Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Yu ken traim bekim ol dispela askim i stap daunbilo:

• Wanem samting bai helpim yu long skulim ol pikinini long mekim gut wok bilong ol?

“Soim pasin” long em. Soim em long pasin bilong mekim gut wok bilong em. (Jo. 13:15) Holim stretpela tingting long ol samting pikinini inap mekim. Taim pikinini i wok long kamap bikpela, lainim em long mekim sampela samting moa long sait bilong i stap klin, bihainim stret taim, na mekim homwok. Kolim stret ol samting yu laik bai em i mas mekim.​—5/1, pes 19-​20.

• Bilong wanem God i no givim strafe long Aron taim em i wokim bulmakau gol?

Tru, Aron i brukim lo bilong God taim em i wokim wanpela imis. (Kis. 20:​3-5) Tasol Moses i beten long helpim Aron, na beten bilong em i bin gat “bikpela strong.” (Jem. 5:16) Aron i gat pasin bilong i stap gut long God. Maski ol manmeri i kirapim em long wokim bulmakau gol, bihain em i soim olsem bel bilong em i no orait long pasin bilong lotuim giaman god. Em i joinim olgeta man bilong lain Livai em ol i stap long sait bilong Jehova. (Kis. 32:​25-​29)​—5/15, pes 21.

• Ples Ofir, em Baibel i stori long en olsem em i gat gol, em i stap we?

Solomon i wokim planti sip long taun Esiongeber, bilong karim ol gol long Ofir i kam. (1 Kin. 9:​26-​28) Dispela taun i stap long het bilong Galf Bilong Akaba klostu long ples nau ol i kolim Elat na Akaba, long hap bilong solwara Retsi. Olsem na ating Ofir i bin stap long Arebia klostu long solwara Retsi o long nambis bilong Afrika o bilong India.​—6/1, pes 15.

• “Balsam bilong Gileat” i makim wanem samting? (Jer. 8:​22, NW)

Balsam i makim wanpela wel i gat gutpela smel em ol i kisim long blut bilong kain kain diwai. Kain diwai olsem i save stap long Gileat, long hap is long wara Jordan, na long sampela arapela hap tu. Balsam i gat ol gutpela samting long en bilong mekim drai ol sua. Lain Israel i stap nogut, tasol dispela i no kirapim ol long painim samting bilong oraitim ol, ol i mekim yet pasin nogut. (Jer. 8:9)​—6/1, pes 21-​22.

• Wanem samting inap helpim Kristen long karim hevi taim poroman marit bilong em i no stap gut long marit?

Sapos poroman i no gat rong em i bin wok strong long bihainim ol stiatok bilong Baibel, em i no ken ting em i gat asua long poroman i bin mekim pasin pamuk. God i save olsem yu mas i gat sampela samting bilong mekim gut bel bilong yu na strongim yu. Em inap mekim gut bel bilong yu long rot bilong ol bratasista.​—6/15, pes 30-​31.

• Yu ken mekim wanem bilong helpim wanpela man i sik?

Putim gut yau. (Sav. 3:​1, 7) Pilim tru hevi bilong em. (Ro. 12:15) Mekim tok i strongim em na helpim gut em. (Kl. 4:6; 1 Jo. 3:18) Pas gut wantaim em. (Snd. 17:17)​—7/1, pes 10-​13.

• Olsem wanem yumi save olsem God i no gat kirap bilong em?

Moses i kamapim klia dispela samting long wanpela beten. (Sng. 90:2) Olsem na God i gat dispela biknem “King bilong olgeta taim.” (1 Ti. 1:17) ​—7/1, pes 28.

• Yu ken mekim wanem bilong putim laik bilong rit long bel bilong ol pikinini bilong yu?

Pasin laikim na pasin bilong papamama long stap gutpela piksa, dispela inap putim laik bilong rit long bel bilong ol pikinini. Givim ol buk long ol. Ritim buk wantaim ol. Kirapim ol long stori long samting yupela ritim. Tokim ol pikinini long ritim buk long yu, na kirapim ol long kamapim ol askim.​—7/15, pes 26.

• I gat wanem as na Jisas i no hariap long oraitim pren bilong em Lasarus, em i sik?

Taim Jisas i kamap long ples, Lasarus i bin stap long matmat 4-pela de pinis. Jisas i bin save olsem sapos em i wet pastaim, dispela bai litimapim moa yet nem bilong Papa bilong em. Long dispela rot, planti manmeri i kamap bilipman. (Jo. 11:45)​—8/1, pes 14-​15.

• Ol “ples lotu” bilong ol Kenan i wanem samting?

Planti taim ol dispela ples lotu i stap antap long ol maunten. Long ol dispela ples ol i save sanapim ol alta na ol imis ol i bin wokim long diwai o ston, na mekim ol pasin God i no laik tru long en. (Nam. 33:52) ​—8/1, pes 23.