“Yupela i Mas Bihainim Wanem Kain Pasin?”
“Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God.”—2 PI. 3:11.
1. Bilong wanem namba 2 pas bilong Pita i kamap long taim stret bilong strongim ol Kristen long taim bilong em?
TAIM aposel Pita i raitim namba 2 pas bilong em, kongrigesen Kristen i bin karim pinis planti hevi long han bilong ol birua. Tasol dispela i no daunim laik bilong ol long givim bel long mekim wok bilong Jehova, o pasim kongrigesen Kristen long kamap bikpela. Olsem na Satan i mekim wok long narapela samting, em samting i bin wok gut planti taim bipo. Olsem Pita i kamapim, Satan i bin traim long bagarapim lain bilong God long rot bilong ol tisa giaman em “oltaim ol i save aigris long ol meri,” na “ol i skul pinis long pasin bilong mangalim ol samting bilong ol arapela man.” (2 Pi. 2:1-3, 14; Ju. 4) Olsem na namba 2 pas bilong Pita i bilong strongim tru ol Kristen long i stap gut long God.
2. Namba 2 Pita sapta 3 i toktok long wanem samting? Yumi mas givim wanem ol askim long yumi yet?
2 Pita i tok: “Long taim mi stap yet long dispela bodi, mi ting em i gutpela long mi mas tokim yupela gen, bilong kirapim yupela long tingim gen ol dispela samting. Mi save, liklik taim tasol na bai mi lusim bodi bilong mi. . . . Olsem na mi laik wok strong long tokim yupela gut. Na taim mi dai pinis, orait long olgeta taim yupela bai inap tingim gen dispela olgeta samting mi bin tokim yupela long en.” (2 Pi. 1:13-15) Yes, Pita i bin save olsem klostu em bai i dai, tasol em i laik bai ol Kristen i mas tingim yet dispela tok em i givim long ol long taim stret. Na tru tumas, ol dispela tok i kamap hap bilong Baibel na yumi olgeta long nau inap ritim. Sapta 3 bilong namba 2 pas bilong Pita i bikpela samting long yumi long nau, long wanem, em i toktok long “taim bilong las de” bilong dispela taim nogut bilong nau, na i toktok long pinis bilong skai na graun. (2 Pi. 3:3, 7, 10) Pita i gat wanem tok bilong givim long yumi? Olsem wanem pasin bilong bihainim tok bilong em bai helpim yumi, na Jehova bai orait long yumi?
3, 4. (a) Pita i tok wanem? Em i givim wanem tok lukaut? (b) Bai yumi skelim wanem 3-pela samting?
3 Taim Pita i toktok pinis long dispela graun bilong Satan bai bagarap, em i tok: “Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God.” (2 Pi. 3:11, 12) Pita i save olsem ol man i mekim laik bilong Jehova na kamapim ol pasin God i laikim, ol tasol bai abrusim bagarap long taim God i “mekim save” long ol birua bilong em. (Ais. 61:2) Olsem na aposel Pita i tok moa: “Ol pren tru, yupela i save pinis long ol dispela samting bai i kamap bihain. Olsem na yupela i mas lukaut gut long yupela yet. Nogut giaman bilong ol man bilong sakim lo em bai i pulim yupela na yupela i no sanap strong moa long bilip.”—2 Pi. 3:17.
4 Pita i stap namel long ol manmeri i gat “save pinis,” olsem na em i bin save olsem long taim bilong las de ol Kristen i mas was gut tru bambai ol inap holimpas pasin bilong i stap gut long God. Bihain, aposel Jon i kamapim klia as bilong dispela samting. Em i tok profet olsem ol bai rausim Satan long heven na Satan bai “belhat nogut tru” long “ol dispela manmeri i save bihainim ol lo bilong God, na ol i save autim tok bilong Jisas na bihainim em.” (KTH 12:9, 12, 17) Ol gutpela wokman em God i bin makim na “ol arapela sipsip” em ol i stap gut long God, ol bai i no bagarap. (Jo. 10:16) Tasol olsem wanem long yumi wan wan? Bai yumi holimpas pasin bilong i stap gut long God? Yumi bai kisim helpim long mekim olsem sapos yumi wok strong long (1) kisim ol pasin God i laikim, (2) holimpas stretpela pasin na stap klin na i no gat asua long ai bilong God, na (3) holim stretpela tingting long ol hevi. Orait nau yumi ken skelim ol dispela samting.
Kisim Ol Pasin God i Laikim
5, 6. Yumi mas wok strong long kisim wanem ol pasin? Bilong wanem yumi mas “wok strong tru” long kisim ol dispela pasin?
5 Long kirap bilong namba 2 pas, Pita i tok: “Yupela i mas wok strong tru long bungim bilip bilong yupela wantaim gutpela pasin, na gutpela pasin wantaim save, na save wantaim pasin bilong bosim bel, na pasin bilong bosim bel wantaim pasin bilong sanap strong, na pasin bilong sanap strong wantaim pasin bilong givim bel tru long God, na pasin bilong givim bel tru long God wantaim pasin bilong laikim ol brata, na pasin bilong laikim ol brata wantaim pasin laikim. Sapos ol dispela pasin i stap long yupela na i pulap na kapsait, orait stretpela save bilong yupela long Bikpela bilong yumi Jisas Krais bai i no inap i stap nating. Nogat. Em bai i karim planti kaikai.”—2 Pi. 1:5-8, NW.
6 Tru, yumi mas “wok strong tru” bilong insait long ol wok i helpim yumi long kisim ol pasin God i laikim. Olsem: I hatwok long go long olgeta miting Kristen, ritim Baibel long olgeta de, na bihainim gutpela sediul bilong mekim stadi bilong yumi yet. Na ating yumi mas wok strong bilong stretim gut taim bilong mekim gut Famili Lotu long olgeta wik. Tasol taim yumi kisim pasin bilong bihainim gutpela sediul pinis, em bai isi moa long mekim ol dispela wok—na moa yet taim yumi pilim olsem dispela i helpim gut yumi.
7, 8. (a) Sampela i tok wanem long Famili Lotu? (b) Olsem wanem pasin bilong mekim Famili Lotu i save helpim yu?
7 Long samting bilong mekim famili lotu, wanpela sista i tok: “Em i helpim mipela long kisim skul long planti samting.” Narapela i tok: “Mi mas tok tru, mi no bin amamas long buk stadi i pinis. Mi laikim tumas dispela miting. Tasol nau mipela i gat Famili Lotu bilong mipela, na mi luksave olsem Jehova i save mipela i sot long wanem samting na long wanem taim mipela i mas kisim dispela samting.” Wanpela het bilong famili i tok: “Pasin bilong mekim Famili Lotu i helpim tru mipela. Taim mipela i gat wanpela miting bilong helpim tru mipela olsem marit, em i gutpela samting tru! Mitupela wantaim i pilim olsem mipela i kamapim gut moa ol pasin bilong holi spirit, na mipela i amamas moa long mekim wok bilong autim tok.” Narapela papa bilong famili i tok: “Ol pikinini i lain long mekim wok painimaut bilong ol yet na ol i lain long planti samting—na ol i amamas long mekim. Dispela pasin i helpim mipela long bilip tru olsem Jehova i save long ol wari bilong mipela na em i save harim ol beten bilong mipela.” Olsem wanem? Ol dispela tok i kamapim tingting bilong yu long dispela gutpela samting Jehova i bin givim long yumi?
8 No ken larim ol liklik samting i pasim yupela long mekim Famili Lotu. Tupela marit i tok: “Insait long 4-pela wik i go pinis, long Fonde nait, wanpela samting i kamap long famili bilong mipela na klostu dispela i pasim mipela long mekim stadi bilong mipela, tasol mipela i no larim dispela samting i pasim mipela.” Tru, ating sampela taim yu mas senisim sediul. Tasol yu mas tingting strong long mekim Famili Lotu long olgeta wik—no ken tru lusim wanpela wik!
9. Olsem wanem Jehova i helpim Jeremaia? Yumi inap kisim wanem skul long pasin bilong Jeremaia?
9 Profet Jeremaia i stap gutpela piksa long yumi ken bihainim. Em i mas kisim ol kaikai bilong spirit i kam long Jehova na em i pilim tru dispela samting. Dispela kaikai i helpim em long sanap strong na no ken lusim wok bilong autim tok long ol lain i no laik harim tok. Em i tok: “Mi pilim tok bilong yu i olsem wanpela bikpela paia i stap long bel bilong mi na i olsem paia i lait insait long ol bun bilong mi.” (Jer. 20:8, 9) Na tu, dispela kaikai i helpim em long sanap strong long taim nogut, paslain long bagarap i painim Jerusalem. Long nau, yumi gat Baibel olgeta. Taim yumi wok strong long stadi na kisim tingting bilong God long ol samting, wankain olsem Jeremaia, bai yumi amamas long mekim yet wok autim tok, stap gut long God maski ol hevi i painim yumi, na stap klin long pasin bilong yumi na long ol samting bilong spirit.—Jem. 5:10.
‘Stap Klin na i No Gat Asua’
10, 11. Bilong wanem yumi mas wok strong long ‘stap klin na i no gat asua’? Bilong i stap olsem yumi mas mekim wanem?
10 Yumi ol Kristen, yumi save olsem yumi stap long taim bilong pinis. Olsem na yumi no kirap nogut olsem ol man bilong dispela graun i laikim tumas ol samting Jehova i nolaik tru long en, olsem pasin mangal, olkain pasin pamuk, na pasin bilong pait na bagarapim man. Ating tingting bilong Satan i olsem: ‘Sapos mi no inap mekim na ol wokman bilong God i pret, orait mi mas bagarapim pasin bilong ol.’ (KTH 2:13, 14) Olsem na yumi mas tingim tru gutpela tok lukaut bilong Pita: “Yupela i mas wok strong long mekim yupela yet i stap klin long ai bilong God na yupela i no gat asua long wanpela samting. Na yupela i mas i stap wanbel wantaim God.”—2 Pi. 3:14.
11 Dispela tok “yupela i mas wok strong” i wankain long tok Pita i bin mekim paslain long dispela olsem “yupela i mas wok strong tru.” Yumi save, Jehova—em man husat i bin kirapim Pita long raitim dispela tok—em i save yumi mas wok strong long ‘stap klin na i no gat asua,’ na ol samting doti bilong dispela graun bilong Satan i no ken bagarapim yumi. Bilong wok strong yumi mas lukautim bel na tingting bilong yumi na ol laik nogut i no ken pulim yumi. (Ritim Sindaun 4:23; Jems 1:14, 15.) Na tu, yumi mas sanap strong na sakim ol man i kirap nogut long pasin Kristen yumi bihainim na ol i “tok nogut long [yumi].”—1 Pi. 4:4.
12. Luk 11:13 i givim wanem tok promis long yumi?
12 Yumi gat sin, olsem na i hatwok long bihainim stretpela pasin. (Ro. 7:21-25) I gat wanpela rot tasol na yumi inap sanap strong, em sapos yumi go long Jehova husat i amamas long givim holi spirit long ol man i askim em. (Lu. 11:13) Dispela spirit i helpim yumi long kamapim ol pasin God i laikim na i helpim yumi long sakim ol traim, na tu, i helpim yumi long karim ol hevi, em ol i wok long kamap planti nau long dispela taim we de bilong Jehova i wok long kam klostu.
Larim Ol Hevi i Strongim Yu
13. Sapos ol hevi i kamap long laip bilong yumi, wanem samting bai helpim yumi long sanap strong?
13 Taim yumi stap yet long dispela graun i gat pasin nogut long en, ol kain kain hevi bai painim yumi. Tasol yumi no ken larim ol dispela hevi i daunim yumi, nogat, yumi mas larim ol hevi i helpim yumi long soim olsem yumi laikim tru God na mekim bilip bilong yumi long God na Baibel i kamap strong moa. Disaipel Jems i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.” (Jem. 1:2-4) Na tu, tingim “sapos traim i kamap long ol man i bihainim God, orait Bikpela i save long rot bilong kisim bek ol long dispela traim.”—2 Pi. 2:9.
14. Olsem wanem pasin bilong Josep i strongim yu?
14 Tingim samting i bin painim pikinini bilong Jekop, em Josep. Ol brata bilong em yet i bin salim em olsem wokboi nating. (Stt. 37:23-28; 42:21) Olsem wanem? Josep i lusim bilip, long wanem, ol samting nogut tru i bin painim em? Em i bel hevi long God i larim ol dispela samting nogut i painim em? Baibel i tokaut klia, nogat! Tasol sampela hevi moa i bin painim Josep. Bihain, meri bilong Potifar i tok giaman olsem Josep i laik reipim em, na Josep i kalabus. Tasol long dispela taim tu, em i no lusim pasin bilong givim bel tru long lotuim God. Nogat. (Stt. 39:9-21) Em i larim ol hevi i strongim em, na em i kisim bikpela blesing long dispela.
15. Stori bilong Naomi inap skulim yumi long wanem samting?
15 Tru, ol hevi inap mekim na yumi bel hevi o yumi kisim bikpela bel hevi. Ating sampela taim Josep tu i bel hevi. Sampela narapela gutpela wokman bilong God tu i pilim olsem. Tingim Naomi, em man na tupela pikinini man bilong em ol i bin dai. Em i tok: “Yupela i no ken kolim mi Naomi, . . . Nogat. God I Gat Olgeta Strong i bin mekim nogut long mi, olsem na yupela i mas kolim mi Mara, em i olsem meri bilong bel nogut.” (Rut 1:20, 21) Yumi ken ting i stret Naomi i pilim olsem. Olsem Josep, em i no bin pundaun long ol samting bilong spirit, na em i no lusim pasin bilong em long i stap gut long God. Na Jehova i givim gutpela pe long dispela meri. (Rut 4:13-17, 22) Na samting i bikpela moa, long Paradais bai kamap bihain, em bai stretim olgeta samting nogut Satan na ol man nogut bilong dispela graun i bin mekim. “Ol man bai i no inap tingim moa ol samting i bin kamap bipo.”—Ais. 65:17.
16. Yumi mas i gat wanem tingting long pasin bilong beten? Bilong wanem i olsem?
16 Maski wanem hevi i painim yumi, pasin laikim bilong God i stap bilong strongim yumi. (Ritim Rom 8:35-39.) Satan bai wok yet long mekim yumi bel hevi, tasol sapos yumi “tingting gut” na “prea gut,” em bai i no inap mekim olsem. (1 Pi. 4:7) Jisas i tok: “Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.” (Lu. 21:36) Tingim tok bilong Jisas olsem yumi mas “beten oltaim,” em olsem yumi mas beten strong oltaim. Taim em i tokim yumi long beten oltaim, em i kamapim olsem nau em i taim bilong tingting strong long i stap gut long em na Papa bilong em. Ol man i em God i orait long ol, ol tasol inap abrusim bagarap long de bilong Jehova.
Mekim Yet Wok Bilong Jehova
17. Sapos i hatwok long autim tok long teritori bilong yu, olsem wanem gutpela pasin bilong ol profet bilong bipo inap helpim yu?
17 Pasin bilong mekim ol wok bilong spirit i save givim nupela strong long yumi. Dispela i kirapim yumi long tingim tok bilong Pita: “Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God.” (2 Pi. 3:11) Nambawan samting bilong ol dispela wok em wok autim tok bilong gutnius. (Mt. 24:14) Tru, ating long sampela teritori i hatwok long autim tok, long wanem, ol man i no laik harim tok o ol i birua long yumi o ol i tingting planti long ol samting bilong wan wan de. Wankain samting i kamap long ol wokman bilong Jehova long bipo. Tasol ol i no givap, nogat, ol i go bek “planti taim” na autim tok bilong God long ol man. (Ritim 2 Stori 36:15, 16; Jer. 7:24-26) Wanem samting i helpim ol long sanap strong? Ol i kisim wankain tingting olsem Jehova long wok bilong ol, na i no tingting bilong dispela graun. Na tu, ol i ting olsem pasin bilong holim nem bilong God em i nambawan gutpela samting.—Jer. 15:16.
18. Wok bilong autim tok bilong Kingdom bai mekim wanem long pasin bilong litimapim nem bilong God long bihain?
18 Yumi tu i holim dispela gutpela wok bilong autim nem bilong Jehova na laik bilong em. Tingim dispela: Taim kot bilong God i kamap long ol birua bilong em, bai ol i no inap tok olsem yumi no bin tokim ol long Jehova na laik bilong em. Tru tumas, wankain olsem Fero bilong bipo, ol bai i save olsem Jehova i givim strafe long ol. (Kis. 8:1, 20; 14:25) Long wankain taim, Jehova bai givim biknem long ol wokman bilong em, na em bai mekim olsem long rot bilong kamapim long ples klia olsem ol i mausman bilong em.—Ritim Esekiel 2:5; 33:33.
19. Olsem wanem yumi ken soim olsem yumi laik mekim gut wok long dispela haptaim we Jehova i isi long ol man?
19 Klostu long pinis bilong namba 2 pas bilong em, Pita i tokim ol wanbilip olsem: “Bikpela i wet yet na em i isi long yumi . . . long wanem, em i laik kisim bek yumi.” (2 Pi. 3:15) Tru tumas, yumi mas wok yet long mekim gut wok long dispela haptaim we Jehova i isi long ol man. Olsem wanem yumi inap mekim olsem? Long rot bilong kamapim ol pasin em God i laikim, na ‘stap klin na i no gat asua,’ na holimpas stretpela tingting long ol hevi, na wok strong long mekim wok bilong Kingdom. Sapos yumi mekim olsem, yumi inap kisim ol blesing bilong oltaim i kam long rot bilong “nupela skai na nupela graun.”—2 Pi. 3:13.
Yu Inap Tingim?
• Olsem wanem yumi inap kisim ol pasin God i laikim?
• Olsem wanem yumi inap i ‘stap klin na i no gat asua’?
• Yumi inap kisim wanem skul long Josep na Naomi?
• Bilong wanem pasin bilong insait long wok autim tok i gutpela samting tru?
[Piksa long pes 9]
Wanem samting bai helpim yupela ol man marit na famili bilong yupela long kisim ol pasin God i laikim?
[Ol Piksa logn pes 10]
Yumi inap kisim wanem skul long pasin Josep i mekim taim ol hevi i painim em?