Yupela i Mas Redi
“Yupela tu i mas redi. Pikinini Bilong Man bai i kam long wanpela taim yupela i no ting bai em i kam.”—Luk 12:40.
1. Krais i tok wanem long yumi mas was i stap?
KRAIS JISAS i kirapim ol disaipel bilong em long was i stap. Em i tokim ol: “Olsem na yupela lukaut. Mi tokim yupela pinis long olgeta samting. . . . Na long dispela taim bai ol i lukim Pikinini Bilong Man i kam wantaim klaut, na i gat bikpela strong na bikpela lait. . . . Tasol i no gat wanpela man i save long dispela de na dispela aua. Ol ensel bilong heven ol i no save long en. Pikinini tu em i no save long en. Papa tasol em i save long dispela. Yupela lukaut. Yupela was i stap. Yupela i no save wanem taim bai dispela i kamap. Em i olsem wanpela man i lusim haus bilong en na i go wokabaut long narapela hap. Em i tokim ol wokboi long bosim ol samting, na em i tilim wok long ol wan wan. Na em i tokim man i was long dua, em i mas was gut. Olsem na yupela was gut. Yupela i no save wanem taim bambai papa bilong haus i kam. Bai em i kam long apinun, o long biknait, o long taim kakaruk i krai, o long moningtaim, em yupela i no save. Nogut em i kam wantu tasol na i lukim yupela i slip. Dispela tok mi givim long yupela, em mi tokim olgeta manmeri. Yupela i mas was i stap!”—Mak 13:23-37.
2. Olsem wanem ol tok bilong Beten Bilong Bikpela i makim olsem yumi mas was i stap? Tasol ol misin bilong Krisendom i bin mekim wanem na i olsem ol i kilim dispela bilip long wetim Kingdom?
2 Yumi stori pinis long planti samting na yumi ken save, ol misin bilong Krisendom ol i no “was i stap.” Wanpela buk bilong ol Katolik (The Catholic Encyclopedia) i tok, ol i bin kilim dispela bilip olsem Kingdom bai kam, long wanem ol i save tok, “kingdom bilong God i olsem . . . God i stap bos long bel bilong yumi.” Olsem na ol i kolim nating ol tok bilong Beten Bilong Bikpela. Tasol narapela bikpela buk (The New Encyclopaedia Britannica) i tok: “Ol tok bilong Beten Bilong Bikpela i makim olsem ol man i mekim nogut long nem na laik bilong God, na Kingdom i no kam yet.” Tru tumas, ol tok bilong dispela beten i makim olsem yumi mas was i stap. Orait, ol Kristen i mas was long wanem samting?
“Was i Stap” long Wanem Samting?
3. Bilong wanem ol Kristen i mas tingim “dispela de na dispela aua”?
3 Sapos yumi skelim gut ol tok bilong Baibel long “Ol Laspela Samting” yumi inap save wanem samting tru ol Kristen i mas “was i stap” long en. Namba wan em olsem: Ol i no ken lusim.tingting long taim. Ol i mas was i stap long “dispela de na dispela aua” God i bin makim, long wanem Jisas i tok, i no gat wanpela man i save wanem taim bai dispela i kamap, God tasol i save. (Mak 13:32, 33) Na Jisas i tokim ol disaipel “ol arapela lain bai i krungutim Jerusalem” inap long taim God i bin makim. (Luk 21:24) Jisas i givim dispela save long lain bilong em bilong helpim ol bambai ol i ken save long taim bilong pinis, long wanem ol dispela tok i hap tok em i bekim long ol taim ol i givim askim long em, olsem: “Tisa, long wanem taim bambai dispela i kamap? Wanem mak bai i kamap pastaim, na mipela i ken save, ol dispela samting i klostu i laik kamap?”—Luk 21:7.
4. Ol Kristen i mas was i stap na wetim wanem “mak” i kamap?
4 Ol Kristen i mas was gut na wetim dispela taim na ol i mas wetim tu dispela “mak” ol i bin askim Jisas long en, em Matyu 24:3 na Mak 13:4 tu i stori long en. Jisas i kolim planti samting insait long dispela “mak”—olsem ol bikpela pait bilong olgeta hap, na hangre, na guria, na sik, na ol man i mekim nogut long ol Kristen tru—ol dispela samting bai kamap long taim ol tok profet bilong Baibel i makim. Na bai ol man inap save long “ol manmeri bilong dispela taim,” em “ol i no i dai pinis yet” na pinis i kamap.—Luk 21:10-12, 32.
5. Olsem wanem Krais i stap wantaim lain bilong em long olgeta taim? Tasol em i tok long dispela samting tasol taim em i tok long mak bilong em i kam bek i stap?
5 Taim ol samting bilong dispela “mak” i kamap, dispela bai makim wanem ol bikpela samting i mas kamap long ‘taim bilong pinis’? Ol disaipel bilong Jisas i givim askim long em, olsem: “Wanem mak bai i kamap pastaim, na mipela i ken save, yu kam i stap [tok Grik, pa.rou.si’a]?” (Matyu 24:3, NW) Orait, taim Krais i kam i stap, dispela bai makim wanem samting? Em i stap wantaim ol disaipel tru bilong em long spirit na helpim ol long mekim wok bilong ol long kamapim ol disaipel. Tasol em i stap wantaim ol olsem long olgeta taim i kam inap long nau. Olsem na taim em i kam bek i stap, dispela i makim bikpela samting moa. (Matyu 18:20; 28:18-20) Ol saveman bilong ol lotu bilong Krisendom, ol tu i tok dispela tok “i kam i stap” i makim bikpela samting moa. Wanpela bikpela buk bilong lotu (The New International Dictionary of New Testament Theology) i tok: ‘Ol samting parousia i makim i insait long ol samting sios i wetim, olsem Krais bai kam long taim bilong pinis.’ Planti tok long Nupela Testamen i kirapim ol Kristen long was i stap na wetim Krais i kam bek.—Matyu 24:3, 27, 37, 39; Jems 5:7, 8; 2 Pita 3:3, 4; 1Jon 2:28; Revelesen 1:7; 22:7.
6. (a) Taim Krais i kam bek, dispela i makim wanem samting bilong dispela pasin nogut bilong nau? (b) Taim Krais i kam bek, olsem wanem long ol Kristen, em spirit holi i bin makim ol na ol i stap gut long wok na ol i dai pinis? Na olsem wanem long ol Kristen bilong dispela lain em ol i stap laip taim Krais i kam bek?
6 Taim Krais i kam bek olsem king, dispela i makim olsem ‘taim bilong pinis bilong dispela taim nau’ em i kamap. (Matyu 24:3; Mak 13:4) Na i makim “las taim” bilong dispela pasin nogut nau i stap long graun. (Danyel 12:4, 9; 2 Timoti 3:1-5) Na i makim Krais i bin kisim Kingdom long Papa bilong em na em i bosim graun ‘namel long ol birua bilong em.’ (Sam 110:2; 2:6-9; Revelesen 11:15-18) Bihain bai Krais i mekim wok jas na skelim olgeta manmeri, tasol pastaim em i mas skelim lain o kongrigesen bilong em yet na kirapim bek ol Kristen em spirit holi i bin makim ol na ol i bin i stap gut long wok i go inap long taim ol i dai. (1 Korin 15:21, 23; 1 Tesalonaika 2:19; 3:13; 4:13-17; 2 Tesalonaika 2:1) Ol Kristen em spirit holi i bin makim ol na ol i stap laip yet long graun, ol i mekim wok olsem “wokboi” bilong Krais, long wanem ol i was i stap na ol i givim kaikai bilong spirit “long taim bilong en.” Krais i putim dispela “wokboi” i stap bos bilong “olgeta samting bilong en,” em olgeta samting bilong Kingdom hia long graun. (Matyu 24:45-47; Luk 12:42-44) Dispela ‘gutpela wokboi’ i mas mekim wok bilong “autim dispela gutnius bilong kingdom” long olgeta hap bilong graun na em i mas bosim dispela wok, na bihain bai “las de” i kamap.—Matyu 24:14.
7. Taim Krais i kam bek i stap, ol Kristen i mas wetim yet wanem narapela mak? Na bilong wanem ol i mas beten yet na tok olsem: “Kingdom bilong yu i mas i kam”?
7 Ol Kristen tru i mas “was i stap” long olgeta dispela samting, na taim ol i lukim ol dispela samting i kamap ol i ken save, Krais i kam bek pinis na em i stap king na dispela taim nau i laik pinis. Maski ol i stap long “taim bilong pinis,” tasol long dispela taim tu ol i mas was i stap. Ol i mas wetim “mak bilong Pikinini Bilong Man” i kamap, ol i mas wetim em “i kam” bilong givim strafe bilong God long ol lain bilong Seten. (Matyu 24:30, 44; Mak 13:26, 35; Luk 12:40; 21:27; 2 Tesalonaika 1:7-10) Olsem na maski em i kam bek pinis i stap na Kingdom bilong em i kamap pinis long heven, tasol ol Kristen i mas was i stap yet, long wanem em wantaim Kingdom bilong em i mas “i kam” bilong “bagarapim na pinisim” ol lain man na ol kingdom bilong dispela graun Seten i bosim. (Danyel 2:44, NW) Olsem na taim Jisas i kolim pinis ol samting bai makim em i kam bek pinis i stap, bihain em i tok: “Sapos yupela i lukim ol dispela samting i kamap, orait yupela i ken save, kingdom bilong God i kam klostu pinis.” (Luk 21:31) Olsem na taim Krais i kam bek pinis i stap, long dispela taim tu ol Kristen i mas beten na tok: “Kingdom bilong yu i mas i kam.” Ol i no ken slip, ol i mas “was i stap” na wetim “las de” na taim bilong God i “kisim bek” ol.—Mak 13:7, 29, 32-37; Luk 21:9, 28.
Husat Ol i Bin “Was i Stap”?
8. Kolim gen ol samting ol Kristen i mas was i stap long en.
8 Em nau, yumi tok pinis, ol Kristen i mas was i stap na wetim ‘taim bilong ol arapela lain ’ i pinis. Na ol i mas was na wetim ‘mak bilong Krais i kam bek pinis i stap na dispela taim nau i laik pinis.’ Ol i mas wetim kirap bek bilong ol Kristen em spirit holi i bin makim ol na ol i bin i stap gut long wok i go inap long taim ol i dai. Na ol i mas wetim ol samting em bai makim klia dispela lain i olsem ‘gutpela wokboi’ bilong Krais, em Krais i putim ol i stap bos bilong ol samting bilong Kingdom hia long graun. Na dispela “wokboi” i wok yet long givim kaikai bilong spirit long ol Kristen na ol i paslain long mekim wok bilong autim “dispela gutnius bilong kingdom long olgeta hap bilong graun,” na bihain bai “las de” i kamap. “Mak bilong Pikinini Bilong Man” bai kamap taim em “i kam” bilong pinisim olgeta samting nogut Seten i bin kamapim.
9. Husat ol i was i stap na wetim ‘taim bilong ol man bilong ol arapela lain’ i pinis? Wastaua i helpim ol Kristen olsem wanem na ol i was i stap?
9 Orait, husat ol i bin “was i stap” long olgeta dispela samting? Long bipo tru, olsem long yia 1876, Charles T. Russell bilong Pitsbeg, Pensilvenia, em i bin was i stap na wetim ‘taim bilong ol man bilong ol arapela lain’ i pinis. Long yia 1876 em i raitim sampela tok long ‘Taim Bilong Ol Man Bilong Ol Arapela Lain—Wanem Taim Bai i Pinis?’ Em i tok, dispela hap taim bai pinis long yia 1914. Kirap long 1880 na bihain long dispela taim ol i putim tok long dispela samting long Wastaua. Wastaua (tok Inglis) bilong Mas 1880 i tok: “Taim bilong ol man bilong ol arapela lain bai pinis long 1914, na kingdom i no ken mekim tru wok bilong en inap long dispela taim.” Tru, long dispela taim bipo ol man bilong lainim ol tok bilong Baibel, em ol i bin raitim ol dispela tok long Wastaua, ol i no save gut olsem yumi long nau long ol samting Baibel i tok bai kamap long pinis bilong ‘taim bilong ol man bilong ol arapela lain.’ Tasol bikpela samting em olsem: Ol i was i stap, na ol i helpim ol brata Kristen bilong ol long was i stap.
10. Olsem wanem ol i save long samting tru bai kamap taim Krais i kam bek?
10 Ol dispela man bilong lainim tok bilong Baibel, em ol i bung wantaim Charles Russell, na Wastaua tu, ol i helpim ol Kristen tru long save, taim Krais i kam bek bai ol i no inap lukim em, na em i no ken i kam olsem man na i stap king long graun. Oltaim ol i tokim “ol arapela wokboi” bilong Bikpela long ol samting i kamap long graun em i olsem “mak” bilong Krais i kam bek na “taim bilong pinis.”
11. (a) Long dispela taim bipo ol i no save gut long wanem samting bilong ol kingdom bilong graun? Na long ol Kristen bilong lain bilong heven ol i “go antap”? (b) Nau yumi save gut tok bilong Danyel 2:44 i makim wanem samting? Na tok bilong 1 Tesalonaika 4:15-17 i makim wanem samting?
11 Tru, long dispela taim ol i ting taim Kingdom i kamap long heven, wantu tasol bai em i bagarapim ol kingdom bilong graun, na ol Kristen em spirit holi i bin makim ol bai ol i “go antap” na bung wantaim ol wanlain bilong ol i dai pinis na ol i bilong kirap bek taim Krais i kam bek. (2 Tesalonaika 2:1) Ol i no save i gat bikpela wok bilong bungim ol man i mas kamap namel long kirap na pinis bilong truim bilong Danyel 2:44. Na ol i no save taim 1 Tesalonaika 4:15-17 i tok bai ol i “go antap,” em i tok long ol Kristen bilong lain bilong heven, em ol i dai bihain long taim kirap bek bilong namba wan taim i kirap. Wantu tasol bai ol i kirap bek i go antap long heven.—1 Korin 15:36, 42-44; Rom 6:3.
12. (a) Taim Krais i kam bek em i laik lukim ‘gutpela wokboi’ bilong em i mekim wanem? Taim em i kam bek em i lukim husat ol i mekim olsem?(b) Dispela lain olsem ‘gutpela wokboi’ ol i mekim wanem i kam inap long nau?
12 Nau yumi save long ol dispela samting. Yumi bin kisim dispela save long rot dispela lain ol i olsem ‘gutpela wokboi.’ Lait i kamap bikpela. (Provep 4:l8) Jisas i tok long dispela “wokboi,” olsem: “Wanem wokboi i gat gutpela tingting, na i save lukaut gut long wok bilong en? Bosman bilong dispela man i bin makim em bilong bosim ol arapela wokboi bilong en, na bilong givim kaikai long ol long taim bilong en. Na bihain bikpela man bilong en i kam bek, na i lukim dispela wokboi i mekim olsem bipo i tokim em pinis, orait dispela wokboi i ken amamas. Mi tok tru long yupela, em bai i putim em i stap bos bilong olgeta samting bilong en.” (Matyu 24:45-47) Bikpela Jisas i kamap king pinis na taim em i skelim lain bilong em long 1919 em i lukim dispela liklik lain Kristen i wok wantaim Wastaua ol i givim bel long was i stap. Kaikai bilong spirit ol i kisim “long taim bilong en” i helpim ol long was i stap. Inap long nau dispela lain, olsem “wokboi” bilong Krais, ol i bin i stap gut long wok bilong ol na givim kaikai bilong spirit long “ol arapela wokboi” bilong Bikpela bambai ol i ken “was i stap.”—Mak 13:33.
Was i Stap o Slip?
13. Ol man i sutim tok long ol Witnes Bilong Jehova, gutpela sapos ol i givim wanem askim long skin bilong ol yet?
13 Tru, ol olpela misin bilong Krisendom na sampela man moa ol i sutim tok long ol Witnes Bilong Jehova, long wanem sampela buk samting bilong ol Witnes i bin makim wanpela taim na kolim ol samting ol i ting em inap kamap long dispela taim. Tasol dispela samting ol Witnes i mekim i stret wantaim tok bilong Jisas, em i tok ol i mas “was i stap,” a? (Mak 13:37) Tasol ol misin bilong Krisendom i bin lainim ol man olsem ‘kingdom bilong God i stap long bel bilong ol,’ olsem na yu ting ol i bin kirapim ol Kristen long was i stap na wetim dispela Kingdom i kam? Nogat, a? Ol i ting ol tok bilong Baibel long “las de” i no gat as bilong en na i olsem stori nating tasol. Olsem na yu ting ol i bin helpim ol Kristen long was i stap o ol i bin mekim ol i slip? Na ol man i lusim bilip na ol i tok “las taim” i kirap long Pentikos na i stap long Taim Bilong Lotu Kristen olgeta, yu ting ol i helpim ol Kristen long was i stap o ol i bin mekim ol i slip? Ol i no helpim ol long tingim gut ol samting bilong spirit, a?
14. Stori long sampela wokboi bilong God long bipo ol i laik hariapim wok bilong God.
14 Tru sampela samting ol Witnes i bin wetim i kamap em i no bin kamap long taim ol i ting Baibel i makim. Maski ol i popaia, tasol ol i was i stap—ol i laik tru long lukim ol samting God i bin tok promis long en em i kamap. Gutpela ol i was i stap olsem, a? Nogut ol i slip na ol i no tingim ol samting Baibel i tok profet long en. Moses i popaia na 40 yia paslain long taim God i makim, Moses i laik helpim ol Isrel. Yu tingim dispela? (Jenesis 15:13; Aposel 7:6, 17, 23, 25, 30, 34) Na ol aposel bilong Krais tu. Ol i laik bai Kingdom i kamap hariap na ol i popaia tru long tingting bilong ol long Kingdom. (Aposel 1:6; skelim tu Luk 19:11 na 24:21.) Na ol Kristen bilong Tesalonaika, em spirit holi i bin makim ol, ol i laik bai Bikpela Krais Jisas i “kam bek” hariap na ‘de bilong Jehova’ i kamap kwiktaim.—2 Tesalonaika 2:1, 2.
15. Stori long sampela man long Baibel ol i bin skelim ol yia bambai ol i ken save long taim ol samting God i laik mekim bai kamap na yumi save i stret yumi ken mekim olsem. Planti wokboi bilong Jehova long nau na long bipo ol i bin singaut long Jehova na tok wanem?
15 Sapos yumi skelim ol yia Baibel i makim bambai yumi ken save wanem taim ol samting God i laik mekim bai kamap, orait yumi no gat rong. Dispela samting i stret wantaim Baibel. (Habakak 2:3) Danyel i bin mekim olsem bambai em i ken save long taim Jerusalem i mas bagarap. (Danyel 9:1, 2) Liklik lain Juda ol i stap gut long God long taim bilong ol aposel, ol i wetim Mesaia o Krais i kam, long wanem ol i bin skelim ol yia tok profet bilong Baibel i makim. (Danyel 9:25; Luk 3:15) Long pinis bilong namba 19 senseri, olsem long yia 1870 samting, na long kirap bilong namba 20 senseri ol Kristen i wetim Kingdom bilong God i kirap mekim wok bilong en long 1914, long wanem ol i bin skelim ol yia na taim Baibel i makim na ol i save wanem taim ‘taim bilong ol man bilong ol arapela lain’ i mas pinis. (Luk 21:24; Danyel 4:16, 17) Olsem na yumi ken save bilong wanem ol i bin skelim ol narapela tok bilong Baibel i makim ol yia bambai ol i ken save wanem taim ol samting ol i bin wet longtaim long en em bai kamap. Ol gutpela wokboi bilong Jehova long bipo i bin singaut long Jehova na tok: “O Jehova, inap long wanem taim?”—Aisaia 6:11, NW; Sam 74:10; 94:3.
Bilong Wanem Yumi Mas “Redi”?
16. (a) Yu ting Mak 13:32 i makim olsem yumi no ken tingim wanem taim bai pinis i kamap? (b) Wanem “mak” i kamap pinis? Tasol yumi wet yet long wanem narapela “mak”?
16 Jisas i tok klia, i no gat wanpela man i save long “dispela de” na “dispela aua” em Papa bai tokim pikinini bilong em long “kam” na pinisim pasin nogut Seten i bosim. Olsem na ating sampela man bai tok: “Bilong wanem i bikpela samting oltaim yumi mas tingim pinis bai kamap?” Em bikpela samting, long wanem Jisas i mekim pinis dispela tok na bihain em i tok: “Yupela lukaut. Yupela was i stap. ... yupela was gut.” (Mak 13:32-35) Kirap long 1914 yumi bin lukim ol samting i makim Jisas i kam bek pinis i stap olsem king. “Mak” bilong parousia bilong Krais i kamap pinis. Nau yumi wetim “mak bilong Pikinini Bilong Man,” em dispela “mak” bai kamap taim em i kam” bilong kilim i dai ol birua bilong Jehova.
17, 18. (a) Bilong wanem Jisas i tokim ol kristen bilong pastaim, taim ol i lukim pinis mak bilong Jerusalem i bagarap, ol i mas ranawe kwiktaim?
17 Jisas i tokim ol Kristen bilong pastaim long Judia long ol samting ol bai lukim olsem “mak” na ol i ken save ol i mas ranawe lusim Jerusalem na em i tok strong olsem: Taim ol i lukim dispela mak, ol i no ken lusim taim—kwiktaim ol i mas ranawe i go. (Luk 21:20-23) Tasol dispela mak i kamap long yia 66 C.E. na Jerusalem i bagarap 4-pela yia bihain, long 70 C.E., olsem na bilong wanem ol i mas kirap kwik na ranawe? Long wanem Jisas i save, sapos ol i lusim taim na ol i no ranawe kwik, bihain bai ol ami bilong Rom i kam bek na bai ol i no gat rot bilong ranawe.
18 Na i olsem tasol long nau. Sapos Kristen i ting olsem pinis i no ken kamap kwik na em i wok ‘isi isi,’ em i no bihainim gutpela tingting. Ating bai em i bagarap.
19. Pita na Jisas i givim wanem toksave long yumi?
19 Krais i kam bek pinis long 1914 na em i stap king inap 70 yia pinis. De bilong em i “kam”—‘de bilong Jehova’—bilong pinisim olgeta samting Seten i bin kamapim, dispela “de” i kam klostu hariap. Aposel Pita i tok dispela”de” bai kamap “olsem stilman i save kam,” na em i tok yumi mas ‘wetim dispela De na wok strong long hariapim dispela De bai i kamap.’ (2 Pita 3:10-12) Na Jisas i tok save long yumi, olsem: “Tasol yupela lukaut gut. Nogut yupela i dring nabaut oltaim na yupela i spak. Nogut yupela i wari long samting bilong bodi. Sapos pasin olsem em i karamapim yupela, orait bai dispela de bilong Bikpela em i painim yupela wantu tasol, olsem spia i save painim abus. . . . Oltaim oltaim yupela i mas was i stap.”—Luk 21:34-36.
20. Yumi mas tenkyu long wanem samting? Sapos yumi was i stap olsem i stret ol Kristen i mas mekim, dispela bai lukautim yumi olsem wanem?
20 Ol Witnes Bilong Jehova i mas amamas na tok tenkyu, long wanem dispela lain olsem ‘gutpela wokboi’ ol i was i stap na ol i bin helpim ol tu long was i stap! Sapos yumi was i stap olsem i stret ol Kristen i mas mekim, dispela samting bai lukautim yumi nau long dispela taim nogut em i “las taim.” Na dispela samting bai kirapim yumi long wok strong long autim “dispela gutnius bilong kingdom.” Long dispela rot bai yumi helpim ol narapela man long was i stap bambai ol tu i no ken bagarap na ol i ken i stap long Nupela Taim, em ‘stretpela pasin tasol bai stap long en.’—2 Timoti 3:1-5; Matyu 24:14; 2 Pita 3:13.
Yu Inap Tingim?
◻ Olsem wanem na ol Kristen i mas tingim ol taim Baibel i makim?
◻ Taim Jisas i ‘kam bek i stap,’ dispela i makim wanem bikpela samting?
◻ Olsem wanem na i stret yumi mas beten yet na tok: “Kingdom bilong yu i mas i kam”?
◻ Ol man i sutim tok long ol Witnes Bilong Jehova long samting bilong ol yia na ol taim, bai yu bekim wanem tok long ol?
◻ Bilong wanem yumi no ken ting, pinis i no ken kamap kwik?
[Blok long pes 19]
Ol Samting Ol Kristen i Mas Wetim
Pinis bilong ‘taim bilong ol man bilong ol arapela lain.’—Luk 21:24.
“Mak” bilong Krais i kam bek i stap na ‘pinis bilong dispela taim nau.’—Matyu 24:3—25:46.
Ol samting i makim klia dispela lain olsem ‘gutpela wokboi.’—Matyu 24:45-47.
“Mak bilong Pikinini Bilong Man” taim em i kam bilong givim strafe bilong Jehova long ol man nogut.—Matyu 24:30.
[Piksa long pes 18]
C. T. Russell na ol poroman bilong em ol i bin was i stap