Askim
Ofa bilong baim bek ol man, dispela i mekim na Jehova i orait long lusim rong bilong yumi. Olsem na bilong wanem ol Kristen i mas autim rong bilong ol long ol elda bilong kongrigesen?
Olsem yumi lukim long stori bilong Devit na Batseba, Jehova i bin lusim rong bilong Devit maski em i bikpela rong, long wanem, Devit i tanim bel tru. Taim profet Natan i kam long em, Devit i tokaut olsem: “Mi mekim sin long ai bilong Bikpela.”—2 Samuel 12:13.
Tru, taim sinman i tanim bel tru na i tokaut long rong bilong em, Jehova i save harim na lusim rong bilong dispela man, tasol long sori bilong Em, Jehova i save mekim narapela samting tu—em i wokim rot bilong helpim dispela man i bin mekim rong bambai em i ken kamap gutpela gen long ol samting bilong spirit. Jehova i bin helpim Devit long rot bilong profet Natan. Long nau, insait long kongrigesen Kristen, i gat ol strongpela Kristen, olsem elda, i stap. Disaipel Jems i tok: “Ating wanpela bilong yupela i gat sik [bilong spirit]? Orait em i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.”—Jems 5:14, 15.
Ol elda i gat save pinis ol inap mekim planti samting bilong daunim bel hevi bilong man i bin mekim rong na em i pilim tru na i tanim bel. Ol i save wok strong long bihainim pasin bilong Jehova long ol samting ol i mekim long sinman. Ol i no laik mekim hatpela pasin, maski ol i mas givim strongpela tok long em bilong stretim em. Long pasin sori ol i save tingim ol samting bilong helpim em long dispela taim stret. Long pasin bilong isi isi ol i mekim wok long Baibel na ol i wok strong long stretim tingting bilong sinman. (Galesia 6:1) Maski man i no kirap long laik bilong em yet na autim rong bilong em, tasol taim ol elda i toktok wantaim em ating dispela bai kirapim em long tanim bel, olsem Devit i bin mekim taim Natan i kam toktok wantaim em. Taim ol elda i givim dispela kain helpim long man i bin mekim rong, dispela i save helpim em long abrusim pasin bilong mekim gen wankain rong na abrusim ol samting nogut inap painim em sapos em i kamap man bilong mekim rong na i no pilim rong bilong em.—Hibru 10:26-31.
Tru, i hatwok long autim sampela rong yumi bin mekim na yumi sem long en, na i hatwok long askim God long lusim rong bilong yumi. Bilong mekim olsem, yumi mas i gat strongpela bel. Tasol tingim samting inap kamap sapos yumi no mekim olsem. Wanpela man i no bin kamapim bikpela rong bilong em long ol elda bilong kongrigesen, na em i stori long dispela na i tok: “Mi bin pilim bikpela bel hevi tru na mi no inap daunim. Mi wok strong moa long autim tok, tasol bel hevi i stap yet.” Em i bin ting, sapos em i beten na kamapim rong bilong em long God, dispela em inap. Tasol nogat, em i no inap, long wanem, em i pilim kain bel hevi olsem bilong King Devit. (Song 51:8, 11) Olsem na mobeta yumi kisim dispela helpim Jehova i save givim long rot bilong ol elda!