Mekim Gut Bel Bilong Man i Krai Sori, Olsem Jisas i Bin Mekim

LASARUS, em man i sindaun long Betani, em i kisim bikpela sik. Ol susa bilong em, Marta na Maria, i salim sampela man i go long gutpela pren bilong ol Jisas. Tasol Lasarus i dai long sik bilong em. Taim em i slip long matmat, ol pren na neiba bilong Marta na Maria i kam lukim ol bilong “mekim gut bel bilong tupela.” (Jon 11:19) Orait nau, Jisas i kamap long Betani na em i go lukim tupela gutpela pren bilong em. Taim yumi skelim ol tok na pasin em i mekim, yumi inap lain long olsem wanem yumi ken mekim gut bel bilong man i krai sori.

Go Lukim Man, Dispela i Soim Yu Tingim Em

Bilong kamap long Betani, Jisas i mas wokabaut inap tupela de. Em i mas brukim wara Jordan na wokabaut long ol maunten rot bilong Jeriko. Kwiktaim Marta i go bilong bungim Jisas long rot. Bihain, Maria i harim olsem Jisas i stap, na em tu i go bungim em. (Jon 10:​40-42; 11:​6, 17-20, 28, 29) Yumi ken save olsem taim Jisas i go lukim tupela susa i krai sori, dispela i mekim gut bel bilong ol.

Long nau tu, taim yumi go lukim ol man i krai sori, dispela inap mekim gut bel bilong ol. Scott na Lydia, pikinini man bilong ol, Theo, husat i gat 6-pela krismas na em i dai long wanpela eksiden, ol i tok: “Yumi mas i gat ol famili na pren bilong helpim yumi. Ol i kam kamap long haus sik long biknait tru.” Ol dispela pren i tok wanem? “Long dispela taim, ol i no mas mekim sampela tok bilong strongim mipela. Ol i stap wantaim mipela, na dispela i soim olsem ol i tingim mipela.”

Baibel i tok, taim Jisas i lukim ol manmeri i krai sori long indai bilong Lasarus, “bel bilong en i sori tru” na em “i krai.” (Jon 11:​33-35, 38) Jisas i no sem long krai long ai bilong ol narapela man. Em i pilim pen na bel sori bilong ol. Yumi ken kisim wanem skul long dispela? Taim yumi go lukim ol man i krai sori, yumi no ken sem long krai wantaim ol. (Rom 12:15) Tasol tu, yumi no ken ting olsem yumi mas mekim na man i bel hevi long wanpela i dai em i mas krai sori tu. Ating sampela i laik krai sori taim ol yet tasol i stap.

Putim Gut Yau

Ating Jisas i tingim pinis sampela tok em i laik kamapim bilong mekim gut bel bilong Marta na Maria, tasol em i larim ol i toktok pastaim. (Jon 11:​20, 21, 32) Taim em i toktok wantaim Marta, em i kamapim wanpela askim, na nau em i putim yau long tok bilong Marta.​—Jon 11:​25-27.

Taim yumi putim gut yau, dispela i kamapim olsem yumi tingim tru man. Olsem na bilong mekim gut bel bilong man i krai sori, yumi mas putim gut yau. Yumi ken mekim olsem long rot bilong kamapim sampela askim na larim man i krai sori long autim tingting bilong em. Tasol was gut, no ken strong long man i mas toktok, nogut em i laik stap isi tasol. Ating em i taiet nogut tru na em i laik malolo.

Ol man i krai sori, ating bel bilong ol i no gat strong na sampela taim ol bai mekim wankain tok planti taim. Sampela i save kamapim samting ol i pilim long bel. Maria na Marta i bin tokim Jisas: “Bikpela, sapos yu bin i stap hia, bai brata bilong mi i no inap i dai.” (Jon 11:​21, 32) Jisas i mekim wanem? Em i putim gut yau na pilim tru tok ol i mekim. Em i no tokim ol long samting ol i mas pilim. Yumi ken save olsem em i pilim tru bikpela pen bilong man i krai sori.

Sapos yu no save long samting yu inap tokim man i krai sori taim yu go lukim em, ating yu ken kirapim tok olsem: “Yu laik toktok long dispela samting?” Orait nau putim gut yau long olgeta tok em i mekim. Pilim tru ol tok yu harim. Lukluk stret long pes bilong man na traim long kliagut long samting man i pilim long bel.

I hatwok long pilim tru tingting bilong man i krai sori. Lydia i tok: “Ol samting mipela i nidim i bin senis. Sampela taim mipela i save krai nogut tru long ai bilong ol visita. Mipela i laik bai ol narapela i kamapim sampela gutpela tok tasol. Ol pren bilong mipela i wok strong long kliagut long ol samting mipela i pilim long bel.”

Jisas i mekim gut tru dispela samting. Em i bin save long “hevi i bin kamap” long olgeta wan wan man. (2 Stori 6:29) Jisas i mekim narapela narapela pasin long taim tupela susa i bungim em. Marta i wok long toktok, olsem na Jisas i toktok wantaim em. Tasol Maria i krai, olsem na Jisas i no toktok longpela taim wantaim em. (Jon 11:​20-28, 32-35) Yumi inap kisim wanem skul long pasin bilong Jisas? I gutpela long larim man i krai sori long kirapim toktok. Pasin bilong yu long amamas long putim yau taim man i kamapim bel hevi bilong em, dispela inap mekim em i belgut.

Ol Tok Bilong Mekim Gut Bel

Taim Maria na Marta i tokim Jisas: “Sapos yu bin i stap hia,” Jisas i no bin sutim tok long tupela o em i bel nogut long dispela, nogat. Em i mekim gutpela tok long Marta olsem: “Brata bilong yu bai i kirap bek.” (Jon 11:23) Long dispela tok em i mekim, Jisas i helpim ol long tingim gutpela samting bai kamap bihain.

Taim yumi toktok wantaim ol man i krai sori, tingim olsem em i bikpela samting long mekim ol gutpela tok, maski yumi no mekim planti tok. Yumi ken mekim ol gutpela tok o yumi ken raitim. Ol man i krai sori ol inap ritim gen ol pas na ol kat, na dispela inap strongim bel bilong ol inap longpela taim bihain long wanpela i dai. Inap 9-pela mun bihain long Bob i dai, meri bilong em Kath i ritim gen olgeta kat em i bin kisim. Em i tok: “Mi pilim olsem ol tok i stap long ol dispela kat i bin helpim mi moa yet long dispela taim. Ol i mekim gut tru bel bilong mi.”

Yu inap raitim wanem tok long kat yu laik salim long man i krai sori? Yu inap raitim sampela tok i stori long man i dai pinis​—olsem ol samting yutupela i bin mekim wantaim, o stori long sampela gutpela pasin bilong em. Kath i tok: “Sampela gutpela stori long Bob na ol pasin bilong em i mekim na mi laik smail na krai long wankain taim. Sampela pani stori long em i mekim mi lap na mi tingim gen ol gutpela taim mipela i bin stap wantaim. Planti kat em nau mi save laikim tru ol i gat ol ves bilong Baibel long en.”

Mekim Samting Bilong Helpim Ol

Bilong helpim famili bilong Lasarus, Jisas i mekim samting yumi no inap mekim. Em i kirapim bek Lasarus. (Jon 11:​43, 44) Tasol yumi inap mekim ol samting olsem redim kaikai, givim ples slip long ol visita bilong man i krai sori, wasim ol klos, lukautim ol liklik pikinini, go long stua samting, o draivim ol long ka. Ol man husat i bel hevi long wanpela i dai, ol bai pilim tru ol wok yumi mekim long pasin laikim.

Yumi ken save olsem, ol man i krai sori i mas i gat sampela haptaim bilong ol yet. Tasol i gutpela yu mekim samting bilong pas gut yet wantaim ol. Wanpela mama husat i krai sori, em i tok: “I no gat wanpela haptaim o wanpela det stret bilong pinisim krai sori.” Sampela i save tingim ol man i krai sori long sampela bikpela de olsem de ol i bin marit o de man i dai. Taim yu redi long helpim ol man long ol kain taim olsem, yu inap kamap gutpela poroman tru long taim bilong hevi.​—Sindaun 17:17.

Jisas i skulim ol disaipel bilong em long gutpela samting bai kamap bihain, na dispela tu i insait long tok em i mekim bilong strongim bel, olsem: “Pren bilong yumi Lasarus i slip. Tasol mi bai go na kirapim em.” (Jon 11:11) Jisas i tokim ol disaipel bilong em olsem bihain bai em i kirapim bek ol man i dai pinis. Em i askim Marta: “Yu bilipim dispela, o nogat?” Marta i tok: “Yes, Bikpela.”​—Jon 11:​24-27.

Yu bilip olsem Jisas bai kirapim bek ol man i dai pinis? Sapos olsem, orait tokim ol man i krai sori long dispela gutpela samting bai kamap bihain. Mekim ol samting bilong helpim ol. Ol tok na pasin bilong yu bai mekim gut bel bilong ol.​—1 Jon 3:18.

[Mep long pes 9]

(Bilong save ol dispela rait i stap we long pes, lukim buk o magasin)

PEREA

Wara Jordan

Jeriko

Betani

Solwara Retsi

Jerusalem

SAMARIA