Yu Save Long Dispela?

Pol i tok long wanem ol mak taim em i tok “ol dispela mak i stap pinis long bodi bilong mi, ol i soim olsem mi wokman tru bilong Jisas”?​—Galesia 6:17.

▪ Ating tok bilong Pol i gat narapela narapela mining long tingting bilong ol man husat i harim tok bilong em. Olsem, long bipo ol i save yusim wanpela ain i hat tru bilong putim mak long ol kalabusman ol i kisim long taim ol i winim pait, long ol man bilong stilim samting long tempel, na ol wokboi nating husat i ranawe. Taim ol i wokim kain mak olsem long skin bilong ol man, dispela em i wanpela mak nogut bilong givim sem long man.

Tasol i no olgeta kain mak olsem ol i mak nogut na i givim sem long man, nogat. Planti lain long bipo ol i save mekim wok long en bilong makim olsem man i insait long wanpela lain o lotu. Buk Theological Dictionary of the New Testament, i tok: “Ol Siria i save dediketim ol yet long god Hadad na Atargatis long rot bilong wokim mak long han o nek bilong ol . . . Na ol man bilong lotuim Dionysus, ol i gat mak bilong wanpela lip long skin bilong ol.”

Long nau, planti man bilong skelim ol tok bilong Baibel ol i ting Pol i toktok long ol bagarap long skin em i bin kisim long ol narapela narapela taim we ol man i bin mekim nogut long em taim em i mekim wok misineri olsem wanpela Kristen. (2 Korin 11:​23-27) Tasol ating tok bilong Pol i makim pasin em i save bihainim long i stap bilong em olsem wanpela Kristen na em i no tok long ol mak tru tru.

Olsem wanem? Ol taun bilong hait long taim bilong ol Israel long bipo ol i ples bilong lukautim ol kilman?

▪ Long ol haiden bilong bipo, planti haus lotu i stap olsem ples hait bilong ol ranaweman o ol kilman. Na long ol lotu bilong bipo i gat nem Kristen, ol haus lotu na ol haus pris i mekim wankain wok. Tasol i gat ol lo i bosim ol taun bilong hait bilong ol Israel long bipo, na dispela i mekim na ol dispela taun i no stap olsem ples bilong lukautim ol kilman.

Lo Bilong Moses i tok ol taun bilong hait ol i bilong lukautim ol man i popaia na kilim man i dai. (Lo 19:​4, 5) Kilman i ken ranawe i go long taun bilong hait i stap klostu na bai wanblut bilong daiman i no ken kilim em i dai bilong bekim rong. Bihain long em i tokim ol hetman long ol samting i bin kamap, orait ol i bringim em i go bilong kot long taun i bosim hap we man i bin kisim bagarap long en. Long dispela hap, kilman i gat rot bilong kamapim klia olsem em i no gat asua. Ol hetman bai skelim sapos i gat sampela pasin birua i bin stap namel long em na long man i dai o nogat.​—Namba 35:​20-24; Lo 19:​6, 7; Josua 20:​4, 5.

Sapos ol i painimaut olsem em i no gat asua, orait ranaweman i mas go bek na stap long taun bilong hait na ol hap i stap klostu long en. Ol dispela taun ol i no ples kalabus. Ol ranaweman i save mekim wok samting na ol i sindaun gut wantaim ol narapela. Taim hetpris i dai, olgeta ranaweman i ken go bek long ples bilong ol na i no gat man bai mekim nogut long ol.​—Namba 35:​6, 25-28.

[Mep long pes 15]

(Bilong save ol dispela rait i stap we long pes, lukim buk o magasin)

OL TAUN BILONG HAIT

1 KEDES

2 GOLAN

3 RAMOT LONG GILEAT

4 SEKEM

5 BESER

6 HEBRON

Wara Jordan