Rot Namba 1

Laikim Tru Ol Manmeri, i No Mani na Mani Kago

BAIBEL I TOK WANEM? “Pasin bilong laikim tumas mani em i as bilong olgeta pasin nogut.”​—1 Timoti 6:10.

BILONG WANEM I HATWOK? Ol man bilong edvetaisim ol samting i putim presa long yumi bambai yumi no amamas long ol samting yumi holim pinis. Ol i laik yumi mas wok oltaim long kisim mani bambai yumi inap baim ol nupela samting. Dispela inap pulim yumi long laikim tumas mani. Tasol Baibel i givim tok lukaut olsem man i laikim tumas mani bai i no inap i stap amamas. King Solomon i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em.”​—Saveman 5:10.

YU INAP MEKIM WANEM? Bihainim pasin bilong Jisas, na lain long laikim tru ol man, winim mani kago. Jisas i redi long lusim ol samting em i holim​—laip bilong em tu​—long wanem, em i laikim tru ol manmeri. (Jon 15:13) Em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Sapos oltaim yumi givim taim na mani bilong yumi bilong helpim ol narapela, ol tu bai helpim yumi. Jisas i tok: “Yupela i mas givim ol samting long ol arapela, na bai God i givim ol samting long yupela.” (Luk 6:38) Ol man husat i wok strong long kisim mani na mani kago, ol bai kisim pen na hevi. (1 Timoti 6:​9, 10) Tasol ol man i laikim tru ol narapela na ol narapela i laikim ol, ol bai stap belgut tru.

I gutpela yu skelim sapos yu inap lusim sampela samting yu holim pinis o yu tingting long baim. Sapos yu mekim olsem bai yu kisim save olsem yu gat sampela taim na strong moa long mekim ol bikpela samting moa long i stap bilong yu​—olsem helpim ol manmeri na mekim wok bilong God, husat i bin givim yu olgeta samting yu holim.​—Matyu 6:24; Aposel 17:28.

[Piksa long pes 4]

“Yupela i mas givim ol samting long ol arapela, na bai God i givim ol samting long yupela”