Bilong Wanem Planti Marit i Bagarap?

“Ol Farisi i kam long [Jisas]. Ol i laik traim em na ol i tok: ‘Ating lo i orait long man i ken katim marit long olgeta kain samting o nogat?’ ”​—⁠Matyu 19:⁠3.

SAMPELA manmeri long taim bilong Jisas ol i ting olsem marit em i no samting bilong i stap oltaim. Jisas i tokim ol olsem: “Ating yupela i no ritim tok olsem man husat i bin wokim ol long pastaim tru, em i bin wokim ol i kamap man na meri? Na ating yupela i no bin ritim tok bilong em olsem: ‘Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi’? Tupela i no stap olsem tupela moa, ol i kamap wanpela bodi tasol. Olsem na samting God i pasim pinis, man i no ken katim.”a (Matyu 19:​4-6) Olsem na yumi ken save God i laik bai marit i stap inap oltaim.

Long planti kantri long nau, winim 40 pesen bilong ol marit i “katim” marit. Olsem wanem? Tok bilong Baibel long marit em bilong bipo tasol? Ol marit i bruk, long wanem, marit yet i no wanpela gutpela samting?

Tingim dispela tok piksa: Fopela marit i baim tupela kar i wankain. Tupela marit i lukautim na draivim gut kar. Kar bilong ol i no bagarap. Tasol tupela narapela marit, ol i no lusim taim na strong bilong lukautim gut kar bilong ol na ol i draivim nabaut nabaut. Kar bilong ol i bagarap na ol i lusim. Em asua bilong husat na namba tu kar i bagarap​—⁠asua bilong kar yet o asua bilong tupela papamama bilong kar? Yumi ken save em asua bilong papamama bilong kar.

Olsem tasol, maski planti marit i bruk, dispela i no makim olsem marit em i wanpela samting nogut, nogat. Planti milion marit i wok gut na dispela i kamapim ples klia olsem marit em i gutpela samting. Kain marit olsem i strongim na givim amamas long man na meri yet, long ol famili, na long ol komiuniti. Tasol wankain olsem kar, ol marit i mas lukautim gut marit bilong ol na oltaim mekim ol samting bilong helpim marit long i stap longpela taim.

Maski yu marit inap sampela de tasol o inap planti yia pinis, tok bilong Baibel long pasin bilong lukautim na strongim marit i save helpim gut ol marit. Long ol pes i kamap bihain long dispela i gat sampela stori yu ken skelim.

[Futnot]