Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w85 7/1 p. 5-9
  • Olsem Wanem na Ol Kristen i No Wetim Moa?

No gat vidio bilong dispela seksen.

Sori, popaia kamap long lodim vidio.

  • Olsem Wanem na Ol Kristen i No Wetim Moa?
  • Wastaua i Tokaut Long Kingdom Bilong Jehova—1985
  • Ol Liklik Het Tok
  • Wankain Infomesen
  • Olsem Wanem na Ol i No Was i Stap Moa?
  • Em i Kilim Dispela Bilip Olgeta
  • Ol i Stap Tudak
  • Tingting Bilong Ol Talatala
  • Samting Ol Katolik i Wetim
  • Sampela Kristen Ol i Was i Stap
  • Ol Man i Was i Stap Ol i Ken Amamas!
    Wastaua i Tokaut Long Kingdom Bilong Jehova—1985
  • Olsem Wanem Long Pasin Bilong Kristen Long Was i Stap?
    Wastaua i Tokaut Long Kingdom Bilong Jehova—1985
  • Wet Liklik na Em Bai i Kamap!
    Wastaua i Tokaut Long Kingdom Bilong Jehova—2015
  • Yupela i Mas Redi
    Wastaua i Tokaut Long Kingdom Bilong Jehova—1985
Lukim Moa
Wastaua i Tokaut Long Kingdom Bilong Jehova—1985
w85 7/1 p. 5-9

Olsem Wanem na Ol Kristen i No Wetim Moa?

JISAS i tok ol disaipel bilong em i mas “was i stap” na wetim em i kam bek na wetim Kingdom bilong em i kam. (Mak 13:37) I gat planti tok long Nupela Testamen na yumi ken save, ol Kristen bilong pastaim ol i bin was i stap na wetim dispela samting. Sampela ol i laik bai dispela samting i mas kamap hariap. (2 Tesalonaika 2:1, 2) Bilong helpim ol Kristen bambai ol i no ken les long wetim dispela samting, Pol na Jems na Pita na Jon ol i raitim pas na kirapim ol brata long was i stap na wetim Krais i ‘kam bek’ na wetim ‘de bilong Jehova.’—Hibru 10:25, 37; Jems 5:7, 8; 1 Pita 4:7; 2 Pita 3:1-15; 1 Jon 2:18, 28.

Sampela saveman bilong ol misin bilong Krisendom ol i bin raitim ol buk na ol i tokaut long dispela samting. Wanpela buk bilong lotu Katolik (Supplément bilong Dictionaire de la Bible) i tok: ‘Planti tok long Nupela Testamen i soim yumi ol Kristen i was i stap na yumi no ken haitim dispela samting. . . . Long lotu Kristen bilong pastaim . . . ol i wetim Krais i kam bek i stap. Dispela bilip bilong ol i stap long olgeta hap bilong Nupela Testamen.’

Orait, bilong wanem sampela saveman bilong ol misin bilong Krisendom ol i laik “haitim” dispela samting? Bilong wanem ol i no laik bai ol man i save ol Kristen bilong pastaim i bin was i stap na wetim taim bilong pinis? Ating ol i laik haitim rong bilong planti man long nau ol i tok ol i Kristen, na ol bikman bilong lotu bilong ol, em ol i no was i stap. Pastaim ol Kristen i was i stap, tasol nau nogat. Orait, olsem wanem dispela senis i bin kamap?

Olsem Wanem na Ol i No Was i Stap Moa?

Taim ol aposel i stap laip yet, sampela Kristen i lusim bilip Kristen tru. Dispela samting i mekim na ol i no wetim moa ol samting Jisas i bin tokim ol long wetim. Ol i no was i stap. Pol i tok, long taim bilong em “dispela pasin bilong sakim lo em i wok hait i stap” insait long kongrigesen Kristen. (2 Tesalonaika 2:3, 4, 7) Sampela yia bihain aposel Pita i tokim ol brata Kristen ol i mas lukaut long ol “profet giaman” na “ol man bilong tok bilas,” em ol bai tok: “Em i bin tok em bai kam bek gen, a? Orait em i stap we? Em i no kam. Taim ol tumbuna i dai, na i kam inap long nau, olgeta samting i stap olsem bipo tru, taim God i wokim.”—2 Pita 2:1; 3:3, 4.

Tasol sampela Kristen ol i was i stap olsem Jisas i tok ol i mas mekim. Ol dispela Kristen i bilipim tok bilong Baibel i tok, taim Jisas i kam bek olsem King, orait, taim bilong em i bosim graun inap 1,000 yia em i klostu. Jastin Matir (em i dai long yia 165 C.E. samting) na Irenias (em i dai long yia 202 C.E. samting) na Tetulian (em i dai bihain long 220 C.E.) olgeta ol i bilip olsem Krais bai bosim graun inap 1,000 yia na ol i strong long kirapim ol Kristen long wetim dispela pasin nogut bilong nau i pinis.

Tasol bihain planti ol i lusim bilip Kristen tru na ol i kirap bihainim tingting bilong ol Grik, em ol i tok yumi gat tewel na taim yumi dai, tewel i stap laip yet. Olsem na ol i no wetim moa dispela taim bilong 1,000 yia. Ol i no wetim Kingdom bilong Krais i bosim graun na olgeta hap bilong graun i kamap gutpela ples Paradais. Ol i ting dispela Paradais em i bilong heven na taim ol i dai bai ol i go i stap long heven. Ol i no was i stap moa. Ol i no wetim Krais i kam bek na Kingdom bilong em i kam. Ol i tingting olsem: ‘Yumi no ken wetim Krais i kam bek, long wanem taim yumi dai bai yumi stap wantaim em long heven.’

Ol i no strong moa long bilip; ol i no was i stap moa. Olsem na ol Kristen i bin lusim bilip ol i kamapim lotu bilong ol yet i gat ol hetman bilong en na ol lo bilong en na ol i no tingting moa long Krais i mas kam bek. Ol i tingting tasol long bosim ol lain bilong ol, na sapos ol inap ol i laik bosim olgeta hap bilong graun. Wanpela buk (The New Encyclopaedia Britannica) i tok: ‘Ol i pilim olsem Krais i no kam bek kwiktaim, olsem na ol i les na ol i no was i stap moa. Ol i no strong moa long wetim “Ol Laspela Samting” na sios i senisim dispela Kingdom bilong God ol i bin wetim. Taim ol i kamapim Misin Katolik olsem wanpela lain i gat ol hetman bilong en, nau ol i no was i stap moa.’

Em i Kilim Dispela Bilip Olgeta

“Pater” o hetman i kilim i dai dispela bilip olgeta em Ogastin (Augustine) bilong Hipo (em i stap long yia 354-430 C.E. samting). Em i raitim wanpela buk (The City of God) na em i tok: “Sios i stap nau long graun em i olsem kingdom bilong Krais na kingdom bilong heven tu wantaim.”

Wanpela buk (The New Bible Dictionary) i tok, dispela tok i senisim tru tingting bilong ol Katolik. Dispela buk i tok: ‘Lotu Katolik i save lainim ol man olsem Sios long graun em i olsem kingdom bilong God. Tok bilong Ogastin i as bilong dispela tingting bilong ol. Krais em i King bilong Kingdom bilong God, tasol ol i tok em i mekim dispela wok long rot bilong ol hetman bilong lotu. Ol samting kingdom i bosim em ol samting Sios i bosim. Ol i tok, kingdom bilong heven i go bikpela taim Sios i mekim wok na i go kamap long olgeta hap bilong graun.’

Em nau, i no gat wok moa long ol i was i stap na wetim ol samting em bai makim kingdom bilong God i kam klostu pinis. Ol i ting dispela kingdom i kamap pinis. Profesa E. W. Benz (long buk The New Encyclopaedia Britannica) i tok: ‘Ogastin i mekim na ol i no wetim kingdom bilong God i kam olsem ol Kristen bilong pastaim i bin mekim, long wanem Ogastin i tok kingdom bilong God i kamap pinis long graun taim Sios i kamap. Em i tok Sios i olsem Kingdom bilong God long Graun. Ogastin i tok, kirap bek bilong namba wan taim i save kamap long olgeta taim insait long sios taim ol man i kisim Baptais, long wanem dispela em i rot bilong ol i go insait long Kingdom bilong God.’

Na Ogastin i kilim tu bilip bilong ol Kristen olsem Krais i mas bosim graun inap 1,000 yia na kamapim bek Paradais long graun. (Revelesen 20:1-3, 6; 21:1-5) Wanpela buk bilong lotu Katolik (The Catholic Encyclopedia) i tok: ‘Santu Ogastin i kisim bilip olsem bai i no gat dispela taim bilong 1,000 yia. . . . Em i ting dispela sabat bilong 1,000 yia bihain long taim ol man i bin i stap long graun inap 6,000 yia em i makim laip i stap oltaim oltaim. Em, Ogastin i ting olsem. Em i ting dispela namba 1,000 i makim samting i gutpela olgeta.’ Na wanpela buk (Britannica Macropaedia bilong 1977) i tok moa olsem: ‘Ogastin i ting dispela 1,000 yia i makim gutpela i stap bilong spirit sios i kisim kirap long Pentikos. . . . Em i no wetim God i kirap mekim wanpela wok long graun.’ Olsem na ol Katolik i save kolim nating tok bilong dispela beten olsem: “Kingdom bilong yu i mas i kam.”

Ol i Stap Tudak

Ol i tok namel long yia 500 samting na yia 1500 C.E. ol man i bihainim tingting bilong Ogastin. Long dispela taim ol Kristen i no was i stap na wetim Kingdom bilong God i kam. Wanpela bikpela buk i tok: ‘Long dispela taim ol tok bilong Nupela Testamen long “Ol Laspela Samting” ol i putim wantaim tok bilong wanpela saveman bilong Grik ol i kolim Plato na tok bilong Aristotel. Ol Kristen bilong pastaim i wetim Krais i kam bek i stap olsem King na ol i bilip olsem ol man i dai pinis bai ol i kirap bek, tasol bihain ol i kisim tingting bilong ol Grik i kam insait long bilip bilong ol na ol i bilip olsem yumi gat tewel na tewel i no inap i dai. . . . Lotu Kristen long dispela Taim Bilong Namel . . . i no strong long wetim “Ol Laspela Samting.” Tasol dispela bilip i no dai olgeta. Sampela ol i sakim sios na ol i bilip na wetim ol dispela samting.’—Encyclopaedia Britannica bilong 1970.

Misin Roman Katolik i save tok bilas long ol dispela lain i sakim sios na i kolim ol olsem ‘ol lain i bilip long taim bilong 1,000 yia.’ Sampela man long dispela taim bipo ol i ting olsem long yia 1,000 bai dispela graun i pinis. Ol man bilong raitim stori bilong Misin Katolik ol i tok bilas long ol dispela man i pret long yia 1,000. Tasol asua bilong husat na ol man nating i pret na ol i ting long yia 1,000 bai dispela graun i pinis? Ol tok Santu Katolik Ogastin i bin mekim em i as bilong dispela samting. Em i tok, ol i bin kalabusim Seten taim Krais i kam long pastaim na Revelesen 20 ves 3, 7, 8 i tok Seten bai kalabus inap 1,000 yia na bihain bai em i lusim kalabus na “i go nabaut . . . bilong giamanim ol lain manmeri.” Olsem na sampela manmeri long namba 10 senseri ol i pret long ol samting ol i ting bai kamap long yia 1,000.

Tru, Misin Roman Katolik i tok ol man i no ken pret, na ol i krosim ol man i makim wanpela de o yia na ol i tok taim bilong ol Kristen bai pinis long dispela de o yia. Wanpela pris Katolik, em Joakim bilong Flora em i bin tok taim bilong ol Kristen bai pinis long yia 1260. Bihain, long yia 1516, taim ol Katolik i mekim Namba Faiv Kibung, Pop Leo X i tambuim ol Katolik long makim de o yia Ol Man Bilong Sakim Krais na Laspela Kot bai kamap. Em i tok, ol man i kalapim dispela tambu bai ol i rausim ol long misin!

Tingting Bilong Ol Talatala

Long namba 16 senseri planti man i pilim olsem lotu Katolik i no stret na ol i tok ol i laik bihainim tok bilong Baibel. Olsem na ol i lusim lotu Katolik na ol i kamapim ol narapela lotu, olsem ol lotu Talatala. Ol i tok ol i laik bihainim tok bilong Baibel, olsem na ol i mas kirap gen long wetim Krais i kam, na inap liklik taim ol i mekim olsem. Tasol bihain gen ol i no bilip strong moa long ol dispela samting. Ol i no bihainim tru tok bilong Baibel. Ol i no kirap bihainim gen lotu Kristen tru. Ol lotu Talatala i bin kamap long dispela taim, kwiktaim ol i lusim dispela bilip na ol i no was i stap. Ol i kamap pren bilong dispela graun.

Wanpela buk (Encyclopaedia Britannica) i tok: ‘Ol lotu Talatala i kamap long dispela taim, kwiktaim ol i kamapim lo bilong ol yet na ol i gat narapela narapela lo long narapela narapela kantri. Ol i no wetim moa “taim bilong pinis.” Ol i kamapim ol lo na tingting bilong ol yet na ol i no bilip moa long “Ol Laspela Samting” Baibel i kolim.’ ‘Ol Talatala na Juda long pinis bilong namba 18 senseri na long namba 19 senseri ol i lusim ol bilip bilong bipo na ol i no wetim taim bilong pinis na “Ol Laspela Samting.” Ol i ting olsem ol i gat save na ol i no ken bihainim moa bilip na tingting bilong ol man bilong bipo em ol i no gat save. Ol i no bilip moa long Laspela Kot samting, ol i tok yumi gat tewel na tewel i no inap i dai. Na sampela saveman bilong lotu i senisim ol tok long Kingdom bilong God na ol i tok, dispela Kingdom em i olsem lo o pasin bilong ol man o wanpela samting i stap hait o wanpela wok bilong helpim ol man samting.’

Em nau, ol dispela saveman bilong ol lotu Talatala ol i no helpim ol Kristen long “was i stap” na wetim Krais i kam bek olsem King na Kingdom bilong God i kam. Ol i kamapim ol narapela tingting na senisim bilip Kristen tru. Planti ol i tok, ‘kingdom bilong God i stap long bel bilong ol man.’ Na sampela i tok, ‘gutpela wok ol man i mekim bilong helpim ol narapela man, dispela i olsem kingdom bilong God i kam.’—The New Bible Dictionary (Talatala).

Samting Ol Katolik i Wetim

Tok bilong Ogastin i kilim bilip bilong ol Katolik long ol samting ol i mas wetim, olsem na ol i no wetim moa Krais i kam bek na dispela taim bilong 1,000 yia. Tasol ol i mas i stap na wetim dispela samting, long wanem dispela i wanpela lo i stap yet long ol tok bilong misin Katolik. Long Me 17, 1979 sampela bikman long Vatiken long Rom (Vatican’s Congregation for the Doctrine of faith) i salim pas long olgeta bisop Katolik long olgeta hap bilong graun na Pop Jon Pol II i orait long en. Dispela pas i tok: Sios i wetim ‘Bikpela Bilong Yumi, Krais Jisas, i kamap ples klia,’ olsem Baibel i tok.”

Em nau, Misin Katolik i tok ol Kristen i mas wetim Krais i kam, tasol hamas taim ol Katolik i harim pris bilong ol i tok ol i mas was i stap na wetim krais i kam bek na Kingdom bilong God i kam? Dispela pas ol i bin salim long ol bisop i bilong “strongim bilip bilong ol kristen long ol samting ol i gat askim long en.” Tasol ol dispela man i tok ol i kristen, olsem wanem na ol i gat askim long Krais i kam bek? Ating sampela tok bilong wanpela buk (The New Encyclopaedia Britannica) inap bekim dispela askim, olsem: ‘Longtaim pinis sios i no bin lainim ol man long ol laspela samting ol i mas wetim i kamap.’ ‘Kirap long taim ol Talatala i lusim misin Katolik na i kam inap long nau, i no gat sampela lain bilong misin Katolik ol i bilip long Laspela Kot na taim bilong 1,000 yia samting.’

Sampela Kristen Ol i Was i Stap

Ol misin bilong Krisendom i no was i stap, long wanem ol i lusim ol tok i tru bilong Baibel na ol i bihainim tingting bilong ol saveman bilong Grik na tok bilong “Santu” Ogastin. Tasol ol wokboi tru bilong God ol i bin was i stap oltaim na wetim Krais i kam bek, na nau long dispela taim wanpela lain Kristen i stap ol i was na ol i wetim gutpela samting tru i kamap. Yu tu yu inap bilip na wetim dispela gutpela samting i kamap. Nau yu ken kaunim ol tok i kamap bihain long dispela, na bihain yu ken tokim ol Witnes Bilong Jehova long helpim yu bambai yu inap “was i stap” na wetim ol gutpela samting i kamap olsem Baibel i kolim.

[Rait long pes 5]

‘Planti tok bilong Nupela Testamen i soim yumi ol Kristen i was i stap na yumi no ken haitim dispela samting’

[Piksa long pes 6]

Ogastin (Augustine) i tok sios long graun em i Kingdom bilong Krais

[Piksa long pes 7]

Pop Leo X i tambuim ol Katolik long makim wanpela de o yia na tok Laspela Kot bai kamap long dispela taim

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim