Jisas i Skulim Ol Man Long Em i Husat

“Jisas i save em i husat, em i kam long wanem hap, as na em i kam long graun, na em bai mekim wanem long bihain.”​​—AUTHOR HERBERT LOCKYER.

PASLAIN long yumi inap bilip long ol samting Jisas i skulim ol man long en, yumi mas kisim save long em. Jisas em i husat? Em i kam long wanem hap? Em i stap bilong mekim wanem? Long ol Gutnius bilong Matyu, Mak, Luk, na Jon, yumi inap kisim bekim bilong ol dispela askim long rot bilong ol tok em Jisas yet i bin mekim.

Em i stap laip paslain long em i kamap long graun Jisas i tok: “Taim Abraham i no kamap yet, Mi Yet Mi Stap Olsem.” (Jon 8:​58) Abraham i bin i stap laip inap olsem 2,000 yia paslain long mama i karim Jisas. Maski i olsem, Jisas i bin i stap laip paslain long Abraham i kamap long graun. Orait, Jisas i bin i stap we? Em i tok: “Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa.”​​—Jon 6:​38.

Pikinini Bilong God Jehova i gat planti pikinini, em ol ensel. Tasol Jisas em i narapela kain. Em i kolim em yet olsem “dispela wanpela Pikinini Bilong God.” (Jon 3:​18) Dispela hap tok i makim olsem God wanpela tasol i bin wokim Jisas, na i no gat narapela man i bin wokim em. Na God i wokim olgeta narapela samting long rot bilong dispela wanpela Pikinini.​​—Kolosi 1:​16.

“Pikinini Bilong Man” Jisas i kolim dispela hap tok planti taim moa bilong makim em yet. (Matyu 8:​20) Long dispela rot em i soim olsem em i no wanpela spirit o ensel husat i tanim i kamap man. Nogat. Em i wanpela man stret. Long rot bilong holi spirit, God i kisim laip bilong Pikinini bilong em long heven na salim i kam long graun, na em i kamap insait long bel bilong yangpela meri, Maria. Olsem na taim Jisas i bon, em i man i gutpela olgeta na i no gat sin.​​—Matyu 1:​18; Luk 1:​35; Jon 8:​46.

Mesaia em God i promis long en Wanpela meri Samaria i tokim Jisas: “Mi save, Mesaia bai i kam.” Na Jisas i tokim em: “Em mi tasol, nau mi toktok wantaim yu.” (Jon 4:​25, 26) Dispela tupela tok, “Mesaia” na “Krais,” i gat wankain mining, em “Man God i Makim.” God yet i bin makim Jisas long mekim wanpela spesel wok bilong inapim ol tok promis bilong God.

Nambawan bikpela wok bilong em Jisas i bin tok: “Mi mas autim gutnius bilong kingdom bilong God . . . God i salim mi na mi kam bilong mekim dispela wok.” (Luk 4:​43) Em i bin mekim planti gutpela wok bilong helpim ol man i sot long ol samting, tasol nambawan bikpela wok bilong em, em wok bilong autim tok long Kingdom Bilong God. Bihain bai yumi stori long ol samting em i bin skulim ol man long en long Kingdom Bilong God.

Em nau, Jisas i no wanpela man nating.a Em i bin i stap long heven, olsem na taim em i kam long graun na skulim ol man, tok bilong em i gat strong. Yumi no ken kirap nogut olsem em i bin autim ol tok we inap mekim sampela samting long planti milion manmeri long olgeta hap bilong graun.

[Futnot]