, na tok Arap.
Opa i tilim planti buk na nius bilong Baibel. Brata Clem Deschamp i lukautim ofis bilong Was Taua long Batavia (nau em Jakata), na wanpela taim wanpela ofisa bilong gavman Holan i singautim em i go lukim em. Dispela ofisa i lukluk long wok bilong ol Witnes long autim tok long dispela hap. Em i tok: “Hamas Witnes i autim tok long hap bilong Is Java?”
Brata Deschamp i tok: “Wanpela tasol.”
Ofisa i tok: “Yu giaman! Ating planti tru ol i wok i stap, long wanem, ol i tilim planti buk na nius bilong yupela long olgeta hap!”
Opa i amamas tru long dispela tok i makim olsem em i mekim bikpela wok. Na tru tumas, em i mekim bikpela wok. Em i save tilim 1,500 inap 3,000 buk na nius long olgeta mun.
Marit, na Tambu, na Pait
Long Disemba 1938, Opa i maritim wanpela yangpela meri Indonisia, nem bilong em Wilhelmina, na em i kamap tumbuna mama bilong mi. Oma em i gutpela meri tru; em i save mekim gut long ol man, na mekim pasin isi, na wok strong, na toktok isi. Mi save, long wanem, taim mi liklik yet mi pas tru wantaim em.
Taim tupela i marit pinis, tupela i mekim yet wok painia. Ol narapela boskru bilong bot (Lightbearer) i go nabaut long ol narapela hap bilong graun, o ol i go bek long ples. Tasol Opa i laik i stap oltaim long Indonisia.
Gavman Holan i bosim Indonisia, na taim Namba 2 Pait Bilong Olgeta Hap i laik kamap, ol pris pasto i subim gavman na gavman i putim sampela tambu long wok bilong ol Witnes Bilong Jehova, na bihain ol i tambuim olgeta. Olsem na i hatwok long ol i autim tok, na ol i save mekim wok long Baibel tasol. Long planti taun em Opa na Oma i go long en, polis i save holim ol na givim planti askim long ol. Ol i mekim olsem tupela i man nogut. Ol i tambuim pinis wok bilong ol Witnes, na nau ol i putim tambu bilong Oma long kalabus, long wanem, em i bihainim lo Kristen na em i no laik insait long pait. Em i dai long kalabus bilong gavman Holan.
Opa na Oma i slip long trak i olsem haus i gat wil, na ol i raun long en na autim tok long olgeta hap bilong Java. Long yia 1940, taim ami bilong Japan i laik kam insait long ples, ol i kamapim pikinini meri, em mama bilong mi. Ol i kolim nem bilong em Victory, em nem bilong wanpela pablik-tok presiden bilong Sosaiti Was Taua long dispela taim (J. F. Rutherford) i bin mekim tupela yia bipo. Tupela i wok painia i go, maski pikinini i kamap.
Long kirap bilong yia 1942, Opa na Oma na Victory i stap long wanpela kago sip bilong ol Holan em i lusim Boneo i kam bek, na wantu wanpela sip bilong pait, em bilong ol Japan, i pairapim gan. Olgeta lait i dai, na ol manmeri i pret na singaut strong. Em nau, pait i bungim famili bilong mi. Sip i sua gut, tasol tupela o tripela de bihain, ami bilong Japan i kamap long Java na wanpela ofisa Holan i tokim ol soldia bilong Japan long Opa na Oma i stap we.
Taim ol Japan i painim ol pinis, ol i kisim olgeta samting bilong tupela, ol liklik samting bilong Victory tu, em bilong pilai. Ol i putim Opa long narapela banis kalabus, na Oma tupela Victory long narapela. Inap 3-pela yia hap Opa i no lukim ol.
I Stap Long Banis Kalabus
Ol i salim Opa i go long banis kalabus long narapela narapela taun—Surabaya pastaim, na bihain Engawe na Bandung na Simahi. Ol i save salim ol kalabusman i go raun raun olsem bambai ol i no gat taim bilong painim rot bilong ranawe. Planti kalabusman ol i bilong Holan, na sampela i bilong Briten na Ostrelia. Taim Opa i stap long kalabus, em i lain long katim gras bilong ol man, na sampela taim em i mekim yet dispela wok. Ol i larim em i holim wanpela buk tasol bilong lotu, em Baibel bilong em (King James Version).
Ol i salim Oma na Victory tu i go long narapela narapela kalabus. Bos bilong banis kalabus i save salim sampela meri i go mekim wok “bilong helpim ol man.” Tasol em i no salim Oma. I gat wanem as, em yumi no save. Bihain Oma i save, ol i salim ol dispela meri i go na bai ol soldia bilong Japan i ken slip wantaim ol, olsem pamuk.
Ol soldia bilong Japan i no save laikim ol pikinini meri, olsem na Oma i putim klos bilong manki long Victory na katim gras bilong em i go sotpela. Bos bilong banis kalabus i save kros tru long nem Victory (olsem “I Win”). Em i laik save, dispela nem i makim ol Japan bai winim pait o ol Amerika bai win?
Oma i tok: “Em i makim olsem Kingdom bilong God bai win na daunim olgeta gavman bilong graun!”
Ol i laik subim Oma na liklik pikinini meri bilong em i gat 5-pela krismas long tok: “Ami Bilong King Bilong Japan Bai Win.” Tasol tupela i no mekim na ol i kisim strafe—tupela i mas sanap stret olsem soldia inap 8-pela aua long bikpela san tru. No gat ples bilong hait long san, no gat wara, no ken sindaun, no ken surik liklik. Tasol Jehova i helpim tupela na ol i winim hevi.
Oma i kalabus wanpela yia pinis na nau bos bilong kalabus i tokim em, man bilong em i dai pinis! Em i putim piksa bilong Opa i go insait long switkes na wok i go, maski em i bel hevi.
Ol i stap nogut long banis kalabus. Long olgeta de ol i kisim skel olsem: Wanpela kap tapiok long moningtaim, na liklik hap bret ol i wokim long saksak long belo, na wanpela kap rais long sup long apinun. Ol i sot tru long kaikai na skin bilong planti i bagarap, na ol i pekpek blut na i dai.
Sik i kisim Opa tu long kalabus, long wanem, em i sot long kaikai. Klostu Oma i dai, long wanem, planti taim em i givim kaikai bilong em long liklik Victory na bai em i no ken hangre na i dai. Oltaim ol man i mekim nogut long ol na oltaim tupela i hangre. Wanpela samting tasol i helpim ol na ol i no bagarap olgeta—ol i stap klostu long God bilong ol, Jehova.
Mi tingim yet wanpela tok Opa i mekim planti taim, em i save tok: “Bilong i stap fri tru, man i mas i stap wanbel wantaim God Jehova.” Olsem na maski Opa i stap long banis kalabus nogut, em i pilim olsem em i stap fri. Opa tupela Oma i givim bel tru long Jehova na dispela i helpim ol long ‘sanap strong long taim bilong hevi.’ (1 Korin 13:7) Mi wantaim meri bilong mi (Gayle), mitupela i wok long pas gut wantaim God olsem tupela i bin mekim.
Lusim Kalabus na Bung Wantaim Gen
Pait i pinis long yia 1945. Ol Japan i putim ol yet long han bilong ol birua na liklik taim bihain, Opa i stap long wanpela tren i lusim Jakata na i go long Bandung. Ol soldia bilong Indonisia i pasim tren. Ol i no pait moa long ol Japan, tasol ol i pait yet bilong rausim ol Holan long ples bambai ol i ken kisim independens. Opa i kirap nogut long ol i rausim em wantu long tren, olsem na em i no mekim tok Inglis; em i kirap mekim tok Holan. Long ol Indonisia, dispela i olsem tok ples bilong ol birua bilong ol, na ol i mas kilim ol birua.
Gutpela tru, taim ol soldia i lukim ol samting i stap long poket bilong Opa, ol i lukim laisens bilong em bilong draivim ka long Ostrelia, em i bin lusim tingting long en. Ol Indonisia i no birua long ol Ostrelia. Opa i pilim olsem God i bin helpim em, na ol soldia i painim dispela laisens, long wanem, sampela aua bihain, ol i pasim tren gen na kilim i dai 12-pela man Holan ol i stap long tren.
Bihain liklik, Oma na Victory i wet long kisim trak bambai ol i ken lusim hap bilong pait. Ol i sindaun arere long rot na planti trak i gat ol soldia na ol narapela man i pulap long en, ol i abrusim tupela i go. Wantu dispela lain trak i sanap i stap; i olsem i no gat as na ol i mekim. Oma i lukluk long trak i stap klostu, em baksait i op, na em i lukim wanpela man bun nating tru i sindaun i stap. Em i luksave stret long em. Em man bilong em! No gat sampela tok inap stori long bikpela amamas bilong tupela long bung wantaim gen.
Go Bek Long Ostrelia
Long yia 1946, taim Opa i stap 11 yia pinis long Indonisia, em i kisim Oma na Victory i go bek long Ostrelia, na planti hevi i painim ol. Ol i lusim ples i gat pait na i kam—ol i no gat wanpela samting—ol i rabis tru, na skin bilong ol i bagarap long hangre, na ol man bilong ples i no amamas long ol. Ol i mekim nogut tru long Oma na Victory, long wanem, ol i bilong narapela skin, olsem bilong Esia. Opa i mas wok strong inap planti aua bambai em inap baim haus na lukautim ol. Tasol ol i karim ol dispela hevi na i stap strong long bilip.
Nau, inap 48 yia bihain, Opa i stap long Melbon, na em i wok yet long i go long ol haus na autim tok. Em i lukim Victory na ol pikinini bilong em i kamap strong long tok i tru, na ol i dediket long Jehova, na olgeta wan wan i bin mekim wok painia.
Victory na Des Zanker (em i kamap papa bilong mi), tupela i bin kisim baptais long yia 1951 samting. Long 1958, Des i kirap long wok long Betel long Ostrelia. Victory i mekim wok painia salim na bihain tupela i marit. Tupela i wok painia wantaim inap liklik taim, na bihain ol i mekim wok bilong raun na lukim ol kongrigesen. Tasol mi kamap na ol i mas lusim dispela wok bilong lukautim mi. Nau, 27 yia bihain, Papa i wok painia yet.
Long kirap bilong yia 1990, Oma i dai long haus, em dispela haus mama bilong mi i go bikpela long en. Mi tu mi go bikpela long dispela haus long Melbon, na liklik brata na susa bilong mi tu. Mipela ol famili i stap wantaim long dispela haus na dispela i olsem gutpela blesing. Sampela taim i olsem mipela i pas pas liklik, tasol mi no tingim dispela. Taim mitupela Gayle i marit, inap 4-pela yia mitupela tu i stap wantaim ol long dispela haus. Bihain mipela i kisim nupela ples wok na mipela i mas lusim haus na mi krai. Ol man i stap long dispela haus i bin sambai long mi na laikim mi na helpim mi tru.
Tasol mitupela i stap amamas, long wanem, mitupela inap mekim wok wankain olsem papamama i bin mekim na tumbuna papamama i bin mekim. Mipela i lusim dispela haus bilong i go mekim gutpela wok, em wok bilong Jehova. Mitupela i mekim wok painia. Mipela i wok strong long bihainim gutpela pasin bilong lain bilong mipela, em dispela wok i bin helpim ol long i stap bel isi na amamas, maski ol i gat hatwok, o ol i stap rabis tru, o ol i stap longtaim long ol banis kalabus bilong ol Japan.—2 Korin 1:3, 4.
Opa i save laikim tru tok King Devit i mekim long Jehova, olsem: “Laip bilong dispela graun i gutpela tasol marimari bilong yu i nambawan tru.” (Song 63:3) Tumbuna papa bilong mi i gat bikpela laik tru long i stap aninit long marimari bilong Jehova inap oltaim oltaim, na olgeta long famili bilong em i gat wankain laik.
[Piksa long pes 21]
Oma na Opa Harris
[Piksa long pes 23]
Craig Zanker (long baksait), wantaim papamama na liklik brata na susa bilong em