Hatwok Bilong Save Gut Long God na Nem Bilong Em

I GAT wanpela man i stap na em i laik pasim rot bilong yu long kisim save long nem bilong Jehova na pas gut wantaim em. Husat dispela man nogut? Baibel i tok: “Em giaman god bilong dispela graun, em i bin pasim tingting bilong ol dispela man i no bilip.” God bilong dispela graun em Satan. Em i laik bai yu stap long tudak na bai gutpela save bilong God i no inap i go insait long bel bilong yu. Satan i no laik bai yu save gut long Jehova na nem bilong em. Tasol olsem wanem Satan i save pasim tingting bilong ol man?​—2 Korin 4:​4-6.

Satan i bin mekim wok long rot bilong lotu giaman bilong pasim ol man long kisim save long God na nem bilong em. Olsem: Long bipo, sampela Juda i bin givim baksait long tok bilong Baibel na ol i laik bihainim tok bilong ol tumbuna i gat lo olsem ol i no ken kolim nem bilong God. Olsem na long ol yia olsem 100 na 200 bihain long Krais, ol Juda i gat wok long ritim buk bilong God long ol man, i luk olsem ol i bin kisim tok olsem ol i no ken ritim nem bilong God olsem i stap long buk bilong God​—ol i mas kolim tok ʼAdho·naiʹ, olsem “Bikpela.” Dispela em i wanpela as na planti man i lusim pasin bilong tingim God. Planti man i lus long kisim ol gutpela samting i kamap long pasin bilong pas gut wantaim God. Tasol olsem wanem long Jisas? Em i gat wanem tingting long nem bilong Jehova?

Jisas na Ol Disaipel i Bin Kamapim Nem Bilong God

Taim Jisas i beten long Papa bilong em, em i tok: “Mi bin kamapim nem bilong yu long ol. Na bai mi kamapim moa yet.” (Jon 17:26) Yumi ken ting planti taim Jisas i bin kolim nem bilong God taim em i ritim o kolim tok bilong sampela hap bilong Ol Skripsa Hibru i gat dispela nem long en. Olsem na yumi save, Jisas i bin kamapim nem bilong God planti taim, olsem ol profet husat i bin stap paslain long em ol i bin mekim. Sapos i gat sampela Juda i no laik kolim nem bilong God long taim Jisas i mekim wok bilong em long graun, yumi ken save Jisas yet i no inap bihainim pasin bilong ol. Em i bin mekim strongpela tok long ol hetman bilong lotu, olsem: “Yupela i save daunim tok bilong God na litimapim pasin yupela i bin kisim long ol tumbuna.”​—Matyu 15:6.

Ol disaipel i stap gut long Jisas ol i wok yet long kamapim nem bilong God long ol man taim Jisas i dai na kirap bek pinis. (Lukim blok “Yu Ting Ol Kristen Bilong Pastaim i Bin Yusim Nem Bilong God?”) Long Pentikos 33 C.E., em long dispela de kongrigesen Kristen i bin kamap nupela, aposel Pita i kamapim wanpela tok profet bilong Joel na em i tokim bikpela lain Juda na ol man i bihainim lotu Juda: “Olgeta manmeri i singaut long Bikpela [“long nem bilong Jehova,” NW] long helpim ol, em bai i kisim bek ol.” (Aposel 2:21; Joel 2:32) Ol Kristen bilong bipo i bin helpim ol man bilong planti kantri long kisim save long nem bilong Jehova. Olsem na long wanpela bung bilong ol aposel na lain hetman long Jerusalem, disaipel Jems i tok: “God i bin tingim ol man bilong ol arapela lain . . . bilong kisim wanpela lain em nem bilong en i ken stap long ol.”​—Aposel 15:​14, NW.

Tasol dispela birua bilong nem bilong God i no les. Taim ol aposel i dai pinis, Satan i kirap kwik long kamapim pasin apostet. (Matyu 13:​38, 39; 2 Pita 2:1) Olsem: Justin Martyr, em man i gat nem Kristen na man bilong raitim buk, em i bin bon long taim aposel Jon i dai, em laspela bilong ol aposel. Tasol long ol rait bilong em, planti taim Justin i tok, Man Bilong Givim olgeta samting em i “wanpela God i no gat nem tru bilong em.”

Taim ol apostet Kristen i wokim ol kopi bilong Ol Skripsa Grik, ol i bin rausim nem bilong Jehova long en na ol i putim wanpela tok Grik, Kyʹri·os, olsem “Bikpela.” Na ol i mekim olsem tu long Ol Skripsa Hibru. Ol i no kolim moa nem bilong God taim ol i ritim Baibel, olsem na ol apostet Juda i save raitim ol kopi bilong Baibel, ol i rausim nem bilong God na ol i raitim ʼAdho·naiʹ winim 130 taim. Jerome i bin pinisim wok bilong em long tanim Baibel long tok Latin long 405 C.E. em ol i kolim Baibel Vulgate, na long dispela Baibel tu ol i no putim nem tru bilong God.

Ol i Laik Rausim Nem Bilong God Long Nau

Long nau, ol saveman i save olsem nem bilong Jehova i stap 7,000 taim samting long Baibel. Olsem na sampela Baibel em planti man i save ritim, olsem Jerusalem Bible bilong ol Katolik, na Baibel Katolik La Biblia Latinoamérica long tok Spen, na Baibel Reina-Valera long tok Spen em planti man i save laikim, ol i kamapim nem bilong God planti taim. Sampela Baibel i raitim nem bilong God olsem “Yahweh.”

Sori tru, planti misin em ol i sponsarim wok bilong tanim Baibel, ol i save subim ol saveman bilong dispela wok long rausim nem bilong God long ol Baibel ol i tanim. Olsem: Long wanpela pas bilong Jun 29, 2008, i go long ol presiden bilong ol kibung bilong ol bisop bilong lotu Katolik, Vatiken i tok: “Nau long dispela taim, pasin bilong kolim nem tru bilong God bilong Israel i wok long kamap isi isi.” Dispela pas i putim strongpela tok olsem: ‘Ol i no ken raitim o kolim nem bilong God.’ Na tu, “taim ol i tanim Baibel i go long ol tokples bilong nau, . . . ol i mas tanim tetragramaton olsem ‘Bikpela,’ em wankain olsem Adonai/Kyrios.” I klia tru olsem Vatiken i putim dispela tok bambai ol i ken pinisim pasin bilong kolim nem bilong God.

Ol Protestan tu i no bin rispek long nem bilong Jehova. Wanpela mausman bilong Baibel New International Version em ol Protestan i bin sponsarim wok bilong tanim, na ol i bin prinim long tok Inglis long 1978, em i tok: “Jehova em i nem tru bilong God, na i gutpela sapos yumi bin mekim wok long en. Tasol yumi bin lusim 2 milion dola samting long tanim dispela Baibel, na dispela mani bai lus nating sapos yumi tanim Song 23 olsem, ‘Yahweh em i wasman bilong mi.’”

Na tu, ol misin i bin pasim rot bilong ol lain bilong Latin Amerika long kisim save long nem bilong God. Steven Voth, bilong lain United Bible Societies (UBS), em i save stiaim wok bilong tanim Baibel, em i tok: “Namel long ol Protestan bilong Latin Amerika i gat wanpela tok pait long pasin bilong mekim wok long nem Jehová . . . I gat wanpela bikpela lain bilong misin Pentikostal . . . i tok ol i laik kisim Baibel Reina-Valera bilong 1960, tasol ol i no laikim nem Jehová long en. Ol i laik bai tok Señor [Bikpela] i stap long en.” Voth i tok, pastaim lain UBS i sakim laik bilong ol, tasol bihain ol i orait long en na ol i kamapim wanpela Baibel Reina-Valera “i no gat nem Jehová long en.”

Pasin bilong rausim nem bilong God long Tok bilong em, Baibel, na putim tok “Bikpela” olsem senis bilong en, dispela i pasim ol man long kisim save olsem God em i husat tru. Dispela senis i save paulim ol man. Olsem: Man i ritim Baibel i no inap save, dispela tok “Bikpela” i makim Jehova o Pikinini bilong em, Jisas. Olsem na long ves bilong Baibel we aposel Pita i kamapim tok bilong Devit, em i tok (NW): “Jehova i tokim Bikpela bilong mi [em Jisas i kirap bek pinis]: ‘Yu sindaun long han sut bilong mi,’” planti Baibel i tanim dispela tok olsem: “Bikpela i tokim Bikpela bilong mi.” (Aposel 2:​34, Buk Baibel) Na long atikol em i raitim, (“Yahweh and the God of Christian Theology”) David Clines i tok: “Taim dispela nem Yahweh i lus pinis long tingting bilong ol Kristen, ol i kirap long tingim Krais tasol.” Olsem na planti manmeri bilong lotu ol i no save olsem dispela God tru em Jisas i bin beten long en, em i wanpela Man i gat nem tru bilong em​—Jehova.

Satan i bin wok strong long pasim tingting bilong ol man na bai ol i no inap save long God. Tasol maski i olsem, yu inap save gut long Jehova na pas gut wantaim em.

Yu Inap Save Gut Long Jehova na Nem Bilong Em

Tru tumas, Satan i bin mekim pait long daunim nem bilong God, na em i mekim dispela pait long rot bilong ol lotu giaman. Tasol yumi save, i no gat wanpela strong long heven o long graun em inap pasim Bikpela King Jehova long kamapim nem bilong em long ol man i laik save tru long em, na ol gutpela samting em i tingting pinis long mekim bilong helpim ol man i stap gut long em.

Ol Witnes Bilong Jehova bai amamas long helpim yu long kisim save long olsem wanem yu ken i go klostu long God long rot bilong stadi long Baibel. Ol i bihainim pasin bilong Jisas husat i tok long God olsem: “Mi bin kamapim nem bilong yu long ol.” (Jon 17:26) Taim yu wok long tingim ol ves bilong Baibel i kamapim klia ol kain kain wok Jehova i bin mekim bilong mekim gut long ol man, bai yu kisim save long ol gutpela pasin bilong em.

Gutpela man Jop em i bin i stap ‘gutpela pren bilong God,’ na yu tu inap mekim olsem. (Jop 29:4) Taim yu kisim save long Tok Bilong God, yu inap save gut long Jehova na nem bilong em. Kain save bai helpim yu long bilip tru olsem Jehova bai mekim ol samting i stret wantaim mining bilong nem bilong em, olsem em yet i bin tokaut long en​—“Mi bai kamap wanem wanem kain mi laikim.” (Kisim Bek 3:​14, NW) Olsem na em bai inapim tru olgeta gutpela promis em i bin mekim long ol man bilong graun.

[Blok/Ol Piksa long pes 6]

Yu Ting Ol Kristen Bilong Pastaim i Bin Yusim Nem Bilong God?

Long taim bilong ol aposel bilong Jisas, ol i bin kamapim ol kongrigesen Kristen long planti kantri. Ol lain bilong ol dispela kongrigesen i save bung wantaim bilong stadi long buk bilong God. Yu ting nem bilong Jehova i bin stap long Baibel bilong ol dispela Kristen bilong pastaim?

Tok Grik i bin kamap olsem bikpela tokples bilong planti kantri, olsem na planti kongrigesen i bin yusim Baibel Grik Septuagint. Dispela Baibel em Ol Skripsa Hibru ol i bin tanim long tok Grik na ol i pinisim dispela wok olsem wan handet yia samting paslain long Krais. Sampela saveman i tok, stat long taim ol i bin kirap long tanim Baibel Septuagint, ol i bin rausim nem bilong God na ol i putim biknem Kyʹri·os, em wanpela tok Grik i makim “Bikpela.” Tasol ol samting i kamapim klia olsem dispela tok i no tru.

Ol olpela rait yu lukim long dispela pes ol i hap bilong Baibel Grik Septuagint ol i bin wokim klostu long taim bilong Jisas. Ol i kamapim klia nem bilong Jehova em ol i raitim long 4-pela leta Hibru יהוה (YHWH), ol i kolim Tetragramaton. Profesa George Howard i tok: “Mipela i gat 3-pela kopi bilong Baibel Grik Septuagint ol i bin kamapim paslain long taim bilong ol Kristen, na i no gat wanpela taim ol i bin tanim Tetragramaton olsem kyrios​—ol i no bin tanim dispela tok. Long nau yumi inap tok stret olsem, em pasin bilong ol Juda paslain long taim bilong Nupela Testamen, na long taim bilong en, na bihain long en, long raitim nem bilong God . . . i go stret long hap bilong Baibel ol i raitim long tok Grik.”​—Biblical Archaeology Review.

Yu ting ol aposel bilong Jisas i bin putim nem bilong God long ol tok ol i raitim long Baibel em spirit bilong God i stiaim ol long mekim? Profesa Howard i tok: “Sios em Nupela Testamen i stori long en i bin ritim na mekim wok long Baibel Septuagint i gat nem bilong God long tok Hibru, na taim ol man bilong raitim Nupela Testamen i kamapim hap tok bilong en, ol i bin putim Tetragramaton insait long rait bilong ol.”

Olsem na yumi ken ting ol Kristen bilong pastaim ol inap ritim nem bilong God long Ol Skripsa Hibru em ol i bin tanim na long ol kopi bilong Ol Skripsa Grik ol i bin holim.

[Kredit Lain]

All photos: Société Royale de Papyrologie du Caire

[Piksa long pes 4, 5]

Wanpela hap bilong buk Aisaia i stap long ol olpela rait bilong detsi, nem bilong God i stap

[Kredit Lain]

Shrine of the Book, Photo © The Israel Museum, Jerusalem

[Piksa long pes 7]

Ol misin i bin haitim nem bilong God long Baibel, long wanem, ol i bihainim pasin tumbuna bilong ol Juda, o ol i tingim winmani ol inap kisim

[Piksa long pes 8]

Jisas i stap gutpela piksa long kamapim nem bilong God long ol man