Go Klostu Long God
Man Bilong “Harim Beten”
YU TING God Jehova i save harim beten bilong ol gutpela man i lotuim em? Stori bilong Jabes long Baibel, em planti man i no save long em, i kamapim klia olsem Jehova em i Man bilong “harim beten.” (Song 65:2) Dispela sotpela stori i stap long wanpela hap we yumi no ting em bai stap long en—em i stap long lista namel long ol nem bilong ol lain tumbuna, long namba wan hap bilong Buk 1 Stori. Orait, nau yumi ken skelim 1 Stori 4:9, 10.
Olgeta samting yumi kisim save long en long Jabes i stap long dispela tupela ves. Ves 9 i tok: “Mama bilong Jabes i gat bikpela pen long taim em i karim em, olsem na em i kolim em long nem Jabes.”a Bilong wanem mama bilong em i givim em dispela nem? Ating taim em i karim Jabes, em i pilim bikpela pen moa, winim pen ol mama i save pilim taim ol i karim pikinini. O ating em i wanpela wido na em i bel hevi olsem man bilong em i no stap bilong lukim nupela bebi bilong ol. Baibel i no stori long dispela samting. Tasol bihain dispela mama bai amamas tru long dispela pikinini man bilong em. Ating ol brata bilong Jabes ol i man bilong bihainim gutpela pasin, tasol ‘pasin bilong Jabes i winim pasin bilong ol brata bilong em. Na ol manmeri i save givim biknem long em.’
Jabes em i man bilong beten long olgeta taim. Em i kirapim beten bilong em long rot bilong askim Jehova long mekim gut long em. Na em i askim God long tripela samting, na dispela i kamapim klia olsem em i gat strongpela bilip.
Namba wan, Jabes i askim God olsem: “Givim mi planti graun.” (Ves 10) Dispela gutpela man i no tingting long kisim bikpela hap graun na mangal long graun bilong ol narapela man. Taim em i beten askim God long givim graun long em, em i no tingim em yet, nogat, em i tingim ol lain manmeri. Ating Jabes i askim Jehova long givim em planti graun, na bai planti man moa husat i lotuim God ol i ken i stap long en.b
Namba tu, Jabes i askim God long “stap wantaim” em. Dispela tok “stap wantaim” i makim olsem God i yusim strong na pawa bilong em long helpim ol man i lotuim em. (1 Stori 29:12) Bilong kisim ol samting em i askim God long en, Jabes i lukluk i go long God husat i save helpim ol man i bilip long em.—Aisaia 59:1.
Namba tri, Jabes i beten: “Was gut long mi, na ol samting nogut i no ken givim pen long mi.” Dispela tok “ol samting nogut i no ken givim pen long mi” i no makim olsem Jabes i laik abrusim ol hevi, nogat, em i laik God i helpim em long em i no ken tingting tumas long ol hevi o ol hevi i no ken daunim em.
Beten bilong Jabes i kamapim klia olsem em i man bilong tingim lotu i tru, na em i bilip na trastim Man bilong harim ol beten. Jehova i mekim wanem? Pinis bilong dispela stori i tok: “God i harim prea bilong en na i mekim olsem Jabes i bin askim em.”
Man bilong harim ol beten i no save senis. Em i amamas long harim beten bilong ol man i lotu long em. Olsem na ol man husat i bilip tru long em, ol i ken tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.”—1 Jon 5:14.
[Ol Futnot]
a Dispela nem Jabes i kam long wanpela tok em inap makim “pen.”
b Ol rait Targum, em ol rait bilong ol Juda i gat ol tok bilong Baibel long en, i kamapim tok bilong Jabes olsem: “Givim mi planti pikinini na mekim lain bilong mi i go bikpela.”