Ol Yangpela—Sakim Ol Wanlain i Pulim Yupela
“Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.”—KL. 4:6.
1, 2. Planti yangpela i pilim olsem wanem long stap narapela kain long ol wanlain, na bilong wanem?
ATING yu bin bungim dispela hevi, olsem ol wanlain i strong long yu mas bihainim pasin na tingting bilong ol. Ating wanpela i bin strong long yu mas mekim wanpela samting em yu save i no stret long mekim. Yu save pilim olsem wanem taim dispela samting i kamap? Christopher i gat 14 krismas i tok: “Sampela taim mi laik bai mi lus nating, o sapos nogat, mi mas kamap wankain olsem ol wanskul na bai mi no ken stap narapela kain long ol.”
2 Olsem wanem? Ol wanlain bilong yu i save stiaim yu? Sapos olsem, bilong wanem? Ating yu laik bai ol i orait long yu, laka? I no gat rong long yu laik bai narapela i orait long yu. Ol bikpela manmeri tu i laik bai ol wanlain bilong ol i orait long ol. Olgeta man—ol yangpela na lapun—i no laik bai narapela i sakim ol. Tasol yu mas save olsem, taim yu strong long bihainim pasin i stret, i no olgeta man bai amamas long yu. Dispela samting i bin painim Jisas tu. Tasol oltaim Jisas i mekim pasin i stret. Sampela i bihainim em na kamap disaipel bilong em, tasol sampela narapela i rabisim Pikinini Bilong God na “lukim em olsem man nating.”—Ais. 53:3.
Ol Wanlain i Gat Strong Long Pulim Yu
3. Bilong wanem yu bai popaia stret sapos yu bihainim pasin bilong ol wanlain?
3 Ating sampela taim yu gat laik long bihainim pasin bilong ol wanlain na bai ol i ken orait long yu. Yu bai popaia stret sapos yu mekim olsem. Ol Kristen i no ken ‘stap olsem ol liklik pikinini’ em “olgeta kain tok i pulim ol nabaut olsem biksi na win i sakim nabaut ol samting.” (Ef. 4:14; NW) Em isi tru long ol liklik pikinini i larim ol narapela i pulim ol nabaut. Tasol yu wanpela yangpela na bihain yu bai kamap man o meri i bikpela pinis. Olsem na sapos yu bilip olsem ol lo bilong Jehova i bilong helpim yu long i stap gut, orait yu mas bihainim ol tok yu bilip long en. (Lo 10:12, 13) Sapos yu no mekim olsem, i olsem yu lusim pasin bilong bosim yu yet. Taim yu larim ol narapela i bosim yu, i olsem yu kamap wokboi bilong ol.—Ritim 2 Pita 2:19.
4, 5. (a) Olsem wanem Aron i larim ol narapela i bosim em? Yu inap kisim wanem skul long dispela? (b) Long wanem ol rot ol wanlain inap pulim yu long bihainim ol?
4 Wanpela taim, brata bilong Moses, Aron, i larim ol narapela i bosim em. Taim ol Israel i strong long em i wokim wanpela god bilong ol, em i mekim olsem. I no olsem Aron i no gat bun, nogat. Pastaim em i bin stap wantaim Moses taim tupela i toktok long Fero, em man i gat bikpela namba tru long Isip. Aron i no pret, em i autim strong ol tok God i bin givim em long autim long Fero. Tasol taim ol wanlain Israel i strong long em i mas bihainim laik bilong ol, Aron i mekim olsem ol i tok. Tru tumas, bikpela strong i stap long pasin bilong ol wanlain long pulim man! Aron i no bin surik long king bilong Isip, tasol em i no bin strong long sakim ol wanlain.—Kis. 7:1, 2; 32:1-4.
5 Olsem dispela stori bilong Aron i kamapim, dispela pasin we ol wanlain i strong long narapela i bihainim laik bilong ol, dispela i no painim tasol ol yangpela o ol man i gat laik long mekim rong, nogat. Dispela pasin inap painim tu ol man husat i gat laik tru long mekim pasin i stret, olsem yu yet. Bilong pulim yu long insait long pasin i no stret, ol wanlain inap sutim tok, tok bilas, o tokim yu long mekim wanpela samting bilong soim olsem yu gat strong o nogat. Maski wanem kain pasin ol i mekim bilong pulim yu, em hatwok long sakim. Bilong sanap strong na no ken larim ol wanlain i pulim yu, yu mas kisim pasin bilong bilip tru long ol samting yu yet i bilip long en.
“Skelim Gut Pasin Bilong Yupela Yet”
6, 7. (a) Bilong wanem i bikpela samting long yu bilip tru long ol samting yu bilip long en? Olsem wanem yu inap kisim pasin bilong bilip tru? (b) Yu ken givim wanem ol askim long yu yet bilong strongim pasin bilong yu long bilip tru?
6 Bilong sakim ol wanlain, pastaim yu yet i mas bilip tru olsem ol samting yu bilip long en na ol lo yu bihainim, ol dispela samting i stret. (Ritim 2 Korin 13:5.) Sapos yu gat strongpela bilip olsem, dispela bai helpim yu long tokaut stret na no ken pret, maski yu man bilong sem. (2 Ti. 1:7, 8) Tasol maski sapos man i no gat pasin bilong pret, ating em bai hatwok long sakim ol wanlain sapos em i gat tupela tingting long samting em i bilip long en. Olsem na yu yet i mas skelim na save olsem ol tok yu bin lainim long Baibel, ol dispela tok em i tru. Olsem: Yu bilip long God na yu bin harim ol narapela i tokaut long as na ol i bilip olsem em i stap. Sapos olsem, orait askim yu yet, ‘Wanem samting i mekim na mi yet i bilip olsem God i stap?’ As bilong dispela askim i no bilong kirapim yu long kisim tupela tingting, nogat, em bilong strongim bilip bilong yu. Na askim tu, ‘Olsem wanem mi save olsem God yet i bin kamapim ol tok i stap long Baibel?’ (2 Ti. 3:16) ‘Bilong wanem mi bilip olsem yumi stap nau long “taim bilong las de”?’ (2 Ti. 3:1-5) ‘Wanem samting i mekim na mi bilip olsem ol lo bilong Jehova i bilong helpim mi long i stap gut?’—Ais. 48:17, 18.
7 Ating yu no laik givim ol kain askim olsem long yu yet, long wanem, yu ting bai yu no inap bekim. Tasol dispela i kain olsem yu no laik sekim mak bilong petrol i stap long ka, long wanem, yu pret olsem mak bai soim olsem ka i no gat petrol. Tasol yu mas sekim mak bilong petrol na bai yu ken putim petrol long ka. Na olsem tasol, sapos yu skelim olsem yu sot long bilip, orait yu mas mekim sampela samting bilong strongim bilip bilong yu.—Ap. 17:11.
8. Stori long olsem wanem yu ken strongim yu yet long bilip tru olsem em i savetingting long bihainim lo bilong God long stap longwe long pasin pamuk.
8 Tingim wanpela eksampel. Baibel i tok yu “mas i stap longwe long pasin pamuk.” Askim yu yet, ‘Bilong wanem em savetingting long bihainim dispela lo?’ Tingim as na ol wanlain bilong yu i insait long dispela pasin. Na tingim tu olsem wanem man i mekim pasin pamuk em “i mekim nogut long bodi bilong em yet.” (1 Ko. 6:18) Taim yu skelim pinis dispela, orait askim yu yet: ‘Wanem rot i gutpela moa long bihainim? Sapos mi insait long pasin pamuk, dispela pasin bai helpim mi?’ Orait skelim gut moa dispela samting na askim yu yet, ‘Bai mi pilim olsem wanem sapos mi pundaun na mekim pasin pamuk?’ Ating sampela wanlain bilong yu bai amamas long yu, tasol bai yu pilim olsem wanem taim yu stap wantaim papamama o ol wanbilip Kristen long Haus Kingdom? Yu bai pilim olsem wanem taim yu laik beten long God? Tru tru yu laik bagarapim pasin bilong yu long i stap klin long ai bilong God na bai yu ken amamasim tasol ol wanklas bilong yu?
9, 10. Taim yu bilip tru long ol samting yu bilip long en, olsem wanem dispela bai strongim yu taim yu stap wantaim ol wanlain?
9 Sapos yu wanpela tineja, yu stap long wanpela kain taim we “tingting” bilong yu i wok long skelim planti samting moa. (Ritim Rom 12:1, 2.) Yusim dispela haptaim long skelim gut moa wanem ol samting yu yet i mas mekim olsem wanpela Witnes Bilong Jehova. Dispela bai helpim yu long kisim pasin bilong bilip tru long ol samting yu bilip long en. Sapos yu mekim olsem, orait taim ol wanlain i laik pulim yu, kwiktaim yu inap bekim tok na yu no pret. Yu bai pilim wankain olsem wanpela yangpela sista Kristen husat i tok: “Taim mi tokaut stret long samting mi bilip long en, mi opim rot long ol narapela i ken save mi wanem kain meri. Lotu bilong mi i no wanpela lotu nating. Em i bikpela samting long tingting bilong mi, ol mak mi putim, ol pasin mi bihainim, na long i stap bilong mi.”
10 Yes, bilong stap strong long bihainim ol pasin yu save em i stret long mekim, yu mas taitim bun tru. (Lu. 13:24) Na ating yu tingting planti olsem hatwok yu mekim bai lus nating o olsem wanem. Tasol tingim: Sapos yu sem long ol bilip bilong yu, ol arapela bai luksave long dispela na ating ol bai strong moa yet long pulim yu. Tasol sapos yu mekim ol tok i kamapim olsem yu bilip tru long ol tok yu mekim, ating yu bai kirap nogut olsem kwiktaim ol wanlain bai surik long pulim yu.—Skelim Luk 4:12, 13.
‘Tingting Gut Pastaim na Bekim Tok’
11. Sapos yu redi gut pastaim, olsem wanem dispela bai helpim yu taim ol wanlain i laik pulim yu?
11 Narapela bikpela samting yu mas mekim bilong sanap strong na bai ol wanlain i no ken pulim yu, em yu mas redi gut. (Ritim Sindaun 15:28.) Bilong redi gut, pastaim yu mas tingim wanem kain samting inap kamap. Sampela taim, sapos yu tingting gut pastaim, dispela inap helpim yu long abrusim hevi. Olsem: Ating yu wokabaut i go na yu lukim sampela wanskul bilong yu i smok i stap. Yu save olsem ol bai laik givim wanpela sigaret long yu. Yu bai mekim wanem? Sindaun 22:3 i tok: “Man i gat gutpela tingting, em i save olsem, hevi i laik kamap long em na em i abrusim.” Sapos yu senisim rot na bihainim narapela rot, ating yu bai abrusim dispela hevi. Dispela i no makim olsem yu pret, nogat, em pasin bilong bihainim savetingting.
12. Taim yu no inap abrusim wanpela hevi, wanem sampela rot bilong bekim tok?
12 Olsem wanem sapos yu no inap abrusim wanpela hevi? Ating wanpela wanlain i askim yu, “Yu no slip yet wantaim wanpela?” I gutpela yu bihainim skultok i stap long Kolosi 4:6 (NW): “Oltaim tok bilong yupela i mas gutpela, olsem yupela i putim sol long en, na bai yupela inap save long wanem tok i stret long bekim long olgeta man wan wan.” Olsem dispela skripsa i makim, i gat kain kain rot bilong bekim tok. I no olsem yu mas kamapim planti tok bilong Baibel, nogat. Ating sotpela bekim tasol em inap. Olsem, taim wanpela i askim yu, “Yu no slip yet wantaim wanpela?,” yu ken tok, “Yes, em stret,” o, “Em samting bilong mi yet.”
13. Sapos wanpela wanlain i tok bilas long yu, olsem wanem yu ken bihainim gutpela tingting taim yu bekim tok?
13 Planti taim Jisas i save bekim sotpela tok tasol taim em i luksave olsem i no gat gutpela samting bai kamap sapos em i bekim longpela tok. Taim Herot i givim askim long em, Jisas i no bekim wanpela tok. (Lu. 23:8, 9) Sampela taim, i gutpela long pasim maus tasol taim wanpela i hambak na givim wanpela kain askim long yu. (Snd. 26:4; Sav. 3:1, 7) Tasol sampela taim, ating yu luksave olsem man i kirap nogut long pasin bilong yu—olsem long sait bilong maritpasin—em i gat gutpela bel maski sapos pastaim em i bin tok bilas long yu. (1 Pi. 4:4) Sapos olsem, orait ating yu ken stori gut moa long bilip bilong yu em Baibel i as bilong en. No ken pret. Yu mas “redi oltaim long bekim tok.”—1 Pi. 3:15.
14. Long gutpela pasin, olsem wanem yu inap mekim i dai tok em wanlain i kamapim?
14 Long sampela taim, ating yu ken kamapim tok i mekim na wanlain i pilim olsem em yet i mekim samting i no stret. Tasol yu mas mekim long gutpela pasin. Olsem: Sapos wanpela wanskul i tokim yu long kisim wanpela sigaret, yu ken tok, “Nogat,” na tok moa olsem, “Mi ting olsem yu gat save na yu no inap smok!” Orait, yu luksave nau long olsem wanem yu inap mekim i dai tok em wanlain i kamapim? I no gat wok long yu long tokim em long as na yu no smok, wanskul yet i mas tingim as na em i smok.
15. Long wanem kain taim i gutpela long lusim ol wanlain bilong yu, na bilong wanem?
15 Tasol olsem wanem sapos ol wanlain i mekim yet ol samting bilong pulim yu? Sapos olsem, i gutpela yu lusim ol tasol na yu go. Sapos yu stap yet wantaim ol, ating bihain tingting bilong yu bai senis na yu kirap bihainim laik bilong ol. Olsem na yu mas lusim ol. Yu no ken pilim olsem ol i winim yu, nogat. Yu ken tingim olsem yu yet i bin stiaim ol samting i bin kamap. Yu no bin kamap wokboi bilong ol wanlain bilong yu, na yu bin mekim Jehova i belgut tru.—Snd. 27:11.
“Tingting Gut na Mekim Wok”
16. Sampela husat i tok ol i Kristen, olsem wanem ol inap putim hevi long yu?
16 Sampela taim, ol yangpela husat i tok ol i wokboi bilong Jehova ol i strong long yu insait long sampela pasin i no stret. Olsem: Ating wanpela yangpela i bin singautim yu long kam long wanpela bung, tasol taim yu kamap, yu luksave olsem i no gat wanpela bikpela man i stap bilong bosim dispela bung. O ating wanpela yangpela husat i tok em i Kristen em i bringim alkohol i kam long wanpela bung, tasol yu wantaim sampela arapela i yangpela tumas long dring. Ating kain kain samting inap kamap we yu mas bihainim maus bilong bel em Baibel i skulim pinis. Wanpela Kristen em i tineja, i tok: “Mi na susa bilong mi i lusim wanpela muvi i gat planti tok nogut long en. Ol narapela husat i bin kam wantaim mitupela, ol i stap yet na lukim muvi. Papamama bilong mitupela i tok amamas long samting mitupela i bin mekim. Tasol ol dispela narapela i kros, long wanem, pasin mitupela i mekim i daunim ol long ai bilong ol arapela.”
17. Yu ken mekim wanem bilong bihainim ol lo bilong God taim yu go long wanpela bung?
17 Olsem dispela ekspiriens i kamapim, taim yu bihainim maus bilong bel em Baibel i skulim pinis, dispela inap mekim na yu pilim hatwok liklik. Tasol yu mas bihainim pasin em yu bilip olsem em stretpela pasin. Redim yu yet. Sapos yu bai go long wanpela bung, stretim rot bilong lusim dispela bung sapos samting i kamap em yu no bin ting em bai kamap. Sampela yangpela i bin pasim tok wantaim papamama bilong ol, olsem sapos ol i ringim ol, dispela i makim olsem papamama i mas i kam na kisim ol. (Sng. 26:4, 5) Em nau, gutpela samting bai kamap sapos yu “tingting gut na mekim wok.”—Snd. 21:5.
‘Amamas Long Taim Yu Yangpela Yet’
18, 19. (a) Olsem wanem yu ken save olsem Jehova i laik bai yu stap amamas? (b) God i ting olsem wanem long ol yangpela husat i sakim ol wanlain i laik pulim ol?
18 Jehova i wokim yu na bai yu inap amamas long i stap laip, na em i laik bai yu stap amamas. (Ritim Saveman 11:9.) Tingim, ol samting em planti wanlain i insait long en, em “pasin bilong sin na kisim amamas bilong sotpela taim tasol.” (Hi. 11:25) God i laik bai yu kisim amamas i gutpela moa, winim amamas bilong sotpela taim. Em i laik bai yu stap amamas oltaim. Olsem na taim traim i painim yu long mekim samting em yu save olsem i no stret long ai bilong God, tingim olsem ol samting Jehova i tokim yu long mekim, em i bilong helpim yu long bihain.
19 Taim yu yangpela, yu mas save olsem maski ol wanlain i amamas long yu long nau, ating planti yia bihain bai ol i no tingim yu. Tasol Jehova i no olsem. Taim yu sakim ol wanlain i laik pulim yu, Jehova i save lukim dispela na em bai i no lusim tingting long yu na pasin bilong yu long i stap gut long em. Em bai ‘givim planti gutpela samting long yu na bai yu no ken sot.’ (Mal. 3:10) Na tu, em i save givim holi spirit bilong inapim yu long ol samting em yu sot long en long nau. Yes, Jehova inap helpim yu long sakim ol wanlain husat i laik pulim yu!
Yu Inap Tingim?
• Pasin bilong ol wanlain long pulim yu i strong olsem wanem?
• Sapos yu bilip tru olsem pasin yu bihainim em i stret, olsem wanem dispela bai helpim yu long sakim ol wanlain?
• Yu ken mekim wanem bilong redim yu yet long sakim ol wanlain husat i laik pulim yu?
• Olsem wanem yu save olsem Jehova i save tingim pasin bilong yu long i stap gut long em?
[Piksa long pes 8]
Bilong wanem Aron i bihainim tok bilong ol wanlain na wokim bulmakau gol?
[Piksa long pes 10]
Redim yu yet—pastaim yu mas tingim ol tok yu bai mekim