Rot Namba 4
Makim Gut Ol Poroman Bilong Yu
BAIBEL I TOK WANEM? “Sapos man i wokabaut wantaim man i gat gutpela tingting, orait em tu bai i kisim gutpela tingting.”—Sindaun 13:20.
BILONG WANEM I HATWOK? Ol pren bilong yumi inap mekim na yumi stap belgut o yumi no amamas. Pasin na toktok bilong ol inap mekim sampela samting long tingting yumi holim long laip.—1 Korin 15:33.
Tingim stori bilong Baibel long 12-pela man em ol i bin kam bek long raun bilong ol long Kenan. Planti bilong ol i mekim stori nogut na “i tok giaman long ol Israel long dispela kantri ol i bin lukim.” Tasol tupela man i mekim ol gutpela tok long ol samting bilong Kenan, na ol i tok “dispela hap graun mipela i bin lukim, em i gutpela tumas.” Tasol tingting nogut bilong ol 10-pela man bilong lukstil i kalap long lain Israel. Baibel i tok: ‘Ol manmeri i harim tok na ol i singaut nogut na olgeta i tok kros.’—Namba 13:30–14:9.
Na i wankain long nau, planti man i “save bel nogut long olgeta samting i kamap long ol, na ol i save toktok planti oltaim.” (Jut 16) I hatwok long stap belgut namel long ol pren em oltaim ol i no save amamas.
YU INAP MEKIM WANEM? Skelim ol toktok i save kamap namel long yu na ol pren bilong yu. Planti taim ol pren bilong yu i save hambak long ol samting ol i holim, o oltaim ol i save komplein long ol samting ol i no gat? Na yu stap olsem wanem kain pren long ol? Yu mekim na ol pren i mangalim ol samting yu gat, o yu save strongim ol long amamas long ol samting ol i holim pinis?
Tingim pasin bilong Devit, husat bai kamap king, na pasin bilong Jonatan, em pikinini bilong King Sol. Devit i bin stap olsem ranaweman long ples drai nating. King Sol i pret long Devit bai kisim wok king bilong em, na em i laik kilim em i dai. Maski Jonatan inap kisim wok king bihain long Sol, em i no tingim dispela samting na em i kamap gutpela pren tru bilong Devit. Jonatan i luksave olsem God i bin makim Devit bilong kamap king na em i amamas long sapotim pren bilong em.—1 Samuel 19:1, 2; 20:30-33; 23:14-18.
Yu mas i gat ol kain pren olsem, em ol i wok strong long stap belgut na oltaim ol i laik ol gutpela samting i painim yu. (Sindaun 17:17) Bilong kisim ol kain pren olsem, yu yet i mas kamapim ol gutpela pasin olsem.—Filipai 2:3, 4.
[Piksa long pes 7]
Ol pren bilong yu i mekim na yu stap belgut o yu no amamas?