Askim

Stat 6:3 i tok: “Mi bin putim spirit bilong mi long ol manmeri bilong givim laip long ol. Tasol ol i samting bilong graun tasol, olsem na mi no ken larim spirit bilong mi i stap long ol oltaim. Nau bai mi larim ol i stap laip inap 120 krismas tasol.” Orait yu ting Jehova i bin makim taim bilong man i stap laip em inap olsem 120 krismas tasol? Na yu ting Noa i bin autim tok bilong Bikpela Tait wara inap long 120 yia?

Bekim bilong tupela askim wantaim, em nogat.

Paslain long Bikpela Tait, planti man i bin i stap laip inap planti handet yia. Noa i gat 600 krismas taim Bikpela Tait i kamap, na em i stap laip inap long 950 krismas. (Stt. 7:6; 9:29) Sampela man em mama i bin karim ol bihain long Bikpela Tait, ol i winim 120 krismas. Arpaksat i gat 438 krismas na em i dai, na Sela i gat 433 krismas na em i dai. (Stt. 11:​10-15) Tasol long taim bilong Moses, ol man i save stap 70 o 80 yia tasol. (Sng. 90:10) Olsem na Stat 6:3 i no makim olsem laip bilong ol man em bai inap olsem 120 yia, nogat.

Orait olsem wanem? Yumi ken ting dispela ves em i wanpela tok God i bin givim long Noa, olsem em i mas givim tok lukaut long ol man olsem bikpela bagarap bai kamap inap 120 yia bihain? Nogat. Sampela taim God i bin toktok wantaim Noa. Long 10-pela ves bihain long ves 3, Baibel i tok: “God i tokim Noa olsem, ‘Olgeta manmeri i wok long pait na bikhet tasol, olsem na mi laik bagarapim ol. Bai mi pinisim tru olgeta lain manmeri.’” Long ol yia bihain long en, Noa i pinisim bikpela wok bilong em long wokim sip, na long dispela taim “Bikpela i tokim Noa olsem, ‘Yu wantaim olgeta lain famili bilong yu i mas i go insait long sip.’” (Stt. 6:13; 7:1) Na i gat sampela taim moa we Jehova i bin tokim Noa long sampela samting.​—Stt. 8:15; 9:​1, 8, 17.

Tasol Stat 6:3 i no mekim kain tok olsem. Em i no kolim nem bilong Noa, na em i no tok God i givim tok long em. Yumi ken ting em i wanpela tok bilong God long samting em i tingting pinis long mekim. (Skelim wantaim Stat 8:21.) Na long stori bilong ol samting i bin kamap paslain tru long taim bilong Adam, yumi ken lukim sampela tok olsem: “Bihain God i tok olsem.” (Stt. 1:​6, 9, 14, 20, 24) Yumi save Jehova i no toktok wantaim wanpela man long graun, long wanem, long dispela taim em i no bin wokim yet ol man.

Olsem na i stret yumi ken ting, Stat 6:3 i kamapim tingting bilong God long pinisim ol pasin nogut i stap long graun. Jehova i tokaut long em bai mekim olsem inap 120 yia bihain, tasol Noa i no save yet long dispela. Tasol bilong wanem em i makim haptaim olsem? Bilong wanem em i wet?

Aposel Pita i kamapim sampela as bilong dispela: “Long taim bilong Noa, pasin nogut i wok long kamap bikpela tru, tasol God i no bekim kwik. Nogat. Em i wet i go inap Noa i wokim pinis sip bilong en. Na liklik lain tasol, inap 8-pela manmeri, ol i bin i go antap long sip na bikpela wara i karim ol i go na God i kisim bek ol na ol i stap gut.” (1 Pi. 3:20) Em nau, taim God i tingting pinis long putim taim olsem 120 yia, i gat sampela wok yet long mekim. Inap 20 yia samting bihain, Noa wantaim meri bilong em i kirap long kamapim ol pikinini. (Stt. 5:32; 7:6) Tripela pikinini man bilong ol i go bikpela na ol i marit, na nau famili i go bikpela inap “8-pela manmeri.” Orait nau ol i mas wokim sip, na ol i no inap wokim hariap, long wanem, em i wanpela traipela sip na lain bilong Noa i no planti. Tru tumas, pasin bilong God long wet i stap inap 120 yia i givim taim long ol long mekim ol dispela samting, na long dispela rot God inap lukautim dispela 8-pela manmeri na “ol i stap gut.”

Baibel i no tokaut long wanem yia stret Jehova i bin tokim Noa long Bikpela Tait bai kamap. Ol pikinini man bilong em i kamap, na ol i go bikpela na marit, olsem na i gat samting olsem 40 o 50 yia i stap yet na Bikpela Tait bai kamap. Orait nau Jehova i tokim Noa: “Bai mi pinisim tru olgeta lain manmeri.” Na em i tok Noa i mas wokim wanpela traipela sip na em wantaim lain bilong em ol i mas go insait long en. (Stt. 6:​13-18) Long ol yia i kamap bihain long dispela, Noa i stap olsem gutpela piksa long bihainim tru stretpela pasin. Tasol em i no mekim dispela samting tasol, nogat. Em “i man bilong tokaut long stretpela pasin,” na em i gat wanpela strongpela tok lukaut bilong givim long ol man​—em tingting bilong God long bagarapim olgeta man i stap long dispela taim, em ol i givim baksait long God. Noa i no save long wanem yia dispela bagarap bai kamap, tasol Noa i save em bai kamap. Na yu save em i bin kamap tru.​—2 Pi. 2:5.