Yu Ting God i Bin Save Olsem Adam na Iv Bai Mekim Sin?

PLANTI man i laik save tru long bekim bilong dispela askim. Taim ol man i stori long as na God i larim ol pasin nogut i stap, planti taim ol i toktok long sin em namba wan man na meri i bin mekim long gaden Iden. Dispela tingting olsem ‘God i save long olgeta samting,’ em i kirapim sampela long ting olsem God i bin save pinis olsem Adam na Iv bai sakim tok bilong em.

Sapos God i bin save olsem dispela tupela marit em ol i gutpela olgeta ol bai mekim sin, orait dispela i makim wanem samting? Dispela kain tingting bai mekim na ol man bai ting olsem God i gat ol pasin nogut. I olsem God i no gat pasin laikim, pasin bilong em i no stret, na em i giaman. Sampela bai ting em pasin nogut tru sapos God i save pinis long samting nogut bai kamap na em i larim tasol dispela samting i painim namba wan man na meri. Sapos olsem bai i luk olsem God i gat asua long olgeta samting nogut na olgeta pen na hevi i kamap kirap long bipo yet na i kam inap long nau, o God i orait tasol long en. Sampela narapela bai ting olsem Man Bilong Wokim yumi em i no tingting stret na mekim ol samting.

Baibel i stori long ol gutpela pasin bilong God Jehova, olsem na yu ting em i gat ol dispela pasin nogut? Bilong bekim dispela askim, yumi ken skelim ol tok Baibel i mekim long ol samting Jehova i bin wokim na long ol pasin bilong em.

‘Olgeta Samting i Gutpela Tru’

Buk Stat i stori long ol samting God i bin wokim na i stori tu olsem God i bin wokim namba wan man na meri long graun, na i tok: “God i lukim olgeta dispela samting i gutpela, na em i amamas tru.” (Stat 1:31) God i wokim Adam na Iv i gutpela olgeta, na ol inap tru long i stap gut long dispela graun. Skin na tingting bilong ol i gutpela olgeta. God i wokim ol “i gutpela” tru na ol inap tru long kamapim ol gutpela pasin em God i laik ol i mas mekim. God i wokim ol na ol i kamap “olsem God yet.” (Stat 1:27) Olsem na inap long mak bilong ol, ol inap long kamapim ol pasin bilong God olsem savetingting, pasin laikim, stretpela pasin, na gutpela pasin. Taim ol i kamapim ol dispela pasin, dispela bai helpim ol long wokim ol gutpela disisen na amamasim Papa bilong ol long heven.

Jehova i wokim man na meri i gutpela olgeta, na em i larim ol i stap fri bilong makim ol samting ol i laik mekim. Olsem na Jehova i no wokim ol olsem robot em ol i gat pinis pasin bilong bihainim laik bilong God long skin bilong ol, nogat. Tingim: Yu bai amamas moa long wanem samting? Wanpela presen yu kisim nating, o wanpela presen em man i givim long yu, long wanem, em i laikim yu tru? Yumi save long bekim bilong dispela askim, a? Na i wankain long Adam na Iv, sapos long laik bilong ol yet ol i bihainim tok bilong God, orait God bai amamas tru long pasin bilong ol. God i wokim namba wan man na meri na ol yet i ken makim wanem samting ol i laik mekim, na dispela i givim rot long ol long bihainim laik bilong God, long wanem, ol i laikim em tru.​—⁠Lo 30:​19, 20.

Gutpela na Stretpela Pasin

Baibel i kamapim klia long yumi ol pasin bilong Jehova. Ol dispela pasin i mekim na Jehova i no inap insait liklik long wanpela samting bilong sin. Song 33:5 i tok, Jehova “i laikim olgeta gutpela pasin na olgeta samting i stret.” Olsem na Jems 1:13 i tok: “Sin i no inap pulim God, na God i no save pulim man long mekim sin.” God i tingim tru Adam na em i givim tok lukaut long em olsem: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:​16, 17) Jehova i givim tupela rot long namba wan man na meri, em laip oltaim o dai. Sapos God i bin givim tok lukaut long ol olsem ol i no ken mekim sin, tasol em i save pinis olsem ol bai mekim pasin nogut, i olsem God i mekim pasin giaman. Jehova em i Man bilong “laikim olgeta gutpela pasin na olgeta samting i stret,” olsem na em i no inap tokim tupela long makim rot ol i laik bihainim, sapos em i makim pinis samting bai kamap.

Jehova i save mekim gutpela pasin tru. (Song 31:19) Jisas i stori long gutpela pasin bilong God, na em i tok: “Sapos pikinini bilong wanpela bilong yupela em i askim papa long givim bret long em, ating papa bai i givim wanpela ston long em, a? Nogat. Na sapos pikinini i askim papa long givim pis long em, ating papa bai i givim em wanpela snek nogut, a? Em tu nogat. Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim ol gutpela samting long ol man i prea long em.” (Matyu 7:​9-11) God i save givim “ol gutpela samting” long ol man. Em i wokim ol manmeri i gutpela tru na putim ol long gutpela ples paradais na dispela i kamapim klia gutpela pasin bilong em. Yu ting kain gutpela King olsem inap givim gutpela ples long ol man na bihain em i mekim pasin nogut na rausim ol? Nogat. Gutpela stretpela Man Bilong Wokim yumi em i no gat asua long ol man i bikhet long em.

‘God Wanpela Tasol i Gat Save Tru’

Baibel i kamapim long ples klia olsem ‘God wanpela tasol i gat save tru.’ (Rom 16:27) Ol ensel bilong God long heven i lukim planti wok bilong God i kamapim tru dispela savetingting bilong em. Ol “i amamas na singaut” taim Jehova i wokim ol dispela samting bilong graun. (Jop 38:​4-7) Yumi ken save olsem ol dispela ensel i lukim ol samting i kamap long gaden Iden na ol i gat laik tru long save long en. Olsem na yu ting God husat i gat savetingting na i wokim gutpela ples antap na graun i naispela tru, em bai wokim man na meri i narakain tru, tasol em i save pinis olsem ol bai mekim sin? Em klia tru olsem God i no makim pinis ol dispela samting nogut bai kamap.

Tasol ating sampela bai tok, ‘Olsem wanem wanpela God husat i gat olgeta save em i no save long dispela samting?’ Tru, Jehova i gat bikpela savetingting na wanpela samting long savetingting bilong Jehova em olsem: “Taim wanpela samting i no kamap yet, [em i] save tokaut long dispela samting bai i kamap na bai i go pinis.” (Aisaia 46:​9, 10) Tasol em i no mas mekim wok long dispela save bilong em, wankain olsem em i no save yusim bikpela strong bilong em long olgeta taim. Jehova i save makim gut wanem taim stret em bai yusim dispela pasin bilong em long save long ol samting i laik kamap bihain. Em i mekim wok long en long taim i stret long em i mekim olsem.

Yumi ken tok piksa long pasin bilong God long em i no yusim strong bilong em long save long ol samting bai kamap bihain. Olsem: Wanpela man i laik lukim vidio bilong wanpela gem bilong spot em i bin rekodim. Sapos em i laik, em inap lukim ol laspela minit bilong gem pastaim bilong save long husat i win. Tasol em i no mas mekim olsem. I no gat wanpela man bai sutim tok long em sapos em i lukim gem long kirap bilong en na i go inap long pinis bilong en, a? Na i wankain long Man Bilong Wokim yumi, em yet i makim olsem em i no laik save long wanem samting bai kamap bihain, nogat. Em i laik wet na lukim ol samting i wok long kamap na nau em inap save long wanem ol pasin ol pikinini bilong em long graun bai bihainim.

Olsem yumi stori pinis, long gutpela savetingting Jehova i no wokim ol man olsem robot bilong bihainim stret wanpela pasin em i putim pinis long skin bilong ol, nogat. Em i larim ol i stap fri bilong makim samting ol i laik mekim. Sapos ol i bihainim stretpela pasin, ol inap kamapim pasin laikim bilong ol, pasin bilong tenkyu, na pasin bilong bihainim tok, na dispela bai mekim ol yet i stap amamas, na moa yet, ol bai amamasim Papa bilong ol long heven, em Jehova.​—⁠Sindaun 27:11; Aisaia 48:⁠18.

Baibel i soim olsem planti taim God i no save mekim wok long pasin bilong em long save long ol samting bai kamap bihain. Olsem, taim bilipman Abraham i laik givim pikinini man bilong em olsem ofa, Jehova i tok: “Yu gat dispela wanpela pikinini tasol, na yu no pasim em. . . . Olsem na [“nau,” NW ] mi save, yu man bilong aninit long [mi].” (Stat 22:12) Tasol i gat sampela taim we pasin nogut bilong sampela man i bin mekim God “i bel hevi.” Yu ting em inap pilim kain bel hevi olsem sapos em i save pinis long samting ol bai mekim?​—⁠Song 78:​40, 41; 1 King 11:​9, 10.

Olsem na i stret yumi ken tok dispela God husat i gat olgeta save em i no mekim wok long dispela bilong save olsem namba wan tumbuna papamama bilong yumi bai mekim sin. Em i no mekim longlong pasin olsem mekim wok long strong bilong em long save long samting nogut i laik kamap na bihain em i giaman tasol long larim ol samting i kamap olsem em i bin lukim pinis.

‘God Yet Em i As Bilong Pasin Laikim’

Birua bilong God, Satan, i kirapim pasin bikhet i kamap long gaden Iden na dispela i kamapim ol samting nogut, na tu, i kamapim sin na dai. Olsem na Satan em i man bilong “kilim ol man i dai.” Em i “man bilong tok giaman, na em i papa tru bilong pasin bilong tok giaman.” (Jon 8:44) Em yet i gat tingting nogut, na em i laik mekim samting bai ol man i ting olsem gutpela Man Bilong Wokim yumi, em tu i gat tingting nogut. Em i laik tok olsem em asua bilong Jehova na ol man i mekim sin.

Pasin laikim em i nambawan as na Jehova i no yusim strong bilong em long save olsem Adam na Iv bai mekim sin o nogat. Pasin laikim em i nambawan bikpela pasin bilong God. Namba 1 Jon 4:8 i tok: “God yet em i as bilong dispela pasin bilong laikim ol arapela.” Pasin laikim em i save kamapim ol gutpela samting, em i no save kamapim ol samting nogut. Pasin laikim i save kirapim ol man long tingim gutpela pasin bilong ol narapela. Yes, pasin laikim i kirapim God Jehova na em i laik ol gutpela samting tru i kamap long namba wan man na meri.

Ol pikinini bilong God long graun inap makim rot nogut, tasol gutpela God bilong yumi i no tingting olsem dispela man na meri i gutpela olgeta ol bai mekim pasin nogut. Em i givim planti gutpela samting long ol na tokim ol long olgeta samting ol i mas save long en. Olsem na i stret God i ken ting ol bai givim bel long bihainim tok bilong em, na i no sakim tok bilong em. Em i save olsem Adam na Iv inap long stap gut long em, olsem bihain Abraham, Jop, Daniel, na sampela moa i bin mekim, em ol man i gat sin.

Jisas i tok: “God em inap long mekim olgeta samting.” (Matyu 19:26) Dispela tok i mekim gut bel bilong yumi. Pasin laikim bilong Jehova na ol narapela gutpela pasin bilong em olsem stretpela pasin, savetingting, na strong, i kamapim klia olsem em bai pinisim tru ol samting nogut em sin na dai i kamapim.​—⁠KTH 21:​3-5.

Tru tumas, pastaim Jehova i no bin save olsem namba wan man na meri bai mekim sin. God i bel hevi long ol manmeri i sakim tok bilong em na long ol pen na hevi i kamap long dispela, tasol God i save olsem dispela samting bai stap sotpela taim tasol na i no inap pasim em long kamapim samting em i tingting pinis long mekim long graun na long ol manmeri. I gutpela yu kisim sampela save moa long dispela laik bilong God na olsem wanem truim bilong dispela tok promis inap helpim yu.a

[Futnot]

[Rait long pes 14]

Jehova i no wokim namba wan man na meri olsem robot bilong bihainim stret wanpela pasin

[Rait long pes 15]

God i save olsem Adam na Iv inap long stap gut long em