Askim

Jehova i tambuim pasin bilong lotuim ol giaman god, olsem na bilong wanem em i no bin givim strafe long Aron taim em i wokim bulmakau gol?

Buk Kisim Bek sapta 32 i stori long Aron i wokim bulmakau gol, taim em i mekim olsem, em i brukim lo bilong God long pasin bilong lotuim giaman god. (Kis. 20:​3-5) Long dispela as, “Bikpela i kros nogut long Aron . . . na i laik kilim em. Olsem na [Moses i] prea long helpim Aron.” (Lo 9:​19, 20) Yu ting prea bilong stretpela man Moses i gat “bikpela strong” bilong helpim Aron? (Jem. 5:16) Yes. I luk olsem Jehova i harim beten bilong Moses na em i no givim strafe long Aron, long wanem, beten bilong Moses i gat bikpela strong, na tu, i gat narapela tupela as.

Wanpela as em olsem, Aron i gat pasin bilong i stap gut long God. Taim God i tokim Moses long go sanap long ai bilong Fero, na long kisim lain Israel na lusim Isip, Jehova i makim Aron long go wantaim Moses na stap olsem mausman bilong Moses. (Kis. 4:​10-16) Dispela tupela man i bin bihainim tok bilong God na inap planti taim ol i go sanap long ai bilong Fero, na ol i karim hevi long hatpela pasin bilong Fero. Na taim ol i stap yet long Isip, Aron i wok long kamapim klia long pasin bilong em olsem em i man bilong i stap gut long Jehova, na em i givim bel tru long mekim wok bilong Jehova.​—Kis. 4:21.

Na tu, tingim samting i bin kirapim Aron long wokim bulmakau gol. Moses i bin stap yet antap long maunten Sainai inap 40 de. Taim ol manmeri i lukim olsem “Moses i stap longpela taim long maunten na em i no kam daun kwik,” ol i kirapim Aron long wokim wanpela imis bilong ol. Aron i harim tok bilong ol na em i wokim wanpela bulmakau gol. (Kis. 32:​1-6) Tasol pasin bilong Aron i kamapim klia olsem long bel em i no orait long pasin bilong lotuim giaman god. I luk olsem em i wokim dispela imis, long wanem, ol manmeri i bin putim presa long em. Taim Moses i kolim strafe long pasin bilong lotuim ol god giaman, olgeta man long lain bilong Livai​—na Aron tu​—ol i go long sait bilong Jehova. Ol i kilim i dai 3,000 manmeri husat i gat asua long lotuim giaman god.​—Kis. 32:​25-29.

Bihain Moses i tokim ol manmeri: “Dispela sin yupela i bin mekim, em i nogut tru.” (Kis. 32:30) Olsem na i no Aron wanpela tasol i gat asua long dispela rong. Nogat. Em wantaim olgeta manmeri i gat asua, ol i bin kisim helpim long rot bilong bikpela pasin marimari bilong Jehova.

Bihain long dispela hevi, Jehova i tok long Aron i mas kamap hetpris. God i tokim Moses: “Putim klos pris long Aron na kapsaitim wel long em bilong makim em bilong mekim wok bilong mi olsem pris.” (Kis. 40:​12, 13) Jehova i fogivim Aron long samting em i bin mekim. Long bel, Aron i stap olsem man bilong sapotim lotu i tru na em i no man bilong bikhet na lotuim giaman god.