Yumi “Wetim Taim God i Makim”
“Olgeta samting God i bin wokim, ol i wetim taim God i makim bilong kamapim ples klia yumi ol pikinini bilong en.”—ROM 8:19.
1. Wanem samting i wankain long ol Kristen bilong nau na ol Kristen long taim bilong ol aposel?
SAMTING i painim ol Kristen bilong nau i wankain olsem samting i bin painim ol Kristen long taim bilong ol aposel. Wanpela tok profet i bin helpim ol wokboi bilong Jehova long dispela taim bipo long save wanem taim Mesaia i mas kamap. (Daniel 9:24-26) Dispela tok profet yet i tok long Jerusalem bai bagarap, tasol em i no gat sampela tok inap helpim ol Kristen long save wanem taim dispela taun bai bagarap. (Daniel 9:26b, 27) Na olsem tasol, wanpela tok profet i bin kirapim sampela sumatin bilong Baibel paslain long yia 1900 long wetim wanpela samting i kamap. Ol i lukim dispela “7-pela yia” bilong Daniel 4:25 na ol i poromanim dispela namba wantaim dispela “taim God i bin makim bilong ol arapela lain man,” na ol i kisim tingting olsem Krais Jisas bai kisim strong bilong bosim Kingdom long 1914. (Luk 21:24; Esekiel 21:25-27) Buk Daniel i gat planti tok profet long en, tasol i no gat wanpela i helpim ol sumatin bilong Baibel long nau long skelim wanem taim tru Jehova bai pinisim dispela pasin nogut bilong graun em Satan i bosim. (Daniel 2:31-44; 8:23-25; 11:36, 44, 45) Tasol klostu nau bai dispela samting i kamap, long wanem, yumi stap long “taim bilong las de.”—Daniel 12:4.a
Was i Stap Taim Krais i Kam i Stap Pinis
2, 3. (a) Wanem samting i kamapim long ples klia tru olsem yumi stap long taim Krais i kam i stap pinis olsem King? (b) Wanem samting i soim yumi olsem ol Kristen i mas wok yet long was i stap taim Krais Jisas i kam i stap pinis?
2 Tru, wanpela tok profet i bin kirapim ol Kristen long wet i stap paslain long taim Krais i kisim namba long bosim Kingdom long 1914. Tasol dispela “mak” Krais i bin givim long ol disaipel bilong makim taim em bai kam i stap na pasin bilong dispela graun bai pinis, em i kolim ol samting bai kamap. Na planti bilong ol dispela samting, ol man bai lukim taim em i kam i stap pinis. Ol dispela samting—olsem ol bikpela pait, kaikai i sot, ol bikpela guria, ol bikpela sik, pasin nogut bai go bikpela, ol man bai mekim nogut long ol Kristen, ol bai autim gutnius bilong Kingdom long olgeta hap bilong graun—ol dispela samting i kamapim long ples klia tru olsem nau yumi stap long taim Krais i stap pinis olsem king.—Matyu 24:3-14; Luk 21:10, 11.
3 Tasol taim Jisas i laik lusim ol disaipel na em i givim tok long ol, em i tokim ol strong olsem: “Yupela i mas was i stap.” (Mak 13:33, 37; Luk 21:36) Taim yumi kaunim ol tok i stap klostu long ol dispela ves na yumi skelim gut, bai yumi lukim olsem Krais i no toktok long ol i mas was i stap na bai ol i ken lukim ol samting i makim kirap bilong taim em i kam i stap, nogat. Em i tokim ol disaipel tru bilong em long was i stap long taim em i kam i stap pinis. Ol Kristen tru i mas was i stap long wanem samting?
4. Dispela mak Jisas i bin givim long ol disaipel bilong em, em i gat wanem wok bilong en?
4 Jisas i mekim bikpela tok profet bilong em bilong bekim askim olsem: “Wanem taim bai ol dispela samting i kamap, na wanem mak bai kamap bilong makim olsem yu kam i stap na pasin bilong dispela graun i laik pinis?” (Matyu 24:3, NW) Dispela mak Jisas i tok profet long en bai helpim ol Kristen long save olsem Krais i kam i stap pinis, na ol inap luksave long ol samting i kamap bilong makim olsem pasin nogut bilong dispela graun i laik pinis.
5. Olsem wanem Jisas i soim olsem em bai kam i stap long spirit, tasol bihain long en bai em i “kam”?
5 Jisas i soim yumi olsem taim em i “kam i stap” (tok Grik, pa·rou·siʹa) em bai kam wantaim bikpela strong na biknem. Taim Jisas i toktok long em bai “kam” (ol i kisim long wanpela tok Grik, erʹkho·mai), em i tok olsem: “Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en. . . . Yupela i ken kisim save long diwai fik. Taim han bilong en i gat wara na ol nupela lip i kamap, yupela i save, taim bilong gutpela san i laik kamap nau. Olsem tasol, taim yupela i lukim dispela olgeta samting i kamap pinis, orait yupela i ken save, Pikinini Bilong Man i kam klostu pinis, na i stap long dua. Olsem na yupela i mas was gut. Yupela i no save wanem de Bikpela bilong yupela bai i kam. . . . Yupela tu i mas redi. Pikinini Bilong Man bai i kam long wanpela taim yupela i no ting em bai i kam.”—Matyu 24:30, 32, 33, 42, 44.
Bilong Wanem Krais Jisas i Kam?
6. Dispela bagarap bai i painim ‘Bikpela Babilon,’ em bai kamap olsem wanem?
6 Tru, kirap long 1914 Krais Jisas i kam i stap pinis olsem King, tasol em i gat wok yet long skelim pasin bilong dispela graun long kot na skelim tu olgeta wan wan man, na nau em bai givim strafe long ol man em i lukim olsem ol i man nogut. (Skelim wantaim 2 Korin 5:10.) Klostu nau Jehova bai putim tingting long bel bilong ol hetman politik long bagarapim ‘Bikpela Babilon,’ em olgeta lotu giaman bilong graun. (KTH 17:4, 5, 16, 17) Aposel Pol i tokaut klia olsem Krais Jisas bai bagarapim “man bilong sakim lo”—em ol pris pasto bilong ol lotu i holim nating nem Kristen, em ol i lusim bilip tru na i bikhet na givim baksait long God—em wanpela bikpela lain tru insait long ‘Bikpela Babilon.’ Pol i tok: “Dispela man bilong sakim lo em bai i kamap ples klia. Na Bikpela Jisas bai i kilim em i dai long win bilong maus bilong em yet. Bikpela bai i kamap ples klia wantaim bikpela lait bilong en, na long dispela lait yet em bai i bagarapim tru dispela man bilong sakim lo.”—2 Tesalonaika 2:3, 8.
7. Taim Pikinini Bilong Man i kam bek olsem King na skelim ol man long kot, em bai mekim wanem?
7 Liklik taim nau na Krais bai skelim ol lain bilong graun long kot, na em bai skelim ol long ol samting ol i bin mekim long ol brata bilong em i stap yet long graun. Baibel i tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais. . . . King bai i bekim tok bilong ol [sipsip] olsem, ‘Mi tok tru long yupela, olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.’ . . . Na ol [meme] bai i go bilong kisim pe nogut, em pen i save stap oltaim. Tasol ol stretpela manmeri bai i kisim laip i stap oltaim oltaim.”—Matyu 25:31-46.
8. Pol i tok wanem long Krais bai i kam bilong givim strafe bilong kot long ol man i givim baksait long God?
8 Olsem yumi lukim long tok piksa bilong ol sipsip na meme, Jisas i mekim laspela kot long ol man i givim baksait long God na em i givim strafe long ol. Pol i mekim gut bel bilong ol wanbilip ol i karim pen na hevi na em i tokim ol: “[God] bai i pinisim dispela hevi nau yupela i karim, na givim malolo long yupela na long mipela wantaim. God bai i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi. Ol dispela man bai i kisim pe nogut olsem. . . . Ol bai i bagarap i stap oltaim oltaim. Long dispela De God i makim, Bikpela bai i kam na mekim save long ol, tasol olgeta manmeri bilong God . . . ol bai i litimapim nem bilong em na amamas tru long em.” (2 Tesalonaika 1:7-10) Klostu nau ol dispela bikpela samting bai kamap, olsem na yumi mas bilip na was i stap na wetim Krais i kam, a?
Wetim Krais i Kamap Ples Klia
9, 10. Ol manmeri God i bin makim na ol i stap yet long graun, bilong wanem ol i amamas long wetim Krais Jisas i kamap ples klia?
9 ‘Taim Bikpela Jisas i lusim heven na i kamap ples klia,’ em bai bagarapim olgeta man nogut, na tu, em bai givim gutpela pe long ol stretpela man. Ol brata bilong Krais em God i bin makim ol na ol i stap yet long graun, ating ol bai wok yet long karim pen na hevi paslain long taim Krais i kamap ples klia, tasol ol i amamas long wetim gutpela laip tru ol bai kisim long heven. Aposel Pita i tokim ol Kristen em God i bin makim: “Long dispela traim yupela i karim pen olsem Krais i bin karim, olsem na yupela i mas amamas. Na taim biknem bilong Krais i kamap ples klia, bai yupela inap amamas moa yet na belgut tru.”—1 Pita 4:13.
10 Ol manmeri God i bin makim, ol i tingting strong tru long ol i mas i stap gut long God i go inap long taim Krais i bungim ol na ol i “bung wantaim em,” bambai ol samting i kamap bilong “traim” bilip bilong ol, dispela bai mekim na ‘taim Jisas Krais i kamap ples klia, em bai i amamas tru long ol na givim biknem long ol.’ (2 Tesalonaika 2:1; 1 Pita 1:7) Ol dispela Kristen em God i mekim ol i kamap pikinini bilong em long rot bilong spirit holi, i gat wanpela tok i stret tru long ol: “Nau yupela i wetim Bikpela bilong yumi Jisas Krais bai i kamap ples klia, na yupela i no sot long wanpela presen bilong Holi Spirit.”—1 Korin 1:6, 7.
11. Ol Kristen God i bin makim, ol i mekim wanem long taim ol i wetim Krais Jisas i kamap ples klia?
11 Ol remnan i gat wankain tingting olsem Pol, em i tok: “Dispela gutpela sindaun na biknem bai i kamap ples klia long yumi bihain, mi ting em bai i winim tru dispela pen yumi save karim nau long dispela taim.” (Rom 8:18) Ol i no gat wok long skelim ol taim na de samting bambai ol i ken i stap strong long bilip, nogat. Ol i wok strong long mekim wok bilong Jehova, na ol i stap olsem gutpela piksa tru ol poroman bilong ol, em “ol arapela sipsip,” ol i ken bihainim. (Jon 10:16) Ol dispela manmeri God i bin makim ol i save, klostu nau pasin nogut bilong dispela graun bai pinis, na ol i bihainim tok bilong Pita, em i tok: “Oltaim tingting bilong yupela i mas i stap redi na yupela i mas bosim gut wokabaut bilong yupela. Yupela i mas bilip strong na wetim God i mekim dispela gutpela samting em i laik mekim long yupela, long taim Jisas Krais i kamap ples klia.”—1 Pita 1:13.
‘Olgeta Samting God i Wokim Ol i Wet’
12, 13. Olsem wanem ol manmeri God i bin wokim ol i “stap nogut na i save bagarap”? Ol arapela sipsip i gat bikpela laik tru long wanem samting?
12 Olsem wanem? Ol arapela sipsip tu i gat gutpela samting ol inap amamas long wetim? Tru tumas, ol i gat. Pastaim Pol i toktok long gutpela samting tru dispela lain God i mekim ol i kamap “pikinini” bilong em ol i wetim, olsem ol bai stap king wantaim Krais long Kingdom bilong heven, na bihain Pol i tok: “Olgeta samting God i bin wokim, ol i wetim taim God i makim bilong kamapim ples klia yumi ol pikinini bilong en. . . . Nau olgeta samting i stap nogut na i save bagarap. Dispela i no kamap long laik bilong ol yet. Nogat. God yet i mekim ol i stap olsem, bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.”—Rom 8:14-21; 2 Timoti 2:10-12.
13 Sin bilong Adam i mekim na olgeta pikinini bilong em “i stap nogut na i save bagarap,” long wanem, taim mama i karim ol, ol i stap kalabus long sin na indai. Ol yet i no inap lusim dispela kalabus ol i stap long en. (Song 49:7; Rom 5:12, 21) Sori tru, ol arapela sipsip ol i gat bikpela laik tru long “God bai i pinisim dispela kalabus bilong bagarap nau olgeta samting i stap long en”! Tasol pastaim i mas i gat sampela samting bai kamap long ol taim na de Jehova i bin makim.
14 Pastaim remnan bilong “ol pikinini bilong God” i mas ‘kamap ples klia.’ Dispela bai kamap olsem wanem? Long taim God yet i makim, ol arapela sipsip bai save olsem ol manmeri God i bin makim, ol i kisim pinis “mak” na ol i kisim biknem pinis long heven bilong mekim wok king wantaim Krais. (KTH 7:2-4) “Ol pikinini bilong God” i kirap bek pinis long matmat, ol tu bai ‘kamap ples klia’ taim ol i wok wantaim Krais long pinisim olgeta pasin nogut bilong dispela graun em Satan i bosim. (KTH 2:26, 27; 19:14, 15) Orait, long Taim Bilong Wan Tausen Yia Bilong Krais i Stap King, ol bai wok yet long ‘kamap ples klia’ taim ol i stap pris na mekim wok long ofa bilong Jisas bilong helpim ol manmeri “God i bin wokim.” Long dispela rot “God bai i pinisim dispela kalabus bilong bagarap” nau ol i stap long en, na bihain ol bai “stap gutpela tru [olsem] . . . ol pikinini bilong God.” (Rom 8:21; KTH 20:5; 22:1, 2) Em gutpela samting tru ol arapela sipsip i wetim, olsem na i gat as na ol i amamas long ‘wetim taim God i makim bilong kamapim ples klia ol pikinini bilong en,’ a?—Rom 8:19.
Jehova i Wet i Stap na Sampela Moa Bai Kisim Laip
15. Yumi mas ting olsem wanem long taim Jehova i makim bilong ol samting i mas kamap?
15 Jehova em i Bikpela Man bilong makim taim bilong ol samting. Ol samting bai kamap stret tru long taim em i bin makim. Tru, sampela taim i olsem ol samting i no kamap olsem yumi bin ting bai ol i kamap. Tasol yumi inap bilip tru olsem God bai truim olgeta tok promis bilong em. (Josua 23:14) Planti ol i bin ting em bai mekim hariap ol samting, tasol i olsem em i larim ol samting i stap olsem inap longtaim liklik. Tasol yumi mas wok long save gut long ol pasin bilong em na yumi mas amamas tru long gutpela tingting na save bilong em! Pol i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en. Olsem tok i stap long buk bilong God, ‘Husat i save pinis long tingting bilong Bikpela? Husat i bin givim tingting long em?’ ”—Rom 11:33, 34.
16. Jehova i wet yet na em i isi long ol man, na dispela inap helpim husat?
16 Pita i tok: “Ol pren tru, yupela i save wet long ol dispela samting i kamap [olsem God bai bagarapim olpela “skai” na “graun” na kamapim “nupela skai” na “nupela graun,” olsem em i bin promis long en]. Olsem na yupela i mas wok strong long mekim yupela yet i stap klin long ai bilong God na yupela i no gat asua long wanpela samting. Na yupela i mas i stap wanbel wantaim God. Na long De bilong Bikpela, God bai i lukim ol dispela gutpela pasin bilong yupela. Bikpela i wet yet na em i isi long yumi. Yupela i mas save, em i mekim dispela pasin, long wanem, em i laik kisim bek yumi.” Jehova i wet yet na em i isi long ol man, olsem na em i givim rot long planti milion manmeri moa na bai ol i ken abrusim bagarap long ‘de bilong Jehova,’ em bai kamap wantu tasol “olsem ol stilman” i save kam. (2 Pita 3:9-15) Na dispela pasin bilong Jehova long wet yet, em i givim rot long yumi na bai yumi ken ‘wok strong long painim rot bambai God i ken kisim bek yumi, na yumi mekim long pasin bilong pret na guria.’ (Filipai 2:12) Jisas i tok yumi mas “lukaut gut” na “was i stap” sapos yumi laik bai God i orait long yumi na yumi inap “sanap long ai bilong Pikinini Bilong Man” long taim em i kam bilong skelim ol man long kot.—Luk 21:34-36; Matyu 25:31-33.
Wok Long Wet i Stap na No Ken Les
17. Yumi mas tingim gut wanem tok bilong Pol?
17 Pol i tokim ol brata bilong em long spirit olsem ol i mas “lukluk strong long ol samting [ol i] no inap lukim long ai,” na ol i no ken “lukluk i go long ol samting [ol] inap lukim.” (2 Korin 4:16-18) Em i no laik bai wanpela samting i mekim na ol i no inap lukim klia long tingting dispela gutpela prais i wetim ol long heven. Maski yumi bilong lain God i bin makim long spirit holi o yumi bilong lain arapela sipsip, yumi mas tingting oltaim long gutpela samting tru yumi wet long en, na yumi no ken les long wetim dispela samting. Yumi mas wok long “strongim bel na wetim i stap,” na bai yumi kamapim long ples klia olsem “yumi no man bilong surik na lus. Nogat tru. Yumi ol manmeri bilong bilip na kisim laip.”—Rom 8:25; Hibru 10:39.
18. Bilong wanem yumi inap larim ol taim na ol de i stap long han bilong Jehova?
18 Yumi inap bilip tru na larim ol taim na ol de i stap long han bilong Jehova. Em bai i no ken lusim taim long truim ol tok promis bilong em—em bai mekim long taim stret em i bin makim. (Habakuk 2:3) Olsem na long nau yumi mas tingim tru wanpela tok Pol i bin givim long Timoti, em i tok: “Long ai bilong God na bilong Krais Jisas, em bai i skelim pasin bilong olgeta manmeri i stap laip na ol manmeri i dai pinis tu, mi tok strong long yu olsem, . . . yu mas strong long autim tok bilong em. Maski sapos ol man i redi long harim tok o ol i no redi, oltaim yu mas wok strong long autim tok bilong Krais. . . . Yu mas mekim wok bilong autim gutnius long ol manmeri. Yu gat wok bilong helpim ol manmeri, na yu mas mekim tru dispela wok.”—2 Timoti 4:1-5.
19. I gat taim yet bilong ol manmeri bilong Jehova i mas mekim wanem? Bilong wanem i olsem?
19 Long nau yumi mas mekim ol samting bambai yumi yet na ol narapela man inap abrusim bagarap. Pol i tok: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Taim i sot pinis. Dispela pasin nogut bilong graun klostu nau bai i pinis. Olsem na yumi mas amamas long wetim ol bikpela samting liklik taim bai kamap. Tasol taim yumi wok long mekim olsem, yumi mas tingting olsem yumi stap yet long taim Jehova i bin makim bilong autim gutnius bilong Kingdom long ol man. Yumi mas mekim dispela wok i go inap long mak em i laikim. Orait “bihain tasol,” olsem Jisas i tok, “bai las de i kamap.”—Matyu 24:14.
[Futnot]
a Lukim sapta 10 na 11 bilong buk Save i Bringim Man Long Laip Oltaim, em Sosaiti Wastaua Bilong Nu Yok i wokim.
Sampela Askim
◻ Long pasin bilong skelim taim bilong ol samting, olsem wanem yumi wankain olsem ol Kristen long taim bilong ol aposel?
◻ Bilong wanem ol Kristen i mas “was i stap,” maski Krais i kam i stap pinis?
◻ Bilong wanem ol man God i bin wokim ol i amamas long wetim ‘ol pikinini bilong God i kamap ples klia’?
◻ Bilong wanem yumi inap bilip tru na larim ol taim na ol de i stap long han bilong Jehova?
14. Ol pikinini bilong God bai i ‘kamap ples klia’ olsem wanem? Olsem wanem dispela bai mekim na “God bai i pinisim dispela kalabus bilong bagarap” ol man bilong graun i stap long en?
[Piksa long pes 17]
Ol Kristen i mas was i stap na wetim Krais i kam
[Piksa long pes 18]
Lain remnan God i bin makim, ol i wok strong long mekim wok bilong Jehova na ol i no tingim wanpela yia o de samting i olsem as na ol i bilip, nogat