Yu Ting God i Laik Yumi Mas Autim Sin Bilong Yumi?

Pasin bilong autim sin long wanpela pris o pasto, dispela pasin i stap yet olsem samting bilong lotu insait long planti misin. Long nau, ol man i orait tasol long ol manmeri i mekim kain kain pasin, olsem na yu ting ol man i mas autim yet sin bilong ol?

OL MAN i gat kain kain tingting long dispela samting. Olsem: Nius National Post bilong Kanada i stori long wanpela man i tokaut olsem i hatwok long tokim wanpela man long rong yu bin mekim, tasol “yu bai pilim gut tru sapos wanpela i putim yau long tok bilong yu, na beten wantaim yu na tokim yu long samting yu mas mekim.” Tasol buk Bless Me, Father, for I Have Sinned i kamapim tok bilong wanpela man olsem: “Pasin bilong autim sin long wanpela man em samting nogut tru insait long Misin. Dispela pasin i kirapim ol man long tingting planti tumas.” Baibel i tok wanem long dispela pasin?

Tok Baibel i Mekim

Lo em God i bin givim long lain Israel i kolim stret ol samting man i mas mekim sapos em i mekim sin. Olsem: Sapos man i mekim rong long narapela man o brukim wanpela lo bilong God, em i mas go long wanpela pris bilong lain Livai, husat bai mekim ofa na askim God long lusim sin bilong em.​—Wok Pris 5:​1-6.

Sampela handet yia bihain long dispela, taim profet Natan i givim tok long King Devit long sin em i bin mekim, Devit i tok wanem? Wantu em i tok: “Mi mekim sin long ai bilong Bikpela.” (2 Samuel 12:13) Na tu, em i beten askim God long marimari long em. Wanem samting i kamap long dispela? Devit i tok: “Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu lusim asua bilong mi na sin bilong mi tu.”​—Song 32:5; 51:​1-4.

Pasin bilong autim sin i wanpela samting God i laik ol manmeri long kongrigesen Kristen long taim bilong ol aposel i mas mekim. Jems, em brata bilong Jisas na wanpela bilong ol man i go pas long kongrigesen long Jerusalem, em i tokim ol Kristen olsem: “Yupela wan wan i mas autim sin bilong yupela long ol arapela manmeri bilong God. Na yupela wan wan i mas prea long God i helpim ol arapela, na bai God i mekim yupela i kamap orait gen.” (Jems 5:16) Olsem na ol Kristen i mas autim wanem samting, na long husat?

Ol Man i Mas Autim Wanem Samting?

Yumi ol man i no gutpela olgeta, na long olgeta de yumi no save tingting gut na mekim ol pasin na tok i no stret na long dispela rot yumi mekim sin long ol narapela. (Rom 3:23) Olsem wanem? Dispela i makim olsem yumi mas autim olgeta dispela rong bilong yumi long wanpela man?

Tru, olgeta sin yumi mekim i nogut long ai bilong God, tasol long pasin marimari em i tingim olsem yumi no gutpela olgeta, olsem na yumi mekim pasin kranki. Tru tumas, man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela, olsem na mipela i mas pret long yu.” (Song 130:​3, 4) Olsem na yumi mas mekim wanem sapos yumi popaia na mekim rong long narapela? Tingim olsem beten Jisas i skulim ol disaipel long en i gat dispela tok: “Yu ken lusim ol sin bilong mipela, long wanem, mipela i save lusim ol rong ol arapela i bin mekim long mipela.” (Luk 11:4) Tasol God bai lusim rong bilong yumi sapos yumi kam long em na askim em long mekim olsem long nem bilong Jisas.​—Jon 14:​13, 14.

Tingim, Jisas i tok yumi tu i mas lusim “ol rong ol arapela i bin mekim long [yumi].” Aposel Pol i tokim ol wanbilip bilong em olsem: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” (Efesus 4:32) Taim yumi lusim rong bilong ol narapela, i gat as na yumi ken ting olsem God bai lusim rong bilong yumi.

Tasol olsem wanem long ol bikpela rong olsem pasin bilong stil, giaman, pamuk, spak, na ol kain pasin olsem? Olgeta man husat i mekim kain rong olsem i brukim ol lo bilong God, olsem na ol i mekim sin long God. Orait, yu ting man i mas autim ol kain sin olsem?

Man i Mas Autim Sin Long Husat?

God i no givim namba long ol man long lusim sin ol man i mekim long God; em wanpela tasol inap mekim olsem. Baibel i tokaut klia olsem: “Tasol sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.” (1 Jon 1:9) Tasol man i mas autim ol kain sin olsem long husat?

God wanpela tasol inap lusim sin bilong man, olsem na man i mas autim sin long God. Devit i mekim olsem, olsem yumi stori pinis long en. Tasol man i mas mekim wanem na bai God i lusim sin bilong em? Baibel i tok: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.” (Aposel 3:19) Tru tumas, bilong God i ken lusim sin bilong man em i mas luksave long sin bilong em na autim, na tu, em i mas redi long lusim pasin i no stret. Planti taim, i hatwok long man long lusim pasin i no stret. Tasol i gat helpim i stap.

Tingim tok bilong disaipel Jems, em tok yumi bin kamapim bipo: “Yupela wan wan i mas autim sin bilong yupela long ol arapela manmeri bilong God. Na yupela wan wan i mas prea long God i helpim ol arapela, na bai God i mekim yupela i kamap orait gen.” Na Jems i skruim sampela tok moa long en, olsem: “Sapos stretpela man i prea, orait prea bilong en i gat bikpela strong, na em inap tru long helpim ol arapela.” (Jems 5:16) “Stretpela man” inap makim “ol hetman bilong sios,” em Jems i stori long ol long ves 14. Long kongrigesen Kristen i gat “ol hetman,” olsem ol elda, em ol i makim bilong helpim ol man i laik bai God i lusim sin bilong ol. Dispela “ol hetman” i no inap lusim sin, long wanem, man i no gat namba long lusim sin bilong narapela man husat i mekim sin long God.a Tasol ol i gat wok long givim tok kaunsel na stretim man i mekim bikpela rong, na helpim em long luksave long bikpela sin em i bin mekim na em i mas tanim bel.​—Galesia 6:1.

Bilong Wanem Man i Mas Autim Sin?

Maski man i mekim bikpela sin o nogat, man i mekim dispela sin em i bagarapim pasin pren bilong em wantaim narapela man na wantaim God. Olsem na ating bel bilong em i gat tok o em i tingting planti. Man i pilim olsem, long wanem, maus bilong bel bilong em i gat tok, em samting God i bin putim long yumi wan wan. (Rom 2:​14, 15) Man inap mekim wanem?

Orait, yumi ken tingim gen tok bilong Buk Jems bilong mekim gut bel bilong yumi, em i tok: “Ating wanpela bilong yupela i gat sik? Orait em i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.”​—Jems 5:​14, 15.

Long ol dispela ves tu ol i singautim ol hetman bilong sios, olsem ol elda, bilong helpim sikman bilong kongrigesen. Ol inap mekim olsem wanem? Ol i no harim tasol sin man i autim, nogat. Man i mekim sin i olsem em i sik, olsem na ol i mas “mekim orait dispela sikman na kirapim em gen.” I gat tupela samting Jems i toktok long en em ol i mas mekim.

Namba wan, em pasin bilong “putim wel long bodi bilong [man].” Dispela i makim olsem tok bilong Baibel i gat strong bilong helpim man. Aposel Pol i kamapim olsem “tok bilong God em i gat laip, na em i wok strong i stap . . . na em i save gut tru long olgeta tingting na laik bilong bel bilong [man].” (Hibru 4:12) Long rot bilong mekim gutpela wok bilong Baibel, ol elda inap helpim man i mekim sin long luksave long rong em i bin mekim na em inap mekim ol samting bilong stretim rong bilong em long ai bilong God.

Namba tu, em pasin bilong ‘bilip long God na prea.’ Ol dispela prea bilong ol elda bai i no senisim tingting bilong God long pasin bilong kamapim stretpela kot, nogat, tasol ol i bikpela samting long God, husat i gat strongpela laik long lusim sin bilong ol man long rot bilong ofa bilong Krais. (1 Jon 2:2) God i amamas long helpim ol sinman husat i tanim bel tru na mekim ol pasin i soim olsem ol i “tanim bel pinis.”​—Aposel 26:20.

Nambawan bikpela as bilong autim sin i bilong God i ken orait long sinman​—em sin man i mekim long narapela man o long God. Jisas Krais i kamapim klia olsem yumi mas stretim hevi wantaim narapela na stap wanbel wantaim em paslain long yumi ken lotuim God wantaim bel i no gat tok. (Matyu 5:​23, 24) Sindaun 28:13 i tok: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” Taim yumi mekim pasin daun long ai bilong God Jehova na askim em long lusim rong bilong yumi, em bai orait long yumi na litimapim yumi.​—1 Pita 5:6.

[Futnot]

[Rait long pes 23]

God bai i no tingim ol popaia bilong yumi na em bai lusim rong bilong yumi sapos yumi askim em long nem bilong Jisas

[Piksa long pes 24]

Nambawan bikpela as bilong autim sin i bilong God i ken orait long yumi