Ol Witnes Bilong Jehova i Gat Wanem Tingting Long Divos?
Mipela i save bihainim tok Baibel i mekim long marit na divos. God i kamapim pasin bilong marit namel long man na meri na bai tupela i stap wantaim inap oltaim. Wanpela risen tasol em Baibel i kolim long ol marit i ken divos em pasin pamuk.—Matyu 19:5, 6, 9.
Ol Witnes i save helpim ol marit husat i gat hevi long marit bilong ol?
Yes, ol i mekim olsem long planti rot:
Ol buk na nius. Ol buk na nius em ol i save wokim planti taim inap strongim ol marit, dispela i makim tu ol marit we i luk olsem ol i gat hevi na i hatwok long stretim. Olsem, lukim ol atikol “Wok Long Mekim Ol Samting Bilong Strongim Marit Bilong Yu,” “Rot Bilong Fogivim Narapela,” na “Trastim Gen Poroman.”
Ol miting. Mipela i save stori long ol gutpela edvais bilong Baibel bilong helpim ol marit, mipela i mekim olsem long ol miting bilong ol kongrigesen na ol kibung.
Ol elda. Ol elda long kongrigesen i save helpim ol marit na kirapim ol long tingim tok i stap long ol skripsa olsem Efesus 5:22-25.
Ol elda bilong kongrigesen i mas tok orait long divos bilong wanpela Witnes?
Nogat. Em tru olsem ol elda bai helpim tupela marit long hau ol inap karim hevi insait long marit, tasol ol i no inap tokim ol long samting ol i mas mekim. (Galesia 6:5) Tasol sapos wanpela i laik divos long samting em Baibel i no kolim, orait Baibel i kamapim olsem em i no stap fri long maritim narapela man o meri.—1 Timoti 3:1, 5, 12.
Ol Witnes i gat wanem tingting long seperet?
Baibel i kirapim tupela marit long stap wantaim maski ol samting i kamap long marit bilong ol, em ol samting ol i no laikim. (1 Korin 7:10-16) Ol marit inap stretim planti hevi bilong ol sapos ol i givim bel long beten oltaim, wok strong long bihainim ol stiatok bilong Baibel, na soim pasin laikim.—1 Korin 13:4-8; Galesia 5:22.
Tasol taim ol kain bikpela hevi i kamap olsem i stap daunbilo, sampela Kristen i mekim disisen long seperet long poroman marit:
Poroman marit i no laik lukautim famili.—1 Timoti 5:8.
Paitim nogut tru poroman marit.—Buk Song 11:5.
Pasim tru poroman marit long lotuim God. Olsem, poroman marit i fosim poroman husat i Witnes long mekim samting i brukim lo bilong God, na poroman Witnes i luksave olsem seperet em wanpela rot tasol bilong “bihainim tok bilong God,“ na i no bilong ol man.—Aposel 5:29.