Go Klostu Long God

Em i Save Long “Tingting Bilong Ol Man”

2 STORI 6:​29, 30

ATING sampela taim yumi olgeta i pilim olsem yumi no inap moa long karim ol hevi bilong yumi, a? Sampela taim i luk olsem i no gat wanpela man inap pilim tru ol hatwok na ol hevi i painim yumi. Tasol i gat wanpela man husat i pilim tru ol samting yumi pilim long bel​—em God Jehova. Tok bilong King Solomon i stap long 2 Stori 6:​29, 30 inap mekim gut bel bilong yumi.

Solomon i mekim beten bilong dediketim tempel long Jerusalem long 1026 B.C.E. Ating em i beten inap olsem 10-pela minit samting, na em i litimapim nem bilong Jehova olsem God bilong stap gut long ol narapela, Man Bilong Truim ol tok promis, na Man Bilong Harim ol beten.​—1 King 8:​23-53; 2 Stori 6:​14-​42.

Solomon i askim Jehova long harim singaut bilong ol man i lotuim em. (Ves 29) Tru Solomon i kolim planti hevi (ves 28), tasol em i tok olgeta wan wan man i save na i pilim “hevi i bin kamap” long em. Ating olgeta wan wan man i karim narapela narapela pen na hevi.

Maski i olsem, ol man i save stap aninit long God ol i gat helpim. Long beten bilong em, Solomon i tingim olgeta manmeri husat i ‘litimapim han bilong ol’ na beten long Jehova.a Ating Solomon i tingim papa bilong em Devit, taim em i karim bikpela hevi, na em i tok: “Olgeta hevi yu karim, em yu mas putim long han bilong Bikpela.”​—Song 55:​4, 22.

Jehova bai mekim wanem taim em i harim singaut bilong ol manmeri husat i mas kisim helpim? Solomon i askim Jehova: “Bikpela, yu stap long ples bilong yu long heven na yu ken harim beten bilong en na lusim sin bilong en na helpim em. Yu tasol yu save long tingting bilong ol man.” (Ves 30) Solomon i save olsem Man bilong “harim beten” i save tingim tru ol manmeri i lotu long em olsem wanpela lain olgeta, na tu, em i save tingim olgeta wan wan man i lotu long em. (Song 65:2) Jehova i save givim helpim ol i mas kisim, na em i save lusim rong bilong ol man i tanim bel tru na i kam bek long em.​—2 Stori 6:​36-39.

Bilong wanem Solomon i bilip olsem Jehova i save harim beten bilong ol man i tanim bel? Long beten bilong em, Solomon i tok moa olsem: “Yu tasol yu save long tingting bilong ol man.” Jehova i save long ol pen na hevi ol wan wan wokman bilong em i karim, na em i tingim ol dispela hevi.​—Song 37:4.

Beten bilong Solomon inap mekim gut bel bilong yumi. Ating ol man i no inap kliagut long tingting i stap long bel bilong yumi​—em ol “hevi” bilong yumi yet. (Sindaun 14:10) Tasol Jehova i save long bel bilong yumi na em i tingim tru yumi. Taim yumi kamapim bel hevi bilong yumi long em long rot bilong beten, dispela inap helpim yumi na bai i isi moa long yumi long karim hevi. Baibel i tok: “God i save wari long yupela. Olsem na olgeta hevi yupela i karim, yupela i mas putim long han bilong en.”​—1 Pita 5:7.

[Futnot]