Skul Yumi Kisim Long Jisas

Olsem Wanem Yumi Ken Bihainim Em?

Taim ol manmeri i bilip long Jisas, em i save tokim ol: “Yu kam bihainim mi.” (Matyu 9:9; 19:21) Wanem ol samting i insait long pasin bilong bihainim Jisas, olsem stap wanpela Kristen? Skelim bekim bilong 3-pela bikpela askim.

Yu mas mekim wanem kain pasin long ol arapela?

▪ Ol disaipel i mas bihainim ol tok bilong Jisas long pasin ol i mekim long ol arapela. Jisas i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” Olsem wanem sapos wanpela i bagarapim bel bilong yu? Jisas i tok: “Yu mas hariap na stretim tok wantaim em.” Na tu, em i tokim ol disaipel: “Sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.”​—Matyu 5:25; 6:15; 7:12.

Long ol marit, Jisas i givim dispela tok: “Yupela i harim pinis bipo ol i tok olsem, ‘Yupela ol marit, yupela i no ken mekim pasin pamuk.’ Tasol mi tokim yupela olsem, sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” Trupela Kristen bai larim ol tok bilong Jisas i stiaim bel na tingting bilong em.​—Matyu 5:​27, 28.

Ol trupela Kristen i save daunim laik bilong ol yet na helpim ol arapela. Jisas i gat pasin bilong daunim laik bilong em yet. Olsem: Jisas wantaim ol aposel i bin mekim bikpela raun bilong autim tok na ol i taiet tru, na ol i no gat taim bilong kaikai. Olsem na Jisas i kisim ol long bot na ol i go long wanpela ples i no gat man bambai ol i ken malolo. Tasol ol manmeri i kisim save long ples em bai i go long en, na ol i ron i go long dispela hap paslain long em. Baibel i tok: “Taim Jisas i go sua em i lukim bikpela lain manmeri i stap. Na em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.” (Mak 6:​30-34) Yu inap bihainim pasin bilong Jisas long rot bilong mekim ol samting God i tokim yu long mekim, maski i gat sampela hatwok long en.

Bilong wanem yu mas autim gutnius?

▪ Jisas i bin skulim ol disaipel bilong em long autim gutnius. Em i tokim ol aposel: “Yupela go na autim tok olsem, ‘Kingdom bilong heven em i kam klostu pinis.’ ” (Matyu 10:7) Tok ol disaipel bilong Jisas i autim inap helpim tru ol man. Jisas i beten olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru.”​—Jon 17:3.

Jisas i tok profet long wanpela wok em planti milion manmeri bai insait long en. Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.” (Matyu 24:14) Sapos yu bin kisim save long Kingdom Bilong God na bilipim ol tok Baibel i mekim, orait yu bai amamas long tokim ol narapela long ol samting yu kisim save long en. Planti disaipel i bin kirap mekim olsem long rot bilong autim tok bilong Kingdom Bilong God long ol famili bilong ol.​—Jon 1:​40, 41.

Bilong wanem yu mas kisim baptais?

▪ Taim Jisas i kisim baptais long wara Jordan, em i beten na tok: ‘God . . . mi kam pinis bilong bihainim laik bilong yu.’ (Hibru 10:7) Sapos yu laik mekim laik bilong God, yu tu i mas kisim baptais. Jisas i tok: ‘Go mekim olgeta lain manmeri i kamap disaipel bilong mi. Na baptaisim ol.’​—Matyu 28:19.

Wanem ol wok na blesing i save kamap taim man i kisim baptais? Ol baptais disaipel bilong Jisas i save givim bel olgeta long mekim wok bilong God. Jisas i kolim Lo bilong God, olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela.” (Matyu 22:37) Na em i tok tu: “Sapos wanpela man i laik bihainim mi, orait em i mas daunim laik bilong em yet.” (Matyu 16:24) Taim man i kisim baptais, dispela i makim olsem em i wokim disisen long daunim laik bilong em yet na bihainim laik bilong God. Ol man husat i mekim olsem, ol inap askim God long mekim bel bilong ol i stap klin long ai bilong em.​—1 Pita 3:21.

Bilong kisim sampela save moa, lukim sapta 18 bilong buk em ol Witnes Bilong Jehova i bin wokim.