Rot Bilong Stretim Ol Komplein i Save Kamap Planti Taim
BAIBEL i tok olsem marit bai i gat hatwok bilong en. God i kirapim aposel Pol long raitim tok i go long ol marit olsem “ol bai karim pen na hevi.” (1 Korin 7:28) Tasol ol marit inap mekim planti samting bilong daunim ol hevi na mekim amamas bilong ol i go bikpela moa. Skelim dispela 6-pela komplein em planti man na meri marit i save mekim, na tingim olsem wanem pasin bilong bihainim ol stiatok bilong Baibel inap helpim ol.
1
KOMPLEIN:
“Mipela i no pas gut moa wantaim.”
STIATOK BILONG BAIBEL:
“Skelim gut wanem ol samting i bikpela samting moa.”—FILIPAI 1:10.
Marit bilong yu em i wanpela bikpela samting tru long i stap bilong yu. Yu mas putim i go pas long ol narapela samting. Olsem na skelim sapos ol wok samting yu mekim i as na dispela komplein i kamap. No ken larim ol samting i kamap long olgeta wan wan de i mekim na yu na poroman bilong yu i no pas gut wantaim. Em i tru olsem wok mani na sampela narapela samting inap mekim na yupela i no stap wantaim long olgeta taim. Tasol yu mas bosim gut ol samting yu laik mekim na i mas i gat mak bilong en—olsem haptaim yu lusim long ol amamas o wantaim ol pren.
Sampela man o meri marit i save mekim sampela wok moa o ol i insait long planti amamas bambai ol i no ken lusim haptaim wantaim poroman marit bilong ol. Isi isi long laik bilong ol yet ol kain marit olsem i wok long lusim pasin bilong pas gut wantaim poroman bilong ol. I olsem ol i ranawe long ol hevi bilong ol. Sapos kain samting olsem i painim yu na poroman bilong yu, orait yupela i mas luksave long as tru na dispela hevi i kamap, na mekim sampela samting bilong stretim. Long rot bilong lusim haptaim bilong i stap wantaim poroman marit bilong yu, bai yutupela i pas gut wantaim na kamap olsem “wanpela bodi.”—Stat 2:24.
Samting sampela i bin mekim bilong bihainim dispela tok: Andrewa na Tanji, tupela marit long Australia, ol i marit inap 10-pela yia. Andrew i tok: “Mi kisim save olsem pasin bilong lusim planti aua long wok na bung tumas wantaim ol pren na famili, dispela inap nogutim marit. Olsem na mi na meri bilong mi, mipela i makim taim bilong toktok gut wantaim na kamapim ol tingting bilong mipela long narapela narapela.”
Dave na Jane, ol i sindaun long Amerika na i marit inap 22 yia, ol i save lusim namba wan hap aua long olgeta apinun long toktok long ol samting ol i bin mekim na kamapim tingting bilong ol. Jane i tok: “Dispela em i wanpela bikpela haptaim na mipela i no save larim wanpela samting i pasim mipela long mekim olsem.”
2
KOMPLEIN:
“Mi no moa kisim ol samting mi gat laik long kisim long dispela marit.”
STIATOK BILONG BAIBEL:
“Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet, nogat.”—1 KORIN 10:24.
Man o meri husat i save tingting tasol long ol samting em i laik kisim long marit, em i no inap amamas, maski em i marit planti taim. Marit i save wok gut taim tupela poroman marit wantaim i tingim ol samting ol inap givim long poroman na i no tingim tumas ol samting ol inap kisim. Jisas i tokaut long as bilong dispela olsem: “Amamas bilong givim samting i winim amamas bilong kisim samting.”—Aposel 20:35.
Samting sampela i bin mekim bilong bihainim dispela tok: Maria na Martin, ol i sindaun long Meksiko, ol i marit inap 39 yia. Tasol i no olgeta taim ol i bin stap amamas wantaim insait long marit bilong ol. Ol i tingim wanpela taim we wanpela bikpela hevi i bin kamap. Maria i tok: “Mipela i tok pait, na mi mekim wanpela tok we i no soim rispek liklik long Martin. Em i belhat tru. Mi traim long tokim em olsem mi bin bel hevi na mi popaia long mekim dispela tok. Tasol em i no laik putim yau long tok bilong mi.” Martin i tok: “Long taim mipela i bin mekim dispela tok pait, mi tingting olsem mipela i no inap stap wantaim moa, na mi no ken traim moa long mekim ol samting bilong helpim marit long i stap gut.”
Martin i laik meri i mas rispektim em. Na Maria i laik Martin i mas pilim tingting bilong em. Tupela wantaim i no kisim samting ol i laik kisim.
Olsem wanem ol i stretim hevi bilong ol? Martin i tok: “Mi larim bel bilong mi i kol pastaim na mitupela wantaim i pasim tok olsem mipela i laik bihainim gutpela tok long pasin bilong soim rispek na mekim gutpela pasin. Long ol yia i go pinis, mipela i kisim save olsem maski ol hevi i kamap, mipela inap daunim ol sapos mipela i beten long God long helpim mipela na bihainim ol tok bilong Baibel.”—Aisaia 48:17, 18; Efesus 4:31, 32.
3
KOMPLEIN:
“Poroman marit bilong mi i no save mekim ol samting em i mas mekim.”
STIATOK BILONG BAIBEL:
“Yumi olgeta wan wan bai tokaut long God long as bilong ol samting yumi bin mekim.”—ROM 14:12.
Tru tumas, marit i no inap wok gut sapos wanpela poroman tasol i wok strong bilong helpim marit long i stap gut. Tasol marit bai i stap nogut moa sapos tupela wantaim i no wok strong na narapela i sutim tok long narapela.
Sapos yu tingting tasol long ol samting poroman marit bilong yu i mas mekim, yu no inap i stap amamas. Na moa yet dispela em i tru sapos yu tingim ol pasin kranki bilong poroman bilong yu na kisim olsem eskius na yu no mekim ol wok yu yet i mas mekim. Tasol sapos yu wok strong long stap gutpela man marit o meri marit, orait dispela bai helpim marit bilong yu long kamap strong moa. (1 Pita 3:1-3) Bikpela samting moa, yu kamapim klia long God olsem yu rispektim ol lo bilong marit, na pasin bilong yu bai mekim God i amamas tru.—1 Pita 2:19.
Samting sampela i bin mekim bilong bihainim dispela tok: Kim na man bilong em, ol i save sindaun long Korea, ol i marit inap 38 yia. Kim i tok: “Sampela taim man bilong mi i save kros long mi na em i no save toktok wantaim mi, na mi no save long as bilong en. Dispela i mekim na mi pilim olsem em i no laikim mi moa. Sampela taim mi bin tingting, ‘Bilong wanem em i laik mi mas pilim tingting bilong em, taim em yet i no save pilim tingting bilong mi?’ ”
Kim inap tingim tasol hevi i bin kamap na ol samting poroman bilong em i no save mekim. Tasol em i no mekim olsem. Kim i tok: “Mi no laik bel nogut i stap longpela taim. Mi kisim save olsem em i bikpela samting long mi yet i mas go pas long mekim ol samting bilong kamapim bel isi. Bihain, mitupela wantaim i stap bel isi na toktok gut wantaim.”—Jems 3:18.
4
KOMPLEIN:
“Meri bilong mi i no save daun long mi.”
STIATOK BILONG BAIBEL:
“Het bilong olgeta man em Krais.” —1 KORIN 11:3.
Sapos man marit i pilim olsem meri bilong em i no daun long em, pastaim em i mas skelim sapos em yet i daun long man i stap Het bilong em, em Jisas Krais. Man marit i ken soim olsem em i stap daun long Jisas long rot bilong bihainim pasin bilong Jisas.
Aposel Pol i tok: “Ol maritman, yupela i mas laikim yet ol meri bilong yupela olsem Krais tu i laikim kongrigesen na i givim em yet bilong helpim kongrigesen.” (Efesus 5:25) Jisas i no “strong tumas long bosim” ol disaipel bilong em. (Mak 10:42-44) Em i kolim klia ol tok bilong stiaim ol na em i stretim ol sapos i gat wok long mekim olsem. Tasol em i no mekim hatpela pasin. Em i mekim gutpela pasin long ol na em i save olsem ol i no inap mekim olgeta samting. (Matyu 11:29, 30; Mak 6:30, 31; 14:37, 38) Long olgeta taim em i putim laik bilong ol i go pas long laik bilong em yet.—Matyu 20:25-28.
Man marit i mas askim em yet olsem, ‘Olsem wanem? Mi strong tumas long bihainim pasin bilong ples long tingting mi gat long wok bos insait long famili na ol meri, winim pasin bilong bihainim ol tok bilong Baibel?’ Olsem, bai yu gat wanem tingting long wanpela meri husat i no wanbel long tingting bilong man bilong em, na long pasin rispek em i kamapim tingting bilong em? Baibel i stori long Sara, em meri bilong Abraham, olsem gutpela piksa long pasin bilong daun long man bilong em. (1 Pita 3:1, 6) Tasol em i kamapim tingting bilong em taim i gat wok long mekim, olsem long taim Abraham i no luksave long samting i laik bagarapim famili bilong em.—Stat 16:5; 21:9-12.
Yumi kisim save olsem Abraham i no mekim na Sara i pret nogut tru long kamapim tingting bilong em. Em i no man bilong mekim hatpela pasin. Olsem tasol, man marit husat i save bihainim ol tok bilong Baibel, em i no inap daunim meri bilong em na strong strong olsem meri i mas bihainim olgeta tok bilong em. Meri bai rispektim em sapos em i mekim wok bos long gutpela pasin sori.
Samting sampela i bin mekim bilong bihainim dispela tok: Jems, husat i save sindaun long Inglan na em i marit inap 8-pela yia, em i tok: “Mi wok long lain olsem mi mas kisim tingting bilong meri bilong mi paslain long mi mekim ol bikpela disisen. Mi no laik tingim mi yet tasol. Mi laik putim laik bilong meri bilong mi i go pas long laik bilong mi yet.”
George i sindaun long Amerika na em i marit inap 59 yia. Em i tok: “Mi no mekim pasin long meri bilong mi olsem em i samting nating, nogat, mi tingim em olsem em i gat save na em i gutpela poroman tru.”—Sindaun 31:10.
5
KOMPLEIN:
“Man bilong mi i no save go pas long mekim ol samting.”
STIATOK BILONG BAIBEL:
“Meri i gat gutpela tingting, em i save mekim gutpela wok long haus bilong en, na ol famili bilong en i wok long kamap strong. Tasol meri i no gat gutpela tingting, em yet i save bagarapim haus na famili bilong en.” —SINDAUN 14:1.
Sapos man bilong yu i no laik wokim ol disisen o go pas long lukautim famili, orait i gat 3-pela samting yu inap mekim. (1) Oltaim yu inap toktok long ol popaia bilong em o (2) yu inap kisim wok bilong em olsem het bilong famili o (3) yu ken tok amamas long em long sampela wok samting em i mekim pinis. Sapos yu mekim namba 1 na namba 2 samting, orait yu bai bagarapim famili bilong yu. Tasol sapos yu mekim namba 3 samting, orait yu bai helpim na strongim marit bilong yu.
Planti man i ting olsem pasin bilong meri long rispektim ol em i bikpela samting tru, winim pasin bilong meri long laikim ol. Olsem na sapos yu mekim na man bilong yu i pilim olsem yu rispektim em—kamapim olsem yu amamas na tingim tru pasin bilong em long wok strong long i go pas long famili—dispela bai helpim em long mekim gut moa wok bilong em. Tru, sampela taim bai yu no wanbel long samting man bilong yu i mekim. Yutupela i mas toktok wantaim long ol dispela samting. (Sindaun 18:13) Tasol tok yu mekim o krai bilong nek bilong yu inap bagarapim o mekim gut long marit bilong yu. (Sindaun 21:9; 27:15) Kamapim tingting bilong yu long pasin rispek na bai yu ken kisim samting yu gat laik long en—man marit husat i no surik long go pas long mekim ol samting.
Samting sampela i bin mekim bilong bihainim dispela tok: Michele, em i save sindaun long Amerika, na em i marit inap 30 yia, em i tok: “Mama wanpela i bin mekim bikpela long mi na ol susa bilong mi, na i no gat papa bilong helpim em, olsem na em i strongpela meri na em yet i save mekim ol disisen. Mi bihainim ol pasin bilong em. Olsem na long olgeta taim mi mas wok strong long daun long man bilong mi. Olsem, mi mas lain long kisim tingting bilong em paslain long mi wokim disisen.”
Rachel, em i sindaun long Australia na i marit long Mark inap 21 yia, em tu i larim samting i bin kamap insait long famili bilong em i stiaim pasin bilong em. Em i tok: “Mama bilong mi i no save daun long papa bilong mi, na ol i save tok pait planti taim na ol i no gat pasin rispek. Taim mi marit nupela, mi bihainim pasin bilong mama bilong mi. Tasol bihain, mi kisim save na bihainim ol gutpela tok bilong Baibel long pasin bilong soim rispek na dispela i helpim mi. Nau mi na Mark i stap amamas insait long marit bilong mipela.”
6
KOMPLEIN:
“Mi les pinis long ol pasin bilong poroman bilong mi em ol pasin i save sikirapim bel bilong mi.”
STIATOK BILONG BAIBEL:
“Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela.”—KOLOSI 3:13.
Taim yu kirap long prenim poroman bilong yu, ating yu tingim tasol ol gutpela pasin bilong em na yu no tingim tumas ol pasin kranki bilong em. Olsem wanem? Yu inap mekim wankain pasin long nau? Tru, sampela taim poroman bilong yu i mekim sampela pasin na bai i gat as na yu ken komplein long en. Tasol askim yu yet, ‘Mi laik tingim wanem pasin bilong poroman bilong mi—ol gutpela pasin o ol pasin nogut?’
Jisas i mekim wok long wanpela gutpela tok piksa i soim yumi olsem em i bikpela samting long yumi no ken tingim ol popaia bilong ol narapela. Em i tok: “Bilong wanem yu lukluk long liklik hap pipia i stap long ai bilong brata bilong yu, na yu no tingim bikpela plang i stap long ai bilong yu yet?” (Matyu 7:3) Ating dispela pipia em liklik hap gras tasol. Tasol dispela plang, em bikpela plang ol i save yusim long wokim bun bilong haus long holim strong rup. Jisas i laik kamapim wanem bikpela tok? “Pastaim rausim bikpela plang long ai bilong yu yet, na bai yu inap lukim gut olsem wanem yu bai rausim liklik hap pipia long ai bilong brata bilong yu.”—Matyu 7:5.
Paslain long dispela tok piksa, em i mekim wanpela strongpela tok lukaut olsem: “Yupela i mas lusim pasin bilong skelim ol arapela olsem jas, nogut ol i skelim yupela tu. Dispela skel yupela i skelim ol arapela long en olsem jas, long dispela wankain skel tasol ol bai skelim yupela tu.” (Matyu 7:1, 2) Sapos yu laik bai God i ken lusim ol rong bilong yu—olsem bikpela plang i stap long ai bilong yu—i gutpela yu lusim rong bilong poroman marit bilong yu.—Matyu 6:14, 15.
Samting sampela i bin mekim bilong bihainim dispela tok: Jenny, em i save sindaun long Inglan na i marit long Simon inap 9-pela yia, em i tok: “Mi luksave olsem planti taim samting i save sikirapim bel bilong mi em pasin bilong man bilong mi long mekim ol samting long las minit. Dispela em i narapela kain, long wanem, taim mipela i pren mi laikim pasin bilong em long kirap kwik long mekim ol samting. Tasol mi luksave olsem mi tu mi gat asua, mi save strong tumas long bosim ol samting. Mitupela Simon i lain long lusim tingting long ol liklik pasin kranki bilong mipela.”
Curt, man bilong Michele, em mipela i stori pinis long em, i tok: “Sapos yu wok long tingim tingim ol pasin kranki bilong poroman bilong yu, ol dispela pasin bai i go bikpela moa. Mi laik tingim ol gutpela pasin bilong Michele, em ol pasin i mekim na mi laikim em taim mipela i kirap pren wantaim.”
Rot Bilong i Stap Amamas
Ol dispela stori i kamapim klia olsem i gat ol hevi i save kamap insait long marit, tasol ol marit inap winim ol dispela hevi. Wanem samting inap helpim ol? Ol i mas kisim pasin bilong laikim tru God na bihainim ol tok bilong em long Baibel.
Alex na Itohan, husat i sindaun long Naijiria na ol i marit inap 20 yia, ol i kisim save long dispela rot bilong i stap amamas. Alex i tok: “Mi kisim save olsem ol marit inap stretim wanem wanem ol hevi i kamap insait long marit bilong ol sapos ol i bihainim ol stiatok bilong Baibel.” Meri bilong em i tok: “Mipela i kisim save olsem em i bikpela samting long beten wantaim long olgeta taim na bihainim tok bilong Baibel long mekim pasin laikim na isi long narapela. Nau mipela i no gat planti hevi olsem mipela i bin gat taim mipela i marit nupela.”
Olsem wanem? Yu laik kisim sampela save moa long olsem wanem tok bilong Baibel inap helpim famili bilong yu? Sapos olsem, askim ol Witnes Bilong Jehova long stori wantaim yu long ol tok bilong sapta 14 bilong buk Tru Tru Baibel i Tok Wanem?b
[Ol Futnot]
a Mipela i bin senisim sampela nem.
b Ol Witnes Bilong Jehova i wokim.
[Piksa long pes 4]
Yumi save lusim taim bilong stap wantaim poroman marit bilong yumi?
[Piksa long pes 5]
Mi tingim ol samting mi inap givim long poroman?
[Piksa long pes 6]
Mi save go pas long stretim ol hevi?
[Piksa long pes 7]
Mi save kisim tingting bilong meri bilong mi paslain long mi mekim wanpela disisen?
[Piksa long pes 9]
Mi save tingim ol gutpela pasin bilong poroman marit bilong mi?