Pasin Bilong Ol Wanlain Long Pulim Yu na Wok Bilong Yu Long Autim Tok
1 Pasin bilong ol wanlain long pulim yumi em i wanpela strongpela samting tru bilong helpim yumi o nogutim yumi. Gutpela pasin bilong ol narapela wokman bilong Jehova em inap kirapim yumi long mekim ol gutpela wok Kristen. (Hi 10:24) Tasol ol wanblut i no Witnes, ol wanwok, ol wanskul na ol wantok ol inap pulim yumi long mekim ol samting i no stret wantaim ol lo Kristen. Ating ol bai ‘tok bilas long gutpela pasin yumi mekim bilong bihainim Krais.’ (1 Pi 3:16) Olsem wanem yumi ken holim yet bikpela laik bilong yumi long autim tok, maski ol wanlain i strong long pulim yumi long lusim dispela wok?
2 Long Famili: Sampela taim wanpela man marit na papa em i no wanpela Witnes Bilong Jehova em i no laik bai meri na ol pikinini bilong em i mekim wok autim tok. Dispela samting i painim wanpela famili long Meksiko. Wanpela meri marit na 7-pela pikinini bilong em ol i kisim tok i tru. Pastaim man i birua, long wanem, em i no laik famili bilong em i autim tok na tilim ol buk bilong Baibel long haus bilong ol man. Em i pilim olsem dispela wok em i wanpela pipia wok. Tasol meri bilong em na ol pikinini ol i stap strong long mekim wok bilong Jehova na ol i mekim wok autim tok long olgeta taim. Bihain, dispela man i luksave em i gutpela samting long mekim wok autim tok olsem God i bin makim, na em tu i dediket long Jehova. Inap 15 yia i lus na bihain em i kisim tok i tru, tasol yu ting em inap kisim tok i tru sapos famili bilong em i no bin strong long mekim wok bilong ol long autim tok?—Lu 1:74; 1 Ko 7:16.
3 Ol Wanwok: Taim yu autim tok long ol wanwok ating sampela bai i no amamas long yu. Wanpela sista i tok, long ofis ol wokman i kirap long stori long pinis bilong pasin nogut bilong dispela graun, na em i tokim ol long ol i mas kaunim Matyu sapta 24, na ol i tok bilas long em. Tasol sampela de bihain, wanpela wanwok i tokim sista olsem em i bin kaunim dispela sapta na em i kirap nogut. Sista i tilim wanpela buk long wanwok, na em i stretim rot wantaim wanwok long mekim Baibel-stadi wantaim em na man bilong em. Namba wan stadi ol i mekim i go i go inap long 2 klok long moningtaim. Bihain long namba 3 stadi, ol i kirap long kam long ol miting, na i no longtaim na ol i lusim smok na ol i kirap long mekim wok autim tok. Yu ting dispela samting inap kamap sapos sista bilong yumi i no bin wok strong long autim bilip bilong em long ol narapela?
4 Ol Wanskul: Planti taim ol pikinini Witnes i kisim hevi taim ol wanskul i strong long pulim ol, na ol i save pret olsem ol narapela pikinini inap daunim ol sapos ol i mekim wok autim tok. Wanpela yangpela Kristen long Amerika i tok: “Mi pret long autim tok long ol narapela yangpela, long wanem, mi ting ol bai tok bilas long mi.” Olsem na em i no save autim tok long ol wanlain long skul na long teritori. Olsem wanem yu inap kisim pasin bilong strongim bel na sakim ol wanlain i strong long pulim yu? Yu mas bilip long Jehova, na mekim ol samting Jehova bai amamas long en. (Snd 29:25) Yu mas amamas long yu inap mekim wok long Tok Bilong God long wok autim tok bilong yu. (2 Ti 2:15) Dispela yangpela yumi bin stori long em, em i kirap beten long Jehova na askim Jehova long helpim em na bai em i gat laik long autim tok long ol wanskul bilong em. Em i kirap autim tok long kain kain taim long skul, na gutpela samting i kamap, na i no longtaim em i kirap autim tok long olgeta yangpela em i save long ol. Em i tok: “Ol dispela yangpela i mas kisim save long ol samting bai kamap bihain, na Jehova i mekim wok long yumi bilong helpim ol.”
5 Ol Man i Stap Klostu Long Yumi: Ating ol man i stap klostu long yumi o ol wantok ol i no save amamas long yumi, long wanem, ol i save yumi husat na yumi gat wanem bilip. Sapos yu pret long ol bai ting olsem wanem long yu, orait askim skin bilong yu: ‘Ol i save long tok i tru i helpim ol man long kisim laip oltaim? Mi ken mekim wanem bilong helpim ol?’ Wanpela wasman sekit i skelim olsem gutpela samting i save kamap taim yumi autim ol liklik liklik tok long ol man i stap klostu long yumi long olgeta taim. Beten long Jehova na askim em long givim strong na gutpela tingting long yu na bai yu ken wok yet long painim ol man i gat gutpela bel.—Fl 4:13.
6 Sapos yumi larim ol wanlain nogut i pulim yumi, dispela bai amamasim ol man i birua long yumi, tasol yu ting dispela i helpim ol o i helpim yumi? Ol manmeri long ples bilong Jisas yet ol i bin birua long em. Ol brata bilong em yet ol i bin sutim sampela strongpela tok long em. Tasol Jisas i save i gat wanpela rot tasol bilong helpim ol em olsem, em i mas bihainim yet dispela rot God i bin tokim em long bihainim. Maski “ol man bilong sin bipo ol i birua nogut long Jisas. Tasol em i sanap strong moa.” (Hi 12:2, 3) Yumi tu i mas mekim olsem. Yu mas strong tru long mekim dispela gutpela wok yu kisim bilong autim tok bilong Kingdom. Sapos yu mekim olsem “God bai i kisim bek yu yet, na em bai i kisim bek ol manmeri i save harim tok bilong yu.”—1 Ti 4:16.