Lida Bilong Yumi Long Nau
“Em i go olsem man i winim pait na em i wok long winim planti pait moa.”—KTH 6:2.
1, 2. (a) Baibel i mekim wanem stori long wok king bilong Krais bihain long 1914? (b) Wanem sampela wok Krais i bin mekim bihain long em i kamap king?
LONG 1914, Krais i kamap King bilong Kingdom Bilong Jehova. Long tingting bilong yumi, em i stap olsem wanem long nau? Yumi ting em wanpela king i sindaun nating tasol long sia king, na wan wan taim tasol em i lukluk i kam daun long graun bilong save kongrigesen bilong em i stap olsem wanem? Sapos olsem, orait yumi mas senisim tingting bilong yumi. Buk Song na Buk Kamapim Tok Hait i stori long em olsem wanpela king i sindaun long wanpela hos na em i go na “i wok long winim planti pait” i go inap long taim em i “winim pait.”—KTH 6:2; Sng. 2:6-9; 45:1-4.
2 Namba wan samting Krais i mekim taim em i kamap king, em olsem: Em i pait long “snek wantaim ol ensel bilong en” na em i winim pait. Nambawan ensel Maikel, em Krais, na ol ensel bilong em, ol i rausim Satan na ol ensel bilong en long heven na tromoi ol i kam daun long graun. (KTH 12:7-9) Orait nau Jisas, olsem “ensel bilong autim tok bilong kontrak,” em i kam wantaim Papa bilong em bilong skelim tempel spirit. (Mal. 3:1) Em i skelim Kristendom, em hap bilong ‘Bikpela Babilon’ i gat bikpela asua tru, na em i lukim olsem em i gat asua long kilim i dai ol man na long mekim em yet i kamap doti long rot bilong insait long ol wok politik bilong dispela graun.—KTH 18:2, 3, 24.
Krais i Mekim Wokboi Bilong Em Long Graun i Kamap Klin
3, 4. (a) Krais i bin mekim wanem wok olsem “ensel bilong autim tok”? (b) Wok bilong skelim tempel i kamapim klia wanem samting? (c) Jisas, olsem Het bilong kongrigesen, i makim wanpela wokboi long mekim wanem wok?
3 Wok bilong skelim tempel, em Jehova na “ensel bilong autim tok” i mekim, i kamapim tu olsem insait long banis bilong tempel spirit, i gat wanpela lain Kristen tru em ol i no insait long ol lotu bilong Kristendom. Tasol dispela lain Kristen God i bin makim, o “ol pris,” i gat wok long ol i mas kamap klin. Profet Malakai i bin tok profet long dispela olsem: “Bai [Jehova] i kam bilong skelim pasin bilong olgeta manmeri olsem man i save kukim silva long paia na rausim pipia bilong en. . . . [Em] bai i rausim pasin doti bilong ol pris na bai ol inap bringim ol gutpela ofa.” (Mal. 3:3) Jehova i mekim wok long “ensel bilong autim tok,” em Krais Jisas, long mekim ol dispela Israel spirit i kamap klin.
4 Tasol maski i olsem, Krais i lukim olsem ol dispela gutpela Kristen God i bin makim, ol i wok strong long givim kaikai bilong spirit long ol wanbilip long taim stret. Kirap long 1879 na i kam, ol i bin kamapim long nius Wastaua ol tok bilong Baibel i stori long Kingdom Bilong God, na ol i bin mekim olsem long gutpela taim na long taim nogut. Jisas i bin tok profet olsem taim em i “kam bek” bilong skelim ol wokboi bilong em long taim bilong “las de,” em bai lukim olsem wanpela wokboi i wok long givim “kaikai long ol” long taim stret. Em bai tok dispela wokboi i ken amamas na em bai “makim dispela wokboi bilong bosim olgeta samting bilong en” long graun. (Mt. 24:3, 45-47) Krais em i Het bilong kongrigesen Kristen na em i bin yusim dispela “wokboi i gat gutpela tingting” long lukautim ol samting bilong Kingdom bilong Em hia long graun. Em i bin stiaim ol dispela “wokboi” God i bin makim, na “ol arapela sipsip,” long rot bilong wanpela Gavening Bodi.—Jo. 10:16.
Bungim Kaikai Bilong Graun
5. Long rot bilong wanpela driman, Jon i lukim King Mesaia i mekim wanem?
5 Long rot bilong wanpela driman, aposel Jon i lukim narapela samting em King Mesaia bai mekim long “de bilong Bikpela,” bihain long taim Em i kamap king long 1914. Jon i tok: “Mi lukluk gen, na mi lukim wanpela waitpela klaut, na wanpela man i wankain olsem yumi man bilong graun i sindaun i stap long dispela klaut. Em i gat hat gol long het bilong en, na long han bilong en em i holim naip i sap tru.” (KTH 1:10; 14:14) Jon i harim wanpela ensel i kam long Jehova i tokim dispela Man long kisim naip na katim kaikai, long wanem, “olgeta kaikai bilong graun i mau pinis.”—KTH 14:15, 16.
6. Wanem samting bai kamap long gaden paslain long taim bilong bungim kaikai?
6 Dispela wok bilong bungim “kaikai bilong graun” i kirapim yumi long tingim tok piksa bilong Jisas long wit na gras nogut. Jisas i tok piksa long em yet olsem man i tromoi ol pikinini wit long gaden bilong em na em i gat tingting olsem ol wit bilong em bai karim planti gutpela kaikai. Dispela gutpela kaikai i makim “ol manmeri bilong kingdom bilong heven,” em ol Kristen tru God i makim ol bilong mekim wok king wantaim Jisas long Kingdom bilong em. Tasol long nait wanpela birua, em “Satan,” i kam long gaden na tromoi ol pikinini bilong gras nogut, “em ol manmeri bilong Satan.” Man bilong tromoi pikinini wit i tokim ol wokman bilong em long larim ol wit na gras nogut i kamap wantaim i go inap long taim bilong katim na bungim ol kaikai, long taim bilong “las de.” Long dispela taim, em bai salim ol ensel bilong em na ol bai rausim ol gras nogut.—Mt. 13:24-30, 36-41.
7. Olsem wanem Krais i mekim wok bilong bungim “kaikai bilong graun”?
7 Jisas i lukautim wok bilong bungim kaikai long olgeta hap, na dispela i truim driman em Jon i bin lukim. Wok bilong bungim “kaikai bilong graun” i kirap taim ol i bungim laspela hap bilong lain 144,000 “manmeri bilong kingdom,” olsem “wit” long tok piksa bilong Jisas. Ol Kristen tru i stap narapela kain long ol Kristen giaman na dispela i kamap klia moa yet bihain long Wol Woa 1, na dispela i bin helpim tru namba 2 hap bilong dispela wok bilong bungim “kaikai bilong graun”—wok bilong bungim ol arapela sipsip. Ol i no “manmeri bilong kingdom,” nogat, ol i bilong lain “planti manmeri tru,” em ol bai stap aninit long dispela Kingdom. Ol i kam long “olgeta kantri na olgeta lain na olgeta tok ples.” Ol i daun long Kingdom Bilong Mesaia, em Krais Jisas na 144,000 “manmeri bilong God Antap Tru” i insait long en. Dispela lain 144,000 bai mekim wok wantaim Jisas long dispela gavman long heven.—KTH 7:9, 10; Dan. 7:13, 14, 18.
Lida Bilong Ol Kongrigesen
8, 9. (a) Wanem samting i kamapim olsem Krais i lukim pasin bilong kongrigesen na olgeta wan wan insait long kongrigesen? (b) Olsem piksa long pes 26 i kamapim, yumi mas abrusim wanem “ol toktok hait bilong Satan”?
8 Stadi i kamap paslain long dispela i bin stori olsem Krais i save gut long olgeta wan wan kongrigesen i stap olsem wanem long sait bilong spirit long taim bilong ol aposel. Long nau, Lida bilong yumi, Krais, husat i bin kisim “bikpela namba na strong bilong bosim olgeta samting long heven na long graun,” em i stap lida bilong ol kongrigesen long olgeta hap wantaim ol wasman bilong ol. (Mt. 28:18; Kl. 1:18) Jehova i mekim em i stap “het bilong olgeta samting na dispela i bilong helpim kongrigesen” bilong ol Kristen God i bin makim ol long holi spirit. (Ef. 1:22, NW) Olsem na em i lukim olgeta samting i kamap insait long olgeta wan wan kongrigesen bilong ol Witnes Bilong Jehova, winim 100,000 kongrigesen.
9 Jisas i givim dispela tok long kongrigesen bilong Taiataira bilong bipo. Em i tok: “Mi Pikinini Bilong God, na ai bilong mi i lait olsem paia i lait strong moa . . . Mi save pinis long olgeta pasin yu save mekim.” (KTH 2:18, 19) Em i givim strongpela tok long dispela kongrigesen, long wanem, ol i insait long pasin pamuk na pasin bilong amamasim laik bilong ol yet, na em i tok: “Mi save skelim gut bel na tingting bilong olgeta man. Na bai mi givim pe long yupela wan wan, inap long pasin yupela i mekim.” (KTH 2:23) Dispela tok i makim olsem Krais i lukim pasin i stap insait long olgeta wan wan kongrigesen, na em i lukim tu pasin bilong olgeta wan wan manmeri insait long kongrigesen. Jisas i tok amamas long ol Kristen long Taiataira em ol “i no bin kisim save long dispela pasin ol i kolim ‘Ol toktok hait bilong Satan.’” (KTH 2:24) Long nau tu em i amamas long ol yangpela na ol lapun, em ol i no kisim save long “ol toktok hait bilong Satan” long rot bilong Intenet o ol vidio gem i soim pasin bilong pait na kilim man, na ol i no bihainim ol kain kain tingting na save bilong ol man. Em i amamas tru long lukim olsem planti Kristen long nau ol i wok strong tru na ol i daunim laik bilong ol yet bambai em i ken stiaim ol long olgeta samting ol i mekim long i stap bilong ol!
10. Baibel i mekim wanem tok piksa long wok bilong Krais long stiaim ol elda bilong ol kongrigesen? Tasol ol i mas luksave long wanem samting?
10 Krais i lukautim gut ol kongrigesen bilong em long graun long rot bilong ol elda. (Ef. 4:8, 11, 12) Long taim bilong ol aposel, olgeta wasman em ol man Kristen God i bin makim. Buk Kamapim Tok Hait i tok ol i olsem ol sta i stap long han sut bilong Krais. (KTH 1:16, 20) Long nau, klostu olgeta elda bilong ol kongrigesen ol i bilong lain arapela sipsip. Yumi ken tingim olsem ol tu i stap aninit long wok bos bilong Krais, long wanem, taim ol wasman i tingim na makim ol long kamap elda, ol i beten pastaim na spirit holi i stiaim dispela wok. (Ap. 20:28) Tasol ol i luksave olsem Krais i mekim wok long sampela man Kristen God i bin makim, em ol i stap olsem Gavening Bodi bilong stiaim ol disaipel bilong em hia long graun.—Ritim Aposel 15:6, 28-30.
“Bikpela Jisas, Yu Kam”
11. Bilong wanem yumi laik tru long lukim Lida bilong yumi i kam kwiktaim?
11 Long wanpela tok hait aposel Jon i kisim, inap planti taim liklik, Jisas i tok em bai kam kwiktaim. (KTH 3:11; 22:7, 20) Yumi save olsem em i toktok long em bai kam bilong givim strafe long Bikpela Babilon na olgeta man nogut i stap aninit long Satan. (2 Te. 1:7, 8) Lapun aposel Jon i laik tru long lukim truim bilong olgeta gutpela samting em tok profet i stori long en. Em i tok: “I tru. Bikpela Jisas, yu kam.” Yumi ol manmeri husat i stap nau long taim bilong pinis bilong dispela pasin nogut bilong graun, yumi tu i gat laik stret long lukim Lida na King bilong yumi i kam bilong mekim holi nem bilong Papa bilong em na kamapim klia olsem i stret Jehova i stap nambawan bos.
12. Krais bai inapim wanem wok paslain long ol ensel i lusim ol win bilong bagarapim pasin nogut bilong graun?
12 Wok bilong putim mak long lain 144,000 bilong Israel tru bilong God, dispela wok i mas pinis pastaim na nau Jisas bai bagarapim oganaisesen bilong Satan long graun. Baibel i kamapim klia olsem ol ensel i no ken lusim win bilong bagarapim pasin bilong graun em Satan i bosim; ol i mas holimpas dispela win i go inap long taim olgeta bilong lain 144,000 i kisim pinis mak.—KTH 7:1-4.
13. Long taim bilong namba wan hap bilong “bikpela hevi tru,” olsem wanem Krais bai kamapim long ples klia olsem em i kam i stap pinis?
13 Planti manmeri bilong graun i no bin luksave olsem Krais i “kam i stap” pinis kirap long 1914. (2 Pi. 3:3, 4, NW) Tasol klostu nau em bai kamapim long ples klia olsem em i kam i stap pinis, na em bai mekim olsem taim em i givim strafe bilong Jehova long olgeta samting bilong graun bilong Satan. Taim “man bilong sakim lo,” em ol pris pasto bilong Kristendom, i kisim bagarap dispela bai kamapim klia tru olsem Jisas i kam i stap pinis. (Ritim 2 Tesalonaika 2:3, 8.) Dispela samting bai kamapim ples klia olsem Krais, em Jas Jehova i makim, em i mekim wok Jas. (Ritim 2 Timoti 4:1.) Kristendom, em hap bilong Bikpela Babilon i gat bikpela asua tru, em bai bagarap pastaim, na bihain olgeta narapela lotu giaman bai bagarap na pinis olgeta. Jehova bai givim tingting long ol gavman na ol bai bagarapim dispela pamukmeri. (KTH 17:15-18) Dispela em namba wan hap bilong “bikpela hevi tru.”—Mt. 24:21.
14. (a) Bilong wanem God bai sotim taim bilong namba wan hap bilong bikpela hevi tru? (b) Taim “mak bilong Pikinini Bilong Man bai i kamap,” ol manmeri bilong Jehova bai mekim wanem?
14 Jisas i tok God bai sotim taim bilong bikpela hevi tru, long wanem, em i tingim “ol manmeri em i makim pinis,” em hap lain bilong ol Kristen God i bin makim, em ol i stap yet long graun. (Mt. 24:22) Taim Jehova i bagarapim olgeta lotu giaman, em bai lukautim ol Kristen em i bin makim na ol poroman bilong ol, em ol arapela sipsip. Jisas i tok moa olsem ‘taim dispela bikpela hevi i pinis’ ol mak bai kamap long san, mun, na ol sta, na bihain “mak bilong Pikinini Bilong Man bai i kamap long skai.” Dispela bai mekim na olgeta lain manmeri bilong graun bai “krai” sori. Tasol dispela samting i no inap painim ol manmeri em God i bin makim, em ol bai kisim laip long heven, na ol poroman bilong ol, husat bai kisim laip long graun. Ol bai “sanap na litimapim het bilong [ol], long wanem, taim bilong God i kisim bek [ol] em i kam klostu pinis.”—Mt. 24:29, 30; Lu. 21:25-28.
15. Krais bai mekim wanem wok taim em i kam?
15 Paslain long em i pinisim wok bilong winim pait, Pikinini Bilong Man bai mekim narapela wok. Em i tok profet olsem: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.” (Mt. 25:31-33) Dispela i makim olsem Krais bai kam olsem Jas bilong tilim ol manmeri bilong “olgeta lain” i go long tupela lain: “ol sipsip,” em ol manmeri husat i bin wok strong long sapotim ol brata bilong Krais (ol Kristen God i bin makim em ol i stap yet long graun) na “ol meme,” em ol manmeri husat “i no bihainim gutnius bilong Jisas, Bikpela bilong yumi.” (2 Te. 1:7, 8) Baibel i tok ol sipsip, em ol “stretpela manmeri,” ol bai kisim “laip oltaim oltaim” long graun, tasol ol meme “bai i go bilong kisim pe nogut, em pen i save stap oltaim,” o bagarap olgeta.—Mt. 25:34, 40, 41, 45, 46.
Jisas i Winim Pait
16. Lida bilong yumi, Krais, bai winim pait olsem wanem?
16 Taim Krais i inapim pinis wok bilong putim mak long olgeta manmeri bilong mekim wok king na wok pris wantaim em, na em i makim ol sipsip na putim long han sut bilong em bilong kisim bek ol, em bai go olsem man i “winim planti pait moa.” (KTH 5:9, 10; 6:2) Jisas i stap het bilong ol strongpela ensel na ol brata bilong em husat ol i kirap bek pinis—em bai bagarapim olgeta gavman politik bilong Satan, ol man bilong pait, na ol wok bisnis bilong graun. (KTH 2:26, 27; 19:11-21) Krais bai pinisim wok bilong winim pait taim em i bagarapim ol samting nogut em Satan i bosim. Bihain em bai kalabusim Satan na ol ensel nogut bilong em long bikpela hul inap 1000 yia.—KTH 20:1-3.
17. Long taim bilong Wan Tausen Yia, Krais bai stiaim ol arapela sipsip i go bilong kisim wanem samting? Yumi mas tingting strong long mekim wanem?
17 Aposel Jon i tok profet long “planti manmeri tru” bilong lain arapela sipsip em ol bai abrusim bagarap long taim bilong bikpela hevi tru, na em i tok: “Pikinini Sipsip i stap namel tru long sia king, em bai i stap wasman bilong ol. Em bai i bringim ol i go long ol hul i gat wara i kamap, em wara bilong givim laip.” (KTH 7:9, 17) Yes, long Taim Bilong Wan Tausen Yia Bilong Krais i Stap King, em bai wok yet long stiaim ol arapela sipsip, em ol bai harim maus bilong em, na em bai stiaim ol i go bilong kisim laip oltaim. (Ritim Jon 10:16, 26-28.) Yumi mas tingting strong long bihainim King, em Lida bilong yumi—long nau na i go inap long nupela taim em Jehova i tok promis long kamapim!
Sampela Askim
• Taim Krais i kamap king pinis, em i mekim wanem wok?
• Krais i mekim wok long wanem lain bilong stiaim ol kongrigesen long graun?
• Long wanem ol rot moa bai Lida bilong yumi, Krais, i kam?
• Olsem wanem Krais bai wok yet long stiaim yumi long nupela taim?
[Piksa long pes 29]
Taim bagarap i painim ol samting nogut em Satan i bosim, dispela bai kamapim klia olsem Krais i kam i stap pinis