Olsem Wanem Long Pasin Bilong Kristen Long Was i Stap?
“DISPELA tok mi givim long yupela, em mi tokim olgeta manmeri. Yupeia i mas was i stap!” Inap planti handet yia, ol Kristen tru i bin tingim dispela tok bilong Krais Jisas. Tasol hamas manmeri bilong lotu Roman Katolik na Isten Otodoks na ol lotu Talatala ol i tingim yet dispela strongpela tok bilong Jisas?—Mak 13:37.
Bilong wanem ol Kristen i mas was i stap? Jisas i tok: “Yupela was gut. Yupela i no save wanem taim bambai papa bilong haus i kam. ․․․ Nogut em i kam wantu tasol na i lukim yupela i slip.” (Mak 13:35, 36) Olsem na ol disaipel bilong Jisas ol i mas was i stap na wetim Krais i kam bek.
Jisas i kam bek bilong mekim wanem? Ol disaipel bilong Jisas i bin givim wanpela askim long em na taim em i bekim tok long ol em i tok ol i mas was i stap. Ol i bin givim askim long em olsem: “Wanem mak bai i kamap pastaim, na mipela i ken save, yu kam i stap na pasin bilong dispela graun i laik pinis?” (Matyu 24:3, NW) Narapela hap bilong Baibel i stori long ol tok Jisas i bin mekim long dispela taim i tok, Jisas i kolim planti samting olsem mak na bihain em i tok: “Bai ol i lukim Pikinini Bilong Man em i kam long wanpela klaut, na em i gat bikpela strong na bikpela lait. Bihain ol dispela samting i stat long kamap, long dispela taim yupela i mas sanap na litimapim het bilong yupela. Taim bilong God i kisim bek yupela em i kam klostu nau. ․․․ sapos yupela i lukim ol dispela samting i kamap, orait yupela i ken save, kingdom bilong God i kam klostu pinis.”—Luk 21:27-31.
I Gat Gutpela As na Ol i Mas Was i Stap
Olsem na i gat gutpela as, olsem Jisas i tok, na ol disaipel i mas was i stap na wetim ol samting bilong dispela “mak” i kamap. Taim ol i lukim ol dispela samting i kamap ol i ken save, Jisas i kam bek i stap, tasol ol i no inap lukim em. Sapos ol inap lukim em bai i no gat wok long wanpela “mak.” Em i kam bek i stap olsem spirit, na dispela samting i makim pasin nogut bilong dispela graun i laik pinis. Em i “las taim” o taim bilong pinis. Na ol Kristen i ken save, ‘taim bilong God i kisim bek ol em i kam klostu,’ na “kingdom bilong God i kam klostu pinis.”
Em, ol Kristen i mas bilip na wetim dispela samting, a? Jisas i lainim ol long beten long dispela samting, olsem: Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i bihainim long heven.” (Matyu 6:9, 10) Olsem na ol Katolik na ol manmeri bilong ol narapela lotu, em ol i save kolim dispela “Beten Bilong Bikpela,” ol i mas was i stap na wetim dispela samting ol i beten long en em i kamap, a? O ating ol tok misin bilong ol i lainim ol long en em i mekim na ol i kolim nating dispela beten? Olsem na ol i no was i stap, ol i no wetim Kingdom i kam.
Bilong Wanem Planti Man Ol i No Was i Stap Moa?
Ol Kristen i mas was i stap na wetim ol samting i makim Jisas i kam bek pinis (tok Grik, pa.rou.si’a; planti Baibel i tanim dispela tok olsem “i laik i kam bek”). Bilong wanem ol i mas was i stap? Long wanem, taim ol i lukim ol dispela samting i olsem “mak” ol i ken save, Kingdom bilong God na pinis bilong dispela taim nogut bilong nau i klostu, na bai God i kisim bek ol. Ol misin ol i kolim ‘Kristen’ ol i mas helpim lain bilong ol long was i stap na wetim dispela samting, nogut Bikpela bilong ol i kam bek na lukim ol i slip. Tasol olsem wanem? Yu ting ol misin i bin mekim dispela wok bilong ol?
Wanpela buk i gat gutpela save long en, em i tok: ‘Ol yia i kamap i go pinis na sios i no lukim ol samting i makim Jisas i kam bek. Olsem na ol i kirap long ting olsem bihain bihain bai em i kam, na klostu ol i lusim tingting olgeta long en na ol i no bilip moa long dispela samting.’—The New International Dictionary of New Testament Theology.
Na tru tumas, ol misin ol i kolim ‘Kristen,’ olsem Krisendom, ol i no was i stap moa olsem Jisas i tok ol Kristen i mas mekim. Ol i no wetim Krais i kam bek i stap olsem King. Ol i no was i stap na wetim Kingdom bilong God i kam. Ol i no wetim moa pinis bilong dispela taim nau na pinis bilong pasin bilong dispela graun.
Wanpela bikpela buk bilong Frans (QUID 1984) i kamapim tingting bilong ol misin long nau, ol i ting olsem wanem long ‘pinis bilong dispela graun.’ Dispela buk i putim het-tok olsem: “Sampela Bilip Bilong Lotu Katolik” na buk i tok: ‘Misin i tok, pinis bilong dispela graun i olsem traim i painim olgeta man wan wan taim ol i dai.’ Na narapela bikpela buk (The New Encyclopaedia Britannica) i tok: ‘Ol olpela misin Kristen i no lainim ol man moa long “Ol Laspela Samting.” Ol i pilim olsem i no gat as bilong dispela tok na i olsem stori nating tasol.’
Orait, olsem wanem long pasin bilong Kristen long was i stap? Yumi kirap nogut long bekim bilong dispela askim, tasol dispela bekim i stret, olsem: Ol “olpela misin Kristen, olsem misin Roman Katolik na Isten Otodoks na ol lotu Talatala, ol i bin kilim i dai dispela pasin bilong was i stap. I no asua bilong ol lain bilong ol dispela misin na ol i no was i stap, tasol planti ol i laik save bilong wanem misim bilong ol i lusim dispela bilip na ol i no wetim moa Krais i kam bek na kingdom bilong God i kam na dispela taim nogut bilong nau i pinis. Orait, long tok i kamap bihain long dispela yumi ken skelim as bilong dispela samting.