Stori Tru o Stori Nating​​—Kisim Stretpela Save Long Jisas

WANEM TINGTING BILONG YU? OL DISPELA TOK HIA EM I STORI TRU O STORI NATING?

Mama i karim Jisas long Disemba 25.

Tripela saveman i go lukim Jisas long taim mama i karim em.

Jisas i no gat ol bratasusa.

Jisas em i God i gat bodi olsem man.

Jisas em i Pikinini Bilong God.

PLANTI man inap tok ol dispela tok em i tru. Tasol sampela bai tok yumi no inap save ol dispela tok i tru o nogat. Ating ol i pilim olsem sapos yu bilip long Jisas, orait em i no bikpela samting long save long ol bekim.

Tasol Baibel i no tok olsem. Em i kirapim yumi long kisim stretpela ‘save long Jisas Krais, Bikpela bilong yumi.’ (2 Pita 1:8) Yumi kisim dispela save taim yumi skelim ol Gutnius. Ol i helpim yumi long save long wanem tok em i stori tru na wanem tok em i stori nating. Orait nau bai yumi skelim tok ol Gutnius i mekim long ol dispela bilip yumi kamapim long antap.

BILIP: Mama i karim Jisas long Disemba 25.

STORI TRU O STORI NATING: STORI NATING.

Baibel i no kolim stret wanpela tok long mun o de em mama i karim Jisas. Orait, ol i kisim we dispela de Disemba 25? Buk The Encyclopædia Britannica i tok olsem ol man em ol i kolim ol yet olsem Kristen, ol i “laik bai dispela de i ken kamap long wankain taim ol haiden long Rom i save wokim bikpela de bilong ol long amamas . . . long pinis bilong taim bilong kol, taim san i sanap longpela taim moa na i wok long kam antap moa long skai.” Dispela ensaiklopidia i tok olsem ol bilip bilong “ol haiden em ol i save amamas long god bilong ol gaden na amamas long san namel long taim bilong kol,” ol dispela bilip i as bilong planti pasin bilong Krismas.

Yu ting Jisas i orait long ol man i amamas long betde bilong em long Disemba 25? Tingim: No gat wanpela man i save long de em mama i karim Jisas. Baibel i no tokim yumi long selebretim betde bilong Jisas, na i no gat wanpela samting i makim olsem ol Kristen bilong bipo i bin mekim, nogat. Tasol Baibel i kamapim de stret em Jisas i bin indai, na em i tokim ol disaipel bilong em long tingim dispela de.a (Luk 22:19) Em i klia tru olsem Jisas i laik bai ol disaipel i tingim gut indai bilong em olsem ofa i bikpela samting, na i no betde bilong em.​—Matyu 20:28.

BILIP: Tripela saveman o king i go lukim Jisas long taim mama i karim em.

STORI TRU O STORI NATING: STORI NATING.

Ating yu bin lukim ol piksa bilong bebi Jisas i slip long bokis kaikai bilong bulmakau, na tripela saveman i holim ol presen ol i sanap raunim em. Tasol kain piksa olsem i kamapim wanpela stori nating.

Tru, sampela man long hap bilong sankamap i bin i kam givim rispek long pikinini Jisas. Tasol ol dispela man ol i saveman bilong lukluk long sta. (Matyu 2:​1, The New English Bible; The Bible​​—An American Translation) Olsem wanem? Ol i bin painim Jisas i slip long bokis kaikai bilong bulmakau? Nogat; ol i go lukim em long haus. Ol samting i kamapim klia olsem ol i bin go lukim Jisas sampela mun bihain long mama i bin karim em.​—Matyu 2:​9-11.

Namba bilong ol dispela man, em 2-pela?, o 3-pela?, o 30? Baibel i no kolim. Ating ol i kisim dispela namba olsem 3-pela man long namba bilong tripela kain presen bilong ol.b (Matyu 2:​11) Sampela i tok ol dispela man em ol i kolim olsem ol saveman, ol i makim ol man bilong kain kain skin. Tasol dispela tingting i no stap long Baibel. Wanpela buk i kamapim ol tok bilong ol Gutnius i tok, “wanpela saveman i bin i stap 700 yia samting bihain long Krais i bin kamapim dispela stori nating.”

BILIP: Jisas i no gat ol bratasusa.

STORI TRU O STORI NATING: STORI NATING.

Baibel i kamapim klia olsem Jisas i gat ol bratasusa. Gutnius Luk i Raitim i kolim Jisas olsem “namba wan pikinini” bilong Maria, dispela i makim olsem bihain Maria i karim sampela pikinini moa.c (Luk 2:7) Gutnius Mak i Raitim i tok sampela long taun Nasaret i bin tingim Jisas i wankain tasol long ol brata bilong em, na ol i no ting em i bikman. Ol i tok: “Em i brata bilong Jems na Josep na Judas na Saimon. Ol susa bilong en ol i stap hia wantaim yumi.”​—Mak 6:3; Matyu 12:46; Jon 7:5.

Baibel i tok olsem, tasol planti tisa bilong lotu ol i strong long tok Jisas i no gat ol bratasusa. Sampela i tok olsem ol dispela brata na sista em ol kasen bilong Jisas.d Ol narapela i tok em ol pikinini bilong Josep. Tasol tingim: Sapos Jisas i wanpela pikinini tasol bilong Maria, yu ting ol dispela man bilong Nasaret inap tok olsem? Ating sampela bilong ol i bin lukim long ai bilong ol yet ol taim we Maria i gat bel. Ol i save olsem Jisas em i wanpela bilong ol pikinini em Maria i bin karim.

BILIP: Jisas em i God i gat bodi olsem man.

STORI TRU O STORI NATING: STORI NATING.

Dispela tingting olsem God i kam daun long graun na em i stap olsem man Jisas, em bilip bilong God Triwan i as bilong en, dispela bilip i bin i stap longtaim​—tasol em i kirap bihain long taim bilong Jisas. Buk The Encyclopædia Britannica i tok: “Dispela tok God Triwan na dispela bilip bilong God Triwan em i no stap long Nupela Testamen . . . Dispela bilip i kamap isi isi insait long sampela handet yia, na long rot bilong planti tok pait.”

Lotu i daunim tru Jisas taim ol i skulim ol man olsem em i God i gat bodi olsem man.e Long wanem rot ol i daunim em? Tingim dispela tok piksa. Sampela man i askim bos bilong ol long wanpela samting, tasol em i tok olsem em i no gat namba bilong givim dispela samting. Sapos tok bilong em i tru, orait dispela bos i kamapim savepasin olsem em i no gat bikpela namba long mekim olgeta samting. Sapos em i no tok tru​—olsem em inap long givim samting ol i askim long en, tasol em i no laik mekim olsem​—em i mekim pasin giaman.

Orait, Jisas i bekim wanem tok taim tupela aposel bilong em i laik kisim bikpela namba? Em i tokim ol: “Husat bai i sindaun long han sut na long han kais bilong mi, dispela em i no samting bilong mi long makim. Nogat. Dispela ol sia ol i bilong ol man Papa bilong mi i redim pinis bilong ol.” (Matyu 20:23) Sapos tru tru Jisas em i God, ating tok em i mekim i giaman, laka? Tasol nogat, taim em i tok long Man i gat bikpela namba tru, Jisas i stap gutpela piksa long pasin bilong daunim em yet​—na em i soim olsem em i no gat wankain namba olsem God.

BILIP: Jisas em i Pikinini Bilong God.

STORI TRU O STORI NATING: STORI TRU.

Jisas em i gutpela man, na i no dispela tasol, nogat. Em i tok: “Mi Pikinini Bilong God.” (Jon 10:36) Tru, olgeta kain man inap kolim ol yet Pikinini Bilong God. Tasol sapos tok bilong Jisas i no tru, dispela i makim em i wanem kain man? Ating em i no gutpela man, laka? Na em i man bilong giaman!

Nambawan samting i kamapim klia tru dispela tok bilong Jisas i tru, em tok bilong God yet. Tupela taim em i tok long Jisas: “Dispela em i Pikinini bilong mi.” (Matyu 3:​17; 17:5) Tingim dispela samting: Baibel i stori tasol long wan wan taim we ol man long graun i bin harim nek bilong God​—tasol long tupela bilong ol dispela taim, em i bin tokaut stret olsem Jisas em i Pikinini bilong em! Dispela em i nambawan samting tru i kamapim klia tok bilong Jisas i tru olsem em i Pikinini Bilong God.

Olsem wanem? Dispela stori i kamapim klia sampela stori tru bilong Jisas em yu no bin save long en bipo? Sapos olsem, orait skelim moa ol Gutnius em holi spirit i kirapim ol man long raitim. Kain stadi olsem bai mekim yu i amamas na helpim yu. Jisas yet i tok olsem taim man i kisim stretpela save long em na long Papa bilong em, dispela em i rot bilong kisim ‘laip i stap gut oltaim.’​—Jon 17:3.

[Ol Futnot]

[Blok/Piksa long pes 14]

Sampela Stretpela Save Moa Long Jisas

Jisas em i wanem kain man? Yu ting em i save pes drai na i no pilim hevi bilong ol man nating na i no laik pas wantaim ol narapela? Sampela bai tok yes long dispela askim. Olsem na ol i kirap nogut long save olsem Jisas . . .

• i bin go long sampela bung bilong amamas.​—Jon 2:​1-​11.

• i mekim gutpela tok amamas long narapela.​—Mak 14:​6-9.

• i amamas long ol liklik pikinini i stap wantaim em.​—Mak 10:​13, 14.

• i krai.​—Jon 11:35.

• i sori long ol narapela.​—Mak 1:​40, 41.