Helpim Ol Pikinini Bilong Yu Long Winim Ol Hevi i Painim Ol

PLANTI hevi i save painim ol yangpela bilong yumi. Ol i stap namel long ol manmeri nogut bilong dispela graun bilong Satan, na tu, ol i gat pait long daunim “olgeta kain laik nogut i save kamap long bel bilong ol yangpela.” (2 Ti. 2:22; 1 Jo. 5:19) Ol i wok strong long tingim Bikpela Man Bilong Wokim ol, olsem na ol i mas karim hevi bilong ol tok bilas na tok nogut em ol man husat i birua long bilip bilong ol, ol i save mekim. (Sav. 12:1) Wanpela brata nem bilong en Vincent, em i tingim bek taim em i yangpela na em i tok: “Long olgeta taim i gat wanpela i toknogutim mi, o mekim nogut long mi, o i laik kirap pait long mi, long wanem, mi wanpela Witnes. Planti taim ol i mekim nogut moa yet long mi na mi no laik i go long skul.”a

Ol pikinini man na pikinini meri bilong yumi i save kisim hevi long ol lain bilong dispela graun, na tu, ol i mas pait long daunim laik bilong ol yet long i stap wankain olsem ol wanlain bilong ol. Cathleen, em yangpela sista i gat 18 krismas samting, em i tok: “I hatwok tru long i stap narapela kain long ai bilong ol narapela.” Alan, em wanpela yangpela brata, i tok: “Planti taim ol wanskul i save singautim mi long i go raun wantaim ol long wiken, na mi gat laik tru long i go.” Na tu, sampela yangpela i gat strongpela laik long insait long ol spot long skul, na dispela inap kirapim ol long kisim ol poroman nogut. Tanya, em wanpela yangpela sista, i tok: “Mi save laikim tru spot. Oltaim ol kosa long skul i save tokim mi long pilai long wanpela tim. I hatwok tru long mi tok nogat.”

Olsem wanem yu inap helpim ol pikinini bilong yu long winim ol hevi? Jehova i bin givim wok long ol papamama long soim rot long ol pikinini bilong ol. (Snd. 22:6; Ef. 6:4) Ol papamama i aninit long God, ol i wok strong long kirapim laik long bel bilong ol pikinini long bihainim tok bilong Jehova. (Snd. 6:​20-23) Dispela bai kirapim ol pikinini long sakim ol samting bilong graun i laik pulim ol, na ol bai mekim olsem tu long taim papamama i no lukim ol.

Ol papamama i gat hatwok long mekim wok mani bilong lukautim famili, na mekim bikpela long ol pikinini, na mekim ol wok bilong kongrigesen​—na mekim olgeta dispela wok long wankain taim. Sampela papa o mama i stap wanpis long taim ol i mekim ol dispela wok, o long taim ol i kisim hevi long poroman marit bilong ol i no bilip. Tasol Jehova i laik bai ol papamama i makim hap taim bilong skulim na helpim ol pikinini. Olsem na yu ken mekim wanem bilong helpim ol pikinini bilong yu na ol i ken sakim ol wanlain i laik pulim ol, o sakim ol traim na ol narapela hevi ol i save kisim long olgeta wan wan de?

Pas Gut Wantaim Jehova

Namba wan samting, ol yangpela bilong yumi ol i mas save long Jehova olsem wanpela Man i stap tru tru. Yumi mas helpim ol long lukim dispela Man yumi ‘no inap lukim em long ai.’ (Hi. 11:27) Vincent, em yumi stori pinis long en, em i tingim papamama i bin helpim em long kisim pasin bilong pas gut wantaim Jehova. Em i tok: “Tupela i skulim mi olsem beten em i bikpela samting. Mi inap tingim bek taim mi liklik yet na mi save beten long Jehova long olgeta nait taim mi laik slip. Long mi, Jehova em wanpela man i stap tru tru.” Olsem wanem long yu? Yu save beten wantaim ol pikinini bilong yu? Taim ol yet i beten, ating i gutpela yu putim yau long ol tok ol i mekim long Jehova, a? Ol i save kolim ol wankain tok long olgeta taim? O long beten bilong ol, ol i kamapim olsem ol i gat wanem tingting tru long Jehova? Taim yu putim yau long beten bilong ol, ating yu inap save, ol i wok long kamap strong long ol samting bilong spirit o nogat.

Ritim Baibel em narapela rot bilong ol yangpela i ken i go klostu moa long Jehova. Cathleen i tok: “Mi bin ritim Baibel olgeta long taim mi yangpela yet na dispela i helpim mi. Em i strongim tru tingting bilong mi olsem, maski ol man i birua long mi, Jehova i stap bilong helpim mi.” Olsem wanem? Ol pikinini bilong yu i gat sediul bilong ol yet long ritim Baibel?​—Sng. 1:​1-3; 77:12.

Tru, ol pikinini i no gat wankain pasin na tingting long bihainim tok papamama i givim bilong soim rot long ol. Na tu, krismas bilong ol pikinini i mekim na ol i wok long kamap strong hariap long samting bilong spirit o ol i kamap strong isi isi. Tasol sapos papamama i no soim rot long ol, bai i hatwok long ol yangpela i ken save long Jehova olsem Man i stap tru tru. Ol papamama i mas putim tok bilong God i go daun long bel bilong ol pikinini na bai i olsem ol inap harim Jehova i toktok long ol, maski ol i stap we. (Lo 6:​6-9) Ol pikinini bilong yu i mas bilip olsem Jehova i save tingim tru ol.

Rot Bilong Toktok Gut Wantaim

Pasin bilong toktok gut wantaim ol pikinini em i narapela bikpela rot bilong helpim ol. Tasol i no olsem yu toktok nating wantaim ol. Yu mas givim sampela askim long ol na putim gut yau long ol bekim bilong ol​—maski tok ol i mekim i narapela kain long tok yu laik harim. Anne, em wanpela mama i gat tupela pikinini man, em i tok: “Mi save mekim ol askim i go inap long taim mi pilim olsem mi kliagut long tingting bilong ol na wanem ol hevi i wok long kamap long laip bilong ol.” Olsem wanem? Ol pikinini bilong yu i pilim olsem yu save putim gut yau taim ol i toktok? Tanya i tok: “Papamama bilong mi i bin putim gut yau long ol tok bilong mi na ol i no lusim tingting long ol toktok mipela i bin mekim. Ol i save long nem bilong ol wanklas bilong mi. Ol i save askim mi long ol dispela wanklas na long ol narapela samting mipela i bin toktok long en long bipo.” Bilong toktok gut wantaim ol pikinini, em i bikpela samting long putim gut yau long tok bilong ol na holim ol dispela tok long tingting.

Planti famili i bin lukim olsem taim bilong kaikai i save opim rot long famili long toktok gut wantaim. Vincent i tok: “Pasin bilong kaikai wantaim em i bikpela samting long famili bilong mipela. Sapos inap, papamama i laik bai mipela i sindaun na kaikai wantaim long olgeta taim. Ol i no larim mipela i lukim TV, o harim redio, o ritim buk long taim bilong kaikai. Mipela i save toktok wantaim long ol liklik samting, olsem ol stori nabaut, na dispela hap taim i mekim isi bel bilong mi long olgeta de na i helpim mi long karim ol kain kain hevi i painim mi long skul.” Na em i tok moa: “Mi save toktok wantaim papamama long taim bilong kaikai, na dispela i helpim mi na bel bilong mi i stap isi taim mi mas askim ol long helpim mi long sampela bikpela hevi samting bilong mi.”

Askim yu yet: ‘Inap hamas taim long olgeta wik, mipela save kaikai wantaim olsem famili?’ Sapos yu stretim dispela samting, ating sampela rot moa bai i op long yu long toktok gut wantaim ol pikinini bilong yu, a?

Lain Long Pasin Bilong Bekim Tok Long Man

Famili Lotu long olgeta wik i save helpim tu olgeta long famili long toktok gut wantaim, na em i helpim ol yangpela long taim sampela hevi i kamap. Alan i tok: “Long taim bilong Famili Lotu, papamama i save kirapim mipela long kamapim tingting bilong mipela. Ol i toktok long ol samting i stret wantaim ol hevi i painim mipela.” Mama bilong Alan i tok: “Mipela i bin makim hap taim long taim bilong stadi bilong lain long pasin bilong bekim tok long ol man. Dispela i helpim ol pikinini long lain long sambai long bilip bilong ol na bilong kamapim klia olsem samting ol i bilip long en em i tru. Dispela i strongim ol long bekim tok na sambai long bilip bilong ol.”

Tru tumas, taim ol wanlain i strong long ol pikinini i mas bihainim pasin bilong ol, na sapos ol pikinini i tok nogat na em tasol, sampela taim dispela i no inap. Ol i mas save long rot bilong bekim ol kain askim olsem bilong wanem na bilong wanem yu no laik. Na ol i mas pilim olsem ol i save long samting ol i mas mekim long taim ol wanlain i tok bilas long bilip bilong ol. Sapos ol i no inap sambai long bilip bilong ol, bai ol i hatwok long sanap strong long lotu i tru. Pasin bilong lain long bekim tok bai strongim ol long mekim olsem.

Blok long pes 18 i kolim sampela samting inap kamap, em yupela i ken mekim traim long en insait long Famili Lotu. Mekim long pasin olsem em samting tru tru i kamap, na sutim ol askim long ol bekim pikinini i givim. Na tingim sampela man em stori bilong ol i stap long Baibel, na olsem wanem pasin bilong ol inap skulim gut ol pikinini. Dispela skul ol pikinini i kisim long haus bai helpim ol long sambai long bilip bilong ol long skul na long ol narapela hap.

Haus Bilong Yu​—Em Gutpela Ples Bilong Stap Long En?

Olsem wanem? Haus bilong yu em gutpela ples we ol pikinini bilong yu i laik kam bek long en long olgeta de bihain long skul? Sapos em i kain gutpela ples olsem, orait dispela bai helpim ol long karim ol hevi bilong ol wan wan de. Wanpela sista nau em i wok long Betel, em i tok: “Taim mi wok long kamap bikpela, wanpela bikpela samting long mi i olsem, haus bilong mipela em ples we mi save pilim seif. Maski taim nogut o hevi i painim mi long skul, mi save olsem, taim mi kam bek long haus bel bilong mi bai i stap isi.” Wanem kain pasin i stap long haus bilong yu? Em ples bilong “belhat na kros na bel nogut,” o em ples i gat pasin ‘laikim, amamas, na bel isi’ long en? (Ga. 5:​19-23) Sapos planti taim i no gat bel isi i stap, orait, yu ken wok strong long tingim wanem ol senis yupela i mas mekim bambai haus bilong yupela i stap olsem gutpela ples bilong ol pikinini bilong yu i ken stap long en?

Narapela rot bilong helpim ol pikinini bilong yu long i stap strong taim ol hevi na traim i painim ol, em yu ken wokim rot bilong ol i ken bung wantaim ol lain husat inap strongim ol. Olsem: Yu inap singautim sampela strongpela brata na sista long kongrigesen long kam bung wantaim yupela long taim bilong kisim amamas? O yu inap kukim liklik kaikai na singautim wasman raun i kam o ol narapela husat i insait long fultaim sevis? Yu save long sampela misineri o sampela long Betel em ol pikinini bilong yu i ken kamap pren bilong ol, olsem long rot bilong pas, o E-meil, o ringim ol long sampela taim? Ol dispela kain poroman inap helpim ol pikinini bilong yu long makim stretpela rot bilong wokabaut long en na putim ol mak bilong spirit ol i laik winim. Tingim ol gutpela pasin yangpela Timoti i bin kisim taim em i poroman wantaim aposel Pol. (2 Ti. 1:13; 3:10) Pol i bin poroman gut wantaim Timoti na dispela i helpim Timoti long putim tingting i go long ol mak bilong spirit em i laik winim.​—1 Ko. 4:17.

Tok Amamas Long Ol Pikinini

Jehova i amamas long lukim ol yangpela i sanap strong na holimpas ol pasin i stret, maski dispela graun bilong Satan i putim planti presa long ol. (Sng. 147:11; Snd. 27:11) Na ating yu tu i amamas long lukim ol yangpela bilong yumi, ol i bihainim savetingting na makim rot i stret long wokabaut long en. (Snd. 10:1) Tokaut long ol pikinini olsem yu gat wanem tingting long ol, na givim planti gutpela tok amamas long ol. Jehova i stap gutpela piksa long ol papamama i ken bihainim. Taim Jisas i kisim baptais, Jehova i tok: “Yu Pikinini bilong mi. Mi laikim yu tumas. Bel bilong mi em i amamas long yu.” (Mk. 1:11) Yumi save, dispela tok bilong Papa i bin strongim Jisas long winim planti hevi i laik painim em! Na olsem tasol, yu mas tokim ol pikinini bilong yu olsem yu laikim ol, na tokaut olsem yu amamas long ol gutpela wok ol i mekim.

Tru, yu no inap banisim ol pikinini olgeta na bai ol i no ken kisim ol hevi na ol man i no ken tok bilas long ol, nogat. Tasol yu inap mekim planti samting bilong helpim ol. Yu inap mekim wanem? Helpim ol long kisim pasin bilong pas gut wantaim Jehova. Kamapim pasin we i kirapim famili long toktok gut wantaim long haus. Mekim Famili Lotu i kamap taim bilong helpim gut ol pikinini, na mekim haus bilong yu i kamap gutpela ples bilong stap long en. Sapos yu mekim olsem, dispela bai helpim ol pikinini long sanap strong na winim planti ol hevi i wok long painim ol.

[Futnot]

[Blok/Piksa long pes 18]

PASIN BILONG MEKIM TRAIM BAI HELPIM PIKININI

Daunbilo i gat lista bilong sampela hevi em ol yangpela bilong yumi i save bungim. I gutpela sapos yupela i mekim traim long sampela bilong ol long taim bilong Famili Lotu bilong yupela.

▸ Wanpela kosa i askim pikinini meri bilong yu long joinim wanpela spot tim long skul.

▸ Ol wanskul i laik givim smok long pikinini man bilong yu taim em i lusim skul na i go long haus.

▸ Sampela mangi i tok ol bai paitim pikinini man bilong yu sapos ol i lukim em i autim tok gen.

▸ Taim pikinini meri bilong yu i autim tok long ol haus, em i bungim wanpela wanskul.

▸ Long ai bilong klas, tisa i askim pikinini meri bilong yu long as na em i no save salutim fleg.

▸ Oltaim wanpela mangi i save tok bilas long pikinini man bilong yu, long wanem, em i wanpela Witnes.

[Piksa long pes 17]

Ol pikinini bilong yu i gat sediul bilong ol yet long ritim Baibel?

[Piksa long pes 19]

Yu save singautim ol strongpela bratasista long bung wantaim yupela long taim bilong kisim amamas?